AtthaPali Vol.2

Bhikkhunivibhange parajikakandavannana yo bhikkhunam vibhangassa sangahito anantaram bhikkhuninam vibhangassa tassa samvannanakkamo patto yato tato tassa apubbapadavannanam. Katum parajike tava hoti samvannana ayam. {656} Tena samayena buddho bhagava savatthiyam viharati .pe. Salho migaranattati salhoti tassa namam migaramataya pana natta hoti. Tena vuttam migaranattati. Navakammikanti navakammam adhitthayikam. Panditati pandiccena samannagata. Byattati veyyattiyena samannagata. Medhaviniti paliggahane satipubbangamaya pannaya atthaggahane pannapubbangamaya satiya samannagata. Dakkhati cheka avirajjhitva sighakattabbakariniti attho. Analasati alasyavirahita. Tatrupayayati tesu kammesu upayabhutaya. Vimamsayati kattabbakammupaparikkhaya. Samannagatati sampayutta. Alam katunti samattha tam tam kammam katum. Alam samvidhatunti evanca idam evanca idam hotuti evam samvidahitumpi samattha. Katakatam janitunti katanca katanca janitum. Teti te ubho sa ca sundarinanda so ca salhoti attho. Bhattaggeti parivesanatthane. Nikkuddeti konasadisam katva Dassite gambhire. Vissaro me bhavissatiti virupo me saro bhavissati vippakarasaddo bhavissatiti attho. Patimanentiti apekkhamana. Kyahanti kim aham. Jaradubbalati jaraya dubbala. Caranagilanati padarogena samannagata. {657-658} Avassutati kayasamsaggaragena avassuta tinta kilinnati attho. Padabhajane panassa tameva ragam gahetva sarattatiadi vuttam. Tattha sarattati vattham viya rangajatena kayasamsaggaragena sutthu ratta. Apekkhavatiti tasseva ragassa vasena tasmim purise pavattaya apekkhaya samannagata. Patibaddhacittati tena ragena tasmim purise bandhitva thapitacitta viya. Esa nayo dutiyapadavibhangepi. Purisapuggalassati purisasankhatassa puggalassa. Adhakkhakanti akkhakanam adho. Ubbhajanumandalanti janumandalanam upari. Padabhajane pana padapatipatiyaeva hetthakkhakam uparijanumandalanti vuttam. Ettha ca ubbhakupparampi ubbhajanumandaleneva sangahitam. Sesam mahavibhange vuttanayeneva veditabbam. Purimayo upadayati sadharanaparajikehi parajikayo catasso upadayati attho. Ubbhajanumandalikati idam pana imissa parajikaya namamattam tasma padabhajane na vicaritam. {659} Evam udditthasikkhapadam padanukkamena vibhajitva idani avassutadibhedena apattibhedam dassetum ubhato avassutetiadimaha. Tattha ubhato avassuteti ubhato avassave. Bhikkhuniya ceva purisassa ca kayasamsaggaragena avassutabhave Satiti attho. Kayena kayam amasatiti bhikkhuni yathaparicchinnena kayena purisassa yankinci kayam puriso va yena kenaci kayena bhikkhuniya yathaparicchinnam kayam amasati ubhayathapi bhikkhuniya parajikam. Kayena kayapatibaddhanti vuttappakareneva attano kayena purisassa kayapatibaddham. Amasatiti ettha sayam va amasatu tassa va amasanam sadiyatu thullaccayameva. Kayapatibaddhena kayanti attano vuttappakarakayapatibaddhena purisassa kayam. Amasatiti idhapi sayam va amasatu tassa va amasanam sadiyatu thullaccayameva. Avasesapadesupi iminava nayena vinicchayo veditabbo. Sace pana bhikkhu ceva bhikkhuni ca hoti tatra sace bhikkhuni amasati bhikkhu niccalo hutva cittena sadiyati bhikkhu apattiya na karetabbo. Sace bhikkhu amasati bhikkhuni niccala hutva citteneva adhivaseti kayangam acopayamanapi parajikakkhette parajikena thullaccayakkhette thullaccayena dukkatakkhette dukkatena karetabba. Kasma. Kayasamsaggam sadiyeyyati vuttatta. Ayam atthakathasu vinicchayo. Evam pana sati kiriyasamutthanata na dissati tasma tabbahulanayena sa vuttati veditabba. {660} Ubbhakkhakanti akkhakanam upari. Adhojanumandalanti janumandalanam hettha. Ettha ca adhokupparampi adhojanumandaleneva sangahitam. {662} Ekato avassuteti ettha kincapi ekatoti avisesena vuttam tathapi bhikkhuniyaeva avassave sati ayam Apattibhedo vuttoti veditabbo. Tatrayam adito patthaya vinicchayo. Bhikkhuni kayasamsaggaragena avassuta purisopi tatheva adhakkhake ubbhajanumandale kayappadese kayasamsaggasadiyane sati bhikkhuniya parajikam. Bhikkhuniya kayasamsaggarago purisassa methunarago va gehasitappemam va suddhacittam va hotu thullaccayameva. Bhikkhunina methunarago purisassa kayasamsaggarago va methunarago va gehasitappemam va suddhacittam va hotu dukkatam. Bhikkhuniya gehasitappemam purisassa vuttesu catusu yam va tam va hotu dukkatameva. Bhikkhuniya suddhacittam purisassa vuttesu catusu yam va tam va hotu anapatti. Sace pana bhikkhu ceva hoti bhikkhuni ca ubhinnam kayasamsaggarago bhikkhussa sanghadiseso bhikkhuniya parajikam. Bhikkhuniya kayasamsaggarago bhikkhussa methunarago va gehasitappemam va bhikkhuniya thullaccayam bhikkhussa dukkatam. Ubhinnam methunarago va gehasitappemam va ubhinnampi dukkatameva. Yassa yattha suddhacittam tassa tattha anapatti. Ubhinnampi suddhacittam ubhinnampi anapatti. {663} Anapatti asanciccati adisu virajjhitva va amasantiya annavihitaya va ayam puriso va itthi vati ajanantiya va tena phutthayapi tam phasasam asadiyantiya va amasanepi sati anapatti. Sesam sabbattha uttanameva. Pathamaparajikasamutthanam kiriya sannavimokkham sacittakam lokavajjam kayakammam akusalacittam dvivedananti. Pathamaparajikasikkhapadam.

The Pali Atthakatha in Roman Book 2 page 508-511. http://84000.org/tipitaka/atthapali/read_rm.php?B=2&A=10689&modeTY=2 อรรถกถาบาลีอักษรไทย :- http://84000.org/tipitaka/atthapali/read_th.php?B=2&A=10689&modeTY=2 อ่านอรรถกถาแปลไทย :- http://84000.org/tipitaka/attha/attha.php?b=1&i=1 เนื้อความพระไตรปิฎกฉบับหลวง :- http://84000.org/tipitaka/read/r.php?B=1&A=1 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=1&A=1 The Pali Tipitaka in Roman Character :- http://84000.org/tipitaka/read/roman_read.php?B=1&A=1 Contents of The Tipitaka Volume 1 http://84000.org/tipitaka/read/?index_1