ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๒๗ ภาษาบาลีอักษรไทย อิติ.อ. (ปรมตฺถที.)

                       ๑๑. อาปายิกสุตฺตวณฺณนา
      [๔๘] เอกาทสเม อาปายิกาติ อปาเย นิพฺพตฺติสฺสนฺตีติ อาปายิกา.
ตตฺถาปิ นิรเย นิพฺพตฺติสฺสนฺตีติ เนรยิกา. อิทมปฺปหายาติ อิทํ อิทานิ
วกฺขมานํ ทุวิธํ ปาปสมาจารํ อปฺปชหิตฺวา, ตถาปฏิปตฺติตถาปคฺคณฺหณวเสน
ปวตฺตํ วาจํ จิตฺตํ ทิฏฺฐิญฺจ อปฺปฏินิสฺสชฺชิตฺวาติ อตฺโถ. อพฺรหฺมจารีติ
พฺรหฺมํ เสฏฺฐํ จรตีติ พฺรหฺมา วา เสฏฺโฐ อาจาโร เอตสฺส อตฺถีติ พฺรหฺมจารี,
น พฺรหฺมจารีติ อพฺรหฺมจารี, พฺรหฺมจาริปติรูปโก ทุสฺสีโลติ อตฺโถ.
พฺรหฺมจาริปฏิญฺโญติ "พฺรหฺมจารี อหนฺ"ติ เอวํปฏิญฺโญ. ปริปุณฺณนฺติ
อขณฺฑาทิภาเวน อวิกลํ. ปริสุทฺธนฺติ อุปกฺกิเลสาภาเวน ปริสุทฺธํ. อมูลเกนาติ
ทิฏฺฐาทิมูลวิรหิเตน, ทิฏฺฐํ สุตํ ปริสงฺกิตนฺติ อิเมหิ โจทนามูลเกหิ วชฺชิเตน
อพฺรหฺมจริเยน อเสฏฺฐจริเยน. อนุทฺธํเสตีติ "ปริสุทฺโธ อยนฺ"ติ ชานนฺโตว
ปาราชิกวตฺถุนา ธํเสติ ปธํเสติ, โจเทติ อกฺโกสติ วา.
      คาถาสุ อภูตวาทีติ ปรสฺส โทสํ อทิสฺวาว อภูเตน ตุจฺเฉน มุสาวาทํ
กตฺวา ปรํ อพฺภาจิกฺขนฺโต. กตฺวาติ โย วา ปน ปาปกมฺมํ กตฺวา "นาหํ
เอตํ กโรมี"ติ อาห. อุโภปิ เต เปจฺจ สมา ภวนฺตีติ เต อุโภปิ ชนา
อิโต ปรโลกํ คนฺตฺวา นิรยํ อุปคมนโต คติยา สมานา ภวนฺติ. ตตฺถ คติเยว
เนสํ ปริจฺฉินฺนา, น ปน อายุ เนสํ. พหุํ หิ ปาปํ กตฺวา จิรํ นิรเย ปจฺจติ,
ปริตฺตํ กตฺวา อปฺปมตฺตกเมว กาลํ. ยสฺมา ปน เตสํ อุภินฺนมฺปิ กมฺมํ
ลามกเมว. เตน วุตฺตํ "นิหีนกมฺมา มนุชา ปรตฺถา"ติ. "ปรตฺตา"ติ ปน
ปทสฺส ปุรโต ๑- "เปจฺจา"ติ ปเทน สมฺพนฺโธ:- ปรตฺถ เปจฺจ อิโต คนฺตฺวา
เต นิหีนกมฺมา ปรโลเก ๒- สมา ภวนฺตีติ.
      เอวํ ภควา อพฺภูตพฺภกฺขานวเสน ภูตโทสปฏิจฺฉาทนวเสน จ ปวตฺตสฺส
มุสาวาทสฺส วิปากํ ทสฺเสตฺวา อิทานิ ตสฺมึ ฐาเน นิสินฺนานํ พหุนฺนํ
ปาปภิกฺขูนํ ทุจฺจริตกมฺมสฺส วิปากทสฺสเนน สํเวชนตฺถํ เทฺว คาถา อภาสิ.
ตตฺถ กาสาวกณฺฐาติ กสาวรสปีตตฺตา กาสาเวน วตฺเถน ปลิเวฐิตกณฺฐา.
ปาปธมฺมาติ ลามกธมฺมา. อสญฺญตาติ กายาทีหิ สญฺญมรหิตา. ปาปาติ ตถารูปา
ปาปปุคฺคลา ปาเปหิ กมฺเมหิ อุปปชฺชิตฺวา ๓- "ตสฺส กาโยปิ อาทิตฺโต สมฺปชฺชลิโต
สโชติภูโต, สงฺฆาฏิปิ อาทิตฺตา"ติอาทินา ๔- ลกฺขณสํยุตฺเต วุตฺตนเยน มหาทุกขํ
อนุภวนฺติเยว.
      ตติยคาถา อยํ สงฺเขปตฺโถ:- ยญฺเจ ภุญเชยฺย ทุสฺสีโล นิสฺสีลปุคฺคโล
กายาทีหิ อสญฺญโต รฏฺฐวาสีหิ สทฺธาทินฺนํ ยํ รฏฺฐปิณฺฑํ "สมโณมฺหี"ติ
@เชิงอรรถ:  สี. ปรโต     ฉ.ม. อยํ ปาโฐ น ทิสฺสติ     สี.,ม. อุปฺปชฺชิตฺวา
@ วิ.มหาวิ. ๑/๒๓๐/๑๖๓, สํ.นิ. ๑๖/๒๑๘/๒๔๗
ปฏิชานนฺโต คเหตฺวา ภุญฺเชยฺย, ตโต อาทิตฺโต อคฺคิวณฺโณ อโยคุโฬว
ภุตฺโต เสยฺโย สุนฺทรตโร, กึการณา? ตปฺปจฺจยา หิสฺส เอโกว อตฺตภาโว
ฌาเยยฺย, ทุสฺสีโล ปน หุตฺวา สทฺธาเทยฺยํ ภุญฺชิตฺวา อเนกานิปิ ชาติสตานิ
นิรเย อุปปชฺเชยฺยาติ.
                     เอกาทสมสุตฺตวณฺณนา นิฏฺฐิตา.
                        ----------------


             อรรถกถาภาษาบาลีอักษรไทย เล่มที่ ๒๗ หน้า ๒๐๐-๒๐๒. http://84000.org/tipitaka/atthapali/read_th.php?B=27&A=4423&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=27&A=4423&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=25&i=226              เนื้อความพระไตรปิฎกฉบับหลวง :- http://84000.org/tipitaka/read/r.php?B=25&A=5341              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=25&A=5413              The Pali Tipitaka in Roman Character :- http://84000.org/tipitaka/read/roman_read.php?B=25&A=5413              สารบัญพระไตรปิฎกเล่มที่ ๒๕ http://84000.org/tipitaka/read/?index_25

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]