AtthaPali Vol.2

{94} Dutiyasikkhāpade. Anācāraṃ ācaritvāti akātabbaṃ katvā. Kāyavacīdvāresu āpattiṃ āpajjitvāti vuttaṃ hoti. Aññenaññaṃ paṭicaratīti aññena vacanena aññaṃ vacanaṃ paṭicarati paṭicchādeti ajjhottharati. Idāni taṃ paṭicaraṇavidhiṃ dassento ko āpannoti ādimāha. Tatrāyaṃ vacanasambandho. So kira kiñci vītikkamaṃ disvā āvuso tvaṃ āpattiṃ āpannosīti saṅghamajjhe āpattiyā anuyuñjiyamāno ko āpannoti vadati. Tato tvanti vutte ahaṃ kiṃ āpannoti vadati. Atha pācittiyaṃ vā dukkaṭaṃ vāti vutte vatthuṃ pucchanto ahaṃ kismiṃ āpannoti vadati. Tato asukasminti vutte ahaṃ kathaṃ āpanno kiṃ karonto ca āpannomhīti pucchati. Atha idaṃ nāma

--------------------------------------------------------------------------------------------- page328.

Karonto āpannoti vutte kaṃ bhaṇathāti vadati. Tato taṃ bhaṇāmāti vutte kiṃ bhaṇathāti vadati. Apicettha ayaṃ pālimuttakopi aññenaññaṃ paṭicaraṇavidhi. Bhikkhūhi tava sipāṭikāya kahāpaṇo diṭṭho kissevamasāruppaṃ karosīti vutto sudaṭṭhaṃ bhante na paneso kahāpaṇo tipumaṇḍalaṃ etanti bhaṇanto vā tvaṃ suraṃ pivanto diṭṭho kissevamasāruppaṃ karosīti vutto sudiṭṭho bhante na panesā surā bhesajjatthāya sampāditaṃ ariṭṭhanti bhaṇanto vā tvaṃ paṭicchanne āsane mātugāmena saddhiṃ nisinno diṭṭho kissevamasāruppaṃ karosīti vutto yena diṭṭhaṃ sudiṭṭhaṃ viññū panettha dutiyo atthi so kissa na diṭṭhoti bhaṇanto vā īdisaṃ tayā kiñci diṭṭhanti puṭṭho na suṇāmīti sotamupanento vā sotadvāre pucchantānaṃ cakkhuṃ upanento vā aññenaññaṃ paṭicaratīti veditabbo. {98} Aññavādake vihesake pācittiyanti ettha aññaṃ vadatīti aññavādakaṃ. Aññenaññaṃ paṭicaraṇassetaṃ nāmaṃ. Vihesatīti vihesakaṃ. Tuṇhībhūtassetaṃ nāmaṃ. Tasmiṃ aññavādake vihesake. Pācittiyanti vatthudvaye pācittiyadvayaṃ vuttaṃ. Aññavādakaṃ ropetūti aññavādakaṃ āropetu patiṭṭhāpetūti attho. Vihesakaṃ ropetūti etasmiṃpi eseva nayo. Aropite aññavādaketi kammavācāya anāropite aññavādake. {100} Aropite vihesaketi etasmimpi eseva nayo. {101} Dhammakamme dhammakammasaññīti ādīsu yantaṃ aññavādakavihesakaropanakammaṃ kataṃ tañce dhammakammaṃ

--------------------------------------------------------------------------------------------- page329.

Hoti so ca bhikkhu tasmiṃ dhammakammasaññī aññavādakañca vihesakañca karoti athassa tasmiṃ aññavādake ca vihesake ca āpatti pācittiyassāti iminā nayena attho veditabbo. {102} Ajānanto pucchatīti āpattiṃ āpannabhāvaṃ ajānantoyeva kiṃ tumhe bhaṇatha ahaṃ na jānāmīti pucchati. Gilāno na kathetīti mukhe tādiso byādhi hoti yena kathetuṃ na sakkoti. Saṅghassa bhaṇḍanaṃ vāti ādīsu saṅghamajjhe kathite tappaccayā saṅghassa bhaṇḍanaṃ vā .pe. Vivādo vā bhavissati so mā ahosīti maññamāno na kathetīti iminā nayena attho veditabbo. Sesaṃ uttānamevāti. Tisamuṭṭhānaṃ kāyacittato vācācittato kāyavācācittato ca samuṭṭhāti siyā kiriyā siyā akiriyā aññenaññaṃ paṭicarantassa hi kiriyā hoti tuṇhībhāvena vihesentassa akiriyā saññāvimokkhaṃ sacittakaṃ lokavajjaṃ kāyakammaṃ vacīkammaṃ akusalacittaṃ dukkhavedananti. Aññavādasikkhāpadaṃ dutiyaṃ.

The Pali Atthakatha in Roman Book 2 page 327-329. http://84000.org/tipitaka/atthapali/read_rm.php?B=2&A=6897&pagebreak=1 อรรถกถาบาลีอักษรไทย :- http://84000.org/tipitaka/atthapali/read_th.php?B=2&A=6897&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=1&i=494 เนื้อความพระไตรปิฎกฉบับหลวง :- http://84000.org/tipitaka/read/r.php?B=1&A=16207 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=1&A=6509 The Pali Tipitaka in Roman Character :- http://84000.org/tipitaka/read/roman_read.php?B=1&A=6509 Contents of The Tipitaka Volume 1 http://84000.org/tipitaka/read/?index_1