AtthaPali Vol.37

3 Bharujatakam ^1- isinamantaram katvati idam sattha jetavane viharanto kosalarajanam arabbha kathesi. Bhagavato hi bhikkhusanghassa ca labhasakkaro maha ahosi. Yathaha, tena kho pana samayena bhagava sakkato hoti garukato manito pujito apacito labhi civarapindapatasenasanagilanapaccaya- bhesajjaparikkharanam, bhikkhusanghopi kho sakkato hoti garukato manito pujito apacito labhi civarapindapatasenasanagilanapaccaya- bhesajjaparikkharanam, annatitthiya pana paribbajaka na sakkata honti na garukata na manita na pujita na apacita na labhino civarapindapatasenasana- gilanapaccayabhesajjaparikkharananti. Te evam parihinalabhasakkara @Footnote: ¹ kurujatakantipi .pe. Ahorattam gulhasannipatam katva mantayanti samanassa gotamassa uppattikalato patthaya mayam hatalabhasakkara jata, samano gotamo labhaggayasaggappatto jato, kena nu kho karanenassa esa sampattiti. Tattheke evamahamsu samano gotamo sakalajambudipassa uttamatthane bhumisise vasati, tenassa labhasakkaro uppajjatiti. Sesa atthetam karanam, sace mayampi jetavanapitthe titthiyaramam karema, evam labhino bhavissamati ahamsu. Te sabbepi evametanti sannitthanam katva sace pana mayam ranno anapaloketva ^1- aramam karessama, bhikkhu varessanti, lancam labhitva abhijjanako nama natthi, tasma ranno lancam datva aramatthanam ganhissamati sannitthanam katva upatthakajane yacitva ranno satasahassam datva maharaja mayam jetavanapitthiyam titthiyaramam karessama, sace bhikkhu katum na dassamati tumhakam arocenti, tesam pativacanam na databbanti ahamsu. Raja lancalobhena sadhuti sampaticchi. Titthiya rajanam sanganhitva vaddhakim pakkosapetva kammam patthapesum. Mahasaddo ahosi. Sattha ke panete ananda uccasadda mahasaddati pucchi. Titthiya bhante jetavanapitthiyam titthiyaramam karenti, tattheso saddoti. Ananda netam thanam titthiyaramassa anucchavikam, titthiya uccasaddakama, na sakka tehi saddhim vasitunti vatva bhikkhusangham sannipatetva gacchatha bhikkhave, ranno acikkhitva @Footnote: ¹ anarocetvatipi. Titthiyaramakaranam nivarethati aha. Bhikkhusangho gantva ranno nivesanadvare atthasi. Raja sanghassa agatabhavam sutva titthiyaramam nissaya agata bhavissantiti lancassa gahitatta raja gehe natthiti vadapesi. Bhikkhu gantva satthu arocesum. Sattha lancam nissaya evam karotiti dve aggasavake pesesi. Raja tesampi agatabhavam sutva tatheva vadapesi. Tepi agantva satthu arocesum. Sattha na idani sariputta raja gehe nisiditum labhissati bahi nikkhamissatiti punadivase pubbanhasamaye nivasetva pattacivaramadaya pancahi bhikkhusatehi saddhim ranno nivesanadvaram agamasi. Raja sutva va pasada otaritva pattam gahetva sattharam pavesetva buddhappamukhassa sanghassa yagubhattam datva sattharam vanditva ekamantam nisidi. Sattha ranno ekam pariyayadhammadesanam aharanto maharaja poranakarajano lancam gahetva silavante annamannam kalaham karetva attano ratthassa asamino hutva mahavinasam papunimsuti vatva tena yacito atitam ahari. Atite bharuratthe bharuraja nama rajjam karesi. Tada bodhisatto pancabhinnaatthasamapattilabhi ganasattha tapaso hutva himavantappadese ciram vasitva lonambilasevanatthaya pancasatatapasaparivuto himavanta otaritva anupubbena bharunagaram patva tattha pindaya caritva nagara nikkhamitva uttaradvare sakhavitapasampannassa vatarukkhassa mule nisiditva bhattakiccam katva tattheva Rukkhamule vasam kappesi. Evam tasmim isigane tattha vasante addhamasaccayena anno ganasattha pancasataparivaro agantva nagare bhikkhaya caritva nagara nikkhamitva dakkhinadvare tadisasseva vatarukkhassa mule nisiditva bhattakiccam katva tattheva vasam kappesi. Iti te dvepi isigana tattha yathabhirantam viharitva himavantameva agamamsu. Tesam gatakale dakkhinadvare vatarukkho sukkhi. Punavare tesu agacchantesu dakkhinadvare vatarukkhavasino pathamataram agantva attano rukkhassa sukkhabhavam natva bhikkhaya caritva nagara nikkhamitva uttaradvare rukkhamulam gantva bhattakiccam katva tattheva vasam kappesum. Itare pana isayo paccha agantva nagare bhikkhaya caritva attano rukkhamulameva gantva bhattakiccam katva vasam kappesum. Te amhakam rukkho amhakam rukkhoti rukkham nissaya annamannam kalaham karimsu. Kalaho maha ahosi. Eke amhakam pathamam vasitatthanam tumhe na labhissathati vadanti. Eke mayam imasmim thane pathamataram idhagata, tumhe na labhissathati vadanti. Iti te mayam samino mayam saminoti kalaham karonta rukkhamulassatthaya rajakulam agamamsu. Raja pathamam vutthaisiganam yeva samikam akasi. Itare na idani mayam imehi parajitati attanam vadapessamati dibbacakkhuna oloketva ekam cakkavattiparibhogam rathapanjaram disva aharitva ranno lancam datva maharaja amhe samike karohiti ahamsu. Raja lancam gahetva dvepi Gana vasantuti dve samike akasi. Itare isayo tassa rathapanjarassa ratanacakkani niharitva lancam datva maharaja amhe yeva samike karohiti ahamsu. Raja tatha akasi. Isigana amhehi vatthukame ca kilesakame ca pahaya pabbajitehi rukkhamulassa karana kalaham karontehi lancam dadantehi ayuttam katanti vippatisarino hutva vegena palayitva himavantameva agamamsu. Sakalabharuratthavasiniyo devata ekato hutva silavante kalaham karentena ranna ayuttam katanti bharuranno kujjhitva tiyojanasatikam bharurattham samuddam ubbattetva anattham akamsu. Iti ekam bharurajanam nissaya sakalaratthavasino vinasam pattati. Sattha imam atitam aharitva abhisambuddho hutva ima gatha avoca isinamantaram katva bharurajati me sutam ucchinno saha ratthehi sa raja vibhavam gato, tasma hi chandagamanam nappasamsanti pandita, adutthacitto bhaseyya giram saccupasanhitanti. Tattha isinamantaram katvati chandagativasena vivaram katva. Bharurajati bharurattharaja. Iti me sutanti iti maya pubbe etam sutam. Tasma hi chandagamananti yasma hi chandagamanam gantva bharuraja saha ratthena ucchinno, tasma chandagamanam pandita nappasamsanti. Adutthacittoti kilesehi adusitacitto hutva bhaseyya. Saccupasanhitanti sabhavanissitam atthanissitam karananissitameva giram Bhaseyya. Ye hi tattha bharuranno lancam ganhantassa ayuttam etam katanti patikkosanta saccupasamhitam giram bhasimsu, tesam thitatthanam nalikeradipe ajjapi dipakasahassam pannayatiti. Sattha imam dhammadesanam aharitva maharaja chandagatikena nama na bhavitabbam, dve pabbajitagane kalaham karetum na vattatiti vatva jatakam samodhanesi. Aham tena samayena jetthakaisi ahosinti. Raja tathagatassa bhattakiccam katva gatakale manusse pesetva titthiyaramam viddhamsapesi. Titthiya appatittha ahesunti. Bharurajajatakam tatiyam. ---------

The Pali Atthakatha in Roman Book 37 page 225-230. http://84000.org/tipitaka/atthapali/read_rm.php?B=37&A=4443&modeTY=2 อรรถกถาบาลีอักษรไทย :- http://84000.org/tipitaka/atthapali/read_th.php?B=37&A=4443&modeTY=2 อ่านอรรถกถาแปลไทย :- http://84000.org/tipitaka/attha/attha.php?b=27&i=275 เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=1607 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=1594 The Pali Tipitaka in Roman Character :- http://84000.org/tipitaka/read/roman_read.php?B=27&A=1594 Contents of The Tipitaka Volume 27 http://84000.org/tipitaka/read/?index_27