ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๒๙ ภาษาบาลีอักษรไทย สุตฺต.อ.๒ (ปรมตฺถ.๒)

              ๑๓. สมฺมาปริพฺพาชนียสุตฺต (มหาสมยสุตฺต) วณฺณนา
      [๓๖๒] ปุจฺฉามิ มุนึ ปหูตปญฺญนฺติ สมฺมาปริพฺพาชนียสุตฺตํ,
"มหาสมยสุตฺตนฺ"ติปิ วุจฺจติ มหาสมยทิวเส กถิตตฺตา. กา อุปฺปตฺติ? ปุจฺฉาวสิกา
อุปฺปตฺติ. นิมฺมิตพุทฺเธน หิ ปุฏฺโฐ ภควา อิมํ สุตฺตมภาสิ, ตํ สทฺธึ ปุจฺฉาย
"สมฺมาปริพฺพาชนียสุตฺตนฺ"ติปิ วุจฺจติ. อยเมตฺถ สงฺเขโป, วิตฺถารโต ปน
สากิยโกลิยานํ อุปฺปตฺติโต ปภุติ โปราเณหิ วณฺณียติ.
      ตตฺรายํ อุทฺเทสมคฺควณฺณนา ๒- :- ปฐมกปฺปิกานํ ปน รญฺโญ
มหาสมฺมตสฺส โรโช นาม ปุตฺโต อโหสิ, โรชสฺส วรโรโช, วรโรชสฺส
@เชิงอรรถ:  ฉ.ม. ปฐนฺติ   สี.,ก. อุทฺเทสมตฺตวณฺณนา

--------------------------------------------------------------------------------------------- หน้าที่ ๑๗๑.

กลฺยาโณ, กลฺยาณสฺส วรกลฺยาโณ, วรกลฺยาณสฺส มนฺธาตา, มนฺธาตุสฺส วรมนฺธาตา, วรมนฺธาตุสฺส อุโปสโถ, อุโปสถสฺส วโร, วรสฺส อุปวโร, ๑- อุปวรสฺส มฆเทโว, ๒- มฆเทวสฺส ปรมฺปรา จตุราสีติ ขตฺติยสหสฺสานิ อเหสุํ. เตสํ ปรโต ตโย โอกฺกากวํสา อเหสุํ. เตสุ ตติยโอกฺกากสฺส ปญฺจ มเหสิโย อเหสุํ, หตฺถา จิตฺตา ชนฺตุ ชาลินี วิสาขาติ. เอเกกิสฺสา ปญฺจ ปญฺจ อิตฺถิสตานิ ปริวารา, สพฺพเชฏฺฐาย จตฺตาโร ปุตฺตา โอกฺกามุโข กากณฺโฑ ๓- หตฺถินิโก ๔- นิปุโรติ, ๕- ปญฺจ ธีตโร ปิยา สุปฺปิยา อานนฺทา วิชิตา วิชิตเสนาติ. เอวํ สา นว ปุตฺเต ลภิตฺวา กาลมกาสิ. อถ ราชา อญฺญํ ทหรํ อภิรูปํ ราชธีตรํ อาเนตฺวา อคฺคมเหสิฏฺฐาเน ฐเปสิ, สาปิ ชนฺตุํ นาม เอกํ ปุตฺตํ วิชายิ. ตํ ชนฺตุกุมารํ ปญฺจเม ทิวเส อลงฺกริตฺวา รญฺโญ ทสฺเสสิ. ราชา ตุฏฺโฐ มเหสิยา วรํ อทาสิ. สา ญาตเกหิ สทฺธึ มนฺเตตฺวา ปุตฺตสฺส รชฺชํ ยาจิ, ราชา "นสฺส วสลิ มม ปุตฺตานํ อนฺตรายมิจฺฉสี"ติ นาทาสิ. สา ปุนปฺปุนํ รโห ราชานํ ปริโตเสตฺวา "น มหาราช มุสาวาโท วฏฺฏตี"ติอาทีนิ วตฺวา ยาจติ เอว. อถ ราชา ปุตฺเต อามนฺเตสิ "อหํ ตาตา ตุมฺหากํ กนิฏฺฐํ ชนฺตุกุมารํ ทิสฺวา ตสฺส มาตุ สหสา วรํ อทาสึ, สา ปุตฺตสฺส รชฺชํ ปริณาเมตุมิจฺฉติ, ตุเมฺห มมจฺจเยน อาคนฺตฺวา รชฺชํ กาเรยฺยาถา"ติ อฏฺฐหิ อมจฺเจหิ สทฺธึ อุยฺโยเชสิ. เต ภคินิโย อาทาย จตุรงฺคินิยา เสนาย นครา นิกฺขมึสุ. นาครา ๖- "กุมารา ปิตุ อจฺจเยน อาคนฺตฺวา รชฺชํ กาเรสฺสนฺติ, ๗- คจฺฉาม เน อุปฏฺฐหามา"ติ จินฺเตตฺวา พหู มนุสฺสา อนุพนฺธึสุ. ปฐมทิวเส โยชนมตฺตา เสนา อโหสิ, ทุติยทิวเส @เชิงอรรถ: สี.,ก. จโร, จรสฺส อุปจโร @ สี. มฆาเทโว ม. กรกณฺโฑ ฉ.,อิ กรกณฺฑุ, @ สี. หตฺถินโข, ม. สาตินโก ม. นิปุโณติ, ฉ.,อิ. สินิปุโรติ, สุ.วิ. ๑/๒๓๒ @ ฉ.ม.,อิ. อยํ ปาโฐ น ทิสฺสติ ก. กาเรยฺยุนฺติ

--------------------------------------------------------------------------------------------- หน้าที่ ๑๗๒.

ทฺวิโยชนมตฺตา, ตติยทิวเส ติโยชนมตฺตา. กุมารา จินฺเตสุํ "มหา อยํ พลกาโย, สเจ มยํ กญฺจิ สามนฺตราชานํ อติกฺกมิตฺวา ๑- ชนปทํ คณฺหิสฺสาม, โสปิ ๒- โน น ปโหสฺสติ, กึ ปเรสํ ปีฬํ กตฺวา ลทฺธรชฺเชน, มหาชมฺพุทีโป, อรญฺเญ นครํ มาเปสฺสามา"ติ หิมวนฺตาภิมุขา อคมึสุ, ตตฺถ นครมาปโนกาสํ ปริเยสมานา หิมวติ กปิโล นาม ตาปโส โฆรตโป ปฏิวสติ โปกฺขรณิตีเร มหาสากสณฺเฑ, ตสฺส วสโนกาสํ คตา. โส เต ทิสฺวา ปุจฺฉิตฺวา ตํ สพฺพํ ปวตฺตึ สุตฺวา เตสุ อนุกมฺปํ อกาสิ. โส กิร ภูมิชยวสํ ๓- นาม วิชฺชํ ชานาติ, ยาย อุทฺธํ อสีติหตฺเถ อากาเส จ เหฏฺฐาภูมิยํ จ คุณโทเส ปสฺสติ. อเถกสฺมึ ปเทเส สูกรมิคา สีหพฺยคฺฆาทโย ตาเสตฺวา ปริปาเตนฺติ, มณฺฑูกมูสิกา สปฺเป ภึสาเปนฺติ. โส เต ทิสฺวา "อยํ ภูมิปฺปเทโส ปฐวีอคฺคนฺ"ติ ตสฺมึ ปเทเส อสฺสมํ มาเปสิ. ตโต โส ราชกุมาเร อาห "สเจ มม นาเมน นครํ กโรถ, เทมิ โว อิมํ โอกาสนฺ"ติ. เต ตถา ปฏิชานึสุ. ตาปโส "อิมสฺมึ โอกาเส ฐตฺวา จณฺฑาลปุตฺโตปิ จกฺกวตฺตึ พเลน อติเสตี"ติ วตฺวา "อสฺสเม รญฺโญ ฆรํ มาเปตฺวา นครํ มาเปถา"ติ ตํ โอกาสํ ทตฺวา สยํ อวิทูเร ปพฺพตปาเท อสฺสมํ กตฺวา วสิ. ตโต กุมารา ตตฺถ นครํ มาเปตฺวา กปิลสฺส วุตฺโถกาเส กตตฺตา "กปิลวตฺถุนฺ"ติ ๔- นามํ อาโรเปตฺวา ตตฺถ นิวาสํ กปฺเปสุํ. อถ อมจฺจา "อิเม กุมารา วยปฺปตฺตา, ยทิ เนสํ ปิตา สนฺติเก ภเวยฺย, โส อาวาหวิวาหํ กเรยฺย, อิทานิ ปน อมฺหากํ ภาโร"ติ จินฺเตตฺวา กุมาเรหิ สทฺธึ มนฺเตสุํ. กุมารา "อมฺหากํ สทิสา ขตฺติยธีตโร น ปสฺสาม, ตาสมฺปิ ภคินีนํ สทิเส ขตฺติยกุมาเร, ชาติสมฺเภทํ จ น กโรมา"ติ. เต ชาติสมฺเภทภเยน @เชิงอรรถ: ฉ.,อิ. อกฺกมิตฺวา ก. สพฺพมฺปิ @ ม. ภูมิชยํ, ฉ.,อิ. ภุมฺมชาลํ ฉ.ม.,อิ. กปิลวตฺถูติ

--------------------------------------------------------------------------------------------- หน้าที่ ๑๗๓.

เชฏฺฐภคินึ มาตุฏฺฐาเน ฐเปตฺวา อวเสสาหิ สํวาสํ กปฺเปสุํ. เตสํ ปิตา ตํ ปวตฺตึ สุตฺวา "สกฺยา วต โภ กุมารา, ปรมสกฺยา วต โภ กุมารา"ติ ๑- อุทานํ อุทาเนสิ. อยํ ตาว สกฺยานํ อุปฺปตฺติ. วุตฺตมฺปิ เจตํ ภควา:- "อถ โข อมฺพฏฺฐ ราชา โอกฺกาโก อมจฺเจ ปาริสชฺเช อามนฺเตสิ `กหนฺนุ โข โภ เอตรหิ กุมารา สมฺมนฺตี'ติ. อตฺถิ เทว หิมวนฺตปสฺเส โปกฺขรณิยา ตีเร มหาสากสณฺโฑ, ตตฺเถตรหิ กุมารา สมฺมนฺติ, เต ชาติสมฺเภทภยา สกาหิ ภคินีหิ สทฺธึ สํวาสํ กปฺเปนฺตีติ. อถ โข อมฺพฏฺฐ ราชา โอกฺกาโก อุทานํ อุทาเนสิ `สกฺยา วต โภ กุมารา, ปรมสกฺยา วต โภ กุมารา'ติ, ตทคฺเค โข ปน อมฺพฏฺฐ สกฺยา ปญฺญายนฺติ, โส จ สกฺยานํ ปุพฺพปุริโส"ติ. ๒- ตโต เนสํ เชฏฺฐภคินิยา กุฏฺฐโรโค อุทปาทิ, โกวิฬารปุปฺผสทิสานิ คตฺตานิ อเหสุํ. ราชกุมารา "อิมาย สทฺธึ เอกโต นิสชฺชฏฺฐานโภชนาทีนิ กโรนฺตานมฺปิ อุปริ เอส โรโค สงฺกมตี"ติ จินฺเตตฺวา อุยฺยานกีฬํ คจฺฉนฺตา วิย ตํ ยาเน อาโรเปตฺวา อรญฺญํ ปวิสิตฺวา ภูมิยํ ฆรสงฺเขเปน ๓- โปกฺขรณึ ขณาเปตฺวา ตํ ตตฺถ ขาทนียโภชนีเยหิ สทฺธึ ปกฺขิปิตฺวา อุปริ ปทรํ ปฏิจฺฉาทาเปตฺวา ปํสุํ ทตฺวา ปกฺกมึสุ. เตน จ สมเยน ราโม นาม ราชา กุฏฺฐโรคี โอโรเธหิ จ นาฏเกหิ จ ชิคุจฺฉิยมาโน เตน สํเวเคน เชฏฺฐปุตฺตสฺส รชฺชํ ทตฺวา อรญฺญํ ปวิสิตฺวา ตตฺถ ปนฺนมูลผลานิ ปริภุญฺชนฺโต น จิรสฺเสว อโรโค สุวณฺณวณฺโณ หุตฺวา อิโต จิโต จ วิจรนฺโต มหนฺตํ สุสิรรุกฺขํ ทิสฺวา ตสฺสพฺภนฺตเร โสฬสหตฺถปฺปมาณํ ตํ โกลาปํ โสเธตฺวา ทฺวารญฺจ @เชิงอรรถ: ก. "สกฺยา"ติ ที.สี. ๙/๒๖๗/๙๒ @ ฉ.ม.,อิ. ภูมิยํ ฆรสงฺเขเปนาติ ปาโฐ น ทิสฺสติ

--------------------------------------------------------------------------------------------- หน้าที่ ๑๗๔.

วาตปานญฺจ กตฺวา นิสฺเสณึ พนฺธิตฺวา ตตฺถ วาสํ กปฺเปสิ. โส องฺคารกฏาเห อคฺคึ กตฺวา รตฺตึ วิสฺสรญฺจ สุสฺสรญฺจ สุณนฺโต สยติ. โส "อสุกสฺมึ ปเทเส สีโห สทฺทมกาสิ, อสุกสฺมึ พฺยคฺโฆ"ติ สลฺลกฺเขตฺวา ปภาเต ตตฺถ คนฺตฺวา วิฆาสมํสํ อาทาย ปจฺจิตฺวา ขาทติ. อเถกทิวสํ โส ปจฺจูสสมเย อคฺคึ ชาเลตฺวา นิสีทิ, เตน จ สมเยน ตสฺสา ราชธีตาย คนฺธํ ฆายิตฺวา พฺยคฺโฆ ตํ ปเทสํ ขณิตฺวา ปทรตฺถเร วิวรมกาสิ. เตน วิวเรน สา พฺยคฺฆํ ทิสฺวา ภีตา วิสฺสรมกาสิ. โส ตํ สทฺทํ สุตฺวา "อิตฺถิสทฺโท เอโส"ติ จ สลฺลกฺขิตฺวา ปาโตว ตตฺถ คนฺตฺวา "โก เอตฺถา"ติ อาห. มาตุคาโม สามีติ. นิกฺขมาติ. น นิกฺขมามีติ. กึการณาติ. ขตฺติยกญฺญา อหนฺติ. เอวํ โสพฺเภ นิขาตาปิ มานเมว กโรติ. โส สพฺพํ ปุจฺฉิตฺวา "อหมฺปิ ขตฺติโย"ติ ชาตึ อาจิกฺขิตฺวา "เอหิ ทานิ ขีเร ปกฺขิตฺตสปฺปิ วิย ชาตนฺ"ติ อาห. สา "กุฏฺฐโรคินิมฺหิ สามิ, น สกฺกา นิกฺขมิตุนฺ"ติ อาห. โส "กตกมฺโม ทานิ อหํ สกฺกา ติกิจฺฉิตุนฺ"ติ นิสฺเสณึ ทตฺวา ตํ อุทฺธริตฺวา อตฺตโน วสโนกาสํ เนตฺวา สยํ ปริภุตฺตเภสชฺชานิ เอว ทตฺวา นจิรสฺเสว อโรคํ สุวณฺณวณฺณมกาสิ. โส ตาย สทฺธึ สํวาสํ กปฺเปสิ. สา ปฐมสํวาเสเนว คพฺภํ คณฺหิตฺวา เทฺว ปุตฺเต วิชายิ, ปุนปิ เทฺวติ เอวํ โสฬสกฺขตฺตุํ วิชายิ, เอวํ เต ทฺวตฺตึส ภาตโร อเหสุํ. เต อนุปุพฺเพน วุฑฺฒิปฺปตฺเต ปิตา สพฺพสิปฺปานิ สิกฺขาเปสิ. อเถกทิวสํ เอโก รามรญฺโญ นครวาสี วนจรโก ๑- ปพฺพเต รตนานิ คเวสนฺโต ตํ ปเทสํ อาคโต ราชานํ ทิสฺวา อญฺญาสิ. "ชานามหํ เทว @เชิงอรรถ: ฉ.ม.,อิ. อยํ ปาโฐ น ทิสฺสติ

--------------------------------------------------------------------------------------------- หน้าที่ ๑๗๕.

ตุเมฺห"ติ อาห. "กุโต ตฺวํ อาคโตสี"ติ จ เตน ปุฏฺโฐ "นครโต เทวา"ติ อาห. ตโต นํ ราชา สพฺพํ ปวตฺตึ ปุจฺฉิ. เอวํ เตสุ สมุลฺลปมาเนสุ เต ทารกา อาคมึสุ. โส เต ทิสฺวา "อิเม เก เทวา"ติ ปุจฺฉิ. ปุตฺตา เม ภเณติ. อิเมหิ ทานิ เทว ทฺวตฺตึสกุมาเรหิ ปริวุโต วเน กึ กริสฺสสิ, เอหิ รชฺชํ อนุสาสาติ. อลํ ภเณ อิเธว สุขนฺติ. โส "ลทฺธํ ทานิ เม กถาปาภฏนฺ"ติ นครํ คนฺตฺวา รญฺโญ ปุตฺตสฺส อาโรเจสิ. รญฺโญ ปุตฺโต "ปิตรํ อาเนสฺสามี"ติ จตุรงฺคินิยา เสนาย ตตฺถ คนฺตฺวา นานปฺปกาเรหิ ปิตรํ ยาจิ, โสปิ "อลํ ตาต กุมาร, อิเธว สุขนฺ"ติ เนว อิจฺฉิ. ตโต ราชปุตฺโต "น ทานิ ราชา คนฺตุํ อิจฺฉติ, หนฺทสฺส อิเธว นครํ มาเปมี"ติ จินฺเตตฺวา ตํ โกลรุกฺขํ อุทฺธริตฺวา ฆรํ กตฺวา นครํ มาเปตฺวา โกลรุกฺขํ อปเนตฺวา กตตฺตา "โกลนครนฺ"ติ จ พฺยคฺฆปเถ กตตฺตา "พฺยคฺฆปถนฺ"ติ ๑- จาติ เทฺว นามามิ อาโรเปตฺวา อคมาสิ. ตโต วยปฺปตฺเต กุมาเร มาตา อาณาเปสิ "ตาตา ตุมฺหากํ กปิลวตฺถุวาสิโน สกฺยา มาตุลา โหนฺติ, ธีตโร เนสํ คณฺหถา"ติ. เต ยํ ทิวสํ ขตฺติยกญฺญาโย นทีกีฬนํ คจฺฉนฺติ, ตํ ทิวสํ คนฺตฺวา นทีติตฺถํ อุปรุนฺธิตฺวา นามานิ สาเวตฺวา ปตฺถิตา ปตฺถิตา ราชธีตโร คเหตฺวา อคมํสุ. สกฺยราชาโน สุตฺวา "โหตุ ภเณ, อมฺหากํ ญาตกา เอเต"ติ ๒- ตุณฺหี อเหสุํ. อยเมเตสํ โกลิยานํ ๓- อุปฺปตฺติ. เอวํ เตสํ สากิยโกลิยานํ อญฺญมญฺญํ อาวาหวิวาหํ กโรนฺตานํ อาคโต วํโส ยาว สีหหนุราชา, ตาว วิตฺถารโต เวทิตพฺโพ:- สีหหนุรญฺโญ กิร ปญฺจ ปุตฺตา อเหสุํ สุทฺโธทโน อมิโตทโน โธโตทโน สกฺโกทโน สุกฺโกทโนติ. ๔- @เชิงอรรถ: ฉ.ม. พฺยคฺฆปชชนฺติ ฉ.ม.,อิ. เอวาติ @ ฉ.ม.,อิ. อยํ โกลิยานํ สี. สุกฺโกทโน อสุกฺโกทโนติ

--------------------------------------------------------------------------------------------- หน้าที่ ๑๗๖.

เตสุ สุทฺโธทเน รชฺชํ การยมาเน ตสฺส ปชาปติยา อญฺชนรญฺโญ ธีตาย มหามายาเทวิยา กุจฺฉิมฺหิ ปูริตปารมี มหาปุริโส ชาตกนิทาเน วุตฺตนเยเนว ๑- ตุสิตปุรา จวิตฺวา ปฏิสนฺธึ คเหตฺวา อนุปุพฺเพน กตมหาภินิกฺขมโน สมฺมาสมฺโพธึ อภิสมฺพุชฺฌิตฺวา ปวตฺติตปวรธมฺมจกฺโก อนุกฺกเมน กปิลวตฺถุํ คนฺตฺวา สุทฺโธทนมหาราชาทโย อริยผเล ปติฏฺฐาเปตฺวา ชนปทจาริกํ จริตฺวา ๒- ปุนปิ อปเรน สมเยน ปจฺจาคนฺตฺวา ปณฺณรสหิ ภิกฺขุสเตหิ สทฺธึ กปิลวตฺถุสฺมึ วิหรติ นิโคฺรธาราเม. ตตฺถ วิหรนฺเต จ ภควติ สากิยโกลิยานํ อุทกํ ปฏิจฺจ กลโห อโหสิ. กถํ? เนสํ กิร อุภินฺนมฺปิ กปิลปุรโกลิยปุรานํ อนฺตเร โรหิณี นาม นที ปวตฺตติ. สา กทาจิ อปฺโปทกา โหติ, กทาจิ มโหกทา. อปฺโปทกกาเล เสตุํ กตฺวา สากิยาปิ โกลิยาปิ อตฺตโน อตฺตโน สสฺสปายนตฺถํ อุทกํ อาเนนฺติ. เตสํ มนุสฺสา เอกทิวสํ เสตุํ กโรนฺตา อญฺญมญฺญํ ภณฺฑนฺตา ๓- "อเร ตุมฺหากํ ราชกุลํ ภคินีหิ สทฺธึ สํวาสํ กปฺเปสิ กุกฺกุฏโสณสิงฺคาลาทิติรจฺฉานา วิย, ตุมฺหากํ ราชกุลํ สุสิรรุกฺเข วาสํ กปฺเปสิ ปิสาจิลฺลิกา วิยา"ติ เอวํ ชาติวาเทน ขุํเสตฺวา อตฺตโน อตฺตโน ราชูนํ อาโรเจสุํ. เต กุทฺธา ยุทฺธสชฺชา หุตฺวา โรหิณีนทีตีรํ สมฺปตฺตา. เอวํ สาครสทิสํ พลํ อฏฺฐาสิ. อถ ภควา "ญาตกา กลหํ กโรนฺติ, หนฺท เน วาเรสฺสามี"ติ อากาเสนาคนฺตฺวา ทฺวินฺนํ เสนานํ มชฺเฌ อฏฺฐาสิ. ตมฺปิ อาวชฺเชตฺวา สาวตฺถิโต อาคโตติ เอเก. เอวํ ฐตฺวา จ ปน อตฺตทณฺฑสุตฺตํ ๔- อภาสิ. ตํ สุตฺวา สพฺเพ สํเวคปฺปตฺตา อาวุธานิ ฉฑฺเฑตฺวา ภควนฺตํ นมสฺสมานา อฏฺฐํสุ, มหคฺฆญฺจ อาสนํ ปญฺญาเปสุํ. ภควา โอรุยฺห ปญฺญตฺตาสเน นิสีทิตฺวา @เชิงอรรถ: ฉ.ม. วุตฺตนเยน ฉ.ม.,อิ. ปกฺกมิตฺวา @ ก. อุทกํ คณฺหนฺตา ขุ.สุ. ๒๕/๙๔ อาทิ/๕๑๘

--------------------------------------------------------------------------------------------- หน้าที่ ๑๗๗.

"กุฐารีหตฺโถ ปุริโส"ติอาทิกํ ผนฺทนชาตกํ, ๑- "วนฺทามิ ตํ กุญฺชรนฺ"ติ ลฏุกิกชาตกํ, ๒- "สมฺโมทมานา คจฺฉนฺติ ชาลมาทาย ปกฺขิโน ยทา เต วิวทิสฺสนฺติ ตทา เอหินฺติ เม วสนฺ"ติ ๓- อิมํ วฏฺฏกชาตกญฺจ กเถตฺวา ปุน เตสํ จิรกาลปฺปวตฺตํ ญาติภาวํ ทสฺเสนฺโต อิมํ มหาวํสํ กเถสิ. เต "ปุพฺเพ กิร มยํ ญาตกา เอวา"ติ อติวิย ปสีทึสุ. ตโต สกฺยา อฑฺฒเตยฺยกุมารสเต, โกลิยา อฑฺฒเตยฺยกุมารสเตติ ปญฺจ กุมารสเต ภควโต ปริวารตฺถาย อทํสุ. ภควา เตสํ ปุพฺพเหตุํ "เอถ ภิกฺขโว"ติ อาห. เต สพฺเพ อิทฺธิยา นิพฺพตฺตอฏฺฐปริกฺขารยุตฺตา อากาเส อพฺภุคฺคนฺตฺวา อาคมฺม ภควนฺตํ วนฺทิตฺวา อฏฺฐํสุ. ภควา เต อาทาย มหาวนํ อคมาสิ. เตสํ ปชาปติโย ทูเต ปาเหสุํ, เต ตาหิ นานปฺปกาเรหิ ปโลภิยมานา อุกฺกณฺฐึสุ. ภควา เตสํ อุกฺกณฺฐิตภาวํ เตสํ อุกฺกณฺฐิตภาวํ ญตฺวา หิมวนฺตํ ทสฺเสตฺวา ตตฺถ กุณาลชาตกกถาย ๔- เตสํ อนภิรตึ วิโนเทตุกาโม อาห "ทิฏฺฐปุพฺโพ โว ภิกฺขเว หิมวา"ติ. น ภควาติ. "เอถ ภิกฺขเว เปกฺขถา"ติ อตฺตโน อิทฺธิยา เต อากาเสน เนนฺโต "อยํ สุวณฺณปพฺพโต, อยํ รชตปพฺพโต, อยํ มณิปพฺพโต"ติ นานปฺปกาเร ปพฺพเต ทสฺเสตฺวา กุณาลทเห มโนสิลาตเล ปจฺจุฏฺฐาสิ. ตโต "หิมวนฺเต ปพฺพเต สพฺเพ จตุปฺปทาทิเภทา ๕- ติรจฺฉานคตา ปาณา อาคจฺฉนฺตุ, สพฺเพสญฺจ ปจฺฉโต กุณาลสกุโณ"ติ อธิฏฺฐาสิ. อาคจฺฉนฺเต จ เต ชาตินามนิรุตฺติวเสน วณฺเณนฺโต "เอเต ภิกฺขเว หํสา, เอเต โกญฺจา, เอเต จกฺกวากา กรวีกา, หตฺถิโสณฺฑกา, โปกฺขรสาตกา"ติ เตสํ ทสฺเสสิ. @เชิงอรรถ: ขุ.ชา. ๒๗/๑๔-๒๖/๒๗๒-๓ ขุ.ชา. ๒๗/๓๙-๔๓/๑๒๙-๓๐ @ ขุ.ชา. ๒๗/๓๓/๙ ขุ.ชา. ๒๘/๘๙-๑๐๗ @ ฉ.ม..อิ. หิมวนฺเต สพฺเพ จตุปฺปทพหุปฺปทาทิเภทา

--------------------------------------------------------------------------------------------- หน้าที่ ๑๗๘.

เต วิมฺหิตหทยา ๑- ปสฺสนฺตา สพฺพปจฺฉโต อาคจฺฉนฺตํ ทฺวีหิ ทิชกญฺญาหิ มุขตุณฺฑเกน ฑํสิตฺวา คหิตกฏฺฐเวมชฺเฌ นิสินฺนํ สหสฺสทิชกญฺญาปริวารํ กุณาลสกุณํ ทิสฺวา อจฺฉริยพฺภุตจิตฺตชาตา ภควนฺตํ อาหํสุ "กจฺจิ ภนฺเต ภควาปิ อิธ กุณาลราชา ภูตปุพฺโพ"ติ. "อาม ภิกฺขเว มยาเวส กุณาลวํโส กโต. อตีเต หิ มยํ จตฺตาโร ชนา อิธ วสิมฺหา นารโท เทวิโล อิสิ, อานนฺโท คิชฺฌราชา, ปุณฺณมุโข ผุสฺสโกกิโล, อหํ กุณาลสกุโณ"ติ สพฺพํ มหากุณาลชาตกํ กเถสิ. ตํ สุตฺวา เตสํ ภิกฺขูนํ โปราณทุติยิกาโย อารพฺภ อุปฺปนฺนา อนภิรติ วูปสนฺตา. ตโต เตสํ ภควา สจฺจกถํ กเถสิ, กถาปริโยสาเน สพฺพปจฺฉิมโก โสตาปนฺโน, สพฺพปุริโม อนาคามี อโหสิ, เอโกปิ ปุถุชฺชโน วา อรหา วา นตฺถิ. ตโต ภควา เต อาทาย ปุนเทว มหาวเน โอรุหิ, อาคจฺฉมานา จ เต ภิกฺขู อตฺตโนว อิทฺธิยา อาคจฺฉึสุ. อถ เนสํ ภควา อุปริมคฺคตฺถาย ปุน ธมฺมํ เทเสสิ, เต ปญฺจสตาปิ วิปสฺสนํ อารภิตฺวา อรหตฺเต ปติฏฺฐหึสุ. ปฐมํ ปตฺโต ปฐมเมว อาคมาสิ "ภควโต อาโรเจสฺสามี"ติ. อาคนฺตฺวา จ "อภิรมามหํ ภควา, น อุกฺกณฺฐามี"ติ วตฺวา ภควนฺตํ วนฺทิตฺวา เอกมนฺตํ นิสีทิ. เอวํ เต สพฺเพปิ อนุกฺกเมน อาคนฺตฺวา ภควนฺตํ ปริวาเรตฺวา นิสีทึสุ เชฏฺฐมาสอุโปสถทิวเส สายนฺหสมเย. ตโต ปญฺจสตขีณาสวปริวุตํ วรพุทฺธาสเน นิสินฺนํ ภควนฺตํ ฐเปตฺวา อสญฺญสตฺเต จ อรูปพฺรหฺมาโน จ สกลทสสหสฺสจกฺกวาเฬ อวเสสเทวตาโย ๒- มงฺคล- สุตฺตวณฺณนายํ วุตฺตนเยเนว ๓- สุขุมตฺตภาเว นิมฺมินิตฺวา สมฺปริวาเรสุํ "วิจิตฺร- ปฏิภานํ ธมฺมเทสนํ โสสฺสามา"ติ. ตตฺถ จตฺตาโร ขีณาสวา พฺรหฺมาโน สมาปตฺติโต วุฏฺฐาย พฺรหฺมคณํ อปสฺสนฺตา "กุหึ คตา"ติ อาวชฺเชตฺวา ตมตฺถํ ญตฺวา @เชิงอรรถ: ก. วิมฺหยหทยา ฉ.ม.....เทวตาทโย ฉ.ม. วุตฺตนเยน

--------------------------------------------------------------------------------------------- หน้าที่ ๑๗๙.

ปจฺฉาคนฺตฺวา มหาวเน ๑- โอกาสํ อลภมานา จกฺกวาฬมุทฺธนิ ฐตฺวา ปจฺเจกคาถาโย อภาสึสุ. ยถาห:- "อถ โข จตุนฺนํ สุทฺธาวาสกายิกานํ เทวานํ เอตทโหสิ อยํ โข ภควา สกฺเกสุ วิหรติ กปิลวตฺถุสฺมึ มหาวเน มหตา ภิกฺขุสํเฆน สทฺธึ ปญฺจมตฺเตหิ ภิกฺขุสเตหิ สพฺเพเหว อรหนฺเตหิ. ทสหิ จ โลกธาตูหิ เทวตา เยภุยฺเยน สนฺนิปติตา โหนฺติ ภควนฺตํ ทสฺสนาย ภิกฺขุสํฆญฺจ. ยนฺนูน มยมฺปิ เยน ภควา เตนุปสงฺกเมยฺยาม, อุปสงฺกมิตฺวา ภควโต สนฺติเก ปจฺเจกคาถํ ภาเสยฺยามา"ติ ๒- สพฺพํ สคาถวคฺเค วุตฺตนเยเนว เวทิตพฺพํ. เอวํ วตฺวา จ ตตฺถ เอโก พฺรหฺมา ปุรตฺถิมจกฺกวาฬมุทฺธนิ โอกาสํ ลภิตฺวา ตตฺถ ฐิโต อิมํ คาถมภาสิ:- "มหาสมโย ปวนสฺมึ ฯเปฯ ทกฺขิตาเย อปราชิตสํฆนฺ"ติ. ๓- อิมญฺจสฺส คาถํ ภาสมานสฺส ปจฺฉิมจกฺกวาฬปพฺพเต ฐิโต สทฺทํ อสฺโสสิ. ทุติโย ปจฺฉิมจกฺกวาฬมุทฺธนิ โอกาสํ ลภิตฺวา ตตฺถ ฐิโต ตํ คาถํ สุตฺวา อิมํ คาถมภาสิ:- "ตตฺร ภิกฺขโว สมาทหํสุ ฯเปฯ อินฺทฺริยานิ รกฺขนฺติ ปณฺฑิตา"ติ. ๓- ตติโย ทกฺขิณจกฺกวาฬมุทฺธนิ โอกาสํ ลภิตฺวา ตตฺถ ฐิโต ตํ คาถํ สุตฺวา อิมํ คาถมภาสิ:- "เฉตฺวา ขีลํ เฉตฺวา ปลิฆํ ฯเปฯ สุสุนาคา"ติ. ๔- @เชิงอรรถ: ฉ.ม.,อิ. อยํ ปาโฐ น ทิสฺสติ ที.มหา. ๑๐/๓๓๑/๒๑๖, สํ.ส. ๑๕/๓๗/๒๙ @ ที.มหา. ๑๐/๓๓๒/๒๑๖, สํ.ส. ๑๕/๓๗/๒๙ ที.มหา. ๑๐/๓๓๒/๒๑๗, สํ.ส. ๑๕/๓๗/๓๐

--------------------------------------------------------------------------------------------- หน้าที่ ๑๘๐.

จตุตฺโถ อุตฺตรจกฺกวาฬมุทฺธนิ โอกาสํ ลภิตฺวา ตตฺถ ฐิโต ตํ คาถํ สุตฺวา อิมํ คาถมภาสิ:- "เย เกจิ พุทฺธํ สรณํ คตาเส ฯเปฯ เทวกายํ ปริปูเรสฺสนฺตี"ติ. ๑- ตสฺสปิ ตํ สทฺทํ ทกฺขิณจกฺกวาฬมุทฺธนิ ฐิโต อสฺโสสิ. เอวํ ตทา อิเม จตฺตาโร พฺรหฺมาโน ปริสํ โถเมตฺวา ฐิตา อเหสุํ, มหาพฺรหฺมาโน เอกจกฺกวาฬํ ฉาเทตฺวา อฏฺฐํสุ. อถ ภควา เทวปริสํ โอโลเกตฺวา ภิกฺขูนํ อาโรเจสิ "เยปิ เต ภิกฺขเว อเหสุํ อตีตมทฺธานํ อรหนฺโต สมฺมาสมฺพุทฺธา, เตสมฺปิ ภควนฺตานํ เอตปฺปรมาเยว เทวตา สนฺนิปติตา อเหสุํ เสยฺยถาปิ มยฺหํ เอตรหิ. เยปิ เต ภิกฺขเว ภวิสฺสนฺติ อนาคตมทฺธานํ อรหนฺโต สมฺมาสมฺพุทฺธา, เตสมฺปิ ภควนฺตานํ เอตปฺปรมาเยว เทวตา สนฺนิปติตา ภวิสฺสนฺติ เสยฺยถาปิ มยฺหํ เอตรหี"ติ. ตโต ตํ เทวปริสํ ภพฺพาภพฺพวเสน ทฺวิธา วิภชิ "เอตฺตกา ภพฺพา, เอตฺตกา อภพฺพา"ติ. ตตฺถ "อภพฺพา ปริสา พุทฺธสเตปิ ธมฺมํ เทเสนฺเต น พุชฺฌติ, ภพฺพา ปริสา สกฺกา โพเธตุนฺ"ติ ญตฺวา ปุน ภพฺพปุคฺคเล จริยวเสน ฉธา วิภชิ "เอตฺตกา ราคจริตา, เอตฺตกา โทสโมหวิตกฺกสทฺธาพุทฺธิจริตา"ติ. เอวํ จริยวเสน ปริคฺคเหตฺวา "อสฺสา ปริสาย กีทิสา ธมฺมเทสนา สปฺปายา"ติ ธมฺมกถํ วิจินิตฺวา ปุน ตํ ปริสํ มนสากาสิ "อตฺตชฺฌาสเยน นุ โข ชาเนยฺย, ปรชฺฌาสเยน, อฏฺฐุปฺปตฺติวเสน, ปุจฺฉาวเสนา"ติ. ตโต "ปุจฺฉาวเสน ชาเนยฺยา"ติ ญตฺวา "ปญฺหํ ปุจฺฉิตุํ สมตฺโถ อตฺถิ, นตฺถี"ติ ปุน สกลปริสํ อาวชฺเชตฺวา "นตฺถิ โกจี"ติ ญตฺวา "สเจ อหเมว ปุจฺฉิตฺวา อหเมว วิสชฺเชยฺยํ, อิมิสฺสา ๒- @เชิงอรรถ: ที.มหา. ๑๐/๓๓๒/๒๑๗, สํ.ส. ๑๕/๓๗/๓๐ ฉ.ม. เอวมสฺสา, อิ. เอตมสฺสา

--------------------------------------------------------------------------------------------- หน้าที่ ๑๘๑.

ปริสาย สปฺปายํ น โหติ. ยนฺนูนาหํ นิมฺมิตพุทฺธํ มาเปยฺยนฺติ ปาทกชฺฌานํ สมาปชฺชิตฺวา วุฏฺฐาย มโนมยิทฺธิยา อภิสงฺขริตฺวา นิมฺมิตพุทฺธํ มาเปสิ. "สพฺพงฺคปจฺจงฺคลกฺขณสมฺปนฺโน ๑- ปตฺตจีวรธโร อาโลกิตวิโลกิตาทิสมฺปนฺโน โหตู"ติ อธิฏฺฐานจิตฺเตน สห ปาตุรโหสิ. โส ปาจีนโลกธาตุโต อาคนฺตฺวา ภควโต สมสเม อาสเน นิสินฺโน เอวํ อาคนฺตฺวา ยานิ ภควตา อิมสฺมึ สมาคเม จริยวเสน ฉ สุตฺตานิ ๒- กถิตานิ. เสยฺยถิทํ? ปุราเภทสุตฺตํ กลหวิวาทสุตฺตํ จูฬพฺยูหสุตฺตํ ๓- ตุวฏกํ อิทเมว สมฺมาปริพฺพาชนิยนฺติ. เตสุ ราคจริตเทวตานํ สปฺปายวเสน กเถตพฺพสฺส อิมสฺส สุตฺตสฺส ปวตฺตนตฺถํ ปญฺหํ ปุจฺฉนฺโต "ปุจฺฉามิ มุนึ ปหูตปญฺญนฺ"ติ อิมํ คาถมาห. ตตฺถ ปหูตปญฺญนฺติ มหาปญฺญํ. ติณฺณนฺติ จตุโรฆติณฺณํ. ปารคตนฺติ นิพฺพานปฺปตฺตํ. ปรินิพฺพุตนฺติ สอุปาทิเสสนิพฺพานวเสน ปรินิพฺพุตํ. ฐิตตฺตนฺติ โลกธมฺเมหิ อกมฺปนียจิตฺตํ. นิกฺขมฺม ฆรา ปนุชฺช กาเมติ วตฺถุกาเม ปนุทิตฺวา ฆราวาสา นิกฺขมฺม. กถํ ภิกฺขุ สมฺมา โส โลเก ปริพฺพเชยฺยาติ โส ภิกฺขุ กถํ โลเก สมฺมา ปริพฺพเชยฺย วิหเรยฺย อนุปลิตฺโต โลเกน หุตฺวา, โลกํ อติกฺกเมยฺยาติ วุตฺตํ โหติ. เสสเมตฺถ วุตฺตนยเมว. [๓๖๓] อถ ภควา ยสฺมา อาสวกฺขยมปฺปตฺวา โลเก สมฺมา ปริพฺพชนฺโต นาม นตฺถิ, ตสฺมา ตสฺมึ ราคจริตาทิวเสน ปริคฺคหิเต ภพฺพปุคฺคลสมูเห ตํตํ เตสํ เตสํ สมานโทสานํ เทวตาคณานํ อาจิณฺณโทสปฺปหานตฺถํ "ยสฺส มงฺคลา"ติ อารภิตฺวา อรหตฺตนิกูเฏเนว ขีณาสวปฏิปทํ ปกาเสนฺโต ปณฺณรส คาถาโย อภาสิ. @เชิงอรรถ: ฉ.ม.,อิ. สพฺพงฺคปจฺจงฺคิ.... ขุ.สุ. ๒๕/๘๕๕ @ ฉ.ม.,อิ. จูฬพฺยูหํ, มหาพฺยูหํ

--------------------------------------------------------------------------------------------- หน้าที่ ๑๘๒.

ตตฺถ ปฐมคาถาย ตาว มงฺคลาติ มงฺคลสุตฺเต วุตฺตานํ ทิฏฺฐมงฺคลาทีนเมตํ อธิวจนํ. สมูหตาติ สุฏฺฐุ อูหตา ปญฺญาสตฺเถน สมุจฺฉินฺนา. อุปฺปาตาติ "อุกฺกาปาตทิสาฑาหาทโย เอวํ วิปากา โหนฺตี"ติ เอวํ ปวตฺตา อุปฺปาตาภินิเวสา. สุปินาติ "ปุพฺพณฺหสมเย สุปินํ ทิสฺวา อิทํ นาม โหติ, มชฺฌนฺติกาทีสุ อิทํ, วามปสฺเสน สยตา ทิฏฺเฐ อิทํ นาม โหติ, ทกฺขิณปสฺสาทีหิ อิทํ, สุปินนฺเต จนฺทํ ทิสฺวา อิทํ นาม โหติ, สูริยาทโย ทิสฺวา อิทนฺ"ติ เอวํ ปวตฺตา สุปินาภินิเวสา, ลกฺขณาติ ทณฺฑลกฺขณวตฺถลกฺขณาทิปาฐํ ปฐิตฺวา "อิมินา อิทํ นาม โหตี"ติ เอวํ ปวตฺตา ลกฺขณาภินิเวสา. เต สพฺเพปิ พฺรหฺมชาเล วุตฺตนเยเนว เวทิตพฺพา. โส มงฺคลโทสวิปฺปหีโนติ อฏฺฐตฺตึส มหามงฺคลานิ ฐเปตฺวา อวเสสา มงฺคลโทสา นาม. ยสฺส ปน เต ๑- มงฺคลาทโย สมูหตา โส มงฺคลโทสวิปฺปหีโน โหติ. อถ วา มงฺคลานญฺจ อุปฺปาตาทิโทสานญฺจ ปหีนตฺตา มงฺคลโทสวิปฺปหีโน โหติ, น มงฺคลาทีหิ สุทฺธึ ปจฺเจติ อริยมคฺคสฺส ๒- อธิคตตฺตา ตสฺมา สมฺมา โส โลเก ปริพฺพเชยฺย, โส ขีณาสโว สมฺมา โลเก ปริพฺพเชยฺย อนุปลิตฺโต โลเกนาติ. [๓๖๔] ทุติยคาถาย ราคํ วินเยถ มานุเสสุ, ทิพฺเพสุ กาเมสุ จาปิ ภิกฺขูติ มานุเสสุ จ ทิพฺเพสุ จ กามคุเณสุ อนาคามิมคฺเคน อนุปฺปตฺติ ธมฺมตํ เนนฺโต ราคํ วินเยถ ๓- อติกฺกมฺม ภวํ สเมจฺจ ธมฺมนฺติ เอวํ ราคํ วิเนตฺวา ตโต ปรํ อรหตฺตมคฺเคน สพฺพปฺปการโต ปริญฺญาภิสมยาทโย สาเธนฺโต จตุสจฺจเภทมฺปิ สเมจฺจ ธมฺมํ อิมาย ปฏิปทาย ติวิธมฺปิ อติกฺกมฺม ภวํ สมฺมา โสติ โสปิ ภิกฺขุ สมฺมา โลเก ปริพฺพเชยฺย. @เชิงอรรถ: ฉ.ม.,อิ. ปเนเต ก. อริยมคฺเคน @ ก. ชเนนฺโต ราคํ วิเนติ

--------------------------------------------------------------------------------------------- หน้าที่ ๑๘๓.

[๓๖๕] ตติยคาถาย "อนุโรธวิโรธวิปฺปหีโน"ติ สพฺพวตฺถูสุปหีนราคโทโส. เสสํ วุตฺตนยเมว. สพฺพคาถาสุ จ "โสปิ ภิกฺขุ สมฺมา โลเก ปริพฺพเชยฺยา"ติ โยเชตพฺพํ. อิโต ปรํ หิ โยชนมฺปิ อวตฺวา อวุตฺตนยเมว วณฺณยิสฺสาม. [๓๖๖] จตุตฺถคาถาย สตฺตสงฺขารวเสน ทุวิธํ ปิยญฺจ อปฺปิยญฺจ เวทิตพฺพํ, ตตฺถ ฉนฺทราคปฏิฆปฺปหาเนน หิตฺวา. อนุปาทายาติ จตูหิ อุปาทาเนหิ กญฺจิ ธมฺมํ อคฺคเหตฺวา. อนิสฺสิโต กุหิญฺจีติ อฏฺฐสตเภเทน ตณฺหานิสฺสเยน ทฺวาสฏฺฐิเภเทน ทิฏฺฐินิสฺสเยน จ กุหิญฺจิ รูปาทิธมฺเม ภเว วา อนิสฺสิโต. สํโยชนิเยหิ วิปฺปมุตฺโตติ สพฺเพปิ เตภูมกธมฺมา ทสวิธสํโยชนสฺส วิสยตฺตา สํโยชนิยา, เตหิ สพฺพปฺปการโต มคฺคภาวนาย ปริญฺญาตตฺตา ปหีนตฺตา ๑- จ วิปฺปมุตฺโตติ อตฺโถ. ปฐมปาเทน เจตฺถ ราคโทสปฺปหานํ วุตฺตํ, ทุติเยน อุปาทานนิสฺสยาภาโว, ตติเยน เสสากุสเลหิ อกุสลวตฺถูหิ จ วิปฺปโมกฺโข. ปฐเมน วา ราคโทสปฺปหานํ, ทุติเยน ตทุปาโย, ตติเยน เตสํ ปหีนตฺตา สํโชนิเยหิ วิปฺปโมกฺโขติ เวทิตพฺโพ. [๓๖๗] ปญฺจมคาถาย อุปธีสูติ ขนฺธุปธีสุปิ. อาทานนฺติ อาทาตพฺพฏฺเฐน เตเยว วุจฺจนฺติ อนญฺญเนยฺโยติ อนิจฺจาทีนํ สุทิฏฺฐตฺตา "อิทํ เสยฺโย"ติ เกนจิ อเนตพฺโพ. เสสํ อุตฺตานปทตฺถเมว. อิทํ วุตฺตํ โหติ:- อาทาเนสุ จตุตฺถมคฺเคน สพฺพโส ฉนฺทราคํ วิเนตฺวา โส วินีตจฺฉนฺทราโค เตสุ อุปธีสุ น สารเมติ, สพฺเพ อุปธี อสารกตฺเตเนว ปสฺสติ. ตโต เตสุ ทุพฺพิเธสุปิ นิสฺสเยสุ ๒- อนิสฺสิโต อญฺเญน วา ๓- เกนจิ "อิทํ เสยฺโย"ติ อเนตพฺโพ ขีณาสโว ภิกฺขุ สมฺมา โส โลเก ปริพฺพเชยฺย. [๓๖๘] ฉฏฺฐคาถาย อวิรุทฺโธติ เอเตสํ ติณฺณํ ทุจฺจริตานํ ปหีนตฺตา สุจริเตหิ สทฺธึ อวิรุทฺโธ. วิทิตฺวา ธมฺมนฺติ มคฺเคน จตุสจฺจธมฺมํ ญตฺวา ๔- @เชิงอรรถ: ฉ.ม. อยํ ปาโฐ น ทิสฺสติ ฉ.ม.,อิ. ทุวิเธนปิ นิสฺสเยน @ ก. อตฺเถน วา ก. วิทิตฺวา

--------------------------------------------------------------------------------------------- หน้าที่ ๑๘๔.

นิพฺพานปทาภิปตฺถยาโนติ อนุปาทิเสสขนฺธนิพฺพานปทํ ปตฺถยมาโน. เสสมุตฺตานตฺถเมว. [๓๖๙] สตฺตมคาถาย อกุฏฺโฐติ ทสหิ อกฺโกสวตฺถูหิ อภิสตฺโต. น สนฺธิเยถาติ น อุปนเยฺหถ น กุปฺเปยฺย. ลทฺธา ปรโภชนํ น มชฺเชติ ปเรหิ ทินฺนํ สทฺธาเทยฺยํ ลภิตฺวา "อหํ ญาโต ยสสฺสี ลาภี"ติ น มชฺเชยฺย. เสสมุตฺตานตฺถเมว. [๓๗๐] อฏฺฐมคาถาย โลภนฺติ วิสมโลภํ. ภวนฺติ กามภวาทึ. ๑- เอวํ ทฺวีหิ ปเทหิ ภวโภคตณฺหา วุตฺตา. ปุริเมน วา สพฺพาปิ ตณฺหา, ปจฺฉิเมน กามภโว. วิรโต เฉทพนฺธนา จาติ เอวเมเตสํ กมฺมกิเลสานํ ปหีนตฺตา ปรสตฺตเฉทนา พนฺธนา จ วิรโตติ. เสสเมตฺถ ๒- วุตฺตนยเมว. [๓๗๑] นวมคาถาย สารุปฺปมตฺตโน วิทิตฺวาติ อตฺตโน ภิกฺขุภาวสฺส ปติรูปํ ๓- อเนสนาทึ ปหาย สมฺมาเอสนาทิอาชีวปาริสุทฺธึ ๔- อญฺญญฺจ สมฺมาปฏิปตฺตึ ตตฺถ ปติฏฺฐหเนน วิทิตฺวา. น หิ ญาณมตฺเตเนว ๕- กิญฺจิ โหติ. ยถา ตถิยนฺติ ๖- ยถาตถํ ยถาภูตํ. ธมฺมนฺติ ขนฺธายตนาทิเภทํ ยถาภูตญาเณน, จตุสจฺจธมฺมํ วา มคฺเคน วิทิตฺวา. เสสํ อุตฺตานตฺถเมว. [๓๗๒] ทสมคาถาย โส นิราโส อนาสิสาโนติ ยสฺส อริยมคฺเคน วินาสิตตฺตา วินาสิตตฺตา อนุสยา จ น สนฺติ, อกุสลมูลา จ สมูหตา, โส นิราโส นิตฺตโณฺห โหติ. ตโต อาสายาภาเวน กญฺจิ รูปาทิธมฺมํ นาสึสติ. เตนาห "นิราโส อนาสิสาโน"ติ. เสสํ วุตฺตนยเมว. [๓๗๓] เอกาทสมคาถาย อาสวขีโณติ ขีณจตุราสโว. ปหีนมาโนติ ปหีนนววิธมาโน. ราคปถนฺติ ราควิสยภูตํ เตภูมกธมฺมชาตํ. อุปาติวตฺโตติ @เชิงอรรถ: ฉ.ม. กามภวาทิภวํ ฉ.ม.,อิ. เสสํ สี.,อิ. ภิกฺขุภาวสฺส อปฺปติรูปํ @ ฉ.ม.,อิ....อาชีวสุทฺธึ ฉ.ม. ญาตมตฺเตเนว ก. ยถาตถนฺติ

--------------------------------------------------------------------------------------------- หน้าที่ ๑๘๕.

ปริญฺญาปหาเนหิ อติกฺกนฺโต. ทนฺโตติ สพฺพทฺวารวิเสวนํ หิตฺวา อริเยน ทมเถน ทนฺตภูมิปฺปตฺโต. ปรินิพฺพุโตติ กิเลสคฺคิวูปสเมน สีติภูโต. เสสํ วุตฺตนยเมว. [๓๗๔] ทฺวาทสมคาถาย สทฺโธติ พุทฺธาทิคุเณสุ ปรปฺปจฺจยวิรหิตตฺตา สพฺพาการสมฺปนฺเนน อเวจฺจปฺปสาเทน สมนฺนาคโต, น ปรสฺส สทฺธาย ปฏิปตฺติยํ คมนภาเวน. ๑- ยถาห "น ขฺวาหํ ภนฺเต เอตฺถ ภควโต สทฺธาย คจฺฉามี"ติ. ๒- สุตวาติ โวสิตสุตกิจฺจตฺตา ปรมตฺถิกสุตสมนฺนาคโต. นิยามทสฺสีติ สํสารกนฺตารมูเฬฺห โลเก อมตปุรคามิโน สมฺมตฺตนิยามภูตสฺส มคฺคสฺส ทสฺสาวี, ทิฏฺฐมคฺโคติ วุตฺตํ โหติ. วคฺคคเตสุ น วคฺคสารีติ วคฺคคตา นาม ทฺวาสฏฺฐิ- ทิฏฺฐิคติกา อญฺญมญฺญํ ปฏิโลมตฺตา, เอวํ วคฺคาหิ ทิฏฺฐีหิ คเตสุ สตฺเตสุ น วคฺคสารี "อิทํ อุจฺฉิชฺชิสฺสติ, อิทํ ตเถว ภวิสฺสตี"ติ เอวํ ทิฏฺฐิวเสน อคมนโต. ปฏิฆนฺติ ปฏิฆาตกํ, จิตฺตฆฏฺฏกนฺติ ๓- วุตฺตํ โหติ. โทสวิเสสนเมเวตํ. วิเนยฺยาติ วิเนตฺวา. เสสํ วุตฺตนยเมว. [๓๗๕] เตรสมคาถาย สํสุทฺธชิโนติ สํสุทฺเธน อรหตฺตมคฺเคน วิชิตกิเลโส. วิวฏจฺฉโทติ วิวฏราคโทสโมหจฺฉทโน. ธมฺเมสุ วสีติ จตุสจฺจธมฺเมสุ วสิปฺปตฺโต. น หิ ๔- สกฺกา เต ธมฺมา ยถา ญาตา เกนจิ อญฺญถา กาตุํ, เตน ขีณาสโว "ธมฺเมสุ วสี"ติ วุจฺจติ. ปารคูติ ปารํ วุจฺจติ นิพฺพานํ, ตํ คโต, สอุปาทิเสสวเสน อธิคโตติ วุตฺตํ โหติ. อเนโชติ อปคตตณฺหาจลโน. สงฺขารนิโรธญาณกุสโลติ สงฺขารนิโรโธ วุจฺจติ นิพฺพานํ, ตมฺหิ ญาณํ อริยมคฺคปญฺญา, ตตฺถ กุสโล, จตุกฺขตฺตุํ ภาวิตตฺตา เฉโกติ วุตฺตํ โหติ. @เชิงอรรถ: สี. คมนาภาเวน องฺ.ปญฺจก. ๒๒/๓๔/๔๒ (สฺยา) @ ฉ.ม. จิตฺตวิฆาตกนฺติ ฉ.ม.,อิ. น หิสฺส

--------------------------------------------------------------------------------------------- หน้าที่ ๑๘๖.

[๓๗๖] จุทฺทสมคาถาย อตีเตสูติ ปวตฺตึ ปตฺวา อติกฺกนฺเตสุ ปญฺจกฺขนฺเธสุ. อนาคเตสูติ ปวตฺตึ อปฺปตฺเตสุ ปญฺจกฺขนฺเธสุ เอว. กปฺปาตีโตติ "อหํ มมนฺ"ติ กปฺปนํ สพฺพมฺปิ วา ตณฺหาทิฏฺฐิกปฺปํ อตีโตติ. ๑- อติจฺจสุทฺธิปญฺโญติ อตีว สุทฺธิปญฺโญ, อติกฺกมิตฺวา วา สุทฺธิปญฺโญ. กึ อติกฺกมิตฺวา? อทฺธตฺตยํ. อรหา หิ ยฺวายํ อวิชฺชาสงฺขารสงฺขาโต อตีโต อทฺธา, ชาติชรามรณสงฺขาโต อนาคโต อทฺธา, วิญฺญาณาทิภวปริยนฺโต ปจฺจุปฺปนฺโน จ อทฺธา, ตํ สพฺพมฺปิ อติกฺกมฺม กงฺขํ วิตริตฺวา ปรมสุทฺธิปฺปตฺตปญฺโญ หุตฺวา ฐิโต. เตน วุจฺจติ "อติจฺจสุทฺธิปญฺโญ"ติ. สพฺพายตเนหีติ ทฺวาทสหายตเนหิ. อรหา หิ เอวํ กปฺปาตีตตฺตา อติจฺจสุทฺธิปญฺญตฺตา จ อายตึ น กิญฺจิ อายตนํ อุเปติ. เตนาห "สพฺพายตเนหิ วิปฺปมุตฺโต"ติ. [๓๗๗] ปณฺณรสมคาถาย อญฺญาย ปทนฺติ เย เต "สจฺจานํ จตุโร ปทา"ติ วุตฺตา, เตสุ เอเกกํ ปทํ ปุพฺพภาคสจฺจววตฺถาปนปญฺญาย ญตฺวา. สเมจฺจ ธมฺมนฺติ ตโต ปรํ จตูหิ อริยมคฺเคหิ จตุสจฺจธมฺมํ สเมจฺจ. วิวฏํ ทิสฺวาน ปหานมาสวานนฺติ อถ ปจฺจเวกฺขณญาเณน อาสวากฺขยสญฺญิตํ นิพฺพานํ วิวฏํ ปากฏมนาวฏํ ทิสฺวาน. สพฺพูปธีนํ ปริกฺขยาติ สพฺเพสํ ขนฺธกามคุณ- กิเลสาภิสงฺขารเภทานํ อุปธีนํ ปริกฺขีณตฺตา กตฺถจิ อสชฺชมาโน ภิกฺขุ สมฺมา โส โลเก ปริพฺพเชยฺย วิหเรยฺย, อนลฺลียนฺโต โลกํ คจฺเฉยฺยาติ เทสนํ นิฏฺฐาเปสิ. [๓๗๘] ตโต โส นิมฺมิโต เทสนํ ๒- โถเมนฺโต "อทฺธา หิ ภควา"ติ อิมํ คาถมาห. ตตฺถ โย โส เอวํวิหารีติ โย โส มงฺคลาทีนิ สมูหนิตฺวา สพฺพมงฺคลโทสปฺปหานวิหารี, โยปิ โส ทิพฺพมานุสเกสุ กาเมสุ ราคํ วิเนยฺย ภวาติกฺกมฺม ธมฺมาภิสมยวิหารีติ เอว ตาย ตาย คาถาย นิทฺทิฏฺฐภิกฺขุํ ทสฺเสนฺโต @เชิงอรรถ: ฉ.ม.,อิ. อตีโต ฉ.ม.,อิ. ธมฺมเทสนํ

--------------------------------------------------------------------------------------------- หน้าที่ ๑๘๗.

อาห. เสสํ อุตฺตานตฺถเมว. ๑- อยํ ปน โยชนา:- อทฺธา หิ ภควา ตเถว เอตํ ยํ ตฺวํ "ยสฺส มงฺคลา สมูหตา"ติอาทีนิ วตฺวา ตสฺสา ตสฺสา คาถาย ปริโยสาเน "สมฺมา โส โลเก ปริพฺพเชยฺยา"ติ อวจ. กึการณํ? โย โส เอวํวิหารี ภิกฺขุ, โส อุตฺตเมน ทมเถน ทนฺโต, สพฺพานิ จ ทสปิ สํโยชนานิ จตุโร จ โยเค วีติวตฺโต โหติ. ตสฺมา สมฺมา โส โลเก ปริพฺพเชยฺย, นตฺถิ เม เอตฺถ วิจิกิจฺฉา"ติ อิติ เทสนาโถมนคาถมฺปิ วตฺวา อรหตฺตนิกูเฏเนว เทสนํ นิฏฺฐาเปสิ. สุตฺตปริโยสาเน โกฏิสตสหสฺสเทวตานํ อคฺคผลุปฺปตฺติ ๒- อโหสิ, โสตาปตฺติสกทาคามิอนาคามิผลปฺปตฺตา ปน คณนโต อสงฺเขฺยยฺยาติ. ปรมตฺถโชติกาย ขุทฺทกฏฺฐกถาย สุตฺตนิปาตฏฺฐกถาย สมฺมาปริพฺพาชนียสุตฺตวณฺณนา นิฏฺฐิตา. -----------

             อรรถกถาภาษาบาลีอักษรไทย เล่มที่ ๒๙ หน้า ๑๗๐-๑๘๗. http://84000.org/tipitaka/atthapali/read_th.php?B=29&A=3830&modeTY=2&pagebreak=1              The Pali Atthakatha in Roman :- http://84000.org/tipitaka/atthapali/read_rm.php?B=29&A=3830&modeTY=2&pagebreak=1              อ่านอรรถกถาแปลไทย :- http://84000.org/tipitaka/attha/attha.php?b=25&i=331              เนื้อความพระไตรปิฎกฉบับหลวง :- http://84000.org/tipitaka/read/r.php?B=25&A=8220              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=25&A=8191              The Pali Tipitaka in Roman Character :- http://84000.org/tipitaka/read/roman_read.php?B=25&A=8191              สารบัญพระไตรปิฎกเล่มที่ ๒๕ http://84000.org/tipitaka/read/?index_25

อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]