AtthaPali Vol.32

page217.

7. Sattamavagga 198. 1. Vappattheragathavannana passati passoti ayasmato vappattherassa gatha. Ka uppatti? so kira padumuttarassa bhagavato kale hamsavatinagare kulagehe nibbattitva vinnutam patto "asuko ca asuko ca thero satthu pathamam dhammapatiggahaka ahesun"ti thomanam sutva bhagavantam upasankamitva patthanam patthapesi "ahampi bhagava anagate tadisassa sammasambuddhassa pathamam dhammapatiggahakanam annataro bhaveyyan"ti, satthu santike saranagamananca pavedesi. So yavajivam punnani katva tato cuto deva- manussesuyeva samsaranto imasmim buddhuppade kapilavatthusmim vasetthassa nama brahmanassa putto hutva nibbatti, vappotissa namam ahosi. So asitena isina "siddhatthakumaro sabbannu bhavissati"ti byakato kondannappamukhehi brahmanaputtehi saddhim gharavasam pahaya tapasapabbajjam pabbajitva "tasmim sabbannutam patte tassa santike dhammam sutva amatam papunissami"ti uruvelayam viharantam ^1- mahasattam chabbassani padhanam padahantam upatthahitva olarikahara- paribhogena nibbijjitva isipatanam gato. Abhisambujjhitva satthara sattasattahani vitinametva isipatanam gantva dhammacakke pavattite patipadadivase sotapattiphale patitthito pancamiyam pakkhassa annasikondannadihi saddhim arahattam papuni. Tena vuttam apadane ^2- :- "ubhinnam devarajunam sangamo paccupatthito ^3- ahosi samupabyulho mahaghoso avattatha. @Footnote: ¹ Si. viharanto ² khu.apa. 32/20/204 saranagamaniyattherapadana @³ cha.Ma. samupatthito, Si. sangame paccupatthite

--------------------------------------------------------------------------------------------- page218.

Padumuttaro lokavidu ahutinam patiggaho antalikkhe thito sattha samvejesi mahajanam. Sabbe deva attamana nikkhittakavacavudha sambuddham abhivadetva ekaggasimsu tavade. Mayham sankappamannaya vacasabhimudirayi anukampako lokavidu nibbapesi mahajanam. Padutthacitto manujo ekapanam vihethayam tena cittappadosena apayam upapajjati. Sangamasise nagova bahu pane vihethayam nibbapetha sakam cittam ma hannittho punappunam. Davinnampi yakkharajunam sena sa vimhita ahu sarananca upagacchum lokajettham sutadinam. Sannapetvana janatam padamuddhari cakkhuma pekkhamanova devehi pakkami uttaramukho. Pathamam saranam gacchim dipadindassa ^1- tadino kappanam satasahassam duggatim nupapajjaham. Mahadundubhinama ca solasasum rathesabha timsakappasahassamhi rajano cakkavattino. Kilesa jhapita mayham .pe. Katam buddhassa sasanan"ti. Arahattam pana patva attana patiladdhasampattim paccavekkhanamukhena satthu guna- mahantatam paccavekkhitva "idisam nama sattharam bahulikadivadena samudacarimha. Aho puthujjanabhavo nama andhakarano acakkhukarano, ariyabhavoyeva cakkhukarano"ti @Footnote: ¹ cha.Ma. dvipadindassa

--------------------------------------------------------------------------------------------- page219.

Dassento:- ^1- "passati passo passantam apassantanca passati apassanto apassantam passantanca na passati"ti gatham abhasi. ^1- [61] Tattha passati passoti passati sammaditthiya dhamme aviparitam janati bujjhatiti passo, dassanasampanno ariyo, so passantam aviparitadassavim "ayam aviparitadassavi"ti passati pannacakkhuna dhammadhammam yathasabhavato janati. Na kevalam passantameva, atha kho apassantanca passati, yo pannacakkhuvirahito dhamme yathasabhavato na passati, tampi apassantam puthujjanam "andho vatayam bhavam acakkhuko"ti attano pannacakkhuna passati. Apassanto apassantam, passantanca na passatiti apassanto pannacakkhurahito andhabalo tadisam andhabalam ayam dhammadhammam yathasabhavato na passatiti yatha apassantam na passati na janati, evam attano pannacakkhuna dhammadhammam yathasabhavato passantanca panditam "ayam evamvidho"ti na passati na janati, tasma ahampi pubbe dassanarahito sakalam neyyam hatthamalakam viya passantam bhagavantam apassantampi puranadim yathasabhavato na passim, idani pana buddhanubhavena sampanno ubhayepi yathasabhavato passamiti sevitabbasevitabbesu attano aviparitapatipattim dasseti. Vappattheragathavannana nitthita. --------- @Footnote: ^1-1 cha.Ma. "passati passo"ti gatham abhasi

The Pali Atthakatha in Roman Book 32 page 217-219. http://84000.org/tipitaka/atthapali/read_rm.php?B=32&A=4847&modeTY=2&pagebreak=1 อรรถกถาบาลีอักษรไทย :- http://84000.org/tipitaka/atthapali/read_th.php?B=32&A=4847&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=26&i=198 เนื้อความพระไตรปิฎกฉบับหลวง :- http://84000.org/tipitaka/read/r.php?B=26&A=5330 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=26&A=5571 The Pali Tipitaka in Roman Character :- http://84000.org/tipitaka/read/roman_read.php?B=26&A=5571 Contents of The Tipitaka Volume 26 http://84000.org/tipitaka/read/?index_26