ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
first pageprevious pagedispage pageNumbernext pagelast page chage to ENGLISH letter  
Atthakatha Book 2 : PALI ROMAN Vinaya.A. (samanta.2)

     {503-505} Tena samayenāti purāṇacīvarasikkhāpadaṃ. Tattha yāva sattamā
pitāmahayugāti pitu pitā pitāmaho. Pitāmahassa yugaṃ pitāmahayugaṃ.
Yuganti āyuppamāṇaṃ vuccati. Abhilāpamattameva cetaṃ. Atthato
pana pitāmahoyeva pitāmahayugaṃ. Tato uddhaṃ sabbepi pubbapurisā
pitāmahaggahaṇeneva gahitā. Evaṃ yāva sattamo puriso tāva yā
asambaddhā sā yāva sattamā pitāmahayugā asambaddhāti vuccati.
Desanāmukhamevetaṃ. Mātito vā pitito vāti vacanato pana
pitāmahayugaṃpi pitāmahīyugaṃpi mātāmahayugaṃpi mātāmahīyugaṃpi tesaṃpi
bhātikabhaginībhāgineyyaputtappaputtādayopi sabbe te idha saṅgahitāevāti
veditabbā. Tatrāyaṃ vitthāranayo. Pitā pitu pitā tassa pitā
Tassāpi pitāti evaṃ yāva sattamā yugā. Pitā pitu mātā
tassāpi pitā ca mātā ca bhātā ca bhaginī ca puttā ca dhītaro cāti
evaṃpi uddhaṃ ca adho ca yāva sattamā yugā. Pitā pitu bhātā
pitu bhaginī pitu puttā pitu dhītaro tesaṃpi puttadhītuparamparāti
evaṃpi yāva sattamā yugā. Mātā mātu mātā tassā mātā
tassāpi mātāti evaṃ yāva sattamā yugā. Mātā mātu pitā
tassa pitā ca mātā ca bhātā ca bhaginī ca puttā ca dhītaro
cāti evaṃpi uddhaṃ ca adho ca yāva sattamā yugā. Mātā
mātu bhātā mātu bhaginī mātu puttā mātu dhītaro tesaṃpi
puttadhītuparamparāti evaṃpi yāva sattamā yugā. Neva mātusambandhena na
pitusambandhena sambaddhā ayaṃ aññātikā nāma. Ubhatosaṅgheti
bhikkhusaṅghe ñatticatutthena ca bhikkhunīsaṅghe ñatticatutthena cāti
aṭṭhavāciyakammena upasampannā. Sakiṃ nivatthaṃpi sakiṃ pārutaṃpīti rajitvā
kappaṃ katvā ekavāraṃpi nivatthaṃ vā pārutaṃ vā. Antamaso
paribhogasīsena aṃse vā matthake vā katvā maggaṃ gato hoti
ussīsakaṃ vā katvā nipanno hoti etaṃpi purāṇacīvarameva.
Sace pana paccattharaṇassa heṭṭhā katvā nipajjati hatthehi vā
ukkhipitvā ākāse vitānaṃ katvā sīsena aphusanto gacchati ayaṃ
paribhogo nāma na hotīti kurundiyaṃ vuttaṃ. Dhotaṃ nissaggiyanti
ettha evaṃ āṇattā bhikkhunī dhovanatthāya uddhanaṃ sajjeti dārūni
saṃharati aggiṃ karoti udakaṃ āharati yāva naṃ dhovitvā ukkhipati
Tāva bhikkhuniyā payoge payoge bhikkhussa dukkaṭaṃ dhovitvā
ukkhittamattaṃ nissaggiyaṃ. Sace duddhotanti maññamānā puna siñcati
vā dhovati vā yāva niṭṭhānaṃ na gacchati tāva payoge payoge
dukkaṭaṃ. Esa nayo rajanākoṭṭanesu. Rajanadoṇiyaṃ hi rajanaṃ
ākīritvā yāva sakiṃ rajati tato pubbe yaṅkiñci rajanatthāya karoti
pacchā vā paṭirajati evaṃ sabbattha payoge payoge dukkaṭaṃ.
Evaṃ ākoṭṭanepi payogo veditabbo. {506} Aññātikāya
aññātikasaññī purāṇacīvaraṃ dhovāpetīti no cepi imaṃ me dhovāti vadati
athakho dhovanatthāya kāyavikāraṃ katvā hatthena hatthe deti pādamūle
vā ṭhapeti upari vā khipati sikkhamānāsāmaṇerasāmaṇerī-
upāsikātitthiyādīnaṃ hatthe peseti nadītitthe dhovantiyā
upacāre vā khipati anto dvādasahatthe okāse dhovāpitaṃyeva
hoti. Sace pana upacāraṃ muñcitvā orato ṭhapeti sā ca
dhovitvā āneti anāpatti. Sikkhamānāya vā sāmaṇeriyā vā
upāsikāya vā hatthe dhovanatthāya deti sā ce upasampajjitvā
dhovati āpattiyeva. Upāsakassa hatthe deti so ce liṅge
parivatte bhikkhunīsu pabbajitvā upasampajjitvā dhovati āpattiyeva.
Sāmaṇerassa vā bhikkhussa vā hatthe dinnepi liṅgaparivattane
eseva nayo. Dhovāpeti rajāpetīti ādīsu ekena vatthunā
nissaggiyaṃ dutiyena dukkaṭaṃ. Tīṇipi kārāpentassa ekena
nissaggiyaṃ sesehi dve dukkaṭāni. Yasmā pana etāni
Dhovanādīni paṭipāṭiyā vā uppaṭipāṭiyā vā kārentassa mokkho
natthi tasmā ettha tīṇi catukkāni vuttāni. Sacepi hi imaṃ
cīvaraṃ rajitvā dhovitvā ānehīti vutte sā bhikkhunī paṭhamaṃ dhovitvā
pacchā rajati nissaggiyena dukkaṭameva. Evaṃ sabbesupi
viparītavacanesu nayo veditabbo. Sace pana dhovitvā ānehīti vutte
dhovati ceva rajati ca dhovanapaccayāeva āpatti rajane
anāpatti. Evaṃ sabbattha vuttādhikaraṇe avuttā dhovatīti iminā
lakkhaṇena anāpatti veditabbā. Imasmiṃ cīvare yaṃ kātabbaṃ taṃ
sabbaṃ tuyhaṃ bhāroti vadanto pana ekavācāya sambahulā āpattiyo
āpajjati. Aññātikāya vematiko aññātikāya ñātikasaññīti
imāni pana padāni vuttananeneva tiṇṇaṃ catukkānaṃ vasena vitthārato
veditabbāni. Ekato upasampannāyāti bhikkhunīnaṃ santike
upasampannāya dhovāpentassa dukkaṭaṃ. Bhikkhūnaṃ santike upasampannāya
pana yathāvatthukameva. Bhikkhūnaṃ santike upasampannā nāma
pañcasatā sākiyāniyo. {507} Avuttā dhovatīti uddesāya vā ovādāya
vā āgatā kiliṭṭhaṃ cīvaraṃ disvā ṭhapitaṭṭhānato gahetvā vā
detha ayya dhovissāmīti āharāpetvā vā dhovati ca rajati ca
ākoṭṭeti ca ayaṃ avuttā dhovati nāma. Yāpi imaṃ cīvaraṃ
dhovāti daharaṃ vā sāmaṇeraṃ vā āṇāpentassa bhikkhuno sutvā
āharatha ayya ahaṃ dhovissāmīti dhovati tāvakālikaṃ vā gahetvā
dhovitvā rajitvā deti ayaṃpi avuttā dhovati nāma.
Aññaṃ parikkhāranti upāhanatthavikapattatthavikaaṃsabandhakakāya-
bandhanamañcapīṭhabhisītaṭikādīnaṃ yaṅkiñci dhovāpeti anāpatti. Sesamettha
uttānatthameva.
     Samuṭṭhānādīsu pana idaṃ sikkhāpadaṃ chassamuṭṭhānaṃ kiriyā
nosaññāvimokkhaṃ acittakaṃ paṇṇattivajjaṃ kāyakammaṃ vacīkammaṃ
ticittaṃ tivedananti.
           Purāṇacīvaradhovāpanasikkhāpadavaṇṇanā niṭṭhitā.



             The Pali Atthakatha in Roman Book 2 page 186-190. http://84000.org/tipitaka/atthapali/read_rm.php?B=2&A=3911              อรรถกถาบาลีอักษรไทย :- http://84000.org/tipitaka/atthapali/read_th.php?B=2&A=3911              อ่านอรรถกถาแปลไทย :- http://84000.org/tipitaka/attha/attha.php?b=1&i=23              เนื้อความพระไตรปิฎกฉบับหลวง :- http://84000.org/tipitaka/read/r.php?B=1&A=751              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=1&A=765              The Pali Tipitaka in Roman Character :- http://84000.org/tipitaka/read/roman_read.php?B=1&A=765              Contents of The Tipitaka Volume 1 http://84000.org/tipitaka/read/?index_1

first pageprevious pagedispage pageNumbernext pagelast page chage to ENGLISH letter

บันทึก ๖ กุมภาพันธ์ พ.ศ. ๒๕๖๑. การแสดงผลนี้อ้างอิงข้อมูลจากอรรถกถาฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ DhammaPerfect@yahoo.com