AtthaPali Vol.11

2. Nāgasuttavaṇṇanā ^*- [138] Dutiye rattandhakāratimisāyanti rattiṃ ^1- andhabhāvakaraṇe ^2- mahātame caturaṅgatamasi. Ajjhokāse nisinno hotīti gandhakuṭito nikkhamitvā caṅkamakoṭiyaṃ pāsāṇaphalake mahācīvaraṃ sīse ṭhapetvā padhānaṃ pariggaṇhamāno nisinno hoti. Nanu ca tathāgatassa abhāvito vā maggo appahīnā vā kilesā appaṭividdhaṃ vā akuppaṃ asacchikato vā nirodho natthi, kasmā evamakāsīti? anāgate kulaputtānaṃ aṅkusatthaṃ. "anāgate ^3- kulaputtā mayā gatamaggaṃ āvajjitvā ajjhokāse vāsaṃ vasitabbaṃ maññamānā padhānakammaṃ karissantī"ti sampassamāno satthā evamakāsi. Mahāti mahanto. Ariṭṭhakoti kāḷako. Maṇīti pāsāṇo. Evamassa sīsaṃ hotīti evaṃ ^4- tassa kāḷavaṇṇakūṭāgārappamāṇamahāpāsāṇasadisaṃ sīsaṃ hoti. Subhāsubhanti dīghamaddhānaṃ saṃsaranto sundarāsundaraṃ vaṇṇaṃ katvā āgatosīti vadati. Athavā saṃsaranti saṃsaranto āgacchanto. Dīghamaddhānanti vasavattiṭṭhānato yāva uruvelāya ^5- dīghamaggaṃ, pure bodhiyā ca ^6- chabbassāni dukkarakārikasamayasaṅkhātaṃ dīghakālaṃ. Vaṇṇaṃ katvā subhāsubhanti sundarañca asundarañca nānappakāraṃ vaṇṇaṃ katvā anekavāraṃ mama santikaṃ āgatosīti attho. So kira vaṇṇo nāma natthi, yena vaṇṇena māro vibhiṃsakatthāya ^7- bhagavato santikaṃ na āgatapubbo. Tena naṃ bhagavā evamāha. Alante tenāti alaṃ tuyhaṃ etena māravibhiṃsakadassanabyāpārena. Dutiyaṃ. @Footnote: ¹ Sī., i. ratti ² cha.Ma. andhabhāvakārake ³ cha.Ma. anāgatehi @⁴ cha.Ma., i. evarūpaṃ ⁵ Ma. uruvelā ⁶ cha.Ma., i. vā @⁷ i. vihiṃsakatthāya ^* cha.Ma. hatthirājavaṇṇasuttavaṇṇanā

The Pali Atthakatha in Roman Book 11 page 162. http://84000.org/tipitaka/atthapali/read_rm.php?B=11&A=4230 อรรถกถาบาลีอักษรไทย :- http://84000.org/tipitaka/atthapali/read_th.php?B=11&A=4230 อ่านอรรถกถาแปลไทย :- http://84000.org/tipitaka/attha/attha.php?b=15&i=419 เนื้อความพระไตรปิฎกฉบับหลวง :- http://84000.org/tipitaka/read/r.php?B=15&A=3329 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=15&A=2928 The Pali Tipitaka in Roman Character :- http://84000.org/tipitaka/read/roman_read.php?B=15&A=2928 Contents of The Tipitaka Volume 15 http://84000.org/tipitaka/read/?index_15