ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓๓ ภาษาบาลีอักษรไทย เถร.อ.๒ (ปรมตฺถที.๒)

                   ๓๔๙. ๓. มหานาคตฺเถรคาถาวณฺณนา
      ยสฺส สพฺรหฺมจารีสูติอาทิกา อายสฺมโต มหานาคตฺเถรสฺส คาถา. กา
อุปฺปตฺติ?
      อยมฺปิ ปุริมพุทฺเธสุ กตาธิกาโร ตตฺถ ตตฺถ ภเว วิวฏฺฏูปนิสฺสยํ กุสลํ
อุปจินนฺโต กกุสนฺธสฺส ภควโต กาเล กุลเคเห นิพฺพตฺติตฺวา วิญฺญุตํ ปตฺโต เอกทิวสํ
กกุสนฺธํ ภควนฺตํ อรญฺญํ อชฺโฌคาเหตฺวา อญฺญตรสฺมึ รุกฺขมูเล ฌานสุเขน นิสินฺนํ
ทิสฺวา ปสนฺนมานโส ตสฺส ทาฬิมผลํ ๓- อทาสิ. โส เตน ปุญฺญกมฺเมน เทวมนุสฺเสสุ
สํสรนฺโต อิมสฺมึ พุทฺธุปฺปาเท สาเกเต มธุวาเสฏฺฐสฺส นาม พฺราหฺมณสฺส ปุตฺโต
หุตฺวา นิพฺพตฺติ, มหานาโคติสฺส นามํ อโหสิ. โส วิญฺญุตํ ปตฺโต ภควติ สาเกเต
@เชิงอรรถ:  ฉ.ม. เอกนวุติโต    ฉ.ม. โอสธมทาสหํ    สี.,อิ. ทาฑิมผลํ
อญฺชนวเน วิหรนฺโต อายสฺมโต ควมฺปติตฺเถรสฺส ปาฏิหาริยํ ทิสฺวา ปฏิลทฺธสทฺโธ
เถรสฺเสว สนฺติเก ปพฺพชิตฺวา ตสฺโสวาเท ฐตฺวา อรหตฺตํ ปาปุณิ. เตน วุตฺตํ
อปทาเน ๑-:-
             "กกุสนฺโธ  มหาวีโร        สพฺพธมฺมาน ปารคู
              คณมฺหา วูปกฏฺโฐ โส       อคมาสิ วนนฺตรํ.
              พีชมิญฺชํ คเหตฺวาน         ลตาย อาวุณึ ๒- อหํ
              ภควา ตมฺหิ สมเย         ฌายเต ปพฺพตนฺตเร.
              ทิสฺวานหํ เทวเทวํ         วิปฺปสนฺเนน เจตสา
              ทกฺขิเณยฺยสฺส วีรสฺส        พีชมิญฺชมทาสหํ.
              อิมสฺมึเยว กปฺปมฺหิ         ยํ มิญฺชมททึ ตทา
              ทุคฺคตึ นาภิชานามิ         พีชมิญฺชสฺสิทํ ผลํ.
              กิเลสา ฌาปิตา มยฺหํ ฯเปฯ  กตํ พุทฺธสฺส สาสนนฺ"ติ.
      อรหตฺตํ ปน ปตฺวา วิมุตฺติสุเขน วิหรนฺโต เถโร ฉพฺพคฺคิเย ภิกฺขู
สพฺรหฺมจารีสุ คารวํ อกตฺวา วิหรนฺเต ทิสฺวา เตสํ โอวาททานวเสน:-
       [๓๘๗] "ยสฺส สพฺรหฺมจารีสุ         คารโว นูปลพฺภติ
             ปริหายติ สทฺธมฺมา          มจฺโฉ อปฺโปทเก ยถา.
       [๓๘๘] ยสฺส สพฺรหฺมจารีสุ          คารโว นูปลพฺภติ
             น วิรูหติ สทฺธมฺเม          เขตฺเต พีชํว ปูติกํ.
       [๓๘๙] ยสฺส สพฺรหฺมจารีสุ          คารโว นูปลพฺภติ
             อารกา โหติ นิพฺพานา       ธมฺมราชสฺส สาสเน.
       [๓๙๐] ยสฺส สพฺรหฺมจารีสุ          คารโว อุปลพฺภติ
             น วิหายติ สทฺธมฺมา         มจฺโฉ พโหทเก ๓- ยถา.
@เชิงอรรถ:  ขุ.อป. ๓๓/๓๑/๕๖ วิเภทกพีชิยตฺเถราปทาน (สฺยา)    ปาลิ. อาจรึ
@ ฉ.ม. พโวฺหทเก
         [๓๙๑] ยสฺส สพฺรหฺมจารีสุ       คารโว อุปลพฺภติ
               โส วิรูหติ สทฺธมฺเม      เขตฺเต พีชํว ภทฺทกํ.
         [๓๙๒] ยสฺส สพฺรหฺมจารีสุ       คารโว อุปลพฺภติ
               สนฺติเก โหติ นิพฺพานํ     ธมฺมราชสฺส สาสเน"ติ
อิมา ฉ คาถา อภาสิ.
      ตตฺถ สพฺรหฺมจารีสูติ สมานํ พฺรหฺมํ สีลาทิธมฺมํ จรนฺตีติ สพฺรหฺมจาริโน,
สีลทิฏฺฐิสามญฺญคตา สหธมฺมิกา, เตสุ. คารโวติ ครุภาโว สีลาทิคุณนิมิตฺตํ ครุกรณํ.
นูปลพฺภตีติ น วิชฺชติ น ปวตฺตติ, น อุปติฏฺฐตีติ อตฺโถ. นิพฺพานาติ กิเลสานํ
นิพฺพาปนโต กิเลสกฺขยาติ อตฺโถ. ธมฺมราชสฺสาติ สตฺถุโน. สตฺถา หิ สเทวกํ
โลกํ ยถารหํ โลกิยโลกุตฺตเรน ธมฺเมน รญฺเชติ โตเสตีติ ธมฺมราชา. เอตฺถ จ
"ธมฺมราชสฺส สาสเน"ติ อิมินา นิพฺพานํ นาม ธมฺมราชสฺเสว สาสเน, น อญฺญตฺถ.
ตตฺถ โย สพฺรหฺมจารีสุ คารวรหิโต, โส ยถา นิพฺพานา อารกา โหติ, ตถา
ธมฺมราชสฺส สาสนโตปิ อารกา โหตีติ ทสฺเสติ. พโหทเกติ พหุ อุทเก.
      สนฺติเก โหติ นิพฺพานนฺติ นิพฺพานํ ตสฺส สนฺติเก สมีเปเอว โหติ. เสสํ
วุตฺตนยเมว. อิมาเอว จ เถรสฺส อญฺญาพฺยากรณคาถา อเหสุํ.
                   มหานาคตฺเถรคาถาวณฺณนา นิฏฺฐิตา.
                       -------------------


             อรรถกถาภาษาบาลีอักษรไทย เล่มที่ ๓๓ หน้า ๙๙-๑๐๑. http://84000.org/tipitaka/atthapali/read_th.php?B=33&A=2263&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=33&A=2263&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=26&i=349              เนื้อความพระไตรปิฎกฉบับหลวง :- http://84000.org/tipitaka/read/r.php?B=26&A=6525              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=26&A=6656              The Pali Tipitaka in Roman Character :- http://84000.org/tipitaka/read/roman_read.php?B=26&A=6656              สารบัญพระไตรปิฎกเล่มที่ ๒๖ http://84000.org/tipitaka/read/?index_26

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]