ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
first pageprevious pagedispage pageNumbernext pagelast page chage to ROMAN letter  
Atthakatha Book 41 : PALI ROMAN Ja.A.7 visati-cattalisa

                      Campeyyajatakam
     ka nu vijjurivabhasiti idam sattha jetavane viharanto
uposathakammam arabbha kathesi.
     Tada hi sattha sadhu vo katam upasaka uposathavasam
upavasantehi poranakapandita nagasampattim pahaya uposathavasam
vasimsuyevati vatva tehi yacito atitam ahari.
     Atite angaratthe angati nama raja rajjam karesi.
Angamagadharatthanam antare campa nama nadi tattha nagabhavanam ahosi.
Campeyyo nama nagaraja rajjam karesi. Kadaci magadharaja angarattham
ganhi kadaci angaraja magadharattham. Athekadivasam magadharaja
angena saddhim yujjhitva yuddhaparajito assam aruyha palayanto
angaranno yodhehi anubandhanto puna campanadim patva parahatthe
maranato nadim pavisitva matam seyyoti asseneva saddhim nadim otari.
Tada campeyyo nama nagaraja antoudake ratanamandapam
nimminetva mahaparivaro mahapanam pivati. Asso ranna saddhim
udake nimujjitva nagaranno purato otarati. Nagaraja
alankatapatiyattam rajanam disva sineham uppadetva asana vutthaya ma
bhayi maharajati rajanam attano pallanke nisidapetva udake
nimujjakaranam pucchi. Raja yathabhutam kathesi. Atha nam maharaja
Ma bhayi ahantam dvinnam ratthanam  samikam karissamiti
assasetva sattaham mahantam yasam anubhavitva atthame divase magadharajena
saddhim nagabhavana nikkhami. Magadharaja nagarajassanubhavena angarajanam
gahetva jivita voropetva dvisu ratthesu rajjam karesi. Tato
patthaya ranno ca nagarajassa ca vissaso thiro ahosi. Raja
anusamvaccharam campanaditire ratanamandapam karetva mahantena pariccagena
nagaranno balikammam karesi. Sopi mahantena parivarena nagabhavana
nikkhamitva balikammam sampaticchati. Mahajano nagaranno sampattim
oloketi.
     Tada bodhisatto daliddakule nibbattetva rajaparisaya saddhim
naditire gantva tam nagarajassa sampattim disva lobham uppadetva
tam patthayamano danam datva silam rakkhitva campeyyanagarajassa
kalakiriyato sattame divase cavitva tassa vasanapasade sirigabbhe
sirisayanapitthe nibbatti. Sariram sumanadamavannam mahantam ahosi.
So tam disva vippatisari hutva maya katakusalanissandena chasu
kamasaggesu issariyam kotthe patisamitadhannam viya ahosi svaham
imissa tiracchanayoniya patisandhim ganhim kim me jivitenati maranaya
cittam uppadesi. Atha nam sumana nama nagamanavika disva
mahanubhavo satto nibbatto bhavissatiti sesanagamanavikanam sannam
akasi. Sabba nanaturiyahattha agantva tassa upaharam karimsu.
Tassa tam nagabhavanam sakkabhavanam viya ahosi. Maranacittam
Patipassambhi. Sappasariram vijahitva sabbalankarapatimandito sayanapitthe
nisidi. Athassa tato patthaya yaso maha ahosi. So tattha
nagarajjam karento aparabhage vippatisari hutva kim me imaya
tiracchanayoniya uposathavasam vasitva ito muccitva manussapatham
gantva saccani pativijjhitva dukkhassantam karissamiti cintetva
tato patthaya tasmimyeva pasade uposathakammam karoti.
Alankatanagamanavika tassa santikam gacchanti. Yebhuyyenassa silam bhijjati.
So tato patthaya pasada nikkhamitva uyyanam gacchati. Ta
tatrapi gacchanti. Uposatho bhijjateva. Tato cintesi maya
ato nagabhavana nikkhamitva manussalokam gantva uposathavasam vasitum
vattatiti. So tato patthaya uposathadivasesu nagabhavana nikkhamitva
ekassa paccantagamassa avidure maggasamipe vammikamatthake mama
cammadihi atthika ganhantu mam kilasappam katukama karontuti
sariram danamukhe visajjetva bhoge abhujitva nipanno uposathavasam
vasati. Mahamagge gacchanta ca agacchanta ca tam disva gandhadihi
pujitva pakkamanti. Paccantagamavasino gantva mahanubhavo
nagarajati upari mandapam katva samanta balukam okiritva gandhadihi
pujayimsu. Tato patthaya manussa mahasatte pasiditva pujam katva
puttam patthenti dhitaram patthenti.
     Mahasattopi uposathakammam karonto catuddasipannarasesu
Vammikamatthake nipajjitva patipade nagabhavanam gacchati. Tassevam
uposatham karontassa addha vitivatto. Atha nam ekadivasam sumana
nama aggamahesi aha deva tvam manussalokam gantva uposathavasam
upavasi manussaloko ca sasanko sappatibhayo sace te bhayam
uppajjeyya atha mayam yena nimittena janeyyama tam no
acikkhahiti. Atha nam mahasatto mangalapokkharaniya tiram netva sace
mam bhadde koci paharitva kilamessati imissa pokkharaniya udakam
avilam bhavissati sace supanno ganhissati udakam pakkutthissati
sace ahitundiko ganhissati udakam lohitavannam bhavissatiti.
Evam tassa tini nimittani acikkhitva catuddasiuposatham adhitthaya
nagabhavana nikkhamitva tattha gantva vammikamatthake nipajji sarirasobhaya
vammikam sobhayamano. Sarirampissa rajatadamam viya setam ahosi.
Matthako rattakambalagenduko viya. Imasmim pana jatake bodhisattassa
sariram nangalasisappamanam ahosi. Bhuridattajatake uruppamanam.
Sankhapalajatake ekadonikanavappamanam.
     Tada eko baranasivasi manavo takkasilam gantva
disapamokkhacariyassa santike alambhayanamantam ugganhitva tena maggena
attano geham gacchanto mahasattam disva aham imam sappam gahetva
gamanigamarajadhanisu kilapento dhanam uppadessamiti cintetva
dibbosadhani gahetva dibbamantam parivattetva mahasattassa santikam
agamasi. Dibbamantasutakalato patthaya mahasattassa kannesu
Tattasalakappavesanakalo viya jato matthako sikharena abhimatthiyamano
viya jato. So ko nukho esoti bhogantarato sisam ukkhipitva
olokento ahitundikam disva cintesi mama visam mahantam sacaham
kujjhitva nasavatam visajjessami etassa sariram bhasmamutthi viya
vippakirissati atha me silam khandam bhavissati na tam olokessamiti.
So akkhini nimmilitva sisam bhogantare thapesi.
Ahitundikabrahmano osadham khaditva mantam parivattetva khelam
mahasattassa sarire okkhipi. Osadhananca mantassa canubhavena
khelena phutthaphutthatthane photanam utthanakalo viya jato. Atha
nam so nangutthe gahetva akaddhitva dighato nipajjapetva
ajapadadandena uppilento dubbalam katva sisam dalham gahetva
nippili. Mahasatto mukham vivari. Athassa mukhe khelam okkhipitva
osadhamantam katva dante bhindi. Mukham lohitassa puri. Mahasatto
attano silabhedabhayena evarupam dukkham adhivasento akkhini ummiletva
olokanamattampi na kari. Sopi nagarajanam dubbalam karissamiti
nangutthato patthayassa atthini cunniyamano viya sakalasariram madditva
pattakavethimam nama vethesi tantakamajjanam nama majji nangutthe
gahetva dussapothimam nama pothesi. Mahasattassa sakalasariram
lohitamakkhitam ahosi. So mahavedanam adhivasesi. Athassa
dubbalabhavam natva vallihi pelam karitva tattha nam pakkhipitva
paccantagamam netva mahajanassa majjhe kilapesi. Niladisu vannesu
Vattacaturassadisu santhanesu anumthuladisu pamanesu yam yam brahmano
icchati mahasatto tam tadeva katva naccati phanasatampi phanasahassampi
karotiyeva. Mahajano pasiditva bahum dhanam adasi. Ekadivasameva
kahapanasahassam sahassagghanake ca parikkhare labhi. Brahmano
aditova sahassam labhitva visajjessamiti cintesi. Tam pana dhanam
labhitva paccantagameyeva tava me ettakam dhanam laddham
rajarajamahamattanam santike bahudhanam labhissamiti sakatanca sukhayanakanca
gahetva sakate parikkhare ca thapetva sukhayanake nisinno mahantena
parivarena mahasattam gamanigamadisu kilapento baranasiyam
uggasenassa ranno santike kilapetva visajjessamiti agamasi. So
manduke maretva nagaranno deti. Nagaraja punappunam
esa mam nissaya maressati tam na khadissamiti tam na khadati.
Athassa madhulaje adasi. Mahasatto sacaham gocaram ganhissami
antopelaya eva maranam bhavissatiti tepi na khadati. Brahmano
mahasattena baranasim patva dvaragamesu kilapento bahudhanam
labhi. Rajapi nam pakkosapetva amhakam kilapehiti aha.
Sadhu deva sve pannarase tumhakam kilapessamiti. Raja sve
nagaraja rajangane naccissati mahajano sannipatitva passatuti
bherincarapetva punadivase rajanganam alankarapetva brahmanam
pakkosapesi. So ratanapelaya mahasattam netva cittatthare pelam
thapetva nisidi. Rajapi pasada oruyha mahajanaparivuto rajasane
Nisidi. Brahmano mahasattam niharitva naccapesi. Mahajana
sakabhavena santharetum asakkonta celukkhepasatasahassani pavattenti.
Bodhisattassa upari sattaratanavassam vassi. Tassa gahitassa maso
sampuri. Ettakam kalam niraharova ahosi.
     Sumana aticirayati me piyasamiko idanissa idha
anagacchantassa maso sampunno kinnu kho karananti gantva
pokkharanim olokenti lohitavannam udakam disva ahitundikena
gahito bhavissatiti natva nagabhavana nikkhamitva vammikasantikam gantva
mahasattassa gahitatthananca kilamitatthananca disva roditva kanditva
paccantagamam gantva pucchitva tam pavuttim sutva baranasim gantva
rajadvare parisamajjhe akase rodamana atthasi. Mahasatto
naccantova akasam olokento tam disva lajjito pelam pavisitva
nipajji. Raja tassa pelam pavitthakale kinnu kho karananti
itocitoca olokento tam akase thitam disva pathamam gathamaha
        ka nu vijjurivabhasi       osadhi viya taraka
        devata nusi gandhabbi       na tam mannami manusiti.
     Tattha na tam mannami manusiti ahantam manusiti na mannami
taya devataya gandhabbiya va bhavitum vattatiti.
     Idani tesam vacanapativacanagatha honti
        namhi devi na gandhabbi      na maharaja manusi
        nagakannasmi bhaddante     atthenamhi idhagata.
                Vibbhantacitta kupitindriyasi
                nettehi te varigana savanti
                kinte nattham kim pana patthayana
                idhagata nari tadimgha bruhi.
                Yamuggatejo uragoti cahu
                nagoti nam ahu manussaloke
                tamaggahi puriso jivikattho
                tam bandhana munca pati mameso.
                Kathanvayam balaviriyupapanno
                hatthatthamagacchi vanibbakassa
                akkhahi me nagakanne tamattham
                katam vijanemu gahitanagam.
                Nagarampi nago bhasmam kareyya
                tathahi so balaviriyupapanno
                dhammanca nago apacayamano
                tasma parakkamma tapo karotiti.
     Tattha atthenamhiti aham ekakaranam paticca idhagata.
Kupitindriyati kilitthaindriya. Variganati assubindughata.
Uragoti cahuti uragoti cayam mahajano kathesi. Tamaggahi
purisoti ayam puriso tam nagarajanam jivikatthaya aggahesi.
Vanibbakassati imassa vanibbakassa purisassa katham nu esa mahanubhavo
Samano hatthattham agatoti pucchi. Dhammancati pancasiladhammam
uposathavasadhammanca garum karonto viharati tasma imina purisena
gahitopi sacaham imassa upari nasavatam visajjessami bhasmamutthi
viya vippakirissati evam me silam bhijjissatiti silabhedabhayena
parakkamma tam dukkham adhivasetva tapo karoti viriyameva
karotiti aha.
     Raja pana katham paneso imina gahitoti pucchi. Athassa
acikkhanti gathamaha
                catuddasi pannarasi ca raja
                catuppathe sammati nagaraja
                tamaggahi puriso jivikattho
                tam bandhana munca pati mamesoti.
     Tattha catuppatheti catukkamaggassa asannatthane ekasmim vammike
caturangasamannagatam adhitthanam adhitthahitva uposathavasam vasanto
nipajjiti attho. Tam bandhanati tam evam dhammikam gunavantam
nagarajanam etassa dhanam datva pelabandhana pamuncati.
     Evanca pana vatva punapi tam yacanti dve gatha abhasi
        solasitthisahassani       amuttamanikundala
        varigehe saya nari    tapi tam saranam gata.
                Dhammena mocehi asahasena
                gamena nikkhena gavam satena
                Ossatthakayo urago caratu
                punnatthiko muncatu bandhanasmati.
     Tattha solasitthisahassaniti ma tvam esa yo va so va
daliddanagoti mannittha etassa hi ettaka sabbalankarapatimandita
itthiyova sesa sampatti apparimanati dasseti.
Varigehe sayati udakacchadanam udakagabbham katva tattha sayanasila.
Ossatthakayoti nissatthakayo hutva. Caratuti caratu.
     Atha nam raja tisso gatha abhasi
                dhammena mocemi asahasena
                gamena nikkhena gavam satena
                ossatthakayo urago caratu
                punnatthiko muncatu bandhanasma.
        Dammi nikkhasatam ludda       thulanca manikundalam
        caturassanca pallankam       ummarapupphasannibham.
        Dve ca sadisiyo bhariya   usabhanca gavam satam
                ossatthakayo urago caratu
                punnatthiko muncatu bandhanasmati.
     Tattha luddati raja uragam mocetum ahitundikam amantetva
tassa databbam deyyadhammam desento evamaha. Gatha pana
hettha vuttatthayeva.
     Atha nam luddako aha
                vinapi dana tava vacanam janinda
                muncemi nam uragam bandhanasma
                ossatthakayo urago caratu
                punnatthiko muncatu bandhanasmati.
     Tattha tava vacananti maharaja vinapi danena tava vacanameva
amhakam garu. Muncemi nanti muncissami etanti vadati.
     Evanca pana vatva mahasattam pelato nihari. Nagaraja
nikkhamitva pupphantaram pavisitva tam attabhavam vijahitva manavakavannena
alankatasariro hutva pathavim bhinditva viya nikkhanto atthasi.
Sumana akasa otaritva tassa santike thita. Nagaraja
anjalim paggayha rajanam namassamano atthasi.
     Tamattham pakasento sattha dve gatha abhasi
        mutto campeyyako nago  rajanam etadabravi
        namo te kasirajatthu     namo te kasivaddhana
        anjalim te pagganhami     passeyyam me nivesanam.
                Addha hi dubbissasametamahu
                yam manuso vissase amanusamhi
                sace ca mam yacasi etamattham
                dakkhemu te naga nivesananiti.
     Tattha passeyyam me nivesananti mama nivesanam campeyyanagabhavanam
ramaniyam passitabbayuttakam tam te aham dassetukamo tam sabalavahano
gantva passa narindati vadati .  dubbissasanti dubbissasaniyam.
Sace cati sace mam yacasi passeyyama te nivesanani apica
kho na tam saddahamiti vadati.
     Atha nam saddahapetum sapatham karonto mahasatto dve gatha
abhasi
                sacepi vato girimavaheyya
                cando ca suriyo ca chama tapeyyum
                sabba ca najjo patisotam vaheyyum
                na tvevaham raja musa bhaneyyam.
                Nabham phaleyya udadhi visusse
                samvatteyya bhutadhara basundhara
                siluccayo meru samulamubbahe
                na tvevaham raja musa bhaneyyanti.
     Tattha samvatteyya bhutadhara basundharati ayam bhutadharati ca
vasundharati ca samkhyam gata mahapathavi kilanjam viya samvatteyya.
Samulamubbaheti evam mahasinerupabbato samulo utthaya puranapunnam
viya akase ubbahe pakkhandeyya.
     So mahasattena evam vutte asaddahanto punapi tameva gatham
vatva
                Addha hi dubbissasametamahu
                yam manuso vissase amanusamhi
                sace ca mam yacasi etamattham
                dakkhemu te naga nivesananiti
tvam maya katagunam janitum arahasi saddahitum pana yuttabhavam va
ayuttabhavam va aham janissamiti pakasento itaram gathamaha
                tumhe khottha ghoravisa ulara
                mahateja khippakopava hotha
                mama karana bandhanasma pamutto
                ahosi no janitave kataniti.
     Tattha ularati ularavisa. Janitaveti janitum.
     Atha nam saddahapetum puna sapatham karonto mahasatto gathamaha
                so paccatam niraye ghorarupe
                ma kayikam satamalattha kinci
                pelaya bandho maranam upetu
                yo tadisam kammakatam na janeti.
     Tattha paccatanti paccatu. Kammakatanti katakammam evam
gunakarakam tumhadisam yo na janati so evarupo hotuti vadati.
     Athassa raja saddahitva thutim karonto gathamaha
                saccappatinna tavamesa hotu
                akkodhano hohi anupanahi
                Sabbanca te nagakulam supanna
                aggiva gimhasu vivajjayantuti
     tattha tavamesa hotuti tava esa patinna sacca hotu. Aggiva
gimhasu vivajjayantuti yatha manussa gimhakale santapam anicchanta
jalamanam aggim vivajjayanti evam vivajjayantu duratova pariharantu.
     Mahasattopi ranno thutim karonto itaram gathamaha
                anukampasi nagakulam janinda
                mata yatha suppiya ekaputtam
                ahanca te nagakulena saddhim
                kahami veyyavatikam ularanti.
     Tam sutva raja nagabhavanam gantukamo senagamanasajjam katum
anapento gatha abhasi
                yojentu ve rajarathe sucitte
                kambojake assatare sudante
                nage ca yojentu suvannakappane
                dakkhemu nagassa nivesananiti.
     Tattha kambojake assatare sudanteti susikkhite kambojaratthasambhave
assatare yojentu.
     Itara abhisambuddhagatha
                bherimudinga panava ca sankha
                avajjayimsu uggasenaranno
                Payasi raja bahu sobhamano
                purakkhato nariganassa majjheti.
     Tattha bahu sobhamanoti bhikkhave so baranasiraja solasahi
narisahassehi purakkhato parivarito tassa nariganassa majjhe
baranasito nagabhavanam gacchanto ativiya sobhamano payasi.
     Tassa nagara nikkhamanakaleyeva mahasatto attano anubhavena
nagabhavanam sabbaratanamayapakaranca dvarattalake ca dissamanarupe
katva nagabhavanagamimaggam alankatapatiyattam mapesi. Raja saparivaro
tena maggena nagabhavanam pavisitva ramaniyam bhumibhaganca pasade
ca addasa.
     Tamattham pakasento sattha aha
        suvannacittakam bhumim         addakkhi kasivaddhano
        suvannamaye ca pasade    veluriyaphalakatthate.
        Sa raja pavisi byamham    campeyyassa nivesanam
        adiccavannupanibham         kamsavijjupabhassaram.
        Nanarukkhehi sanchannam     nanagandhasamiritam
        so pavekkhi kasiraja   campeyyassa nivesanam.
        Pavitthasmim kasiranne      campeyyassa nivesane
        dibba turiya pavajjimsu     nagakanna ca naccayum.
                Tam nagakanna caritam ganena
                anvaruhi kasiraja pasanno
                Nisidi sovannamayamhi pithe
                sapassaye candanasaralitteti.
     Tattha suvannacittakanti suvannavalukaya santhatam. Byamhanti
alankatanagabhavanam. Campeyyassati nagabhavanam pavisitva
campeyyanagarajassa nivesanam pavisi. Kamsavijjupabhassaranti meghamukhe
suvannasataramsivijju viya obhasamanam. Nanagandhasamiritanti nanavidhehi
dibbagandhehi anusancaritam. Caritam ganenati tam nivesanam nagakannanam
ganena caritam anucaritam. Candanasaralitteti dibbasaracandanena
anulitte.
     Tattha nisinnamattassevassa nanaggarasasampannadibbabhojanam
upanamesum. Tatha solasannam itthisahassanam sesarajaparisaya ca. So ca
sattahamattam sapariso dibbannapanadini paribhunjitva dibbehi
kamagunehi abhiramitva sukhasayane nisinno mahasattassa yasam vannetva
nagaraja kasma pana tvam evarupam sampattim pahaya manussaloke
vammikamatthake nipajjitva uposathavasam vasiti pucchi. Sopissa kathesi.
     Tamattham pakasento sattha aha
                so tattha bhutva ca atho ramitva
                campeyyakam kasiraja avoca
                vimanasetthani imani tuyham
                adiccavannani pabhassarani
                Netadisam atthi manussaloke
                kimatthiyam naga tapo karosi.
                Ta kambukayuradhara suvattha
                vattanguli tambatalupapanna
                paggayha payenti anomavanna
                netadisam atthi manussaloke
                kimatthiyam naga tapo karosi.
                Najjova tema puthulomamaccha
                adasasakuntabhiruda sutittha
                netadisam atthi manussaloke
                kimatthiyam naga tapo karosi.
                Konca mayura diviya ca hamsa
                vaggussara kokila sampatanti
                netadisam atthi manussaloke
                kimatthiyam naga tapo karosi.
                Amba ca sala tilaka ca jambuyo
                uddalaka pataliyo ca phulla
                netadisam atthi manussaloke
                kimatthiyam naga tapo karosi.
                Ima ca te pokkharanna samantato
                dibya ca gandha satatam sampavayanti
                Netadisam atthi manussaloke
                kimatthiyam naga tapo karosi.
                Na puttahetu na dhanassa hetu
                ayuno vapi janinda hetu
                manussayonim abhipatthayano
                tasma parakkamma tapo karomiti.
     Tattha tati solasasahassanagakanna sandhayaha. Kambukayuradharati
suvannabharanadhara. Vattanguliti pavalankurasadisavattanguli.
Tambatalupapannati abhirattehi hatthapadatalehi samannagata. Payentiti
dibbapanam ukkhipitva tam payenti. Puthulomamacchati puthulapattehi
nanamacchehi samannagata. Adasasakuntabhirudati adasasankhatehi
sakunehi abhiruda. Sutitthati sundaratittha. Diviya ca hamsati
dibbahamsa ca. Sampatantiti manunnaravam ravanta rukkhato rukkham
sampatanti. Dibya gandhati tasu pana pokkharanisu satatam dibya
gandha pavayanti. Abhipatthayanoti patthayanto vicarami. Tasmati
tena karanena parakkamma viriyam paggahetva tapo karomi uposatham
karomi uposatham upavasamiti.
     Evam vutte raja mahasattassa thutim karonto gathamaha
                tvam lohitakkho vihatantaramso
                alankato kappitakesamassu
                Surosito lohitacandanena
                gandhabbarajava disa pabhasasi.
                Deviddhipattosi mahanubhavo
                sabbehi kamehi samangibhuto
                pucchami tam nagaraje tamattham
                seyyo ito kena manussalokoti.
     Tattha surositoti suvilitto.
     Athassa acikkhanto nagaraja aha
                janinda nannatra manussaloka
                suddhi va samvijjati samyamo va
                ahanca laddhana manussayonim
                kahami jatimaranassa antanti.
     Tattha suddhi vati maharaja annatra manussaloka
amatanibbanasankhata suddhi va silasamyamo va natthi. Antanti manussayonim
laddha jatijaramaranassa antam karissamiti tapo karomiti.
     Tam sutva raja gathamaha
                addha have sevitabba sapanna
                bahussuta ye bahuthanacintino
                nariyo ca disvana tvanca naga
                kahami punnani anappakaniti.
     Tattha nariyo cati ima tava nagakannayo ca tvanca
disva bahupunnani karissamiti vadati.
     Atha nam nagaraja aha
                addha have sevitabba sapanna
                bahussuta ye bahuthanacintino
                nariyo ca disvana mamanca raja
                karohi punnani anappakaniti.
     Tattha karohiti kareyyasi maharajati.
     Evam vutte uggaseno gantukamo hutva nagaraja ciram
vasimha gamissamati apucchi.
     Atha nam mahasatto tenahi maharaja yavadicchakam dhanam
ganhahiti dhanam dassento aha
                idanca me jatarupam pahutam
                rasi suvannassa ca talamatta
                ito haritva sovannagharani karaya
                rupiyassa ca pakaram karontu.
                Muttananca vahasahassani panca
                veluriyamissanam ito haritva
                antepure bhumiyam santharantu
                nikkaddama hehiti niraja ca.
                Etadisam avasa rajasettha
                vimanasettham bahu sobhamanam
                baranasim nagaram iddha phitam
                rajjanca karesi anomapannati.
     Tattha rasiti tesu tesu thanesu talappamana rasiyo.
Sovannagharaniti suvannagehani. Nikkaddamati evam sante antepure
bhumi nikkaddama ca niraja ca bhavissati. Etadisanti evarupam
suvannamayam rajatamayam pakaram muttaveluriyasanthatam bhumibhagam. Phitanti
phitam eva baranasinagaram avasa. Anomapannati alamakapanna.
     Raja tassa katham sutva adhivasesi. Mahasatto nagabhavane
bherincarapetva sabbe rajapurisa yavadicchakam hirannasuvannadikam
dhanam ganhantuti ranno ca anekehi sakatasatehi dhanam pesesi.
Raja mahantena yasena nagabhavana nikkhamitva baranasimeva gato.
Tato patthaya kira jambudipatalam sahirannam jatam.
     Sattha imam dhammadesanam aharitva evam poranakapandita
nagasampattim pahaya uposathavasam vasimsuti vatva jatakam samodhanesi
tada ahitundiko devadatto ahosi sumana rahulamata ahosi
uggaseno sariputto ahosi campeyyanagaraja pana ahamevati.
                   Campeyyajatakam nitthitam.
                         Dasamam.
                    --------------



             The Pali Atthakatha in Roman Book 41 page 111-131. http://84000.org/tipitaka/atthapali/read_rm.php?B=41&A=2270&modeTY=2              อรรถกถาบาลีอักษรไทย :- http://84000.org/tipitaka/atthapali/read_th.php?B=41&A=2270&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=27&i=2180              เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=8706              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=9223              The Pali Tipitaka in Roman Character :- http://84000.org/tipitaka/read/roman_read.php?B=27&A=9223              Contents of The Tipitaka Volume 27 http://84000.org/tipitaka/read/?index_27

first pageprevious pagedispage pageNumbernext pagelast page chage to ROMAN letter

บันทึก ๖ กุมภาพันธ์ พ.ศ. ๒๕๖๑. การแสดงผลนี้อ้างอิงข้อมูลจากอรรถกถาฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ DhammaPerfect@yahoo.com