AtthaPali Vol.50

546/134. 4. Vangisattherapadanavannana catutthapadane padumuttaro nama jinotiadikam ayasmato vangisattherassa apadanam. Ayampi purimabuddhesu katadhikaro tattha tattha bhave vivattupanissayani punnani upacinanto padumuttarassa bhagavato kale hamsavatinagare mahabhogakule nibbatto vuddhippatto dhammam sotum gacchantehi nagaravasihi saddhim viharam gantva dhammam sunanto sattharam ekabhikkhum patibhanavantanam aggatthane thapentam disva satthu adhikarakammam katva "ahampi anagate patibhanavantanam aggo bhaveyyan"ti patthanam katva satthara byakato yavajivam kusalam katva devamanussesu ubhayasampattiyo anubhavitva imasmim buddhuppade savatthiyam brahmanakule nibbattitva matuparibbajikabhavena aparabhage paribbajakoti pakato vangisoti ca laddhanamo tayo vede ugganhitva tato acariyam aradhetva chavasisajananamantam nama sikkhitva chavasisam nakhena akotetva "ayam satto asukayoniyam nibbatto"ti janati. Brahmana "ayam amhakam jivikaya maggo"ti vangisam gahetva gamanigamarajadhaniyo vicarimsu. Vangiso tivassamatthake matanampi sisam aharapetva nakhena akotetva "ayam satto asukayoniyam nibbatto"ti vatva mahajanassa kankhacchedanattham te te jane avahetva ^1- attano attano gatim kathapeti. Tena tasmim mahajano abhippasidati. So tam nissaya mahajanassa hatthato satampi sahassampi labhati. Brahmana vangisam adaya yatharuci vicarimsu. Vangiso satthu gune sutva sattharam upasankamitukamo ahosi. Brahmana "samano gotamo mayaya tam avattessati"ti patikkhipimsu. Vangiso tesam vacanam anadiyitva satthu santikam gantva patisantharam katva ekamantam nisidi. Sattha tam pucchi "vangisa kinci sippam janati"ti "ama bho gotama chavasisamantam namekam janami, tena tivassamatthake matanampi sisam nakhena akotetva nibbattatthanam janami"ti. Atha sattha tassa ekam niraye nibbattassa sisam, ekam manussesu, ekam devesu, ekam parinibbutassa sisam aharapetva dassesi. So pathamasisam akotetva "bho gotama ayam satto niraye nibbatto"ti aha. Sadhu vangisa sutthu taya dittham, "ayam satto kuhim nibbatto"ti pucchi. Manussaloketi. Ayam kuhinti. Devaloketi. Tinnannampi nibbattatthanam kathesi. Parinibbutassa pana sisam nakhena akotento neva antam na kotim passi. Atha nam sattha "na sakkosi vangisa"ti pucchi. Passatha bho gotama upaparikkhami tavati punappunam parivattetvapi bahirakamantena khinasavassa sisam janitum na sakkoti. Athassa matthakato sedo mucci. So lajjitva tunhi ahosi. Atha nam sattha "kilamasi vangisa"ti aha. Ama bho gotama imassa nibbattatthanam @Footnote: ¹ Si. avisapetva. Janitum na sakkomi. Sace tumhe janatha, kathethati. "vangisa aham etampi janami, ito uttarimpi janami"ti vatva:- "cutim yo vedi sattanam upapattinca sabbaso asattam sugatam buddham tamaham brumi brahmanam. Yassa gatim na jananti deva gandhabbamanusa khinasavam arahantam tamaham brumi brahmanan"ti ^1- ima dve gathayo abhasi. So tena hi bho gotama tam vijjam me dethati apacitim dassetva satthu santike nisidi. Sattha "amhehi samanalingassa dema"ti aha. Vangiso "yam kinci katva maya imam mantam gahetum vattati"ti brahmane upagantva aha "tumhe mayi pabbajante ma cintayittha, aham mantam ugganhitva sakalajambudipe jetthako bhavissami, tumhakampi tena saddameva bhavissati"ti. So mantatthaya satthu santikam upasankamitva pabbajjam yaci. Tada ca thero nigrodhakappo bhagavato santike thito hoti, tam bhagava anapesi "nigrodhakappa imam pabbajehi"ti. Thero satthu anaya tam pabbajetva "mantaparivaram tava ugganhahi"ti dvattimsakarakammatthanam vipassanakammatthananca acikkhi. So dvattimsakarakammatthanam sajjhayantova vipassanaya kammatthanam patthapesi. Brahmana tam upasankamitva "kim bho vangisa samanassa gotamassa santike sippam uggahitan"ti pucchimsu, ama sikkhitam, tena hi ehi gamissamati kim sippasikkhanena, gacchatha tumhe na mayham tumhehi kattabbakiccanti. Brahmana "tvampi dani samanassa gotamassa vasam apanno, mayaya @Footnote: ¹ khu.dha. 25/419-20/90, khu.su. 25/649-50/460. Avattito, kim mayam tava santike karissama"ti agatamaggeneva pakkamimsu. Vangiso vipassanam vaddhetva arahattam sacchakasi. [96] Evam thero arahattam patva attano pubbakammam saritva somanassajato pubbacaritapadanam pakasento padumuttaro nama jinotiadimaha. Anuttanatthameva vannayissama. [99] Pabhahi anuranjantoti so padumuttaro bhagava nilapitadi- chabbannapabhahi ramsihi anuranjanto jalanto sobhayamano vijjotamanoti attho. Veneyyapadumani soti padumuttarasuriyo attano vacanasankhatena suriyaramsiya veneyyajanasankhatapadumani visesena bodhento pabodhento arahattamaggadhigamena phullitani karotiti attho. [100] Vesarajjehi sampannoti:- "antaraye ca niyyane buddhatte asavakkhaye etesu catutthanesu buddho sutthu visarado"ti evam vuttacatuvesarajjananehi sampanno samangibhuto samannagatoti attho. [105] Vagiso vadisudanoti vadinam panditajananam iso padhano "vadiso"ti vattabbe dakarassa gakaram katva evam vuttanti datthabbam. Sakatthaparatthavadam sudati paggharapeti pakatam karotiti vadisudano. [110] Maramasanati khandhamaradayo pancamare masati paramasati viddhamsetiti maramasano. Ditthisudanati voharaparamatthasankhatam ditthidassanam sudati paggharam dipetiti ditthisudano. [111] Vissamabhumi santananti sakalasamsarasagare santanam kilamantanam sotapattimaggadiadhigamapanena vissamabhumi vissamatthanam vupasamatthananti attho. [132] Tatoham vihatarambhoti tato paccekabuddhassa sariradassanena aham vihatarambho vinatthasarambho, vinatthamano nimmado hutva pabbajjam sam sutthu yacim samyacim arocesinti attho. Sesam suvinneyyamevati. Vangisattherapadanavannana nitthita. ----------------

The Pali Atthakatha in Roman Book 50 page 312-316. http://84000.org/tipitaka/atthapali/read_rm.php?B=50&A=6703&modeTY=2 อรรถกถาบาลีอักษรไทย :- http://84000.org/tipitaka/atthapali/read_th.php?B=50&A=6703&modeTY=2 อ่านอรรถกถาแปลไทย :- http://84000.org/tipitaka/attha/attha.php?b=32&i=134 เนื้อความพระไตรปิฎกฉบับหลวง :- http://84000.org/tipitaka/read/r.php?B=32&A=3938 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=32&A=4800 The Pali Tipitaka in Roman Character :- http://84000.org/tipitaka/read/roman_read.php?B=32&A=4800 Contents of The Tipitaka Volume 32 http://84000.org/tipitaka/read/?index_32