ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓๕ ภาษาบาลีอักษรไทย ชา.อ.๑ เอกนิปาต(๑)

                     ๑๐ สุขวิหาริชาตกํ
     ยญฺจ อญฺเญ น รกฺขนฺตีติ อิทํ สตฺถา อนุปิยนครํ นิสฺสาย
อนุปิยอมฺพวเน วิหรนฺโต สุขวิหารึ ภทฺทิยตฺเถรํ อารพฺภ กเถสิ ฯ
สุขวิหารี ภทฺทิยตฺเถโร ฉขตฺติยสมาคเม อุปาลิสตฺตโม ปพฺพชิโต ฯ เตสุ
ภทฺทิยตฺเถโร จ กิมฺพิลตฺเถโร จ ภคุตฺเถโร จ อุปาลิตฺเถโร จ อรหตฺตํ
ปตฺตา อานนฺทตฺเถโร โสตาปนฺโน ชาโต อนุรุทฺธตฺเถโร ทิพฺพจกฺขุโก
เทวทตฺโต ฌานลาภี ชาโต ฯ ฉนฺนํ ปน ขตฺติยานํ วตฺถุ ยาว
อนุปิยนครา กณฺฑหาลชาตเก อาวิภวิสฺสติ ฯ อายสฺมา ปน ภทฺทิโย
ราชกาเล อตฺตานํ รกฺขนฺโต รกฺขาสํวิธานเทวตาว พหูหิ รกฺขาหิ
รกฺขิยมานสฺส อุปริ ปาสาทตเล มหาสยเน ปริวตฺตมานสฺสาปิ
อตฺตโน ภยุปฺปตฺติญฺจ ทิสฺวา อิทานิ อรหตฺตํ ปตฺวา
อรญฺญาทีสุ ยตฺถกตฺถจิ วิหรนฺโตปิ อตฺตโน วิคตภยตฺตญฺจ
สมนุปสฺสนฺโต อโห สุขํ อโห สุขนฺติ อุทานํ อุทาเนสิ ฯ ตํ สุตฺวา
ภิกฺขู อายสฺมา ภทฺทิโย อญฺญํ พฺยากโรตีติ ภควโต อาโรเจสุํ ฯ
ภควา น ภิกฺขเว ภทฺทิโย อิทาเนว สุขวิหารีเยว ปุพฺเพปิ
สุขวิหารีเยวาติ อาห ฯ ภิกฺขู ตสฺสตฺถสฺสาวิภาวตฺถาย ภควนฺตํ
ยาจึสุ ฯ ภควา ภวนฺตเรน ปฏิจฺฉนฺนํ การณํ ปากฏํ อกาสิ ฯ
     อตีเต พาราณสิยํ พฺรหฺมทตฺเต รชฺชํ การยมาเน โพธิสตฺโต
อุทิจฺจพฺราหฺมณมหาสาโล หุตฺวา กาเมสุ อาทีนวํ เนกฺขมฺเม จานิสํสํ
ทิสฺวา กาเม ปหาย หิมวนฺตํ ปวิสิตฺวา อิสิปพฺพชฺชํ ปพฺพชิตฺวา อฏฺฐ
สมาปตฺติโย นิพฺพตฺเตสิ ฯ ปริวาโรปิสฺส มหา อโหสิ ปญฺจ ตาปสสตานิ ฯ
โส วสฺสกาเล หิมวนฺตโต นิกฺขมิตฺวา ตาปสคณปริวุโต คามนิคมาทีสุ
จาริกญฺจรนฺโต พาราณสึ ปตฺวา ราชานํ นิสฺสาย ราชุยฺยาเน
วาสํ กปฺเปสิ ฯ ตตฺถ วสฺสิเก จตฺตาโร มาเส วสิตฺวา ราชานํ
อาปุจฺฉิ ฯ อถ นํ ราชา ภนฺเต ตุมฺเห มหลฺลกา กึ โว หิมวนฺเตน
อนฺเตวาสิเก หิมวนฺตํ เปเสตฺวา อิเธว วสถาติ ยาจิ ฯ โพธิสตฺโต
เชฏฺฐนฺเตวาสิกํ ปญฺจ ตาปสสตานิ สมฺปฏิจฺฉาเปตฺวา คจฺฉ
ตฺวํ อิเมหิ สทฺธึ หิมวนฺเต วส อหมฺปน อิเธว วสิสฺสามีติ
เต อุยฺโยเชตฺวา สยํ ตตฺเถว วาสํ กปฺเปสิ ฯ โส ปนสฺส
เชฏฺฐนฺเตวาสิโก ราชปพฺพชิโต มหนฺตํ รชฺชํ ปหาย
ปพฺพชิตฺวา กสิณปริกมฺมํ กตฺวา อฏฺฐสมาปตฺติลาภี อโหสิ ฯ โส
ตาปเสหิ สทฺธึ หิมวนฺเต วสมาโน เอกทิวสํ อาจริยํ ทฏฺฐุกาโม
หุตฺวา เต ตาปเส อามนฺเตตฺวา ตุมฺเห อนุกฺกณฺฐมานา อิเธว วสถ
อหํ อาจริยํ ทิสฺวา อาคจฺฉิสฺสามีติ อาจริยสฺส สนฺติกํ คนฺตฺวา
วนฺทิตฺวา ปฏิสนฺถารํ กตฺวา เอกํ ตฏฺฏิกํ อตฺถริตฺวา อาจริยสฺส
สนฺติเกเยว นิปชฺชิ ฯ ตสฺมึ จ สมเย ราชา ตาปสํ ปสฺสิสฺสามีติ
อุยฺยานํ คนฺตฺวา วนฺทิตฺวา เอกมนฺตํ นิสีทิ ฯ อนฺเตวาสิกตาปโส
ราชานํ ทิสฺวาปิ เนว อุฏฺฐาสิ นิปนฺนโกเยว ปน อโห สุขํ อโห
สุขนฺติ อุทานํ อุทาเนสิ ฯ ราชา อยํ ตาปโส มํ ทิสฺวาปิ น
อุฏฺฐิโตติ อนตฺตมโน โพธิสตฺตํ อาห ภนฺเต อยํ ตาปโส ยถิจฺฉกํ
ภุตฺโต ภวิสฺสติ อุทานํ อุทาเนนฺโต สุขเสยฺยเมว กปฺเปตีติ ฯ มหาราช
อยํ ตาปโส ปุพฺเพ ตุมฺหาทิโสว เอโก ราชา อโหสิ สฺวายํ
อหํ ปุพฺเพ คิหิกาเล รชฺชสิรึ อนุภวนฺโต อาวุธหตฺเถหิ พหูหิ
รกฺขิยมาโนปิ เอวรูปํ สุขํ นาม นาลตฺถนฺติ อตฺตโน ปพฺพชฺชาสุขํ
ฌานสุขํ อารพฺภ อิทํ อุทานํ อุทาเนสีติ เอวญฺจ ปน วตฺวา
โพธิสตฺโต รญฺโญ ธมฺมกถํ กเถตุํ อิทํ คาถมาห
     ยญฺจ อญฺเญ น รกฺขนฺติ      โย จ อญฺเญ น รกฺขติ
     ส เว ราช สุขํ เสติ       กาเมสุ อนเปกฺขวาติ ฯ
     ตตฺถ ยญฺจ อญฺเญ น รกฺขนฺตีติ ยํ ปุคฺคลํ อญฺเญ พหู ปุคฺคลา
น รกฺขนฺติ ฯ โย จ อญฺเญ น รกฺขตีติ โยปิ เอกโก อหํ รชฺชํ
กาเรมีติ อญฺเญ พหู น รกฺขนฺติ ฯ ส เว ราช สุขํ เสตีติ
มหาราช โส ปุคฺคโล เอโก อทุติโย ปวิวิตฺโต กายิกเจตสิก-
สุขสมงฺคี หุตฺวา สุขํ เสติ ฯ อิทญฺจ เทสนาสีสเมว น เกวลเมว
สุขํ เสติเยว เอวรูโป ปน ปุคฺคโล สุขํ คจฺฉติ ติฏฺฐติ นิสีทติ
สยติ สพฺพิริยาปเถสุ สุขปฺปตฺโตว โหติ ฯ กาเมสุ อนเปกฺขวาติ
วตฺถุกามกิเลสกาเมสุ อเปกฺขาวิรหิโต วิคตจฺฉนฺทราโค นิตฺตณฺโห
เอวรูโป ปุคฺคโล สพฺพิริยาปเถสุ สุขํ วิหรติ มหาราชาติ ฯ
     ราชา ธมฺมเทสนํ สุตฺวา ตุฏฺฐมานโส วนฺทิตฺวา นิเวสนเมว
คโต ฯ อนฺเตวาสิโกปิ อาจริยํ วนฺทิตฺวา หิมวนฺตเมว คโต ฯ
โพธิสตฺโต ปน ตตฺเถว วิหรนฺโต อปริหีนชฺฌาโน กาลํ กตฺวา
พฺรหฺมโลเก นิพฺพตฺติ ฯ
     สตฺถา อิทํ ธมฺมเทสนํ อาหริตฺวา ทสฺเสตฺวา เทฺว วตฺถูนิ
กเถตฺวา อนุสนฺธึ ฆเฏตฺวา ชาตกํ สโมธาเนสิ ตทา อนฺเตวาสิโก
ภทฺทิยตฺเถโร อโหสิ คณสตฺถา ปน อหเมวาติ ฯ
                   สุขวิหาริชาตกํ ทสมํ ฯ
                   อปณฺณกวคฺโค ปฐโม ฯ
                 ---------------------


             อรรถกถาภาษาบาลีอักษรไทย เล่มที่ ๓๕ หน้า ๒๑๓-๒๑๖. http://84000.org/tipitaka/atthapali/read_th.php?B=35&A=4445&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=35&A=4445&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=27&i=10              เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=56              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=59              The Pali Tipitaka in Roman Character :- http://84000.org/tipitaka/read/roman_read.php?B=27&A=59              สารบัญพระไตรปิฎกเล่มที่ ๒๗ http://84000.org/tipitaka/read/?index_27

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]