ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
first pageprevious pagedispage pageNumbernext pagelast page chage to ROMAN letter  
Atthakatha Book 52 : PALI ROMAN Cariya.A. (paramatthadi.)

                      3.  Kururajacariyavannana 1-
      [20]  Punaparam yada homi       indapatthe 2- puruttame
            raja dhananjayo nama     kusale dasahupagato.
      [21]  Kalingaratthavisaya         brahmana upaganchu mam
            ayacum mam hatthinagam      dhannam mangalasammatam.
      [22]  Avutthiko janapado        dubbhikkho chatako maha
            dadahi pavaram nagam        nilam anjanasavhayan"ti.
@Footnote: 1 ka. kurudhammacariyavannana  2 Si.,Ma. indapatte
     #[20]  Tatiye indapatthe puruttameti indapatthanamake kururatthassa puravare
uttamanagare. Rajati dhammena samena catuhi sangahavatthuhi parisam ranjetiti raja.
Kusale dasahupagatoti kusalehi dasahi samannagato, danadihi dasahi punnakiriyavatthuhi,
dasahi kusalakammapathehi va yuttoti attho.
     #[21]  Kalingaratthavisayati kalingaratthasankhatavisaya. Brahmana upaganchu
manti kalingarajena uyyojita attha brahmana mam upasankamimsu. Upasankamitva ca
pana ayacum mam hatthinaganti hatthibhutam mahanagam mam ayacimsu. Dhannanti
dhanayitabbasirisobhaggappattam lakkhanasampannam. Mangalasammatanti tayayeva
lakkhanasampattiya mangalam abhivuddhikarananti abhisammatam janehi.
     #[22]  Avutthikoti vassarahito. Dubbhikkhoti dullabhabhojano. Chatako mahati
mahati jighacchabadha vattatiti attho. Dadahiti dehi. Nilanti nilavannam.
Anjanasavhayanti anjanasaddena avhatabbam, anjananamakanti attho. Idam vuttam hoti:-
amhakam kalingarattham avutthikam, tena idani mahadubbhikkham tattha mahantam chatakabhayam
uppannam, tassa vupasamatthaya imam anjanagirisankasam tuyham anjananamakam mangalahatthim
dehi, imasmim hi tattha nite devo vassissati, tena tam sabbabhayam vupasammissatiti.
Tatrayam anupubbikatha:-
      atite kururatthe indapatthanagare bodhisatto kururajassa aggamahesiya
kucchimhi patisandhim gahetva anupubbena vinnutam patto, takkasilam gantva
yogavihitani sippayatanani vijjatthanani ca uggahetva paccagato pitara
uparajje thapito, aparabhage pitu accayena rajjam patva dasa rajadhamme akopento
dhammena rajjam karesi dhananjayo nama namena. So catusu nagaradvaresu nagaramajjhe
nivesanadvareti cha danasalayo karetva devasikam 1- chasatasahassam dhanam vissajjento
@Footnote: 1 Si.,Ma. devasikam devasikam
Sakalajambudipam unnangalam katva danam adasi. Tassa danajjhasayata danabhirati
sakalajambudipam patthari.
      Tasmim kale kalingaratthe dubbhikkhabhayam chatakabhayam rogabhayanti tini bhayani
uppajjimsu. Sakalaratthavasino dantapuram gantva rajabhavanadvare ukkatthimakamsu
"devam vassapehi deva"ti. Raja tam sutva "kim karana ete viravanti"ti
amacce pucchi. Amacca ranno tamattham arocesum. Raja poranakarajano deve
avassante kim karontiti. "devo vassatu"ti danam datva uposatham adhitthaya
samadinnasila sirigabbham pavisitva dabbasanthare sattaham nipajjantiti. Tam sutva
tatha akasi. Devo na vassi, evam raja aham maya kattabbakiccam akasim,
devo na vassati, kinti karomati. Deva indapatthanagare dhananjayassa nama kururajassa
mangalahatthimhi anite devo vassissatiti. So raja balavahanasampanno duppasaho,
kathamassa hatthi anessamati. Maharaja tena saddhim yuddhakiccam natthi, danajjhasayo
so raja danabhirato yacito samano alankatasisampi chinditva pasadasampannani
akkhinipi uppatetva sakalarajjampi niyyatetva dadeyya, hatthimhi vattabbameva
natthi, avassam yacito samano dassatiti. Ke pana yacitum samatthati. Brahmana
maharajati. Raja attha brahmane pakkosapetva sakkarasammanam katva
paribbayam datva hatthiyacanattham pesesi. Te sabbattha ekarattivasena turitagamanam
gantva katipaham nagaradvare danasalasu bhunjanta sariram santappetva ranno
danaggam agamanapathe kalam agamayamana pacinadvare atthamsu.
      Bodhisattopi patova nhatanulitto sabbalankarappatimandito
alankatavaravaranakhandhagato mahantena rajanubhavena danasalam gantva otaritva sattatthajananam
sahatthena danam datva "iminava niharena detha"ti vatva hatthim abhiruhitva
dakkhinadvaram
Agamasi. Brahmana pacinadvare arakkhassa balavataya okasam alabhitva
dakkhinadvaram gantva rajanam agacchantam ullokayamana dvarato natidure
unnatatthane thita sampattam rajanam hatthe ukkhipitva jayapesum. Raja vajirankusena
varanam nivattetva tesam santikam gantva te brahmane 1- "kim icchatha"ti pucchi.
Brahmana "kalingarattham dubbhikkhabhayena chatakabhayena rogabhayena ca upaddutam, so
upaddavo imasmim tava mangalahatthimhi nite vupasammissati, tasma imam anjanavannam
nagam amhakam dehi"ti ahamsu. Tamattham pakasento sattha aha "kalingaratthavisaya .pe.
Anjanasavhayan"ti. Tassattho vutto eva.
      Atha bodhisatto "na metam patirupam, yam me yacakanam manorathavighato siya,
mayhanca samadanabhedo siya"ti hatthikkhandhato otaritva "sace analankatatthanam atthi,
alankaritva dassami"ti samantato oloketva analankatatthanam adisva sondaya
nam gahetva brahmananam hatthesu thapetva ratanabhingarena pupphagandhavasitam udakam
patetva adasi. Tena vuttam:-
      [23]  "na me yacakamanuppatte   patikkhepo anucchavo
            ma me bhijji samadanam    dassami vipulam gajam.
      [24]  Nagam gahetva sondaya   bhingare ratanamaye
            jalam hatthe akiritva     brahmananam adam gajan"ti.
      Tattha yacakamanuppatteti yacake anuppatte. Anucchavoti anucchaviko
patiruPo. Ma me bhijji samadananti sabbannutannanatthaya sabbassa yacakassa
sabbam anavajjam icchitam dadanto danaparamim puressamiti yam mayham samadanam,
@Footnote: 1 Si. bhonto brahmana
Tam ma bhijji. Tasma dassami vipulam gajanti mahantam imam mangalahatthim dassamiti.
Adanti adasim.
      [25]  Tasmim pana hatthimhi dinne amacca bodhisattam etadavocum "kasma
maharaja mangalahatthim dadattha, nanu anno hatthi databbo, ranna nama evarupo
opavayho mangalahatthi issariyam abhivijayanca akankhantena na databbo"ti. Mahasatto
"yam mam yacaka yacanti, tadeva maya databbam, sace pana mam rajjam yaceyyum, rajjampi
tesam dadeyyam, mayham rajjatopi jivitatopi sabbannutannanameva piyataram, tasma tam
hatthim adasin"ti aha. Tena vuttam "tassa nage padinnamhi"tiadi. Tattha tassati
tassa tena, tasmim nage hatthimhi dinne.
      [26]  Mangalasampannanti mangalagunehi samannagatam. Sangamavijayuttamanti
sangamavijaya uttamam, sangamavijaye va uttamam padhanam pavaram nagam. Kinte rajjam
karissatiti tasmim nage apagate tava rajjam kim karissati, rajjakiccam na karissati,
rajjampi apagatamevati dasseti.
      [27]  Rajjampi me dade sabbanti titthatu nago tiracchanagato, idam
me sabbam kururatthampi yacakanam dadeyyam. Sariram dajjamattanoti rajjepi va kim
vattabbam, attano sarirampi yacakanam dadeyyam, sabbopi hi me ajjhattikabahiro
pariggaho lokahitatthameva maya pariccatto. Yasma sabbannutam piyam mayham
sabbannuta ca danaparamim adim katva sabbaparamiyo apurentena na sakka
laddhum, tasma nagam adasim ahanti dasseti.
      Evampi tasmim nage anite kalingaratthe devo na vassateva. Kalingaraja
"idanipi na vassati, kim nu kho karanan"ti pucchitva "kururaja garudhamme 1-
rakkhati,
@Footnote: 1 Si.,Ma. kurudhamme
Tenassa ratthe anvaddhamasam anudasaham devo vassati, ranno gunanubhavo esa, na
imassa tiracchanagatassati janitva "mayampi garudhamme rakkhissama, gacchatha
dhananjayakorabyassa santike te suvannapatte likhapetva anetha"ti amacce pesesi.
Garudhamma vuccanti panca silani, tani bodhisatto suparisuddhani katva rakkhati,
yatha ca bodhisatto, evamassa mata aggamahesi kanitthabhata uparaja purohito
brahmano rajjuggahako amacco sarathi setthi donamapako dovariko nagarasobhini
vannadasiti. Tena vuttam:-
            "raja mata mahesi ca   uparaja purohito
            rajjuggaho sarathi setthi  dono dovariko tatha
            ganika te ekadasa      garudhamme patitthita"ti.
      Te amacca bodhisattam upasankamitva vanditva tamattham arocesum. Mahasatto
"mayham garudhamme kukkuccam atthi, mata pana me surakkhitam rakkhati, tassa santike
ganhatha"ti vatva tehi "maharaja kukkuccam nama bhikkhakamassa sallekhavuttino
hoti, detha no"ti yacito "pano na hantabbo, adinnam na adatabbam,
kamesumicchacaro na caritabbo, musa na bhanitabbam, majjam na patabban"ti suvannapatte
likhapetva "evam santepi matu santike ganhatha"ti aha.
      Duta rajanam vanditva tassa santikam gantva "devi tumhe kira garudhammam
rakkhatha, tam no detha"ti vadimsu. Bodhisattassa matapi tatheva attano kukkuccassa
atthibhavam vatvava tehi yacita adasi. Tatha mahesiadayopi. Te sabbesampi
santike suvannapatte garudhamme likhapetva dantapuram gantva kalingaranno
datva tam pavattim arocesum. Sopi raja tasmim dhamme vattamano panca silani
puresi. Tato sakalakalingaratthe devo vassi. Tini bhayani vupasantani. Rattham khemam
Subhikkham ahosi. Bodhisatto yavajivam danadini punnani katva sapariso saggapuram
puresi. Tada ganikadayo uppalavannadayo ahesum. Vuttanhetam:-
            "ganika uppalavanna      punno dovariko tada
            rajjuggaho ca kaccano   donamapako ca kolito.
            Sariputto tada setthi    anuruddho ca sarathi
            brahmano kassapo thero  uparajanandapandito.
            Mahesi rahulamata       mayadevi janettika
            kururaja bodhisatto      evam dharetha jatakan"ti. 1-
      Idhapi nekkhammaparamiadayo sesadhamma ca vuttanayeneva niddharetabbati. 2-
                      Kururajacariyavannana nitthita.
                          -------------



             The Pali Atthakatha in Roman Book 52 page 43-49. http://84000.org/tipitaka/atthapali/read_rm.php?B=52&A=917&modeTY=2              อรรถกถาบาลีอักษรไทย :- http://84000.org/tipitaka/atthapali/read_th.php?B=52&A=917&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=33&i=211              เนื้อความพระไตรปิฎกฉบับหลวง :- http://84000.org/tipitaka/read/r.php?B=33&A=8682              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=33&A=11390              The Pali Tipitaka in Roman Character :- http://84000.org/tipitaka/read/roman_read.php?B=33&A=11390              Contents of The Tipitaka Volume 33 http://84000.org/tipitaka/read/?index_33

first pageprevious pagedispage pageNumbernext pagelast page chage to ROMAN letter

บันทึก ๖ กุมภาพันธ์ พ.ศ. ๒๕๖๑. การแสดงผลนี้อ้างอิงข้อมูลจากอรรถกถาฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]