AtthaPali Vol.27

3. Tikanipata 1. Pathamavagga 1. Mulasuttavannana [50] Tikanipatassa pathame tiniti gananaparicchedo. Imaniti abhimukhikaranam. Akusalamulaniti paricchinnadhammanidassanam. Tattha akusalani ca tani mulani cati akusalamulani. Atha va akusalanam hetupaccayapabhavajanakasamutthapakanibbattakatthena mulani cati akusalamulani, akusaladhammanam karananiti attho. Karanam hi yatha hinoti etasma phalam pavattatiti hetu, paticcaetasma etiti paccayo, pabhavati etasmati pabhavo, attano phalam janetiti janakam, samutthapetiti samutthapakam, nibbattetiti nibbattakanti ca vuccati, evam patitthatthena mulanti, tasma akusalamulaniti akusalanam supatitthitabhavasadhanani, karananiti vuttam hoti. Keci pana "saliadinam salibijadini viya manippabhadinam manivannadayo viya ca akusalanam akusalabhavasadhako lobhadinam mulattho"ti vadanti evam sante akusalacittasamutthanarupesu nesam hetupaccayabhavo na siya. Na hi tani tesam akusalabhavam sadhenti, na ca paccaya na honti. Vuttanhetam:- "hetu hetusampayuttakanam dhammanam tamsamutthanananca rupanam hetupaccayena paccayo"ti. ^1- Ahetukassa ca mohassa akusalabhavo na siya akusalabhavasadhakassa mulantarassa abhavato. Athapi siya lobhadinam sabhavasiddho akusaladibhavo, @Footnote: ¹ abhi.pa. 40/1/1 Tamsampayuttanam pana lobhadipatibaddhoti. Evampi yatha lobhadinam, evam alobhadinampi sabhavasiddho kusaladibhavoti alobhadayo kusala eva siyum, na abyakata, na ca honti. Tasma yatha sampayuttesu, evam mulesupi kusaladibhavo pariyesitabbo. Yonisomanasikaradiko viya hi kusalabhavassa, ayonisomanasikaradiko akusalabhavassa karananti gahetabbam. Evam akusalabhavasadhanavasena lobhadinam mulattham aggahetva supatitthitabhavasadhanavasena gayhamane na koci doso. Laddhahetupaccaya hi dhamma virulhamula viya padapa thira honti supatitthita, heturahita pana tilabijakadisevala viya na supatitthitati hetuadiatthena akusalanam upakarakatta mulaniti akusalamulani. Yasma pana mulena mutto akusalacittuppado natthi, tasma tihi mulehi sabbo akusalarasi pariyadiyitva dassitoti datthabbam. Tani akusalamulani sarupato dassetum "lobho akusalamulan"tiadi vuttam. Tattha lobhadisu yam vattabbam, tam hettha vuttameva. Tattha pana tatiyamaggavajjha lobhadayo agata, idha pana anavasesati ayameva viseso. Gathayam papacetasanti akusaladhammasamayogato lamakacittam. Himsantiti attano pavattikkhane ayatim vipakakkhane ca vibadhenti. Attasambhutati attani jata. Tacasaranti kanthikam, velunti attho. Samphalanti attano phalam. Idam vuttam hoti:- khadirasisapadayo ^1- viya antosaro ahutva bahisarataya tacasaranti laddhanamam veluadim yatha attasambhutameva phalam himsati vinaseti, evameva anto siladisararahitam lamakacittam puggalam attasambhutayeva lobhadayo vinasentiti. Pathamasuttavannana nitthita. -------------- @Footnote: ¹ Ma. khadirasaladayo

The Pali Atthakatha in Roman Book 27 page 206-207. http://84000.org/tipitaka/atthapali/read_rm.php?B=27&A=4539&modeTY=2 อรรถกถาบาลีอักษรไทย :- http://84000.org/tipitaka/atthapali/read_th.php?B=27&A=4539&modeTY=2 อ่านอรรถกถาแปลไทย :- http://84000.org/tipitaka/attha/attha.php?b=25&i=228 เนื้อความพระไตรปิฎกฉบับหลวง :- http://84000.org/tipitaka/read/r.php?B=25&A=5403 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=25&A=5461 The Pali Tipitaka in Roman Character :- http://84000.org/tipitaka/read/roman_read.php?B=25&A=5461 Contents of The Tipitaka Volume 25 http://84000.org/tipitaka/read/?index_25