Atthakatha Book 55 : PALI ROMAN
Pañca.A. (paramatthadī.)

                     9. Yathākammūpagatañāṇakathāvaṇṇanā
     [377] Idāni yathākammūpagatañāṇakathā nāma hoti. Tattha yesaṃ "iti
dibbena cakkhunā visuddhena .pe. Yathākammūpage satte pajānātī"ti 1- suttaṃ
ayoniso gahetvā yathākammūpagañāṇameva dibbacakkhunti laddhi, te sandhāya pucchā
sakavādissa, paṭiññā itarassa. Puna yathākammūpagatañca manasi karotīti puṭṭho
ekacittassa ārammaṇadvayābhāvā paṭikkhipati. Dutiyaṃ puṭṭho nānācittavasena
paṭijānāti. Puna lesokāsaṃ adatvā dvinnaṃ phassānanti puṭṭho paṭikkhipati. Iti
yathā iminā yathākammūpagatapadena, evameva ime vata bhonto sattātiādipadehipi
saddhiṃ yojanāsu attho veditabbo.
     [378] Āyasmā sāriputto yathākammūpagataṃ ñāṇaṃ jānātīti idaṃ sakavādī
yasmā thero appicchatāya abhiññāñāṇāni na valañjetīti ekacce na jānanti,
tāni panassa neva atthīti maññanti, tasmā taṃ "dibbacakkhuno alābhī thero"ti
maññamānaṃ pucchati. Teneva kāraṇena "atthāyasmato sāriputtassa dibbacakkhū"ti
parato puṭṭho paṭikkhipati. Dutiyaṃ puṭṭho yaṅkiñci sāvakena pattabbaṃ, sabbantaṃ
therena anuppattanti paṭijānāti. Idānissa vikkhepaṃ karonto sakavādī nanu āyasmā
@Footnote: 1 dī.Sī. 9/246/83, khu.paṭi. 31/257/169 (syā)
---------------------------------------------------------------------------------------------
page199.
Sāriputtotiādimāha. Imañhi gāthaṃ thero valañjanapaṇidhiyāeva abhāvena āha, na
abhiññāñāṇānaṃ 1- abhāvena. Paravādī pana abhāvenevāti atthaṃ sallakkheti. Tasmā
tassa laddhiyā therassa yathākammūpagatañāṇameva atthi, no dibbacakkhu. Tena vuttaṃ
"tena hi na vattabbaṃ yathākammūpagatañāṇaṃ dibbacakkhū"ti.
                   Yathākammūpagatañāṇakathāvaṇṇanā niṭṭhitā.
                           ----------


             The Pali Atthakatha in Roman Book 55 page 198-199.
http://84000.org/tipitaka/atthapali/read_rm.php?B=55&A=4450&pagebreak=1
             อรรถกถาบาลีอักษรไทย :-
http://84000.org/tipitaka/atthapali/read_th.php?B=55&A=4450&pagebreak=1
             อ่านอรรถกถาแปลไทย :-
http://84000.org/tipitaka/attha/attha.php?b=36&i=
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=36&A=
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=36&A=
             The Pali Tipitaka in Roman Character :-
http://84000.org/tipitaka/read/roman_read.php?B=36&A=
             Contents of The Tipitaka Volume 36
http://84000.org/tipitaka/read/?index_36