|
| บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
Hatthipalajatakam
cirassam vata passamati idam sattha jetavane viharanto
mahabhinekkhammam arabbha kathesi.
Tada hi sattha na bhikkhave idaneva pubbepi tathagato
nekkhammam nikkhantoyevati vatva atitam ahari.
Atite baranasiyam esukari nama raja ahosi. Tassa
purohito daharakalato patthaya piyasahayo te ubhopi aputtaka
ahesum. Te ekadivasam sukhasamaye nisinna mantayimsu amhakam issariyam
Mahantam putto va dhita va natthi kinnu kho kattabbanti.
Tato raja purohitam aha samma sace tava gehe putto jayissati
mama rajjassa samiko bhavissati sace mama putto jayissati tava
gehe bhoganam samiko bhavissatiti. Evam ubhopi annamannam sankaramakamsu.
Athekadivasam purohito bhogagamam gantva agamanakale dakkhinadvarena
nagaram pavisanto bahinagare ekam bahuputtikam nama duggatitthim
passi. Tassa satta putta sabbeva aroga eko pacanabhajanam
kapallam ganhi eko sayanakatasarakam eko purato gacchati
eko pacchato gacchati eko angulim ganhi eko anke nisinno
eko khandhe. Atha nam purohito pucchi bhadde imesam darakanam
pita kuhinti. Sapi imesam pita nama nibaddho natthiti. Evarupe
satta putte kinti katva alatthati. Sa annam gahanam apassanti
nagaradvare thitam nigrodharukkham dassetva sami ekasmim nigrodhe
adhivatthaya devataya santike patthetva labhim etaya me putta
dinnati aha. Purohito tenahi gaccha tvanti ratha oruyha
nigrodhamulam gantva sakhayam gahetva caletva ambho devate
tvam ranno puttam na desi ranno santika kim nama alabhasi
raja te anusamvaccharam sahassam visajjetva balikammam kareti tassa
putte na desi etaya duggatitthiya tava ko upakaro kato
yenassa satta putte adasi sace amhakam ranno puttam na
desi ito tam sattame divase samulakam chinditva khandakhandikam
Karessamiti rukkhadevatam tajjetva pakkami. So etena niyameneva
punadivasepi punadivasepiti patipatiya cha divase kathesi. Chatthe pana
divase sakhayam gahetva rukkhadevate ajjhekarattimattakameva sesam
sace me ranno puttavaram na desi sve tam nitthapessamiti
aha. Rukkhadevata avajjitva tam karanam tattato natva ayam
brahmano puttam alabhanto mama vimanam nasessati kena nukho
upayena tassa puttam datum vattatiti catunnam maharajanam santikam
gantva tamattham arocesi. Te mayam tassa puttam datum na
sakkhisasamati vadimsu. Atthavisatiyakkhasenapatinam santikam agamasi. Tepi
tathevahamsu. Sakkassa devaranno santikam gantva kathesi. Sopi
labhissati nukho raja anucchavike putte udahu noti upadharento
punnavante cattaro devaputte passi. Te kira purimabhave
baranasiyam pesakara hutva tena kammena laddhakam pancakotthasam
katva cattaro kotthase paribhunjimsu pancamam gahetva ekatova danam
dadamsu te tato cuta tavatimsabhavane nibbattimsu tato yamabhavane
nibbattimsuti evam anulomapatilomam chasu devalokesu sampattim anubhavanta
vicaranti. Tada pana nesam tavatimsabhavanato cavitva yamabhavanam
gamanavare sakko tesam santikam gantva pakkositva marisa tumhehi
manussalokam gantum vattati esukariranno aggamahesiya kucchismim
nabbattathati aha.
Te tassa vacanam sutva sadhu deva gamissama na panamhakam
Rajakulenattho atthi purohitassa gehe nibbattetva daharakaleyeva
kame pahaya pabbajissamati vadimsu. Sakko sadhuti tesam
patinnam gahetva agantva rukkhadevataya tamattham arocesi.
Sa tutthamanasa sakkam vanditva attano vimanameva gata.
Purohitopi punadivase balavapurise sannipatapetva vasipharasuadini
gahapetva rukkhamulam gantva rukkhasakhaya gahetva ambho
devate ajja mayham puttam yacantassa sattamo divaso idani te
nitthanakaloti aha. Tato rukkhadevata mahantenanubhavena
khandhavivarato nikkhamitva madhurena sarena tam amantetva brahmana
titthatu eko putto cattaro te putte dassamiti aha. Mama
puttenattho natthi amhakam ranno puttam dehiti. Tuyheva
dammiti. Tenahi mama dve dehi ranno dve dehiti. Ranno na
demi cattaropi tuyheva demi taya ca laddhamattava bhavissanti
agare athatva daharakaleyeva pabbajissantiti. Tvam ranno
kevalam putte dehi apabbajjanakaranam pana amhakam bharoti.
Sa tassa puttavaram datva attano bhavanam pavisi. Tato patthaya
devataya sakkaro maha pavattati. Jetthakadevaputto cavitva
purohitassa brahmaniya kucchimhi nibbatti. Tassa namagahanadivase
hatthipaloti namam katva apabbajjanatthaya hatthigopake
paticchapesum. So tesam santike vaddhati. Tassa padasa gamanakale
dutiyo cavitva tassa kucchimhi nibbatti. Tassapi jatakale
Assapaloti namam karimsu. So assagopakanam santike vaddhati.
Tatiyassa jatakale gopaloti namam karimsu. So gopalakehi
saddhim vaddhati. Catutthassa jatakale ajapaloti namam karimsu.
So ajapalehi saddhim vaddhati. Te vuddhimanvaya sobhaggappatta
ahesum.
Atha nesam pabbajitabhayena ranno vijita pabbajite niharimsu.
Sakalakasikaratthe ekapabbajitopi nahosi. Te kumara atipharusa
ahesum. Yaya disaya gacchanti taya disaya ahariyamanam pannakaram
vilumpanti. Hatthipalassa solasavassakale sarirasampattim disva
raja ca purohito ca kumara mahallaka jata chattussapanasamayo
tesam kinnu kho katabbanti mantetva ete abhisittakalato
patthaya atisura bhavissanti tato tato pabbajita
agamissanti te disva pabbajissanti etesam pabbajitakale
janapada ullola bhavissanti vimamsissama tava ne paccha
abhisincissamati cintetva ubhopi isivesam gahetva bhikkhaya caranta
hatthipalakumarassa nivesanadvaram agamamsu. Kumaro te disva
tuttho pasanno upasankamitva vanditva tisso gatha abhasi
cirassam vata passama brahmanam devavanninam
mahajatam kharidharam pankadantam rajassiram.
Cirassam vata passama isim dhammagune ratam
kasayavatthavasanam vakaciram paricchadam.
Asanam udakam pajam patti ganhatu no bhavam
agghe bhavantam pucachama aggham kurutu no bhavanti.
Tattha brahmananti bahitapapam brahmanam. Devavanninanti
setthavanninam ghoratapam parimanitindriyam pabbajitattabhavam uggatapanti
attho. Kharidharanti kharibharadharam. Isinti silakkhandhadayo pariyesitva
thitam. Dhammagune ratanti sucaritakotthase abhiratam. Asananti
idam tesam nisidanatthaya asanam pannapetva gandhodakanca
padapunchananca abbhanjatelanca upanetva aha. Aggheti ime
sabbepi asanadayo agghe bhavantam pucchama. Kurutu noti ime
no agghe bhavam patigganhatuti.
Evam so tesu ekekam varena varena aha. Atha nam
purohito aha tata hatthipala tvam amhe ke imeti mannamano
evam kathesiti. Himavantaka isayoti. Na mayam tata isayo
esa raja esukari aham te pita purohitoti. Atha kasma
isivesam ganhathati. Tava vimamsanatthayati. Mama kim vimamsathati.
Sace amhe disva na pabbajissasi atha tam rajje abhisincitum
agatamhati. Tata na me rajjenattho pabbajissamahanti.
Atha nam pita tata hatthipala nayam kalo pabbajjayati vatva
yathaajjhasayam anusasento catuttham gathamaha
adhicca vede pariyesa vittam
putte gehe tata patitthapetva
Gandhe rase paccanubhotu sabbam
arannam sadhu muni so pasatthoti.
Tattha adhiccati ajjhayitva. Putteti chattam ussapetva
natake varena upatthapetva puttadhitahi vaddhitva te putte
gehe patitthapetvati attho. Sabbanti ete ca gandharase sesanca
sabbam vatthukamam anubhavitva. Arannam sadhu muni so pasatthoti
paccha mahallakakale pabbajitassa arannam sadhu laddhakam hoti yo
evarupe kale pabbajati so muni buddhadihi ariyehi pasatthoti vadati.
Tato hatthipalo gathamaha
veda na sacca na ca vittalabho
na puttalabhena jaram vihanti
gandhe rase muccanamahu santo
sakammuna hoti phalupapattiti.
Tattha na saccati yam sagganca magganca vadanti na tam
sadhenti tuccha nissara nipphala. Vittalabhoti dhanalabhopi
pancasadharanatta sabbo ekasabhavo na bhavissati. Na jaranti
tata jaram va byadhimaranam va na koci puttalabhena patibahitum
samattho nama atthi dukkhamula hete upadhayo. Gandhe raseti
gandhe ca rase ca sesaarammanesu ca muccanamuttimeva buddhadayo
pandita kathenti. Sakammunati attana katakammeneva sattanam
Phalupapatti phalanipphatti hoti kammassaka hi tata sattati.
Kumarassa vacanam sutva raja gathamaha
addha hi saccam vacanam tavetam
sakammuna hoti phalupapatti
jinna ca matapitaro tavayime
passeyyu tam vassasatam arogyanti.
Tattha vassasatam arogyanti ete vassasatam arogyam tam passeyyum
tvampi vassasatam jivanto matapitaro posassuti vadati.
Tam sutva kumaro deva tvam kinnametam vadesiti vatva
dve gatha abhasi
yassassu sakkhi maranena raja
jaraya mitti naravira settha
yo vapi janna na marissam kadaci
passeyyu tam vassasatam arogyam.
Yathapi navam purisodakamhi
ereti cenam upaneti tiram
evampi byadhi sasatam jara ca
upaneti maccuvasamantakassati.
Tattha sakkhiti mittadhammo. Maranenati datto mitto
matoti sammatimaranena. Jarayati pakatajaraya hi saddhim yassa
metti bhaveyya yassetam marananca jara ca mittabhavena
Nadhigaccheyyati attho. Ereti cenanti maharaja yatha nama puriso
nadititthe udakamhi navam thapetva paratiragamijanam aropetva sace
arittena uppilento piyena va kaddhanto caleti ghateti atha
nam paratiram upaneti evam byadhi ca jara ca niccam antakassa
maccuno vasam upanentiyevati.
Evam imesam sattanam jivitasankharassa parittabhavam dassetva
maharaja tumhe titthatha tumhehi saddhim kathentameva mam byadhi ca
jara ca maranam ca upagacchanti appamatta hothati ovadam
datva rajananca pitaranca vanditva attano paricarike gahetva
baranasirajjam pahaya pabbajissamiti nikkhami. Pabbajja nama
esa sobhana bhavissatiti hatthipalakumarena saddhim mahajano nikkhami.
Yojanika parisa ahosi. So taya parisaya saddhim gangatiram
patva gangaya udakam oloketva kasinaparikammam katva jhanam
nibbattetva cintesi ayam samagamo maha bhavissati mama tayo
kanitthabhataro matapitaro raja deviti sabbe saparisa pabbajissanti
baranasi sunna bhavissati yava etesam agamana idheva
vasissamiti. So tattheva mahajanassa ovadam dadanto nisidi.
Punadivase raja ca purohito ca cintayimsu hatthipalakumaro tava
rajjam pahaya mahajanam adaya pabbajissamiti gantva gangatire
nisidi assapalam vimamsitva abhisincissamati. Te isiveseneva
tassapi gehadvaram agamamsu. Sopi te disva pasannamanaso
Upasankamitva cirassam vata passamiti adini vatva tatheva patipajji.
Tepi tam tatheva vatva attano agatakaranam kathayimsu. So mama
bhatike hatthipalakumare sante pathamataram mayhameva setacchattam
papunatiti pucchitva tata bhata tena mayham rajjenattho
pabbajissamiti vatva nikkhantoti vutte kaham pana so idaniti
gangatire nisinnoti vutte tata mama bhatara chadditakhelena mama
kammam natthi bala hi parittapanna satta etam kilesam pajahitum
na sakkonti aham pana jahissamiti. Ranno ca pitu ca dhammam
desento dve gatha abhasi
panko ca kama palipo ca kama
manohara duttara maccudheyya
etasmim panke palipe visanna
hinattarupa na taranti param.
Ayam pure luddamakasi kammam
svayam gahito na hi mokkhito me
orundhiya nam parirakkhissami
mayam puna luddamakasi kammanti.
Tattha pankoti yo koci kaddamo. Palipoti sukhumavalikamisso
sanhakaddamo. Tattha kamo laggapanavasena panko nama
osidapanavasena palipo namati vutto. Duttarati duratikkama.
Maccudheyyati maccuno adhitthanam. Etesu hi lagga ceva anupavittha
Ca satta uttaritum asakkonta dukkhakkhandhapariyaye vuttappakaram
dukkhanceva marananca papunanti. Tenaha etasmim panke palipe
visanna hinattarupa na taranti paranti. Tattha visannati
byasanna. Byasannatipi patho ayameva attho. Hinattarupati
hinacittasabhava. Paranti nibbanaparam gantum na sakkonti.
Ayanti maharaja ayam mamattabhavo pubbe assagopakehi saddhim
vaddhanto mahajanassa vilumpanahethanadivasena bahum luddam sahasikakammam
akasi. Svayam gahitoti so ayam tassa kammassa vipako maya
gahito. Na hi mokkhito meti samsarappavatte sati nahi mokkho
ito akusalaphalato mamatthi. Orundhiya nam parirakkhissamiti idani
nam kayavacimanodvarani pidahanto orundhitva parirakkhissami.
Kimkarana. Mayam puna luddamakasi kammanti aham hi ito patthaya
papam akatva kalyanameva karissami.
Titthatha tumhe tumhehi saddhim kathentameva mam byadhijaramaranani
upagacchantiti ovadam dadanto yojanikam parisam gahetva nikkhamitva
hatthipalakumarasseva santikam gato. So tassa akase nisiditva
dhammam desento bhatika ayam samagamo maha bhavissati idheva
tava homati aha. Itaropi sadhuti sampaticchi. Punadivase
raja ca purohito ca tenevupayena gopalakumarassa nivesanam gantva
tenapi tatheva patinandita attano agamanakaranam acikkhimsu. Sopi
assapalakumaro viya patikkhipitva aham cirato patthaya
Pabbajitukamo vane natthagonam viya pabbajjam upadharento vicarami tena
me natthagonassa padam viya bhatikanam gatamaggo dittho svaham
teneva maggena gamissamiti vatva gathamaha
gavamva nattham puriso yatha vane
andhe sati raja apassamano
evam nattho esukari mamattho
soham katham na gaveseyya rajati.
Tattha esukariti rajanam alapati. Mamatthoti vane gono
viya mama pabbajjasankhato attho nattho. Sohanti so aham
ajja pabbajitanam maggam disva katham pabbajjam na gaveseyyam mama
bhatikanam gatamaggameva gamissami narindati.
Atha nam tata gopalaka ekaham dviham agamehi amhe
samassasetva paccha pabbajissasiti vadimsu. So maharaja ajja
kattabbam kammam sve karissamiti na vattabbam kalyanakammam
nama ajja ajjeva kattabbanti vatva itaram gathamaha
hiyyoti hiyati poso pareti parihayati
anagatam netamatthiti natva
uppannacchandam ko panudeyya dhiroti.
Tattha hiyyoti sveti attho. Pareti punadivase. Idam
vuttam hoti yo maharaja ajja kattabbam kammam sveti kattabbam
kammam pare pareti vatva na karoti so tato parihayati na
Tam kammam katum sakkotiti. Evam gopalako bhaddekarattam nama
kathesi. Svayamattho bhaddekarattasutte kathetabbo. Anagatam
netamatthiti yam anagatam netam atthiti natva uppannakusalacchandam
ko pandito panudeyya hareyya.
Evam gopalakumaro dvihi gathahi dhammam desetva titthatha
tumhe tumhehi saddhim kathentameva mam byadhijaramaranadini upagacchantiti
yojanikam parisam gahetva nikkhamitva dvinnam bhatikanam santikam gato.
Hatthipalo tassapi dhammam desesi. Punadivase raja ca purohito
ca tenevupayena ajapalakumarassa nivesanam gantva tenapi tatheva
patinandita attano agamanakaranam acikkhitva chattam te
ussapessamati vadimsu. Kumaro aha mayham bhatika kuhinti.
Te amhakam rajjena attho natthiti setacchattam pahaya tiyojanikaparisam
gahetva nikkhamitva gangatire nisinnati. Naham mama bhatikehi
chadditakhelam sisenadaya vicarissami ahampi pabbajissamiti. Tata
tvam tava daharo amhakam hatthabharo vayappattakale pabbajissasiti.
Atha nam kumaro kim tumhe kathetha nanu ime satta daharakalepi
mahallakakalepi marantiyeva ayam daharakale marissati ayam
mahallakakaleti kassaci hatthe va pade va nimittam natthi aham
mama maranakalam na janami tasma idaneva pabbajissamiti vatva
dve gatha abhasi
Passami voham daharim kumarim
mattupamam ketakapupphanettam
abhutva bhoge pathame vayasmim
adaya maccu vajate kumarim.
Yuva sujato sumukho sudassano
samo kusumbhaparikinnamassu
hitvana kame patigaccha geham
anujanatha mam pabbajissami devati.
Tattha voti nipatamattam. Passamicceva attho. Mattupamanti
hasabhasavilasehi mattam viya vicarantim. Ketakapupphanettanti
ketakapupphapattam viya puthulayatanettam. Abhutva bhogeti abhutvava bhoge.
Vajateti evam uttamarupadharam kumarim pathamavaye vattamanam abhutva
bhogameva matapitunam upari mahantam sokam patetva maccu gahetvava
gacchati. Sujatoti susanthito. Sumukhoti kancanadasapunnacandasadisamukho.
Sudassanoti uttamarupadharitaya sampannadassano.
Samoti suvannasamo. Kusumbhaparikinnamassuti sannisinnatthena
sukhumatthena ca tarunakusumbhakesarasadisaparikinnamassu. Imina evarupopi
kumaro maccuvasam gacchati tathavidhampi hi sinerum uppatento viya
nikkaruno maccu adaya gacchatiti dasseti. Hitvana kame
patigaccha geham anujanatha mam pabbajissami devati deva
puttadarabandhanasmim hi uppanne tam bandhanam ducchedaniyam hoti tenaham
Puretaranneva kame ca gehanca hitva idaneva pabbajissami
anujanatha manti.
Evanca pana vatva titthatha tumhe mam tumhehi saddhim
kathentanneva byadhijaramaranani upagacchantiti te ubho vanditva
yojanikam parisam gahetva nikkhamitva gangatirameva agamasi.
Hatthipalo tassapi akase nisiditva dhammam desetva samagamo
maha bhavissatiti tattheva nisidi. Punadivase purohito pallankamajjhagato
nisiditva cintesi mama putta pabbajita idani
aham ekakova manussakhanuko jatomhi ahampi pabbajissamiti.
So brahmaniya saddhim mantento gathamaha
sakhahi rukkho labhate samannam
pahinasakham pana khanumahu
pahinaputtassa mamajja hoti
vasetthi bhikkhacariyaya kaloti.
Tattha labhate samannanti rukkhoti voharam labhati. Vasetthiti
brahmanim alapati. Bhikkhacariyayati mayhampi pabbajjaya kalo
puttanam santikameva gamissamiti.
So evam vatva brahmane pakkosapesi. Satthi
brahmanasahassani sannipatimsu. Atha ne aha tumhe kim karissathati.
Tumhe pana acariyati. Aham mama puttassa santike
Pabbajissamiti. Na tumhakameva nirayo unho mayampi pabbajissamati.
So asitikotidhanam brahmaniya niyyadetva yojanikam brahmanaparisam
adaya nikkhamitva puttanam santikanneva gato. Hatthipalo
tayapi parisaya akase thatva dhammam desesi. Punadivase brahmani
cintesi mama cattaro putta setacchattam pahaya pabbajissamati
gata brahmanopi purohitatthanena saddhim asitikotidhanam
chaddetva puttananneva santikam gato ahameveka kim karissami
puttassa gatamaggeneva gamissamiti. Sa atitam udaharanam
aharanti udanagathamaha
aghasmim koncava yatha himaccaye
katani jalani padaleyyu hamsa
gacchanti putta ca pati ca mayham
saham katham nanuvaje pajananti.
Tattha aghasmim koncava yathati yatheva akase koncava
sakuna asajjamana gacchanti. Himaccayeti vassaccaye. Katani
jalani padaleyyu hamsati atite kira channavutisahassa suvannahamsa
vassarattapahonakasalim kancanaguhayam nikkhamitva vassabhayena bahi
anikkhamitva catumasam tattha vasanti. Atha nesam unnanabhi
nama makkatako guhadvare jalam bandhati. Tesu dvinnam tarunahamsanam
dvigunam vattam denti. Te thamasampannataya jalam chinditva
puratova gacchanti sesa tesam gatamaggena gacchanti. Sa
Tamattham pakasenti evamaha. Idam vuttam hoti yatheva akase
koncasakuna asajjamana gacchanti tatha himaccaye vassanatikkame
dve turanahamsa katani jalani padaletva gacchanti atha
nesam gatamaggena itare hamsa idani pana mama putta tarunahamsa
jalam viya kamajalam chinditva gata mayapi tesam gatamaggena
gantabbanti imina adhippayena gacchanti putta ca pati ca mayham
saham katham nanuvaje pajananti aha.
Iti sa katham aham evam pajananti na pabbajissami
pabbajissamiyevati sannitthanam katva brahmaniyo pakkosapetva
aha tumhe kim karissathati. Tumhe pana ayyeti. Aham
pabbajissamiti. Mayampi pabbajissamati ahamsu. Sa tam vibhavam
chaddetva yojanikam parisam gahetva puttanam santikameva gata.
Hatthipalo tayapi parisaya akase nisiditva dhammam desesi.
Punadivase raja kuhim purohitoti pucchi. Deva purohito brahmani
cassa sabbam dhanam chaddetva dviyojanikam parisam gahetva puttanam
santikam gatati. Raja assamikam dhanam amhakam papunatiti tassa
gehato dhanam aharapesi. Athassa aggamahesi raja kim karotiti
pucchitva purohitassa gehato dhanam aharapetiti vutte purohito
kuhinti pucchitva sapajapatiko pabbajjaya nikkhantoti
sutva ayam raja brahmanena ca brahmaniya ca catuhi puttehi
ca jahitaukkaram chadditakhelam viya mohena mulho attano gharam
Aharapesi upamaya nam chaddapessamiti sunato mamsam aharapetva
rajangane rasim karetva ujumaggam visajjetva jalam parikkhipapesi.
Gijjha duratova disva tassatthaya otarimsu. Tattha
sapanna jalam pasaritam natva atibharika hutva ujukam uppatitum
na sakkhissamati attana khaditamamsam chaddetva vamitva jalam
analliyitva ujukameva uppatitva gamimsu. Andhabala pana tehi
chadditam vamitam khaditva bhariya hutva ujukam uppatitum asakkonta
gantva jale bajjhimsu. Athekam gijjham anetva deviya
dassayimsu. Sa tam adaya ranno santikam gantva ehi tava
maharaja rajangane ekam kiriyam passamati sihapanjaram vivaritva
ime gijjhe olokehi maharajati vatva dve gatha abhasi
ete bhutva vamitva ca pakkamanti vihangama
ye ca bhutva na vamimsu te me hatthatthamagata.
Avami brahmano kame so tvam paccavamissasi
vantado puriso raja na so hoti pasamsiyoti.
Tattha bhutva vamitva cati mamsam khaditva vamitva ca.
Paccavamissasiti patiparibhunjissasi. Vantadoti parassa vamitakhadako.
Na pasamsiyoti so tanhaya vasiko balo buddhadihi panditehi
pasamsitabbo na hotiti.
Tam sutva raja vippatisari ahosi. Tayo bhava aditta viya
upatthahimsu. So ajjeva rajjam pahaya mama pabbajitum vattatiti
Uppannasamvego deviya thutim karonto gathamaha
panke ca posam palipe byasannam
bali yatha dubbalam uddhareyya
evampi mam udatari bhoti
pancali gathahi subhasitahiti.
Tattha byasannanti nimuggam. Visannantipi patho. Uddhareyyati
kesesu va hatthesu va gahetva ukkhipitva thale thapeyya.
Udatariti kamapankato uttarayi. Udatasitipi patho.
Ayamevattho. Uddhatasitipi patho. Uddhariti attho. Pancaliti
pancalarajadhite.
Evanca pana vatva tam khananneva pabbajitukamo hutva amacce
pakkosapetva aha tumhe kim karissathati. Tumhe pana devati
ahamsu. Aham hatthipalassa santike pabbajissamiti. Mayam pabbajissama
devati. Raja dvadasayojanike baranasinagare rajjam
chaddetva atthika setacchattam ussapentuti amaccaganaparivuto
tiyojanikam parisam gahetva kumarasseva santikam gato. Hatthipalo
tassapi parisaya akase nisinno dhammam desesi. Sattha ranno
pabbajitabhavam pakasento gathamaha
idam vatva maharaja esukari disampati
rajjam hitvana pabbaji nago chetvava bandhananti.
Punadivase nagare ohinajano sannipatitva rajadvaram gantva
Deviya arocetva nivesane pavisitva devim vanditva ekamantam
thito gathamaha
raja ca pabbajjamarocayittha
rajjam pahaya naravirasettho
tuvampi no hohi yatheva raja
amhehi gutta anusasa rajjanti.
Tattha anusasati amhehi gutta hutva dhammena rajjam karehi.
Sa mahajanassa katham sutva sesagatha abhasi
raja ca pabbajjamarocayittha
rajjam pahaya naravirasettho
ahampi eka carissami loke
hitvana kamani manoramani.
Raja ca pabbajjamarocayittha
rajjam pahaya naravirasettho
ahampi eka carissami loke
hitvana kamani yathodhikani.
Accenti kala tarayanti rattiyo
vayoguna anupubbam jahanti
ahampi eka carissami loke
hitvana kamani manoramani.
Accenti kala tarayanti rattiyo
vayoguna anupubbam jahanti
ahampi eka carissami loke
hitvana kamani yathodhikani.
Accenti kala tarayanti rattiyo
vayoguna anupubbam jahanti
ahampi eka carissami loke
sitibhuta sabbamaticca sanganti.
Tattha ekati puttadhitukilesasambadhehi muccatva imasmim loke
ekikava vicarissami. Kamaniti rupadayo kamagune. Yathodhikaniti
yena yena odhina thitani tena tena tatha thitaneva jahissami na
kinci amasissamiti attho. Accenti kalati pubbanhadayo
kala atikkamanti. Tarayantiti atuccha hutva ayusankharam
khepayamana khadayamana gacchanti. Vayogunati pathamavayadayo
tayo mandadasakadayo va dasakotthasa. Anupubbam jahantiti
uparuparikotthasam apatva tattha tattheva nirujjhanti. Sitibhutati
unhakarake unhasabhave kilese pahaya sitala hutva. Sabbamaticca
sanganti ragasangadikam sabbasangam atikkamitva ekika carissami
hatthipalassa kumarasantikam gantva pabbajissami.
Iti sa imahi gathahi mahajanassa dhammam desetva
amaccabhariyayo pakkosapetva aha tumhe kim karissathati. Tumhe
Pana ayyeti. Aham pabbajissamiti. Mayampi pabbajissamati. Sa
sadhu ayyayoti. Rajanivesane suvannakotthagaradvaradini
vivarapetva asukatthane ca asukatthane ca mahanidhanam nihitanti
suvannapatte likhapetva dinnanneva atthika harantuti vatva
suvannapattam mahatalathambhe bandhapetva nagare bherincarapetva
mahasampattim chaddetva nagara nikkhami. Tasmim khane sakalanagaram sankhubbhi
raja ca kira devi ca rajjam pahaya pabbajissamati nikkhanta mayam
idha kim karissamati. Tato manussa yathapuritaneva gehani chaddetva
putte hatthe gahetva nikkhamimsu. Sabbapana pasaritaniyameneva
thita nivattetva olokento nama nahosi. Sakalanagaram tuccham
ahosi. Devipi tiyojanikam parisam gahetva tattheva gata. Hatthipalo
tassapi parisaya akase nisinno dhammam desetva tam dvadasayojanikam
parisam gahetva himavantabhimukho payasi. Hatthipalakumaro
kira dvadasayojanikam parisam gahetva baranasim tuccham katva
pabbajissamiti mahajanam adaya himavantam gacchati kimangam pana mayanti
sakalakasikarattham sankhubbhi. Aparabhage parisa timsayojanika ahosi.
So taya parisaya saddhim himavantam gantva pavisi. Sakko avajjento
tam pavuttim natva hatthipalakumaro mahabhinikkhamanam nikkhanto
samagamo maha bhavissati vasanatthanam laddhum vattatiti vissakammam
anapesi gaccha vissakamma ayamato chattimsayojanikam vittharato
pannarasayojanam assamam mapetva pabbajitaparikkhare sampadehiti.
So sadhuti patissunitva gangatire ramaniye bhumibhage vuttappamanam
assamapadam mapetva pannasalasu katthattharapannattharaasanadini
pannapetva sabbe pabbajitaparikkhare mapesi. Ekekissa ca
pannasalaya dvare ekeko cankamo rattitthanadivatthanaparicchinno
katasudhaparikammo alambanaphalako tesu thanesu nanatarunavanasurabhi-
kusumasanchanna pupphagaccha ekekassa cankamassa kotiyam ekeko
udakabharito kupo tassa santike ekeko phalarukkho so ekova
sabbaphalani phalati. Idam sabbam devatanubhavena ahosi.
Vissakammo assamam mapetva pannasalaya pabbajitaparikkhare thapetva
yekeci pabbajitukama ime parikkhare ganhantuti jatihingulakena
bhittiya akkharani likhitva attano anubhavena bheravasadde
migapakkhino duddasike amanusse ca patikkamapetva sakatthanameva gato.
Hatthipalakumaro ekapadikamaggena sakkadattiyaassamam pavisitva
akkharani disva sakkena mama mahabhinikkhamanam nikkhantabhavo nato
bhavissatiti dvaram vivaritva pannasalam pavisitva isipabbajjam
pabbajitva nikkhamitva cankamam otaritva katipaye vare aparaparam
cankamitva sesajanakayam pabbajetva assamapadam vicarento
tarunaputtanam itthinam majjhatthane pannasalam adasi. Tato anantaram
mahallikitthinam tato anantaram majjhimitthinam samanta parikkhipitva
pana purisanam adasi. Atha eko raja baranasiyam kira raja
Natthiti agantva alankatapatiyattam nagaram oloketva rajanivesanam
aruyha tattha tattha ratanarasim disva evarupam nagaram pahaya pabbajitakalato
patthaya pabbajja namesa ulara bhavissatiti surasonde
maggam pucchitva hatthipalassa santikam payasi. Hatthipalo tassa
vanantaram agatabhavam natva patimaggam gantva akase nisinno
parisaya dhammam desetva assamapadam netva sabbaparisam pabbajesi.
Etenupayena annepi cha rajano pabbajimsu. Satta rajano
bhoge chaddayimsu. Chattimsayojaniko assamo nirantaro paripuri.
Yo kamavitakkadisu annataram vitakkesi. Mahapuriso tassa dhammam
desetva brahmaviharabhavananceva kasinabhavananca acikkhi. Te
yebhuyyena jhanabhinna nibbattetva tisu kotthasesu dve kotthasa
brahmaloke nibbattimsu. Tatiyakotthasam tidha katva eko kotthaso
brahmaloke nibbatti eko chakamasaggesu. Eko isinam paricariyam
katva manussaloke tisu kulasampattisu nibbatti. Evam hatthipalassa
sasanam apagatanirayatiracchanayonipittivisayasurakayam ahosi.
Imasmim tambapannidipe pathavicalakadhammaguttatthero katakandakaravasi
phussadevatthero uparikandakamalakavasi mahasangharakkhitatthero
malayamahadevatthero bhaggirivasi mahadevatthero gamantapabbharavasi
mahasivatthero kalavallimahamandapavasi mahanagatthero kuddalasamagamo
muggaphakkasamagamo cullasuttasomasamagamo
Ayogharapanditasamagamo hatthipalasamagamo ca sabbapaccha nikkhantasadisa
ahesum. Tenaha bhagava
abhittharetha kalyane papa cittam nivaraye
dandhanhi karoto punnam papasmim ramati manoti.
Kalyanam turiteneva katabbam.
Sattha imam dhammadesanam aharitva evam bhikkhave pubbepi
tathagato mahabhinekkhammam nikkhantoyevati vatva jatakam samodhanesi
tada esukari raja suddhodanamaharaja ahosi devi mahamaya
purohito kassapo brahmani bhaddakapilani ajapalo anuruddho
gopalo moggallano assapalo sariputto sesaparisa
buddhaparisa hatthipalo pana ahamevati.
Hatthipalajatakam nitthitam.
Terasamam.
--------------
The Pali Atthakatha in Roman Book 41 page 139-163.
http://84000.org/tipitaka/atthapali/read_rm.php?B=41&A=2856&modeTY=2
อรรถกถาบาลีอักษรไทย :-
http://84000.org/tipitaka/atthapali/read_th.php?B=41&A=2856&modeTY=2
อ่านอรรถกถาแปลไทย :-
http://84000.org/tipitaka/attha/attha.php?b=27&i=2245
เนื้อความพระไตรปิฎกฉบับหลวง :-
http://84000.org/tipitaka/read/r.php?B=27&A=8987
พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=27&A=9551
The Pali Tipitaka in Roman Character :-
http://84000.org/tipitaka/read/roman_read.php?B=27&A=9551
Contents of The Tipitaka Volume 27
http://84000.org/tipitaka/read/?index_27
        |
|
บันทึก ๖ กุมภาพันธ์ พ.ศ. ๒๕๖๑. การแสดงผลนี้อ้างอิงข้อมูลจากอรรถกถาฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]