|
| บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
Samkiccajatakam
disva nisinnam rajananti idam sattha jivakambavane viharanto
ajatasattussa pitughatakammam arabbha kathesi.
So hi devadattam nissaya tassa vacanena pitaram ghatapetva
devadattassa sanghabhedavasane bhinnaparisassa roge uppanne tathagatam
khamapessamiti mancasivikaya savatthim gacchantassa jetavanadvare
pathavim pavitthabhavam sutva devadatto sammasambuddhassa patipakkho
hutva pathavim pavisitva aviciparayano jato mayapi tam nissaya
pita dhammiko dhammaraja ghatito ahampi nukho pathavim pavisissamiti
Bhito rajjasiriya cittassadam na labhi thokam niddayissamiti niddam
upagatamattova navayojanabahalaya ayapathaviyam patetva ayasulehi
kottiyamano viya sunakhehi luncitva khajjamano viya bheravaravena
viravanto utthati.
Athekadivasam komudiya catumasiniya amaccaganaparivuto attano
yasam olokento mama pitu yaso ito mahantataro tatharupam
namaham dhammarajanam devadattam nissaya ghatesinti cintesi.
Tassevam cintentasseva kaye daho uppajji sakalasariram sedatintam
hoti. Tato ko nukho me imam bhayam vinodetum sakkhissatiti
cintetva thapetva dasabalam anno natthiti natva aham tathagatassa
mahaparadho ko nukho mam netva dassessatiti cintento na
anno koci annatra jivikati sallakkhetva tassa gahetva
gamanupayam karonto ramaniya vata bho dosina rattiti udanam
udanetva kinnukhvajja samanam va brahmanam va payirupaseyyamati
vatva puranasavakadihi puranadinam gune kathite tesam vacanam
anadayitva jivakam patipucchitva tena tathagatassa gunam kathetva
tam devo bhagavantam payirupasatiti vutto hatthina yanani kappapetva
jivakambavanam gantva tam tathagatam upasankamitva vanditva tathagatena
katapatisantharo sanditthikam samannaphalam pucchitva tathagatassa madhuram
samannaphaladhammadesanam sutva suttapariyosane upasakattam pativedetva
Tathagatam khamapetva pakkami. So tato patthaya danam dento
silam rakkhanto tathagatena saddhim samsaggam katva madhuradhammakatham sunanto
kalyanasamsaggena pahinabhayo vigatalomahamso hutva cittassadam
patilabhitva sukhena cattaro iriyapathe kappesi.
Athekadivasam dhammasabhayam katham samutthapesum avuso ajatasattu
pitughatakammam katva bhayappatto ahosi rajjasirim nissaya cittassadam
alabhanto sabbairiyapathesu dukkham anubhoti so dani tathagatam
agamma kalyanasamsaggena vigatabhayo issariyasukham anubhotiti. Sattha
agantva kayanuttha bhikkhave etarahi kathaya sannisinnati pucchitva
imaya namati vutte na bhikkhave idaneva pubbepesa pitughatakammam
katva mam nissaya sukham sayiti vatva atitam ahari.
Atite baranasiyam brahmadatto rajjam karento brahmadattakumaram
nama puttam patilabhi. Tada bodhisatto purohitassa gehe patisandhim
ganhi. Jatassevassa samkiccakumaroti namam karimsu. Te ubhopi
rajanivesane ekatova vaddhimsu. Annamannam sahayaka hutva
vayappatta takkasilam gantva sabbasippani ugganhitva paccagamimsu.
Atha raja puttassa uparajjam adasi. Bodhisattopi uparajasseva
santike ahosi. Athekadivasam uparaja pitu uyyanakilam gacchantassa
mahantam yasam disva tasmim lobham uppadetva mayham pita mama
bhatikasadiso sace etassa maranam olokessami mahallakakale
rajjam labhissami tada laddhenapi rajjena ko attho pitaram
Maretva rajjam ganhissamiti cintetva bodhisattassa tamattham
arocesi. Bodhisatto samma pitughatakammam nama bhariyam nirayamaggo
na sakka etam katum ma kariti patibahi. So punappunampi
kathetva yavatatiyam tena patibahito padamulikehi saddhim mantesi.
Te sampaticchitva ranno maranupayam vimamsimsu. Bodhisatto tam
pavuttim natva naham etehi saddhim ekako bhavissamiti matapitaro
anapucchitvava aggadvarena nikkhamitva himavantam pavisitva isipabbajjam
pabbajitva jhanabhinna nibbattetva vanamulaphalaharo vihasi.
Rajakumaropi tasmim khane pitaram marapetva mahantam yasam anubhavi.
Samkiccakumaro kira isipabbajjam pabbajitoti sutva bahu
kulaputta nikkhamitva tassa santike pabbajimsu. So mahata
isiganena parivuto tattha vasi. Sabbepi samapattilabhinoyeva.
Rajapi pitaram maretva appamattakamyeva kalam rajjasukham anubhavitva
tato patthaya bhito cittassadam alabhanto niraye kammakaranappatto
viya ahosi. So bodhisattam anussaritva sahayo me pitughatakammam
bhariyanti patisedhetva mam attano katham gahapetum asakkonto
attanam niddosam katva palayi sace so idhabhavissa na me
pitughatakammam katum adassa idampi me bhayam hareyya kaham
nukho so etarahi viharati sace tassa vasanatthanam janeyyam
pakkosapeyyam ko nukho me etassa vasanatthanam aroceyyati
cintesi. So tato patthaya antepure ca rajasabhaya ca
Bodhisattasseva vannam bhasati. Evam addhane gate so bodhisatto
raja mam sarati maya tattha gantva tassa dhammam desetva
tam nibbhayam katva gantum vattatiti cintetva pannasavassani
himavante vasitva pancasatatapasaparivuto akasenagantva dayapasse
namuyyane otaritva isiganaparivuto silapatte nisidi. Uyyanapalo
tam disva bhante ganasattha ko namati pucchitva samkiccapandito
namati ca sutva sayampi sanjanitva bhante yavaham rajanam
anemi tava idheva hotha amhakam raja tumhe datthukamoti
vatva vanditva vegena rajakulam gantva tassa agatabhavam
ranno arocesi. Raja tassa santikam gantva kattabbayuttakam
upaharam katva panham pucchi.
Tamattham pakasento sattha aha
disva nisinnam rajanam brahmadattam rathesabham
athassa pativedesi yassasi anukampako.
Samkiccayam anuppatto isinam sadhusammato
taramanarupo niyyahi khippam passa mahesinam.
Tato ca raja taramano yuttamaruyha sandanam
mittamaccaparibyulho agamasi rathesabho.
Nikkhippa panca kakudhani kasinam ratthavaddhano
balavijanim unhisam khaggachattancupahanam.
Oruyha raja yanamha thapayitva paticchadam
asinam dayapassasmim samkiccamupasankami .
Upasankamitva so raja sammodi isina saha
tam katham vitisaretva ekamantam upavisi.
Ekamantam nisinnova atha kalam amannatha
tato papani kammani pucchitum patipajjatha.
Isim pucchatha samkiccam isinam sadhusammatam
asinam dayapassasmim isisanghapurakkhatam.
Kam gatim pecca gacchanti nara dhammaticarino
aticinno maya dhammo tam me akkhahi pucchitoti .
Tattha disvati bhikkhave so uyyanapalo rajanam rajasabhayam
nisinnam disva athassa pativedesi. Yassasiti vadanto arocesiti
attho. Yassasiti maharaja yassa tvam anukampako muducitto
asi. Yassa abhinham vannam payirudahasi so ayam samkicco
isinam antare sadhu laddhakoti sammato anuppatto tava uyyane
silapatte isiganaparivuto kancanapatima viya nisinno. Taramanarupoti
maharaja pabbajita nama kule va gane va alagga tumhakam
gacchantananneva pakkameyyum tasma taramanarupo khippam niyyahi
mahantanam siladigunanam esitattapassa mahesinanti. Tatoti bhikkhave
so raja tassa vacanam sutva tato tassa vacanato anantarameva.
Nikkhippati nikkhipitva tassa kira uyyanadvaram patvava etadahosi
Pabbajita nama garutthaniya samkiccatapasassa santikam uddhatavesena
gantum ayuttanti. So manicittasuvannadandanca balavijanim kancanamayam
unhisapatam suparikkhittam mangalakhaggam setacchattam suvannapadukati
imani panca rajakakudhabhandani apanetva tena vuttam nikkhippati.
Paticchadanti tameva rajakakudhabhandam thapayitva bhandagarikassa hatthe
datva. Dayapassasminti evamnamake uyyane. Atha kalam
amannathati atha so idani panham pucchitum kaloti janati.
Paliyam pana yathakalanti. Agatassa kalanurupena panhapucchanam
amannathati attho. Patipajjathati patipajji. Peccati patigantva
paralokassa va namametam tasma paralokanti attho. Mayati
bhante maya sucaritadhammo atikkanto pitughatakammam katam tam me
akkhahi kam gatim pitughataka gacchanti katarasmim niraye paccantiti
pucchati.
Tam sutva bodhisatto tenahi maharaja sunohiti vatva
ovadam tava adasi.
Tamattham pakasento sattha aha
isi avaca samkicco kasinam ratthavaddhanam
asinam dayapassasmim maharaja sunohi me.
Uppathena vajantassa yo maggamanusasati
tassa ce vacanam kayira nassa maggeyya kantako.
Adhammam patipannassa yo dhammamanusasati
tassa ce vacanam kayira na so gaccheyya duggatinti.
Tattha uppathenati corehi pariyutthitamaggena. Maggamanusasatiti
khemamaggam akkhati. Nassa maggeyya kantakoti tassa ovadakarassa
purisassa maggato mukham corakantako na passeyya. Yo dhammanti
yo sucaritadhammam. Na soti so puriso nirayadibhedam duggatim na
gaccheyya. Uppathasadiso hi maharaja adhammo khemamaggasadiso
sucaritadhammo. Tvam pana pubbe pitaram ghatetva raja homiti
mayham kathetva maya patibahito mama vacanam akatva pitaram ghatetva
idani socasi panditanam ovadam akaronto nama coramaggapatipanna
viya mahabyasanam papunatiti.
Evamassa ovadam datva mahasatto upari dhammam desento aha
dhammo patho maharaja adhammo pana uppatho
adhammo nirayam neti dhammo papeti sugatim.
Adhammacarino raja nara visamajivino
yam gatim pecca gacchanti niraye te sunohi me.
Sanjivo kalasutto ca sanghato dve ca roruva
athaparo mahavici tapano ca patapano .
Iccete attha niraya akkhata duratikkama
akinna luddakammehi pacceka solasussada.
Kadariyatapana ghora accimanto mahabbhaya
lomahamsanarupa ca bhesma patibhaya dukkha.
Catukkona catudvara vibhatta bhagaso mita
ayopakarapariyanta ayasa patikujjita.
Tesam ayomaya bhumi jalita tejasa yuta
samanta yojanasatam phuta titthanti sabbada.
Ettha patanti niraye uddhampada avamsira
isinam ativattaro sannatanam tapassinam.
Te bhunahana paccanti maccha bila kata yatha
samvacchare asankheyye nara kibbisakarino.
Dayhamanena gattena niccam santarabahiram
niraya nadhigacchanti dvaram nikkhamanesino.
Puratthimenapi dhavanti tato dhavanti pacchato
uttarenapi dhavanti tato dhavanti dakkhinam
yam yamhi dvaram gacchanti tantadeva pithiyyati.
Bahuni vassasahassani jana nirayagamino
baha paggayha kandanti katva dukkham anappakam.
Asivisamva kupitam tejasim duratikkamam
na sadhurupe aside sannatanam tapassinam.
Atikayo mahissaso ajjano kekakadhipo
sahassabahu ucchinno isimasajja gotamam.
Arajam rajasa vaccham kisam avakriya dandaki
talova mulato chinno sa raja vibhavangato.
Upahacca manam mejjho matangasmim yasassine
saparisajjo ucchinno mejjharannam tada ahu.
Kanhadipayanasajja isim andhakavindayo
annamannam musale hantva sampatta yamasadhanam.
Athayam isina satto antalikkhacaro pure
pavekkhi pathavim cecco hinatto kalapariyayam.
Tasma hi chandagamanam nappasamsanti pandita
adutthacitto bhaseyya giram saccupasanhitam.
Manasa ce padutthena yo naro pekkhate munim
vijjacaranasampannam gantva so nirayam adho.
Ye vuddhe paribhasanti pharusupakkama jana
anapacca adayada talavatthu bhavanti te.
Yo ca pabbajitam hanti katakiccam mahesinam
sa kalasutte niraye ciram rattaya paccati.
Yo ca raja adhammattho rattham viddhamsano cuto
tapayitva janapadam tapane pecca paccati.
So ca vassasahassanam satam dibyani paccati
accisanghapareto so dukkham vedeti vedanam.
Tassa aggisikha kaya niccharanti pabhassara
tejobhakkhassa gattani lomaggehi nakhehi ca.
Dayhamanena gattena niccam santarabahiram
dukkhabhitunno nadati nago tundaddito yatha.
Yo lobha pitaram hanti dosa va purisadhamo
sa kalasutte niraye ciram rattaya paccati.
Sa tadiso paccati lohakumbhiyam
pakkanca sattihi hananti nittacam
andham karitva muttakarisabhakkham
khare nimujjanti tathavidham naram.
Tattam pakkutthitamayogulanca
dighe ca jale cirarattatapite
vikkhambhamadaya vibhajja rajjuhi
vivate mukhe samsavayanti rakkhasa.
Sama ca sona savala ca gijjha
kakolasangha ca dija ayomukha
sangamma khadanti vipphandamanam
jivham vibhajja vighasam salohitam.
Tam daddhakalam paribhinnagattam
nippothayanta anuvicaranti rakkhasa
rati hi tesam dukkhino panitare
Etadisasmim niraye vasanti
yekeci loke idha pettighatino.
Putto ca mataram hantva ito gantva yamakkhayam
bhusamapajjate dukkham attakammaphalupago.
Amanussa atibala hantaram janayantiya
ayomayehi balehi pilayanti punappunam.
Tam passavam saka gatta rudhiram attasambhavam
tambalohavilinamva tattam payenti mattiyam.
Jiguccham kunapam puti duggandham guthakaddamam
pubbalohitasankasam rahadoggayha titthati.
Tamenam kimiyo tattha atikaya ayomukha
chavim bhetvana khadanti pagiddha mamsalohite.
So ca tam nirayam patto nimuggo sataporisam
putikam kunapam vati samanta satayojanam.
Cakkhumapi hi cakkhuhi tena gandhena jiyyati
etadisam brahmadatta matughati labhe dukkham.
Khuradharamanukkamma tikkham durabhisambhavam
patanti gabbhapatiniyo duggam vettaranim nadim.
Ayomaya simbaliyo solasangulikantaka
ubhato mabhilambanti duggam vettaranim nadim.
Te accimanto titthanti aggikkhandhava araka
aditta jatavedena uddham yojanamuggata.
Ete sajanti niraye tatte tikhinakantake
nariyo ca aticariniyo nara ca paradaragu.
Te patanti adhokkhandha vivatta vihata puthu
sayanti vinividdhanga digham jagganti sambarim.
Tato ratya vivasane mahatim pabbatupamam
lohakumbhim pavajjanti tattam aggisamudakam.
Evam diva ca ratto ca dussila mohaparuta
anubhonti sakam kammam pubbe dukkatamattano.
Ya ca bhariya dhanakkita samikam atimannati
sassum va sassuram vapi jettham vapi nanandanam
tassa vankena jivhaggam nibbahanti sabandhanam.
Sa byamamattam kiminam jivham passati attano
vinnapetum na sakkoti tapane pecca paccati.
Orabbhika sukarika macchika migabandhaka
cora goghataka ludda avanne vannakaraka.
Sattihi lohakutehi nettimsehi usuhi ca
hannamana kharanadim papatanti avamsira.
Sayam pato kutakari ayokutehi hannati
tato vantam durattanam paresam bhunjate sada.
Dhanka bherandaka gijjha kakola ca ayomukha
vipphandamanam khadanti naram kibbisakarinam.
Ye migena migam hanti pakkhim va pana pakkhina
asanto rajasa channa gantva te nirayussadanti.
Tattha dhammo pathoti dasakusalakammapathadhammo khemo appatibhayo
sugatimaggo. Visamajivinoti adhammena kappitajivika. Nirayeti te
etesam nibbattaniraye kathemi. Sunohi meti mahasatto ranna
pitughatakanam nibbattanirayam pucchitopi pathamam tam adassetva attha
mahaniraye solasa ca ussadaniraye dassetum evamaha. Kimkarana.
Pathamam hi tasmim dassiyamane raja phalitena hadayena tattheva mareyya
imesu pana nirayesu paccamanasatte disva ditthanugatiko hutva
aham viya annepi bahu papakammino atthi aham etesam antare
paccissamiti sanjatupatthambho arogo bhavissatiti te pana niraye
dassento mahasatto pathamam iddhibalena pathavim dvidha katva paccha
dassesi. Tesam vacanattho. Nirayapalehi pajjalitani nanavudhani
gahetva khandakhandikam chinna nerayikasatta punappunam sanjivanti
etthati sanjivo. Nirayapala punappunam nadanta vagganta pajjalitani
nanavudhani gahetva jalitaya lohapathaviya nerayike aparaparam
anubandhitva paharitva jalitapathaviyam patite jalitakalasuttam patetva
Jalitapharasum gahetva sayam unnadanta mahantena attassarena viravante
atthamse solasamse karonta ettha gacchantiti kalasutto. Mahanta
jalitaayapabbata ghatenti etthati sanghato. Tattha kira satte
navayojanaya jalitaayapathaviya yava katito pavesetva niccalam karonti.
Atha puratthimato mahanto jalito ayapabbato samutthaya asani viya
viravanto agantva te satte sanhakaraniyam tile pimsanto viya gantva
pacchimadisaya titthati. Pacchimadisato samutthitopi tatheva gantva
puratthimadisaya titthati. Dve pana ekato samagantva ucchuyante
ucchukhandani viya pilenti. Evam tattha bahuni vassasatasahassani
dukkham anubhonti.
Dve ca roruvati jalaroruvo ca dhumaroruvo cati dve.
Tattha jalaroruvo kappena santhitahi rattalohitajalahi punno.
Dhumaroruvo kharadhumena punno. Tesu jalaroruve paccantanam navahi
vanamukhehi jala pavisitva sariram dahanti. Dhumaroruve paccantanam
navahi vanamukhehi kharadhumo pavisitva pittham viya sariram sedesi.
Ubhayatthapi paccanta satta mahaviravam viravanti dvepi roruvati
vutta. Jalanam va paccanasattanam va tesam dukkhassa va vici
antara natthi etthati avici. Mahanto avici mahavici. Tatra hi
puratthimadihi bhittihi jala utthahitva pacchimabhittiadisu patihannati
tava bhittiyo vinivijjhitva purato yojanasatam ganhati hettha
utthita jala upari patihannati upari utthita hettha patihannati
Evam tavettha jalanam vici nama natthi. Tassa pana anto
yojanasatatthanam khiravallipitthissa puritanali viya sattehi nirantaram
puritam catuhi iriyapathehi paccantanam sattanam pamanam natthi na
ca annamannam byabadhenti sakatthaneyeva paccanti. Evamettha
sattanam vici nama natthi. Yatha pana jivhagge cha madhuvinduni
sattamassa tambalohavinduno anudahanabalavataya abboharikani honti
tatha tattha anudahanabalavataya sesa cha akusalavipaka upekkha
abboharika honti. Dukkhameva nayati nirantaram pannayati.
Evamettha dukkhassa vici nama natthi. Svayam saha bhittihi vikkhambhanato
attharasadhikatiyojanasato avattato catupannasadhikanavayojanasato saha
ussadehi dasayojanasahassani. Evamassa mahantata veditabba.
Niccale satte tapatiti tapano. Ativiya tapetiti patapano.
Tattha tapanasmim satte talakkhandhappamane jalitaayasule nisidapenti.
Tato hettha pathavi jalati sulam na jalati satta jalanti. Evam
so nirayo niccale satte tapati. Itarasmim pana nibbattasatte
jalantehi avudhehi paharitva jalitaayapabbatam aropenti.
Tesam pabbatamatthake thitakale kammapaccayo vato paharati. Te
tattha santhatum asakkonta uddhampada adhosira patanti. Atha
hettha ayapathavito jalitani ayasulani utthahanti. Te tani
matthakeneva asadetva tesu vinividdhasarira jalanta jalanta
paccanti. Evameva ativiya tapetiti.
Bodhisatto pana ete niraye dassento pathamam sanjivam
dassetva tattha paccante nerayikasatte disva mahajanassa mahabhaye
uppanne tampi antaradhapetva puna pathavim dvidha katva kalasuttam
dassesi. Tatthapi paccamane satte disva mahajanassa mahabhaye
uppanne tampi antaradhapesiti. Evam patipatiya dassesi. Tato
rajanam amantetva maharaja taya imesu atthasu mahanirayesu
paccamane satte disva appamadam katum vattatiti vatva puna
tesanneva mahanirayanam kiccam kathetum icceteti adimaha.
Tattha akkhatati maya ca tuyham kathita poranakehi ca
kathitayeva. Akinnati paripunna. Pacceka solasussadati
etesam nirayanam ekekassa catusu dvaresu ekekasmim cattaro
cattaro katva solasa solasa ussadanirayati sabbepi satam atthavisati ca
ussadaniraya attha ca mahanirayati chattimsanirayasatam. Kadariyatapanati
sabbepete kadariyanam tapana balavadukkhataya ghora
kappatthitanibbattanam accinam atthitaya accimanto bhayassa
mahantataya mahabbhaya ditthamatta va lomani hamsantiti lomahamsanarupa
ca bhimsanataya bhesma bhayajananataya patibhaya sukhabhavena dukkha.
Catukkonati sabbepi caturassamanjusasadisa. Vibhattati catudvaravasena
vibhatta. Bhagaso mitati dvaravithinam vasena kotthase
thapetva mita. Ayasa patikujjitati sabbepi navayojanikena
ayakapalena paticchanna. Phuta titthantiti sabbepi ettakam thanam
Anupharitva titthanti. Uddhampada avamsirati evam tesu nirayesu
samparivattitva punappunam patamane sandhayaha. Ativattaroti
pharusavacahi atikkamitva vattaro. Mahanirayesu kira yebhuyyena
dhammikasamanabrahmanesu kataparadhava paccanti tasma evamaha.
Te bhunahanati te isinam ativattaro attano vuddhiya hatatta
bhunahana kotthasakata maccha viya paccanti. Asankheyyeti ganetum
asakkuneyye. Kibbisakarinoti darunakammakarino. Nikkhamanesinoti
niraya nikkhamanam esantapi gavesantapi nikkhamanadvaram nadhigacchanti.
Puratthimenati yada tvam dvaram aparutam hoti atha tadabhimukha
dhavanti. Tesam tattha chaviadini jhayanti. Dvarasamipam
pattananca tesam pithiyyati pacchimam aparutam viya khayati. Esa
nayo sabbattha. Na sadhurupeti vuttappakaram sappam viya sadhurupe
isayo asanena pharusavacanena kayakammena va ghattento
upagaccheyya. Kimkarana. Sannatanam tapassinam asaditatta atthasu
mahanirayesu mahadukkhassa anubhavitabbatta.
Idani ye rajano tatharupe asadetva tam tam dukkham patta
te dassetum atikayoti adimaha. Tattha atikayoti balasampanno
mahakayo. Mahissasoti dhanuggaho. Sahassabahuti pancahi
dhanuggahasatehi bahusahassehi aropetabbam dhanum aropanasamatthataya
sahassabahu. Kekakadhipoti kekakaratthadhipati. Vibhavangatoti
Vinasam patto. Vatthuni sarabhangajatake vittharitani. Upahacca mananti
attano cittam padusetva. Matangasminti matangapandite.
Vatthu matangajatake vannitam. Kanhadipayanasajjati kanhadipayanam
asajja. Yamasadhananti nirayam. Vatthu ghatajatake vittharitam.
Isinati kapilatapasena. Pavekkhiti pavittho. Ceccoti
cetiyaraja. Hinattoti parihinattabhavo antarahita iddhi.
Kalapariyayanti pariyayamaranakalam patva. Vatthu cetiyajatake
kathitam. Tasmati yasma cittavasiko hutva isisu aparajjhitva atthasu
mahanirayesu paccati. Tasma hi chandagamananti chandadicatubbidhampi
agatigamanam. Padutthenati kuddhena. Gantva so nirayam adhoti
so tena adhogamaniyena kammena adhonirayameva gacchati. Paliyam
pana nirayussadanti likhitam. Tassa ussadanirayam gacchatiti attho.
Vuddheti vayovuddhe ca gunavuddhe ca. Anapaccati bhavantarepi
apaccam va dayadam va na labhantiti attho. Talavatthuti
ditthadhammepi chinnamulatalo viya mahavinasam patva nirayesu nibbattanti.
Hantiti mareti. Ciram rattayati ciram kalam.
Evam mahasatto isivihethakanam paccananiraye dassetva upari
adhammikarajunam paccananiraye dassenato yo cati adimaha. Tattha
rattham viddhamsanoti chandadivasena gantva ratthassa viddhamsano.
Accisanghapareto soti accisamuhaparikkhitto. Tejobhakkhassati
aggimeva khadantassa. Gattaniti tigavute sarirasabbangapaccangani.
Lomaggehi ca nakhehi cati etehi saddhim sabbani ekajalani honti.
Tundadditoti anenjanakaranam kariyamano tundehi viddho nago
yatha nadati.
Evam mahasatto adhammikarajunam paccananiraye dassetva idani
pitughatakadinam paccananiraye dassetum yo lobhati adimaha. Tattha
lobhati yasadhanalobhena. Dosati dutthacittataya. Nittacanti
lohakumbhiyam bahuni vassasahassani pakkam niharitva tigavutamassa sariram
nittacam katva jalitaya lohapathaviya patetva tinhehi ayasulehi
kottenta cunnavicunnam karonti. Andham karitvati maharaja tam
pitughatakam nirayapala jalitalohapathaviyam uttanam patetva jalitehi
ayasulehi akkhini bhinditva andham karitva mukhe unham muttakarisam
pakkhipitva palalapitham viya nam samvattetva kappena santhite khare
lohaudake nimujjapenti. Tattam pakkutthitamayogulancati puna
pakkutthitaguthakalalanceva jalitaayogulanca khadapenti. So pana tam
ahariyamanam disva mukham pitheti. Athassa dighepi aggatapite jalamane
jale adaya mukham vikkhambhitva vivaritva rajjubandham ayabalisam khipitva
jivham niharitva tasmim vivatte mukhe tam ayogulam samsavayanti pakkhipanti.
Rakkhasati nirayapala. Sama cati maharaja tassa pitughatakassa
jivham balisena nikkaddhitva ayasankunahi pathaviyam nihatam jivham sama
sona savalavanna sunakha ca lohatunda gijjha ca kakolasangha
ca anne ca nanappakara sakuna samagantva avudhehi chindanta viya
Vibhajja kakapadakarena kotthase katva. Vipphandamananti
visandamanalohitam vighasam khadanta viya satte bhakkhayantiti attho.
Tam daddhakalanti tam pitughatakam jhayamanam kalam viya daddhajalitasariram.
Paribhinnagattanti tattha tattha bhinnagattam. Nippothayantati jalitehi
ayamuggarehi paharanta. Rati hi tesanti tesam nirayapalanam sa rati
kila hoti. Dukkhino panitareti itare pana nerayikasatta dukkhita
honti . pettighatinoti pitughataka. Iti imam pitughatakanam
paccananirayam disva raja bhitatasito ahosi.
Atha nam mahasatto samassasetva matughatakanam paccananirayam
dassesi. Yamakkhayanti yamanivesanam nirayanti attho. Attakammaphalupagoti
attano kammaphalena upagato. Amanussati nirayapala. Hantaram
janayantiyati matughatakam . balehiti ayamakacibalehi vethetva
ayayantena piliyanti. Tanti tam matughatakam. Payentiti tassa
hi piliyamanassa ruhiram galitva ayakapallam pureti. Atha nam yantato
niharanti tavadevassa sariram pakatikam hoti. Tam pathaviyam uttanam
nipajjapetva vilinatambaloham viya pakkutthitalohitam payenti.
Oggayha titthatiti tam bahuni vassasahassani ayayantehi piletva
jegucchaduggandhapatikkule mahante guthakaddame avate khipanti. So tam
daharam oggayha orohitva titthati. Atikayati ekadonikanavappamana-
sarira. Ayomukhati ayasucimukha. Chavim bhetvanati chavim adim
katva yava atthimpi bhetva atthiminjampi khadanti. Pagiddhati
Gadhita mucchita. Na kevalanca khadanteva adhomukhadihi pana
pavisitva mukhadihi nikkhamanti vamapassadihi pavisitva
dakkhinapassadihi nikkhamanti sakalasariram chiddavachiddam karonti. So
tattha atidukkhapareto viravanto paccati. So cati so matughatako
tam sataporisam nirayam patto sasisako nimuggova hoti. Tanca kunapam
samanta yojanasatam putim katva vayati. Matughatiti matughatako.
Evam mahasatto matughatakanam paccananirayam dassetva puna
gabbhapatakanam paccananirayam dassento gathamaha. Khuradharamanukkammati
khuradharanirayam atikkamitva. Tattha kira nirayapala mahante mahante
khuradhare upari dharetva santharanti. Tato ya hi gabbhapatanakhara-
bhesajjadini pivitva gabbha patita ta gabbhapatiniyo itthiyo
jalitehi avudhehi pothenta anubandhanti. Ta tikhinakhuradharasu
khandakhandika hutva punappunam utthaya tam durabhisambhavam khuradharanirayam
akkamantiyo atikkamitva nirayapalehi anubandha duggam duggamam visamam
vettaranim pattanti. Tattha tattha kammakaranam nimijatake avibhavissati .
Evam gabbhapatinam nirayam dassetva mahasatto yattha paradarika
ca aticariniyo ca paccanti tam kantakasimbalinirayam dassento
ayomayati adimaha. Tattha ubhato mabhilambantiti vettaraniya
ubhosu tiresu tasam simbalinam sakha olambanti. Te pajjalitasarira
satta accimanto hutva titthanti. Yojananti tigavutam te sariram
sarirato utthitajalaya pana saddhim yojanubbedha honti. Ete
Sajantiti te paradarika satta nanavidhehi avudhehi kottiyamana
ete simbaliniraye abhiruhanti. Te patantiti te bahuni vassasahassani
rukkhavitapesu lagga jhayitva punapi nirayapalehi avudhehi vihata
vivatta hutva parivattitva adhosisaka patanti. Puthuti bahuni.
Vinivaddhangati tesam tato patanakale hettha ayapathavito sulani
utthahitva tesam matthakam sampaticchanti tani tesam adhomaggena
nikkhamanti. Te evam avudhehi sulehi viddha ciram rattaya sayanti.
Dighanti supiniddam alabhanta digharattam jaggantiti attho. Tato ratya
vivasaneti rattinam accaye cirakalatikkamenati attho. Pavajjantiti
satthiyojanikajalitalohakumbhim kappena santhitajalitatambaloharasapunnam
lohakumbhim nirayapalehi khitta paccanti. Dussilati paradarika.
Evam mahasatto paradarikaaticarikanam paccanasimbalinirayam dassetva
ito param samikavattasassuvattadini apurentinam paccanatthanam pakasento
ya cati adimaha. Tattha atimannatiti bhimsajatake vuttam samikavattam
karonti atikkamitva mannati. Jettham vati samikassa jetthabhataram.
Nanandananti samikassa bhaginim. Etesampi hi annatarassa
hatthapadapitthiparikammanahapanabhojanadibhedam vattam apurenti tesu
hirottappam anupatthapenti te atimannati nama. Sapi niraye
nibbatti. Vankenati tassa ca samikavattadinam aparipurikaya
samikadayo akkositva paribhasitva niraye nibbattaya lohapathaviyam
Nipajjapetva ayasankuna mukham vivaritva balisena jivhaggam nibbahanti
rajjubandhanena sabandhanam kaddhanti. Kiminanti kimibharitam. Idam vuttam
hoti maharaja so nerayikasatto evam nikkaddhi tam attano
byamena byamamattam jivhaggam avudhehi kottitakottitatthane
sanjatehi mahadonippamanehi kimihi bharitam passati. Vinnapetum
na sakkotiti nirayapale yacitukamopi kinci vattum na sakkoti.
Tapaneti evam sa tattha bahuni vassasahassani paccitva puna
tapanamahaniraye paccati.
Evam mahasatto samikavattasassusassuravattadini apurentinam
paccananirayam dassetva idani sukarikadinam paccananiraye dassento
orabbhikati adimaha. Tatta avanne vannakarakati pesunnakaraka.
Kharanadinti ete orabbhikadayo etehi sattiadihi hannamana
vettaranim papatantiti attho. Sesani orabbhikadinam paccanatthanani
nimijatake avibhavissanti. Kutakariti kutavinicchayassa ceva
tulakutadinanca karake sandhayetam vuttam. Tattha kutavinicchaya-
kutattakarakakutaagghapanikanam paccananirayani nemijatake avibhavissanti.
Vantanti vamitakam. Durattananti duggatattabhavanam. Idam vuttam
hoti maharaja te durattabhava satta ayakutehi matthake
bhijjamane vamanti tato tam vantam jalitaayakapallehi tesu ekaccanam
mukhe khipanti. Iti te paresam vantam bhunjanti nama. Bherandakati
singala. Vipphandamananti adhomukhanipajjapitanikkaddhitajivham
Itocitoca vipphandamanam. Migenati okacarikamigena. Pakkhinati
tatharupeneva. Gantva teti te gantva. Nirayussadanti ussadanirayam.
Paliyam pana nirayam adhoti likhitam. Ayam pana nirayo nemijatake
avibhavissatiti.
Iti mahasatto ettake niraye dassetva idani ranno
devalokavivaranam katva ranno devaloke dassento aha
santova uddham gacchanti sucinnenidha kammuna
sucinnassa phalam passa sahinda deva sabrahmaka
tantam brumi maharaja dhammam ratthapati cara
tatha tatha raja carahi dhammam
yatha tam sucinnam nanutappeyya pacchati.
Tattha santoti kayadihi upasanto. Uddhanti devalokam.
Sahindati tattha tattha indehi saddhim. Mahasatto hissa
catummaharajike deve dassento maharaja catummaharajike
deve passa cattaro maharajano passa tavatimse passa sakkam
passati evam te sabbepi sahindake ca sabrahmake ca deve
dassento idam sucinnassa phalam idampi phalanti dassesi. Tantam
brumiti tasma tam bhanami. Dhammanti ito patthaya panatipatadini
panca verani pahaya danadini punnani karohiti. Yatha
tam sucinnam nanutappeyyati yatha tam danadipunnakammam sucinnam
pitughatakakammapaccayam vippatisaram paticchadetum samatthataya
Tam nanutappeyya tatha tam sucinnam cara bahupunnam karohiti attho.
So mahasattassa dhammakatham sutva tato patthaya assasapassasam
patilabhi. Bodhisatto pana kinci kalam tattha vasitva attano
vasanatthananneva gatoti.
Sattha imam dhammadesanam aharitva na bhikkhave idaneva
pubbepesa maya assasitoyevati vatva jatakam samodhanesi tada
raja ajatasattu ahosi isigana buddhaparisa samkiccapandito
pana ahamevati.
Samkiccajatakam nitthitam.
Dutiyam.
Iti satthinipatavannana nitthita.
------------
@Footnote:
@*** hanranir m+mikhramula ***
The Pali Atthakatha in Roman Book 42 page 104-130.
http://84000.org/tipitaka/atthapali/read_rm.php?B=42&A=2118&modeTY=2
อรรถกถาบาลีอักษรไทย :-
http://84000.org/tipitaka/atthapali/read_th.php?B=42&A=2118&modeTY=2
อ่านอรรถกถาแปลไทย :-
http://84000.org/tipitaka/attha/attha.php?b=28&i=90
เนื้อความพระไตรปิฎกฉบับหลวง :-
http://84000.org/tipitaka/read/r.php?B=28&A=595
พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=28&A=767
The Pali Tipitaka in Roman Character :-
http://84000.org/tipitaka/read/roman_read.php?B=28&A=767
Contents of The Tipitaka Volume 28
http://84000.org/tipitaka/read/?index_28
        |
|
บันทึก ๖ กุมภาพันธ์ พ.ศ. ๒๕๖๑. การแสดงผลนี้อ้างอิงข้อมูลจากอรรถกถาฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]