|
| บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
Gijjhajātakaṃ
te kathaṃ nu karissantīti idaṃ satthā jetavane viharanto mātu-
posakabhikkhuṃ ārabbha kathesi. Vatthuṃ sāmajātake āvībhavissati.
Atīte bārāṇasiyaṃ brahmadatte rajjaṃ kārente bodhisatto
gijjhayoniyaṃ nibbattitvā vayappatto vuḍḍhe parihīnacakkhuke mātāpitaro
gijjhaguhāyaṃ ṭhapetvā gomaṃsādīni āharitvā posesi. Tasmiṃ kāle
bārāṇasiyaṃ susāne eko nesādo aniyamitvā gijjhānaṃ pāse
oḍesi. Athekadivasaṃ bodhisatto gomaṃsaṃ pariyesanto susānaṃ paviṭṭho
pādena pāse bajjhitvā attānaṃ na cintesi vuḍḍhe pana
mātāpitaro anussaritvā kathaṃ nu kho me mātāpitaro yāpessanti
mama bandhabhāvaṃpi ajānantā anāthā nippaccayā pabbataguhāyameva
sussitvā marissanti maññeti vilapanto paṭhamaṃ gāthamāha
---------------------------------------------------------------------------------------------
page136.
Te kathaṃ nu karissanti vuḍḍhā giridarīsayā
ahaṃ bandhosmi pāsena nilīyassa vasaṃ gatoti.
Tattha nilīyassāti evaṃnāmakassa nesādaputtassa.
Nesādaputto tassa paridevitaṃ sutvā āha
kiṃ gijjha paridevesi kā nu te paridevanā
na me suto vā diṭṭho vā bhāsanto mānusiṃ dijo.
Bharāmi mātāpitaro vuḍḍhe giridarīsaye
te kathannu karissanti ahaṃ vasaṃ gato tava.
Yannu gijjho yojanasataṃ kuṇapāni apekkhati
kasmā jālañca pāsañca āsajjāpi na bujjhasīti.
Yadā parābhavo hoti poso jīvitasaṅkhayo
atha jālañca pāsañca āsajjāpi na bujjhatīti.
Bharassu mātāpitaro vuḍḍhe giridarīsaye
mayā tvaṃ samanuññāto sotthiṃ passāhi ñātake.
Evaṃ luddhaka nandassu saha sabbehi ñātibhi
bharissaṃ mātāpitaro vuḍḍhe giridarīsayeti.
Nesādaputtena dutiyā gijjhena tatiyā iti imā gāthā paṭipāṭiyā
vuttā.
Tattha yannūti yaṃ nu etaṃ loke kathīyati. Gijjho yojanasataṃ
kuṇapāni apekkhatīti yojanasataṃ atikkamma ṭhitāni kuṇapāni passati
taṃ yadi kathaṃ atha kasmā tvaṃ imaṃ jālañca pāsañca āsajjāpi
---------------------------------------------------------------------------------------------
page137.
Na bujjhasi santikaṃ āgantvāpi na jānāsīti. Parābhavoti vināso.
Bharassūti idaṃ so bodhisattassa dhammakathaṃ sutvā paṇḍito gijjharājā
paridevanto na attano paridevati mātāpitūnaṃ paridevati nāyaṃ
māretuṃ yuttoti tassa tussitvā āha vatvā ca pana piyacittena
muducittena pāsaṃ mocesi.
Athassa bodhisatto maraṇadukkhato mutto sukhito anumodanaṃ
karonto osānagāthaṃpi vatvā mukhapūraṃ maṃsaṃ ādāya gantvā mātāpitūnaṃ
adāsi.
Satthā imaṃ dhammadesanaṃ āharitvā saccāni pakāsetvā
jātakaṃ samodhānesi saccapariyosāne mātuposakabhikkhu sotāpattiphale
patiṭṭhahi. Tadā nesādaputto channo ahosi mātāpitaro mahā-
rājakulāni ahesuṃ gijjharājā pana ahamevāti.
Gijjhajātakaṃ catutthaṃ.
The Pali Atthakatha in Roman Book 39 page 135-137.
http://84000.org/tipitaka/atthapali/read_rm.php?B=39&A=2680&pagebreak=1
อรรถกถาบาลีอักษรไทย :-
http://84000.org/tipitaka/atthapali/read_th.php?B=39&A=2680&pagebreak=1
อ่านอรรถกถาแปลไทย :-
http://84000.org/tipitaka/attha/attha.php?b=27&i=990
เนื้อความพระไตรปิฎกฉบับหลวง :-
http://84000.org/tipitaka/read/r.php?B=27&A=4342
พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=27&A=4364
The Pali Tipitaka in Roman Character :-
http://84000.org/tipitaka/read/roman_read.php?B=27&A=4364
Contents of The Tipitaka Volume 27
http://84000.org/tipitaka/read/?index_27
        |
|
บันทึก ๖ กุมภาพันธ์ พ.ศ. ๒๕๖๑. การแสดงผลนี้อ้างอิงข้อมูลจากอรรถกถาฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]