AtthaPali Vol.15

3. Tatiyapaṇṇāsaka 11. 1. Āsāduppajahavaggavaṇṇanā [119] Tatiyapaṇṇāsakassa paṭhame āsāti taṇhā. Duppajahāti duccajā dunnīharā ^1- lābhāsāya duppajahabhāvena ^2- sattā dasapi vassāni vīsatipi saṭṭhīpi vassāni "ajja labhissāma, sve labhissāmā"ti rājānaṃ upaṭṭhahanti, kasikammādīni karonti, ubhato byūḷhaṃ saṅgāmaṃ pakkhandanti, ajapathasaṅkupathādayo paṭipajjanti, nāvāya mahāsamuddaṃ pavisanti. Jīvitāsāya duppajahattā sampatte maraṇakālepi vassasatajīviṃ attānaṃ maññanti. So kammakammanimittādīni passantopi "dānaṃ dehi, pūjaṃ karohī"ti anukampakehi vuccamāno "nāhaṃ marissāmi"ccevaṃ ^3- āsāya kassaci vacanaṃ na gaṇhāti. [120] Dutiye pubbakārīti paṭhamaṃ upakārassa ^4- kārako. Kataññū katavedīti tena kataṃ ñatvā pacchā kārako. Tesu pubbakārī "iṇaṃ demī"ti saññaṃ karoti, pacchā kārako "iṇaṃ jīrāpemī"ti ^5- saññaṃ karoti. [121] Tatiye titto ca tappetā cāti paccekabuddho ca tathāgatasāvako ca khīṇāsavo titto nāma, tathāgato arahaṃ sammāsambuddho titto ca tappetā ca. [122] Catutthe duttappayāti dāyakena duttappayā ^6- tappetuṃ na sukaRā. Nikkhipatīti na dassati ^7- na paribhuñjati. Vissajjetīti paresaṃ deti. [123] Pañcame na vissajjetīti sabbaṃyeva paresaṃ na deti, attano pana yāpanamattaṃ gahetvā avasese na deti. ^8- @Footnote: ¹ Sī.,i. dunnīhārā ² Sī.,i. duppajahanabhāvena ³ cha.Ma.,i. marissāmi @jīvissāmi"cceva ⁴ Sī.,i. upakārakassa ⁵ Sī.,i. jīrāpessāmīti @⁶ Sī.,i. atappayā ⁷ cha.Ma. nidahati ⁸ cha.Ma.,i. avasesaṃ deti [124] Chaṭṭhe subhanimittanti iṭṭhārammaṇaṃ. [125] Sattame paṭighanimittanti aniṭṭhanimittaṃ. [126] Aṭṭhame parato ca ghosoti parassa santikā asaddhammassavanaṃ. [127] Navame parato ca ghosoti parassa santikā saddhammassavanaṃ. Sesaṃ sabbattha uttānamevāti. Āsāduppajahavaggo paṭhamo. --------------

The Pali Atthakatha in Roman Book 15 page 65-66. http://84000.org/tipitaka/atthapali/read_rm.php?B=15&A=1445 อรรถกถาบาลีอักษรไทย :- http://84000.org/tipitaka/atthapali/read_th.php?B=15&A=1445 อ่านอรรถกถาแปลไทย :- http://84000.org/tipitaka/attha/attha.php?b=20&i=363 เนื้อความพระไตรปิฎกฉบับหลวง :- http://84000.org/tipitaka/read/r.php?B=20&A=2259 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=20&A=2233 The Pali Tipitaka in Roman Character :- http://84000.org/tipitaka/read/roman_read.php?B=20&A=2233 Contents of The Tipitaka Volume 20 http://84000.org/tipitaka/read/?index_20