ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
first pageprevious pagedispage pageNumbernext pagelast page chage to ROMAN letter  
Atthakatha Book 1 : PALI ROMAN Vinaya.A. (samanta.1)

     Makkati vajjiputta ca .pe. Vuddhapabbajito migoti idam
kim. Ima vinitavatthunam bhagavata sayam vinicchitanam tesam tesam vatthunam
udanagatha nama tani vatthuni sukham vinayadhara ugganhissantiti
dhammasangahakattherehi thapita. Vatthugatha pana dharamaneyeva bhagavati
upalittherena thapita imina lakkhanena ayatim vinayadhara vinayam
vinicchinissantiti. Tasma ettha vuttalakkhanam sadhukam sallakkhetva
pathamasikkhapadam vinicchinitabbam. Dutiyadinanca vinitavatthusu
vuttalakkhanena dutiyadini. Vinitavatthuni hi sippikanam paticchannakarupani viya
vinayadharanam paticchannakavatthuni hontiti. {67} Tattha purimani dve vatthuni
anuppannattiyamyeva vuttatthani. Tatiye vatthumhi. Gihilingenati
gihivasena odatavattho hutva. Catutthe natthi kinci vattabbam.
Tato paresu sattasu. Kusaciranti kuse ganthitva kataciram.
Vakaciranti tapasanam vakkalam. Phalakacirannama phalakasanthanani
phalakani sibbetva kataciram. Kesakambaloti kesehi tante
vayitva katakambalo. Valakambaloti camarivalehi vayitva
katakambalo. Ulakapakkhanti alakasakunassa pakkhehi katanivasanam.
Ajinakkhipanti salomam sakhuram ajinamigacammam. Dvadasame vatthumhi.
Sarattoti kayasamsaggaragena saratto. Tam ragam natva bhagava
apatti sanghadisesassati aha. {68} Terasame vatthumhi.
Uppalavannati sa theri savatthiyam setthidhita satasahassakappe
abhiniharasampanna. Tassa pakatiyapi atidassaniya niluppalavanna
kayacchavi. Abbhantare pana kilesasantapassa abhavena ativiya
virocati. Sa tayeva vannapokkharataya uppalavannati namam
labhati. Patibaddhacittoti gihikalato patthaya rattacitto. So
kira tassa natidarako hoti. Athakhoti anantaratthe nipato.
Mancake nisinnanantaramevati vuttam hoti. Diva bahirato agantva
dvaram pidhaya nisinnanam hi andhakaram hoti. So yavassa tam
andhakaram na nassati tavadeva evamakasiti attho. Dusesiti
paddhamsesi. Theri pana anavajja attano samanasannam paccupatthapetva
asadiyanti nisidi asaddhammadhippayena paramattha
aggikkhandhasilathambhakhadirasarakhanuka viya. Sopi attano manoratham puretva
gato. Tassa theriya dassanapatham vijahantasseva ayam mahapathavi
sinerupabbatam dharetum samatthapi tam papapurisam byamamattakalevaram
dharetum asakkonti viya bhijjitva vivaramadasi. So tamkhanamyeva
avicijalanam indanabhavam agamasi. Bhagava tam sutva anapatti
bhikkhave asadiyantiyati vatva therim sandhaya dhammapade imam
gathamabhasi
          Vari pokkharapatteva       araggeriva sasapo
          yo na lippati kamesu      tamaham brumi brahmananti.
     {69} Cuddasame vatthumhi. Itthilingam patubhutanti rattibhage niddam
okkamantassa purisasanthanam massudadhikadi sabbam antarahitam
itthisanthanam uppannam. Tanneva upajjham tam upasampadanti
pubbe gahitaupajjhameva pubbe kataupasampadameva anujanami.
Puna upajjha na gahetabba upasampada na databbati attho.
Tani vassaniti bhikkhupasampadato pabhuti ya vassaganana tamyeva
vassagananam anujanami. Na ito patthaya vassaganana katabbati
attho. Bhikkhunihi sankamitunti bhikkhunihi cassa saddhim sankamitum
sangantum samangibhavitum anujanamiti attho. Idam vuttam hoti
apatirupam danissa bhikkhunam majjhe vasitum bhikkhuniupassayam gantva
bhikkhunihi saddhim vasatuti. Ya apattiyo bhikkhunam bhikkhunihi
sadharanati ya desanagaminiyo va vutthanagaminiyo va apattiyo
bhikkhunam bhikkhunihi saddhim sadharana. Ta apattiyo bhikkhuninam
santike vutthatunti ta sabbapi bhikkhunihi katabbam vinayakammam
katva bhikkhuninam santike vutthatum anujanamiti attho. Tahi
apattihi anapattiti ya pana bhikkhunam bhikkhunihi asadharana
sukkavisatthiadika apattiyo tahi anapatti lingaparivattena
ta apattiyo vutthitava honti. Puna pakatilinge uppannepi
tahi apattihi tassa anapattiyevati. Ayantavettha palivinicchayo.
     Ayampana palimutto okkantikavinicchayo. Imesu tava
dvisu lingesu purisalingam uttamam itthilingam hinam tasma purisalingam
balavaakusalena antaradhayati itthilingam dubbalakusalena patitthati.
Itthilingam pana antaradhayantam dubbalaakusalena antaradhayati purisalingam
balavakusalena patitthati. Evam ubhayampi akusalena antaradhayati
kusalena patilabbhati. Tattha sace dvinnam bhikkhunam ekato sajjhayam
va dhammasakaccham va katva ekagare nipajjitva niddam okkantanam
ekassa itthilingam patubhavati ubhinnampi sahaseyyapatti hoti.
So ce bujjhitva attano tam vippakaram disva dukkhi dummano
rattibhageyeva itarassa aroceyya tena samassasetabbo hotu
ma cintayittha vattasseveso doso sammasambuddhena dvaram dinnam
bhikkhu va hotu bhikkhuni va anavato dhammo avarito
saggamaggoti. Samassasetva ca evam vattabbam tumhehi bhikkhuniupassayam
gantum vattati atthi vo kaci sandittha bhikkhuniyoti. Sacassa
honti tadisa bhikkhuniyo atthiti no ce honti natthiti
vatva so bhikkhu vattabbo mama sangaham karotha idaniyeva
mam bhikkhuniupassayam nethati. Tena bhikkhuna tam gahetva tassa
va sanditthanam attano va sanditthanam bhikkhuninam santikam gantabbam.
Gacchantena ca ekena na gantabbam catuhi pancahi bhikkhuhi saddhim
jotakanca kattarayatthinca gahetva samvidahanam parimocetva mayam
amukannamatthanam gacchamati gantabbam. Sace bahigame dure viharo
Hoti antaramagge gamantaranadipararattivippavasaganaohiyanapattihi
anapatti. Bhikkhuniupassayam gantva ta bhikkhuniyo vattabba
asukannama bhikkhum ajanathati. Ama ayyati. Tassa itthilingam
patubhutam sangaham danissa karothati. Ta ce sadhu ayya
idani mayampi sajjhayissama dhammam sossama gacchatha tumheti
vatva sangaham karonti aradhika ca honti sangahika
lajjiniyo ta kopetva annattha na gantabbam. Gacchati ce
gamantaranadipararattivippavasaganaohiyanapattihi na muccati. Sace pana
lajjiniyo honti na sangahikayo annattha gantum labbhati.
Sacepi alajjiniyo honti sangaham pana karonti tapi pariccajitva
annattha gantum labbhati. Sace lajjiniyo ca sangahika ca
natika na honti asannagame pana anna natika honti
patijagginika tasampi santikam gantum vattatiti vadanti. Gantva
sace bhikkhubhavepi nissayapatipanno patirupaya bhikakhuniya santike
nissayo gahetabbo. Matika va vinayo va uggahito suggahito
puna uggahanakaranam natthi. Sace bhikkhubhave parisavacaro tassa
santikeyeva upasampanna supasampanna annassa santike nissayo
gahetabbo. Pubbe tam nissaya vasantehipi annassa santike
nissayo gahetabbo. Paripunnavassasamanerenapi annassa santike
upajjha gahetabba. Yam panassa bhikkhubhave adhitthitam ticivaranca
patto ca tam adhitthanam vijahati puna adhitthatabbam. Sankaccika ca
Udakasatika ca gahetabba. Yam atirekacivaram va atirekapatto va
vinayakammam katva thapito hoti tam sabbampi vinayakammam vijahati
puna katabbam. Patiggahitatelamadhuphanitadinipi patiggahanam vijahanti.
Sace patiggahanato sattame divase lingam parivattati puna patiggahetva
sattaham vattati. Yam pana bhikkhukale annassa bhikkhuno santakam
patiggahitam tam patiggahanam na vijahati. Yampi ubhinnam sadharanam
avibhajitva thapitam tam pakatatto rakkhati. Yam pana vibhattam
etasseva santakam tam patiggahanam vijahati. Vuttampi cetam
parivare
              telamadhuphanitam vapi sappim
              samam gahetvana nikkhipeyya avitivatte
              sattahe sati paccaye paribhunjantassa apatti
              panhamesa kusalehi cintitati.
Idam hi lingaparivattam sandhaya vuttam. Patiggahanam nama
lingaparivattena kalakiriyaya sikkhapaccakkhanena hinayavattanena
anupasampannassa danena anapekkhavissajjanena acchinditva gahena ca
vijahati. Tasma sacepi haritakakhandampi patiggahetva thapitamatthi
sabbamassa patiggahanam vijahati. Bhikkhuvihare pana yankincissa
santakam patiggahetva va apatiggahetva va thapitam sabbassa
sava issara aharapetva gahetabbam. Yam panettha thavaram tassa
santakam senasanam va uparopaka va te yassicchati tassa
Databba. Terasasu sammatisu ya bhikkhukale laddha sammati sabba
patippassambhati. Purimikaya senasanaggaho patippassambhati.
Sace pacchimikaya senasane gahite lingam parivattati bhikkhusangho
cassa uppannam labham datukamo hoti apaloketva databbo.
Sace bhikkhunihi sadharanaya paticchannaya apattiya parivasantassa
lingam parivattati pakkhamanattameva databbam. Sace manattam
carantassa parivattati puna pakkhamanattameva databbam. Sace
cinnamanattassa parivattati bhikkhunihi abbhanakammam katabbam.
Sace akusalavipake parikkhine pakkhamanattakale punareva lingam
parivattati charattam manattameva databbam. Sace cinne
pakkhamanatte parivattati bhikkhuhi abbhanakammam katabbanti.
     Anantare bhikkhuniya lingaparivattanavatthumhi idha vuttanayeneva
sabbo vinicchayo veditabbo. Ayam pana viseso. Sacepi
bhikkhunikale apanna sancarittapatti paticchanna hoti parivasadanam
natthi charattam manattameva databbam. Sace pakkhamanattam carantiya
lingam parivattati na tenattho charattam manattameva databbam.
Sace cinnamanattaya parivattati puna manattam adatva bhikkhuhi
abbhetabbo. Atha bhikkhuhi manatte adinne puna lingam parivattati
bhikkhunihi pakkhamanattameva databbam. Atha charattam manattam carantassa
puna parivattati pakkhamanattameva databbam. Cinnamanattassa
pana lingaparivatte jate bhikkhunihi abbhanakammam katabbam.
Puna parivatte ca linge bhikkhunibhave thitayapi ya apattiyo
pubbe patippassaddha ta supatippassaddhaevati. {70} Ito parani
matuya methunam dhammantiadini cattari vatthuni uttanatthaniyeva.
     {71} Mudupitthivatthumhi. So kira bhikkhu natapubbako tassa sippakosallattham
parikammakata pitthi muduka ahosi. Tasma evam katum asakki.
Lambivatthumhi. Tassa bhikkhussa angajatam digham hoti tasma
lambiti vutto. Ito parani dve vanavatthuni uttanatthaneva.
Lepacittavatthumhi lepacittannama cittakammarupam. Darudhitalikavatthumhi
darudhitalika nama kattharupam. Yatha ca imesu dvisu evam annesupi
dantarupapotthakarupaloharupadisu anupadinnakesu itthirupesu nimitte
methunaragena upakkamantassa asuci muccatu va ma va dukkatameva.
Kayasamsaggaragena upakkamantassapi tatheva dukkatam. Mocanaragena
pana upakkamantassa mutte sanghadiseso amutte thullaccayanti.
     {72} Sundaravatthumhi. Ayam sundaro nama rajagahe kuladarako saddhaya
pabbajito attabhavassa abhirupataya sundaroti namam labhi. Tam
rathiya gacchantam disva samuppannacchandaraga sa itthi imam vippakaram
akasi. Thero pana anagami tasma so na sadiyi. Annesam
pana avisayo eso. Ito paresu catusu vatthusu te bhikkhu
jala dummedha matugamassa vacanam gahetva tatha katva paccha
kukkuccayimsu. {73} Akkhayitadini tini vatthuni uttanatthaneva. Dvisu
chinnasisavatthusu ayam vinicchayo. Vattakate mukheti vivate. Angajatam
Pavesento sace hettha va upari va ubhayapassehi va chupantam
paveseti parajikam. Catuhi passehi acchupantam pavesetva
abbhantare talukam chupati parajikameva. Cattari passani talukanca
acchupanto akasagatameva katva paveseti ca niharati ca dukkatam.
Yadi pana danta suphussita antomukhe okaso natthi danta ca
bahi otthamamsena paticchanna tattha vatena asamphuttham allokasam
tilaphalamattampi pavesentassa parajikameva. Uppatite pana otthamamse
danteyeva upakkamantassa thullaccayam. Yopi danto bahi nikkhamitva
titthati na sakka otthehi pidahitum tattha upakkamantepi
bahinikkhantajivhaya upakkamantepi thullaccayameva. Jivamanasarirepi
bahinikkhantajivhaya thullaccayameva. Yadi pana bahijivhaya palivethetva
antomukham pavesayati parajikameva. Uparigivaya chinnasisassapi
adhobhagena angajatam pavesetva talukam chupantassa parajikameva.
Atthikavatthumhi. Susanam gacchantassapi dukkatam. Atthikani
sankaddhantassapi santhapentassapi nimitte methunaragena
upakkamantassapi kayasamsaggaragena upakkamantassapi asuci muccatu va
ma va dukkatameva. Mocanaragena pana upakkamantassa muccante
sanghadiseso amuccante thullaccayam. Nagivatthumhi. Nagamanavika va
hotu kinnariadinam va annatara sabbattha parajikam. Yakkhivatthumhi
sabbapi devata yakkhieva. Petivatthumhi. Nijjhamatanhikadipetiyo
alliyitumpi na sakka. Vimanapetiyo pana atthi yasam kalapakkhe akusalam
Vipaccati junhapakkhe devata viya sampattim anubhonti. Evarupaya
petiya va yakkhiya va sace dassanaggahanaamasanaphusanaghattanani
pannayanti parajikam. Athapi dassanam natthi itarani
pannayanti parajikameva. Atha va dassanaggahanani na pannayanti
amasanaphusanaghattanehi pannayamanehi tam puggalam visannam katva
attano manoratham puretva gacchati ayam avisayo nama tasma
ettha avisayatta anapatti. Pandakavatthu pakatameva.
Upahatindriyavatthumhi. Upahatindriyoti upahatakayappasado
khanukhandamiva sukham va dukkham va na vediyati. Avediyantassapi
sevanacittavasena apatti. Chupitamattavatthusmim. Yo methunadhammam
patisevissamiti matugamam ganhitva methune virajjitva vipatisari
hoti dukkatamevassa hoti. Methunadhammassa hi pubbappayoga
hatthaggahadayo yava sisam na papunati tava dukkate titthanti
sise sampatte parajikam hoti. Pathamaparajikassa hi dukkatameva
samantam. Itaresam tinnam thullaccayam. Ayam pana bhikkhu methunadhamme
virajjitva kayasamsaggam sadiyiti veditabbo. Tenaha bhagava apatti
sanghadisesassati. {74} Bhaddiyavatthumhi. Bhaddiyam nama nagaram. Jatiya
vanam nama jatipupphagumbanam ussannataya evam laddhanamam. Tam tassa
nagarassa upacare vanam. So tattha nipanno tena vatupatthambhena
mahaniddam okkami. Ekarasam bhavangameva vattati. Kilinnam
passitvati asucikilittham passitva. {75} Ito parani sadiyanapatisamyuttani
Cattari vatthuni ajananavatthu cati panca uttanatthaneva. {76} Dvisu
asadiyanavatthusu. Sahasa vutthasiti asivisena dattho viya
aggina daddho viya ca turitam vutthasi. Akkamitva pavattesiti
appamatto bhikkhu araddhavipassako upatthitassati khippam vutthahantova
akkamitva bhumiyam pavattento lolento patesi.
Puthujjanakalyanakehi evarupesu thanesu cittam rakkhitabbam. Ayanca
tesam annataro sangamasisayodho bhikkhu. {77} Dvaram vivaritva
nipannavatthumhi. Diva patisalliyantenati diva nipajjantena. Dvaram
samvaritva patisalliyitunti dvaram pidahitva nipajjitum. Ettha
ca kincapi paliyam ayannama apattiti na vutta vivaritva
nippannadosena pana uppanne vatthusmim anujanami bhikkhave diva
.pe. Patisalliyitunti vuttatta dvaram asamvaritva patisalliyantassa
dukkatam vuttam. Bhagavato hi adhippayam natva upalittheradihi
atthakatha thapita. Atthapatti diva apajjati no rattinti
iminapi cetam siddham.
     Kidisam pana dvaram samvaritabbam kidisam na samvaritabbam.
Rukkhapadaravelupadarakilanjapannadinam yena kenaci kavatam katva hettha
udukkhale upari uttarapasake ca pavesetva katam parivattakadvarameva
samvaritabbam. Annam gorupanam vajjesu rukkhasucikantakadvaram game
gamatthakanakam cakkalakayuttadvaram phalakesu va kitikasu va dve tini
cakkalakani yojetva katam samsaranakitikadvaram apanesu viya katam
Ugghatanakitikadvaram dvisu tisu thanesu venusalaka gopetva
pannakutisu katam salakahatthakadvaram dussasanidvaranti evarupam dvaram
na samvaritabbam. Pattahatthassa kavatappanamane pana ekam
dussasanidvarameva anapattikaram. Avasesani panamentassa apatti.
Diva patisalliyantassa pana parivattakadvarameva apattikaram. Sesani
samvaritva va asamvaritva va nipajjantassa apatti natthi.
Samvaritva pana nipajjitabbam. Etam vattam. Parivattakadvaram pana
kittakena samvutam hoti. Sucighatikasu dinnasu susamvutameva hoti.
Apica kho sucimattepi dinne vattati ghatikamattepi dinne vattati
dvarabaham phusetva pidahitamattepi vattati isakam aphusitepi vattati
sabbantimena vidhina yavata sisam nappavisati tavata aphusitepi
vattatiti. Sace bahunam valanjanatthanam hoti bhikkhum va samaneram va
dvaram avuso jaggahiti vatvapi nippajjitum vattati. Atha bhikkhu
civarakammam va annam va kinci karonta nisinna honti etam dvaram
jaggissantiti abhogam katvapi nipajjitum vattati. Kurundatthakathayam
pana upasakampi apucchitva esa jaggissatiti abhogam katva va
nipajjitum vattati kevalam bhikkhunim va matugamam va apucchitum na
vattatiti vuttam. Atha dvarassa udukkhalam va uttarapasako va
bhinno hoti atthapito va samvaritum na sakkoti navakammattham
va pana itthakapunjo va mattikadinam va rasi antodvare kato
hoti attam va bandhanti yatha samvaritum na sakkati 1- evarupe
@Footnote: 1. sakkotitipi.
Antaraye asamvaritvapi nipajjitum vattati. Yadi pana kavatam natthi
laddhakappameva. Upari sayantena nissenim aropetva nipajjitabbam.
Sace nissenimatthake thakanakam hoti thaketva nipajjitabbam. Gabbhe
nipajjantena gabbhadvaram va pamukhadvaram va yamkinci samvaritva
nipajjitum vattati. Sace ekakuddake gehe dvisu passesu dvarani
katva valanjenti dvepi dvarani jaggitabbani. Tibhumikepi
pasade dvaram jaggitabbameva. Sace bhikkhacara patikkamma
lohapasadasadisam pasadam bahu bhikkhu divaviharattham pavisanti
sanghattherena dvarapalassa dvaram jaggahiti vatva va dvarajagganam
etassa bharoti abhogam katva va pavisitva nipajjitabbam.
Yava sanghanavakena evameva katabbam. Pure pavisantanam dvarajagganam
nama pacchimanam bharoti evam abhogam katumpi vattati.
Anapuccha va abhogam va akatva antogabbhe va asamvutadvare
bahi va nipajjantanam apatti. Gabbhe va bahi va nipajjanakalepi
dvarajagganam nama mahadvare dvarapalassa bharoti abhogam katva
nipajjitum vattatiyeva. Lohapasadadisu akasatale nipajjantenapi
dvaram samvaritabbameva. Ayam hettha sankhepo. Idam diva
patisalliyanam yena kenaci parikkhitte sadvarabandhatthane kathitam.
Tasma abbhokase va rukkhamule va mandape va yatthakatthaci
sadvarabandhe nipajjantena dvaram samvaritvava nipajjitabbam. Sace
mahaparivenam hoti mahabodhianganalohapasadaanganasadisam bahunam
Otaranatthanam yattha dvaram samvutampi samvutatthane na titthati
dvaram alabhanta pakaram abhiruhitvapi vicaranti tattha  samvaranakiccam
natthi. Rattim dvaram vivaritva nipanno arune uggate utthahati
anapatti. Sace pana pabujjhitva puna supati apatti. Yo
pana arune uggate vutthahissamiti paricchinditvava dvaram
asamvaritva rattim nipajjati yathaparicchedameva vutthati tassa
apattiyeva. Mahapaccariyam pana evam nipajjanto anadariyadukkata
na muccatiti vuttam. Yo pana bahumeva rattim jaggitva addhanam
va gantva diva kilantarupo mance nisinno pade bhumito
amocetvava niddavasena nipajjati tassa anapatti. Sace
okkantaniddo ajanantopi pade mancakam aropeti apattiyeva.
Nisiditva apassaya supantassa anapatti. Yopica niddam
vinodessamiti cankamanto patitva sahasa vutthati tassapi anapatti.
Yo pana patitva tattheva sayati na vutthati tassa apatti.
Ko muccati ko na muccatiti. Mahapaccariyam tava ekabhangena
nipannakoeva muccati pade pana bhumito mocetva nipanno
yakkhagahitakopi visannibhutopi na muccatiti vuttam. Kurundatthakathayam
bandhitva nipajjapitova muccatiti vuttam. Mahaatthakathayam pana
yo cankamanto mucchitva patito tattheva supati tassapi avasatta
apatti na dissati acariya pana na kathayanti tasma apattiyevati
mahapadumattherena vuttam. Dve pana jana apattito
Muccantiyeva yo ca yakkhagahitako yo ca bandhitva nipajjapitoti.
     {78} Bharukacchavatthumhi. Anapatti supinantenati yasma supinante
avisayatta evam hoti tasma upalitthero bhagavata avinicchitapubbampi
imam vatthum nayaggahena vinicchini. Bhagavapi ca sutva
sukathitam bhikkhave upalina apade padam karonto viya akase
padam dassento viya upali imam panham kathesiti vatva theram etadagge
thapesi etadaggam bhikkhave mama savakanam bhikkhunam vinayadharanam
yadidam upaliti. Ito parani supavasadini 1- uttanatthaneva.
     {80} Bhikkhunisampayojanadisu. Te licchavikumaraka khiddapasuta attano
anacarena evam akamsu. Tato patthaya licchavinam vinaso evam
udapadi. {82} Vuddhapabbajitavatthumhi. Dassanam agamasiti anukampaya
tam dakkhissamiti geham agamasiti. Athassa sa attano ca
darakananca nanappakarehi anathabhavam samvannesi anapekkhanca
nam natva kupita ehi vibbhamahiti balakkarena aggahesi. So
attanam mocetum patikkamanto jaradubbalataya attano paripati.
Tato sa attano manam akasi. So pana bhikkhu anagami
samucchinnakamarago tasma na sadiyiti. {83} Migapotakavatthu
uttanatthamevati.
     Samantapasadikaya vinayasamvannanaya pathamaparajikavannana
nitthita.
@Footnote: 1. supabbadiniti bhaveyya tena kho pana samayena rajagahe supabba nama upasikati
@vuttatta.
        Tatridam samantapasadikaya samantapasadikatasmim
        acariyaparamparato nidanavatthuppabhedadipanato
        parasamayavisajjanato sakasamayavisuddhito ceva
        byanjanaparisodhanato padatthato paliyojanakkamato
        sikkhapadavinicchayato vibhanganayabhedadassanato
        sampassatam na dissati kinci apasadikam yato ettha
        vinnunamayam tasma samantapasadikatveva
        samvannana pavatta vinayassa vinayadamanakusalena
        vuttassa lokanathena lokanukampamanenati.
                      -----------



             The Pali Atthakatha in Roman Book 1 page 326-341. http://84000.org/tipitaka/atthapali/read_rm.php?B=1&A=6863&modeTY=2              อรรถกถาบาลีอักษรไทย :- http://84000.org/tipitaka/atthapali/read_th.php?B=1&A=6863&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=1&i=48              เนื้อความพระไตรปิฎกฉบับหลวง :- http://84000.org/tipitaka/read/r.php?B=1&A=5569              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=1&A=1192              The Pali Tipitaka in Roman Character :- http://84000.org/tipitaka/read/roman_read.php?B=1&A=1192              Contents of The Tipitaka Volume 1 http://84000.org/tipitaka/read/?index_1

first pageprevious pagedispage pageNumbernext pagelast page chage to ROMAN letter

บันทึก ๖ กุมภาพันธ์ พ.ศ. ๒๕๖๑. การแสดงผลนี้อ้างอิงข้อมูลจากอรรถกถาฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]