AtthaPali Vol.12

10. Paccayasuttavannana [20] Dasame paticcasamuppadanca vo bhikkhave desessami paticcasamuppanne ca dhammeti sattha imasmim sutte paccaye ca paccayanibbatte ca sabhavadhamme desessamiti ubhayam arabhi. Uppada va tathagatananti tathagatanam uppadepi, buddhesu uppannesupi anuppannesupi jatipaccaya jaramaranam, jatiyeva jaramaranassa paccayo. Thitava sa dhatuti thitova so paccayasabhavo, na kadaci jati jaramaranassa paccayo na hoti. Dhammatthitata dhammaniyamatati imehipi dvihi paccayameva katheti. Paccayena hi paccayuppanna dhamma titthanti, tasma paccayova "dhammatthitata"ti vuccati. Paccayo dhamme niyameti, tasma "dhammaniyamata"ti vuccati. Idappaccayatati imesam jaramaranadinam paccaya idappaccaya idappaccayava idappaccayata. Tanti tam paccayam. Abhisambujjhatiti nanena abhisambujjhati. Abhisametiti tam ^1- nanena abhisamagacchati. Acikkhatiti katheti. Desetiti desayati. ^2- Pannapetiti janapeti. Patthapetiti nanamukhe thapeti. Vivaratiti vivaritva dasseti. Vibhajatiti vibhagato dasseti. Uttanikarotiti pakatam karoti. Passathati cahati passatha ativadati. ^3- Kinti? jatipaccaya bhikkhave jaramaranantiadi. Iti kho bhikkhaveti evam kho bhikkhave. Ya tatrati ya tesu "jatipaccaya jaramaranan"tiadisu. Tathatatiadini paccayakarasseva vevacanani. So tehi tehi paccayehi anunadhikeheva tassa tassa dhammassa sambhavato tathatati, samaggim upagatesu @Footnote: ¹ cha.Ma. ayam patho na dissati ² cha.Ma.,i. dasseti ³ cha.Ma. iti ca vadati Paccayesu muhuttampi tato nibbattanibbattanam dhammanam ^1- asambhavabhavato avitathatati, annadhammapaccayehi annadhammanuppattito anannathatati, jaramaranadinam paccayato va paccayasamuhato va idappaccayatati vutto. Tatrayam vacanattho:- imesam paccaya idappaccaya, idappaccaya eva idappaccayata, idappaccayanam va samuho idappaccayata. Lakkhanam panettha saddasatthato veditabbam. Aniccanti hutva abhavatthena aniccam. Ettha ca aniccanti na jaramaranam aniccam, aniccasabhavanam pana khandhanam jaramaranatta aniccam nama jatam. Sankhatadisupi eseva nayo. Ettha ca sankhatanti paccayehi samagantva katam. Paticcasamuppannanti paccaye nissaya uppannam. Khayadhammanti khayasabhavam. Vayadhammanti vigacchanakasabhavam. Viragadhammanti virujjhanakasabhavam. ^2- Nirodhadhammanti nirujjhanakasabhavam. Jatiyapi vuttanayeneva aniccata veditabba. Janakapaccayanam va kiccanubhavalakkhane ^3- ditthatta ^4- ekena pariyayenanettha aniccatiadini yujjantiyeva. Bhavadayo aniccadisabhava. ^5- Sammappannayati ^6- savipassanaya maggapannaya. Pubbantanti purimam atikkantam. ^7- Ahosim nu khotiadisu "ahosim nu kho nanu kho"ti sassatakaranca adhiccasamuppattiakaranca nissaya atite attano vijjamanatanca avijjamanatanca kankhati. Kim karananti na vattabbam, ummattako viya balaputhujjano yatha va tatha va pavattati. Kim nu kho ahosinti jatilingupapattiyo nissaya "khattiyo nu kho ahosim brahmanavessasuddagahatthapabbajitadevamanussanam annataro"ti kankhati. Katham nu khoti @Footnote: ¹ Si. nibbattanadhammanam, cha.Ma.,i. nibbattanam dhammanam @² cha.Ma., i. virajjanakasabhavam ³ cha.Ma.,i. kiccanubhavakkhane @⁴ Si.,i. nidditthatta ⁵ cha.Ma. aniccadisabhavayeva @⁶ Si.,i. pannayati ⁷ cha.Ma. atitanti attho Santhanakaram nissaya "digho nu kho ahosim rassaodatakanhapamanikadinam annataro"ti kankhati. Keci pana "issaranimmanadini nissaya `kena nu kho karanena ahosin'ti hetuto ^1- kankhati"ti vadanti. Kim hutva kim ahosinti jatiadini nissaya "khattiyo hutva nu kho brahmano ahosim .pe. Devo hutva manusso"ti attano param param kankhati. Sabbattheva pana addhananti kaladhivacanametam. Aparantanti anagatam antam. Bhavissami nu kho nanu khoti sassatakaranca ucchedakaranca nissaya anagate attano vijjamanatanca avijjamanatanca kankhati. Sesam panettha ^2- vuttanayameva. Etarahi va paccuppannam addhananti idani va patisandhimadim katva cutipariyantam sabbampi vattamanakalam gahetva. Ajjhattam kathamkathi bhavissatiti attano khandhesu vicikicchi bhavissati. Aham nu khosmiti attano atthibhavam kankhati. Yuttam panetanti? yuttam ayuttanti ka ettha cinta. Apicettha idam vatthumpi udaharanti:- culamataya kira putto mundo, mahamataya putto amundo, tam puttam mundesum, so utthaya "aham nu kho culamataya putto"ti cintesi. Evam "aham nu khosmi"ti kankha hoti. No nu khosmiti attano natthibhavam kankhati. Tatrapi idam vatthu:- eko kira macche ganhanto udake ciratthanena sitibhutam attano urum macchoti cintetva pahari. Aparo susanapasse khettam rakkhanto bhito sankutito ^3- sayi, so patibujjhitva attano jannukani dve yakkhati cintetva pahari. Evam no nu khosmiti kankha hoti. ^4- Kim nu khosmiti khattiyova samano attano khattiyabhavam kankhati. Esa nayo sesesu. ^5- Devo pana samano devabhavam ajananto nama natthi, sopi pana @Footnote: ¹ Ma. hetum ² cha.Ma.,i. sesamettha @³ Si. sankucito ⁴ cha.Ma.,i. kankhati @⁵ cha.Ma., i. sesesupi "aham rupi nu kho arupi nu kho"tiadina nayena kankhati. Khattiyadayo kasma na janantiti ce. Apaccakkha tesam tattha tattha kule uppatti. Gahatthapi ca potalakadayo ^1- pabbajitasannino, pabbajitapi "kuppam nu kho me kamman"tiadina nayena gahatthasannino, manussapi ca rajano viya attano ^2- devasannino honti. Katham nu khosmiti vuttanayameva. Kevalam hettha abbhantare jivo nama atthiti gahetva tassa santhanakaram nissaya "digho nu khosmi rassacaturassachalamsaatthamsasolasamsadinam ananatarassakaro"ti ^3- kankhanto katham nu khosmiti kankhatiti veditabbo. Sarirasanthanam pana paccuppannam ajananto nama natthi. Kuto agato so kuhim gami bhavissatiti attabhavassa agatigatitthanam kankhanto evam kankhatiti. ^4- Ariyasavakassati idha sotapanno adhippeto, itarepi pana tayo avaritayevati. Dasamam. Aharavaggo dutiyo. ---------------

The Pali Atthakatha in Roman Book 12 page 46-49. http://84000.org/tipitaka/atthapali/read_rm.php?B=12&A=1017&modeTY=2 อรรถกถาบาลีอักษรไทย :- http://84000.org/tipitaka/atthapali/read_th.php?B=12&A=1017&modeTY=2 อ่านอรรถกถาแปลไทย :- http://84000.org/tipitaka/attha/attha.php?b=16&i=60 เนื้อความพระไตรปิฎกฉบับหลวง :- http://84000.org/tipitaka/read/r.php?B=16&A=590 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=16&A=608 The Pali Tipitaka in Roman Character :- http://84000.org/tipitaka/read/roman_read.php?B=16&A=608 Contents of The Tipitaka Volume 16 http://84000.org/tipitaka/read/?index_16