ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓๒ ภาษาบาลีอักษรไทย เถร.อ.๑ (ปรมตฺถที.๑)

                    ๒๑๙. ๒. กสฺสปตฺเถรคาถาวณฺณนา
      เยน เยน สุภิกฺขานีติ อายสฺมโต กสฺสปตฺเถรสฺส คาถา. กา อุปฺปตฺติ?
      อยํ กิร ปทุมุตฺตรสฺส ภควโต กาเล พฺราหฺมณกุเล นิพฺพตฺติตฺวา ตีสุ เวเทสุ
อญฺเญสุ จ พฺราหฺมณสิปฺเปสุ นิปฺผตฺตึ คโต, โส เอกทิวสํ ภควนฺตํ ทิสฺวา
ปสนฺนมานโส สุมนปุปฺเผหิ ปูชํ อกาสิ. กโรนฺโต จ สตฺถุ สมนฺตโต อุปริ จ
ปุปฺผมุฏฺฐิโย ขิปิ. พุทฺธานุภาเวน ปุปฺผานิ ปุปฺผาสนากาเรน สตฺตาหํ อฏฺฐํสุ.
โส ตํ อจฺฉริยํ ทิสฺวา ภิยฺโยโส มตฺตาย ปสนฺนมานโส อโหสิ. อปราปรํ ปุญฺญานิ
กโรนฺโต กปฺปสตสหสฺสํ สุคตีสุเยว สํสรนฺโต อิมสฺมึ พุทฺธุปฺปาเท สาวตฺถิยํ
อญฺญตรสฺส อุทิจฺจพฺราหฺมณสฺส ปุตฺโต หุตฺวา นิพฺพตฺติ, กสฺสโปติสฺส นามํ อโหสิ.
ตสฺส ทหรกาเลเยว ปิตา กาลมกาสิ. มาตา ตํ ปฏิชคฺคติ. โส เอกทิวสํ เชตวนํ
คโต ภควโต ธมฺมเทสนํ สุตฺวา เหตุสมฺปนฺนตาย ตสฺมึเยว อาสเน โสตาปนฺโน
หุตฺวา มาตุ สนฺติกํ คนฺตฺวา อนุชานาเปตฺวา ปพฺพชิโต สตฺถริ วุฏฺฐวสฺเส
ปวาเรตฺวา ชนปทจาริกํ ปกฺกนฺเต สยมฺปิ สตฺถารา สทฺธึ คนฺตุกาโม อาปุจฺฉิตุํ
มาตุ สนฺติกํ อคมาสิ. มาตา วิสฺสชฺเชนฺตี โอวาทวเสน:-
     [๘๒] "เยน เยน สุภิกฺขานิ          สิวานิ อภยานิ จ
           เตน ปุตฺตก คจฺฉสฺสุ          มา โสกาปหโต ภวา"ติ
คาถํ อภาสิ.
      ตตฺถ เยน เยนาติ ยตฺถ ยตฺถ. ภุมฺมตฺเถ หิ เอตํ กรณวจนํ, ยสฺมึ ยสฺมึ
ทิสาภาเคติ อตฺโถ. สุภิกฺขานีติ สุลภปิณฺฑานิ, รฏฺฐานีติ อธิปฺปาโย. สิวานีติ
เขมานิ อโรคานิ. อภยานีติ โจรภยาทีหิ นิพฺภยานิ, โรคทุพฺภิกฺขภยานิ ปน
"สุภิกฺขานิ, สิวานี"ติ ปททฺวเยเนว คหิตานิ. เตนาติ ตตฺถ, ตสฺมึ ตสฺมึ
ทิสาภาเคติ อตฺโถ. ปุตฺตกาติ อนุกมฺปนฺตี ตํ อาลปติ. มาติ ปฏิเสธตฺถวาจกนิปาโต.
๑- โสกาปหโตติ วุตฺตคุณรหิตานิ รฏฺฐานิ คนฺตฺวา ทุพฺภิกฺขภยาทิชนิเกน โสเกน
อุปหโต มา ภว มาโหสีติ อตฺโถ. ตํ สุตฺวา เถโร "มม มาตา มยฺหํ โสก-
รหิตฏฺฐานคมนํ อาสีสติ, หนฺท มยฺหํ ๒- สพฺพโส อจฺจนฺตเมว โสกรหิตํ ฐานํ ปตฺตุํ
ยุตฺตนฺ"ติ อุสฺสาหชาโต วิปสฺสนํ ปฏฺฐเปตฺวา น จิรสฺเสว ๓- อรหตฺตํ ปาปุณิ. เตน
วุตฺตํ อปทาเน ๔- :-
@เชิงอรรถ:  ฉ.ม. มาติ ปฏิเสธตฺเถ นิปาโต     ฉ.ม. มยํ     สี. น จิรสฺเสว อรญฺเญ วสนฺโต
@ ขุ.อป. ๓๒/๑/๒๑๒ เสยฺยกตฺเถราปทาน
          "อชฺฌายโก มนฺตธโร            ติณฺณํ เวทาน ปารคู
           อพฺโภกาเส ๑- ฐิโต สนฺโต      อทฺทสํ โลกนายกํ.
           สีหํ ยถา วนจรํ ๒-            พฺยคฺฆราชํว นิตฺตสํ
           ติธาปภินฺนมาตงฺคํ              กุญฺชรํว มเหสินํ.
           เสเรยกํ คเหตฺวาน            อากาเส อุกฺขิปึ อหํ
           พุทฺธสฺส อานุภาเวน            ปริวาเรนฺติ สพฺพโส.
           อธิฏฺฐหิ มหาวีโร              สพฺพญฺญู โลกนายโก
           สมนฺตา ปุปฺผจฺฉทนา            โอกิรึสุ นราสภํ.
           ตโต สา ปุปฺผกญฺจุกา           อนฺโตวณฺฏา พหิมุขา
           สตฺตาหํ ฉทนํ กตฺวา            ตโต อนฺตรธายถ.
           ตญฺจ อจฺฉริยํ ทิสฺวา            อพฺภุตํ โลมหํสนํ
           พุทฺเธ จิตฺตํ ปสาเทสึ           สุคเต โลกนายเก.
           เตน จิตฺตปฺปสาเทน            สุกฺกมูเลน โจทิโต
           กปฺปานํ สตสหสฺสํ              ทุคฺคตึ นุปปชฺชหํ.
           ปณฺณรสสหสฺสมฺหิ               กปฺปานํ ปญฺจวีสติ
           วีตมลาสนามา จ ๓-           จกฺกวตฺตี มหพฺพลา.
           กิเลสา ฌาปิตา มยฺหํ ฯเปฯ      กตํ พุทฺธสฺส สาสนนฺ"ติ.
      อรหตฺตํ ปน ปตฺวา "อิทเมว มาตุ วจนํ อรหตฺตปฺปตฺติยา ๔- องฺกุสํ ชาตนฺ"ติ
ตเมว คาถํ ปจฺจุทาหาสิ.
                   กสฺสปตฺเถรคาถาวณฺณนา นิฏฺฐิตา.
@เชิงอรรถ:  สี. อชฺโฌกาเส   สี. เอกจรํ   สี. จิณฺณมาลาสนามา จ   ม. อรหตฺตุปฺปตฺติยา


             อรรถกถาภาษาบาลีอักษรไทย เล่มที่ ๓๒ หน้า ๒๗๕-๒๗๗. http://84000.org/tipitaka/atthapali/read_th.php?B=32&A=6141&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=32&A=6141&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=26&i=219              เนื้อความพระไตรปิฎกฉบับหลวง :- http://84000.org/tipitaka/read/r.php?B=26&A=5456              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=26&A=5667              The Pali Tipitaka in Roman Character :- http://84000.org/tipitaka/read/roman_read.php?B=26&A=5667              สารบัญพระไตรปิฎกเล่มที่ ๒๖ http://84000.org/tipitaka/read/?index_26

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]