ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓๕ ภาษาบาลีอักษรไทย ชา.อ.๑ เอกนิปาต(๑)

หน้าที่ ๒๑๐.

๙ มฆเทวชาตกํ อุตฺตมงฺครุหา มยฺหนฺติ อิทํ สตฺถา เชตวเน วิหรนฺโต มหาภินิกฺขมนํ อารพฺภ กเถสิ ฯ ตํ เหฏฺฐา นิทานกถาย กถิตเมว ฯ ตสฺมึ ปน กาเล ภิกฺขู ทสพลสฺส เนกฺขมฺมํ วณฺณยนฺตา นิสีทึสุ ฯ อถ สตฺถา ธมฺมสภํ อาคนฺตฺวา พุทฺธาสเน นิสินฺโน ภิกฺขู อามนฺเตตฺวา กาย นุตฺถ ภิกฺขเว เอตรหิ กถาย สนฺนิสินฺนาติ ปุจฺฉิ ฯ ภนฺเต น อญฺญาย กถาย ตุมฺหากํเยว ปน เนกฺขมฺมํ วณฺณยมานา นิสินฺนมฺหาติ ฯ น ภิกฺขเว ตถาคโต เอตรหิเยว เนกฺขมฺมํ นิกฺขนฺโต ปุพฺเพปิ นิกฺขนฺโตเยวาติ อาห ฯ ภิกฺขู ตสฺสตฺถสฺสาวิภาวตฺถํ ภควนฺตํ ยาจึสุ ฯ ภควา ภวนฺตเรน ปฏิจฺฉนฺนํ การณํ ปากฏํ อกาสิ ฯ อตีเต วิเทหรฏฺเฐ มิถิลายํ มฆเทโว นาม ราชา อโหสิ ธมฺมิโก ธมฺมราชา ฯ โส ทีฆมทฺธานํ เขเปตฺวา เอกทิวสํ กปฺปกํ อามนฺเตสิ ยทา เม สมฺม กปฺปก สิรสฺมึ ปลิตานิ ปสฺเสยฺยาสิ อถ เม อาโรเจยฺยาสีติ ฯ กปฺปโกปิ ทีฆมทฺธานํ เขเปตฺวา เอกทิวสํ รญฺโญ อญฺชนวณฺณานํ เกสานํ อนฺตเร เอกเมว ปลิตํ ทิสฺวา เทว เอกํ เต ปลิตํ ทิสฺสตีติ อาโรเจสิ ฯ เตนหิ เม สมฺม ตํ ปลิตํ อุทฺธริตฺวา ปาณิมฺหิ ฐเปหีติ ฯ เอวํ วุตฺเต สุวณฺณสณฺฑาเสน อุทฺธริตฺวา รญฺโญ ปาณิมฺหิ ปติฏฺฐาเปสิ ฯ ตทา รญฺโญ จตุราสีติวสฺสสหสฺสานิ อายุ อวสิฏฺฐํ อโหสิ ฯ เอวํ สนฺเตปิ ปลิตํ

--------------------------------------------------------------------------------------------- หน้าที่ ๒๑๑.

ทิสฺวา มจฺจุราชานํ อาคนฺตฺวา สมีเป ฐิตํ วิย อตฺตานํ อาทิตฺตปณฺณสาลํ ปวิฏฺฐํ วิย จ มญฺญมาโน สํเวคํ อาปชฺชิตฺวา พาลมฆเทว ยาว ปลิตสฺสุปฺปาทา นาม อิเม กิเลเส ชหิตุํ นาสกฺขีติ จินฺเตสิ ฯ ตสฺเสว ปลิตปาตุภูตํ อาวชฺเชนฺตสฺส อนฺโตทาโห อุปฺปชฺชิ สรีเร เสทา มุญฺจึสุ สาฏกา ปีเฬตฺวา อปเนตพฺพาการปฺปตฺตา อเหสุํ ฯ โส อชฺเชว มยา นิกฺขมิตฺวา ปพฺพชิตุํ วฏฺฏตีติ ฯ กปฺปกสฺส สตฺตสหสฺสุฏฺฐานกํ คามวรํ ทตฺวา เชฏฺฐปุตฺตํ ปกฺโกสาเปตฺวา ตาต มม สีเส ปลิตํ ปาตุภูตํ มหลฺลโกมฺหิ ชาโต ภุตฺตา โข ปน เม มนุสฺสกามา อิทานิ ทิพฺพกาเม ปริเยสิสฺสามิ เนกฺขมฺมกาโล มยฺหํ ตฺวํ อิทํ รชฺชํ ปฏิปชฺช อหํ ปน ปพฺพชิตฺวา มฆเทวอมฺพวนุยฺยาเน วสนฺโต สมณธมฺมํ กริสฺสามีติ อาห ฯ ตํ เอวํ ปพฺพชิตุกามํ อมจฺจา อุปสงฺกมิตฺวา เทว กึ ตุมฺหากํ ปพฺพชฺชาการณนฺติ ปุจฺฉึสุ ฯ ราชา ปลิตํ หตฺเถน คเหตฺวา อมจฺจานํ อิทํ คาถมาห อุตฺตมงฺครุหา มยฺหํ อิเม ชาตา วโยหรา ปาตุภูตา เทวทูตา ปพฺพชฺชาสมโย มมนฺติ ฯ ตตฺถ อุตฺตมงฺครุหาติ เกสา ฯ เกสา หิ สพฺเพสํ หตฺถปาทาทีนํ องฺคานํ อุตฺตเม สิรสฺมึ รุฬฺหตฺตา อุตฺตมงฺครุหาติ วุจฺจนฺติ ฯ อิเม ชาตา วโยหราติ ปสฺสถ ตาตา ปลิตปาตุภาเวน ติณฺณํ วยานํ หรณโต อิเม ชาตา วโยหรา ฯ ปาตุภูตาติ นิพฺพตฺตา ฯ

--------------------------------------------------------------------------------------------- หน้าที่ ๒๑๒.

เทโวติ มจฺจุ ตสฺส ทูตาติ เทวทูตา ฯ สิรสฺมึ หิ ปลิเตสุ ปาตุภูเตสุ มจฺจุราชสฺส สนฺติเก ฐิโต วิย โหติ ตสฺมา ปลิตาติ มจฺจุเทวสฺส ทูตาติ วุจฺจนฺติ ฯ เทวา วิย ทูตาติปิ เทวทูตา ฯ ยถา หิ อลงฺกตปฏิยตฺตาย เทวตาย อากาเส ฐตฺวา อสุกทิวเส ตฺวํ มริสฺสสีติ วุตฺโต วิย ตเถว โหติ ฯ เอวํ สิรสฺมึ ปลิเตสุ ปาตุภูเตสุ เทวตาย พฺยากรณสทิสเมว โหติ ตสฺมา ปลิตานิ เทวสทิสา ทูตาติ วุจฺจนฺติ ฯ วิสุทฺธิเทวานํ ทูตาติปิ เทวทูตา ฯ สพฺพโพธิสตฺตา หิ ชิณฺณพฺยาธิมตปพฺพชิเต ทิสฺวาว สํเวคมาปชฺชิตฺวา นิกฺขมฺม ปพฺพชนฺติ ฯ ยถาห ชิณฺณญฺจ ทิสฺวา ทุกฺขิตญฺจ พฺยาธิตํ มตญฺจ ทิสฺวา คตมายุสงฺขฺยํ กาสาววตฺถํ ปพฺพชิตญฺจ ทิสฺวา ตสฺมา อหํ ปพฺพชิโตมฺหิ ราชาติ ฯ อิมินา ปริยาเยน ปลิตานิ วิสุทฺธิเทวานํ ทูตตฺตา เทวทูตาติ วุจฺจนฺติ ฯ ปพฺพชฺชาสมโย มมนฺติ คิหิภาวโต นิกฺขมนฏฺเฐน ปพฺพชฺชาติ ลทฺธนามสฺส สมณลิงฺคคหณสฺส กาโล มยฺหนฺติ ทสฺเสติ ฯ โส เอวํ วตฺวา ตํ ทิวสเมว รชฺชํ ปหาย อิสิปพฺพชฺชํ ปพฺพชิตฺวา ตสฺมึเยว มฆอมฺพวเน วิหรนฺโต จตุราสีติวสฺสสหสฺสานิ จตฺตาโร พฺรหฺมวิหาเร ภาเวตฺวา อปริหีนชฺฌาเน ฐิโต กาลํ กตฺวา พฺรหฺมโลเก นิพฺพตฺติตฺวา ปุน ตโต จุโต มิถิลายเมว เนมิ นาม ราชา หุตฺวา โอสฺสกฺกมานํ อตฺตโน วํสํ ฆเฏตฺวา ตตฺเถว อมฺพวเน

--------------------------------------------------------------------------------------------- หน้าที่ ๒๑๓.

ปพฺพชิตฺวา พฺรหฺมวิหาเร ภาเวตฺวา ปุน พฺรหฺมโลกูปโคว อโหสิ ฯ สตฺถาปิ น ภิกฺขเว ตถาคโต อิทาเนว มหาภินิกฺขมนํ นิกฺขมนฺโต ปุพฺเพปิ นิกฺขนฺโตเยวาติ วตฺวา อิทํ ธมฺมเทสนํ อาหริตฺวา ทสฺเสตฺวา จตฺตาริ อริยสจฺจานิ ปกาเสสิ ฯ สจฺจปริโยสาเน เกจิ โสตาปนฺนา อเหสุํ เกจิ สกทาคามิโน เกจิ อนาคามิโน ฯ อิติ ภควา อิมานิ เทฺว วตฺถูนิ กเถตฺวา อนุสนฺธึ ฆเฏตฺวา ชาตกํ สโมธาเนสิ ตทา กปฺปโก อานนฺโท อโหสิ ปุตฺโต ราหุโล มฆเทวราชา ปน อหเมวาติ ฯ มฆเทวชาตกํ นวมํ ฯ --------------------

             อรรถกถาภาษาบาลีอักษรไทย เล่มที่ ๓๕ หน้า ๒๑๐-๒๑๓. http://84000.org/tipitaka/atthapali/read_th.php?B=35&A=4376&modeTY=2&pagebreak=1              The Pali Atthakatha in Roman :- http://84000.org/tipitaka/atthapali/read_rm.php?B=35&A=4376&modeTY=2&pagebreak=1              อ่านอรรถกถาแปลไทย :- http://84000.org/tipitaka/attha/attha.php?b=27&i=9              เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=51              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=54              The Pali Tipitaka in Roman Character :- http://84000.org/tipitaka/read/roman_read.php?B=27&A=54              สารบัญพระไตรปิฎกเล่มที่ ๒๗ http://84000.org/tipitaka/read/?index_27

อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]