อรรถกถาเล่มที่ ๓๗ ภาษาบาลีอักษรไทย
 ชา.อ.๓ ทุกนิปาตวณฺณนา

                     ๑๐ สีลานิสํสชาตกํ
     ปสฺส สทฺธาย สีลสฺสาติ อิทํ สตฺถา เชตวเน วิหรนฺโต เอกํ
สทฺธํ อุปาสกํ อารพฺภ กเถสิ ฯ
     โส กิร สทฺโธ ปสนฺโน อริยสาวโก เอกทิวสํ เชตวนํ
คจฺฉนฺโต สายํ อจิรวตีนทีตีรํ คนฺตฺวา นาวิเก นาวํ ตีเร ฐเปตฺวา
ธมฺมสฺสวนตฺถาย คเต ติตฺเถ นาวํ อทิสฺวา พุทฺธารมฺมณํ ปีตึ
ทฬฺหํ คเหตฺวา นทึ โอตริ ฯ ตสฺส ปาทา อุทกมฺหิ น โอสีทึสุ ฯ
โส ปฐวีตเล คจฺฉนฺโต วิย เวมชฺฌคตกาเล วีจึ ปสฺสติ ฯ อถสฺส
พุทฺธารมฺมณปีติ มนฺทา ชาตา, ตสฺส ปาทา โอสีทิตุํ อารภึสุ ฯ
โส ปุน พุทฺธารมฺมณํ ปีตึ ทฬฺหํ กตฺวา อุทกปิฏฺเฐเนว คนฺตฺวา
เชตวนํ ปวิสิตฺวา สตฺถารํ วนฺทิตฺวา เอกมนฺตํ นิสีทิ ฯ สตฺถา
เตน สทฺธึ ปฏิสนฺถารํ กตฺวา อุปาสก กจฺจิ มคฺคํ อาคจฺฉนฺโต
อปฺปกิลมเถน อาคโตสีติ ปุจฺฉิตฺวา ภนฺเต พุทฺธารมฺมณํ ปีตึ คเหตฺวา
อุทกปิฏฺเฐ ปติฏฺฐํ ลภิตฺวา ปฐวึ มทฺทนฺโต วิย อาคโตมฺหีติ
วุตฺเต น โข อุปาสก ตฺวญฺเญว พุทฺธคุเณ อนุสฺสริตฺวา ปติฏฺฐํ
ลทฺโธ, ปุพฺเพปิ อุปาสกา สมุทฺทมชฺเฌ นาวาย ภินฺนาย พุทฺธคุเณ
อนุสฺสรนฺตา ปติฏฺฐํ ลภึสูติ วตฺวา เตน ยาจิโต อตีตํ อาหริ ฯ
     อตีเต กสฺสปสมฺมาสมฺพุทฺธกาเล โสตาปนฺโน อริยสาวโก
เอเกน นหาปิตกุฏุมฺพิเกน สทฺธึ นาวํ อภิรูหิ ฯ ตสฺส นหาปิตสฺส
ภริยา อยฺย อิมสฺส สุขทุกฺขํ ตว ภาโรติ นหาปิตมฺปิ ตสฺส หตฺเถ
นิกฺขิปิ ฯ อถสฺส นาวา สตฺตเม ทิวเส สมุทฺทมชฺเฌ ภินฺนา ฯ
เตปิ เทฺว ชนา เอกสฺมึ ผลเก นิปนฺนา เอกทีปกํ ปาปุณึสุ ฯ
ตตฺถ โส นหาปิโต สกุเณ มาเรตฺวา ปจิตฺวา ขาทนฺโต อุปาสกสฺส
เทติ ฯ อุปาสโก อลํ มยฺหนฺติ น ขาทติ ฯ โส จินฺเตสิ
อิมสฺมึ ฐาเน อมฺหากํ ฐเปตฺวา ตีณิ สรณานิ อญฺญา ปติฏฺฐา
นตฺถีติ ฯ โส ติณฺณํ รตนานํ คุเณ อนุสฺสริ ฯ อถสฺส อนุสฺสรนฺตสฺส
ตสฺมึ ทีปเก นิพฺพตฺโต นาคราชา อตฺตโน สรีรํ มหานาวํ กตฺวา
มาเปสิ ฯ สมุทฺทเทวตา นิยามโก มาณโว อโหสิ ฯ นาวา
สตฺตรตเนหิ ปูรยิตฺถ ฯ ตโย กูปกา อินฺทนีลมณิมยา อเหสุํ,
โสวณฺณมโย ลกาโร รชตมยานิ โยตฺตานิ โสวณฺณมยานิ
ยฏฺฐิยานิ ฯ สมุทฺทเทวตา นาวาย ฐตฺวา อตฺถิ ชมฺพุทีปํ คมิกาติ
โฆเสติ ฯ อุปาสโก มยํ คมิสฺสามาติ อาห ฯ เตน หิ เอหิ
นาวํ อภิรูหาติ ฯ โส นาวํ อภิรูหิตฺวา นหาปิตํ ปกฺโกสิ ฯ
สมุทฺทเทวตา ตุยฺหญฺเญว ลพฺภติ น เอตสฺสาติ อาห ฯ กึการณาติ ฯ
เอตสฺส สีลาจารคุณา นตฺถิ, ตํ การณํ, อหํ ตุยฺหํ นาวํ อาหรามิ
น เอตสฺสาติ ฯ โหตุ, อหํ อตฺตโน ทินฺนทาเนน รกฺขิตสีเลน
ภาวิตภาวนาย เอตสฺส ปตฺตึ ทมฺมีติ ฯ นหาปิโต อนุโมทามีติ
อาห ฯ เทวตา อิทานิ คณฺหิสฺสามีติ ตมฺปิ อาโรเปตฺวา อุโภปิ
ชเน สมุทฺทา นิกฺขมิตฺวา นทิยา พาราณสึ ปตฺวา อตฺตโน อานุภาเวน
ทฺวินฺนมฺปิ เตสํ เคเห ธนํ ปติฏฺฐาเปตฺวา ปณฺฑิเตเหว สทฺธึ สํสคฺโค
นาม กาตพฺโพ, สเจ อิมสฺส นหาปิตสฺส อิมินา อุปาสเกน สทฺธึ
สํสคฺโค นาภวิสฺส, สมุทฺทมชฺเฌ เยว นสฺสิสฺสตีติ ปณฺฑิตสํสคฺคสฺส
คุเณ กถยมานา อิมา คาถา อโวจ
         ปสฺส สทฺธาย สีลสฺส     จาคสฺส จ อยํ ผลํ,
         นาโค นาวาย วณฺเณน   สทฺธํ วหติ อุปาสกํ ฯ
         สพฺภิ เรว สมาเสถ,    สพฺภิ กุพฺเพถ สนฺถวํ,
         สตํ หิ สนฺนิวาเสน      โสตฺถึ คจฺฉติ นหาปิโตติ ฯ
     ตตฺถ ปสฺสาติ กญฺจิ อนิยมิตฺวา ปสฺสถาติ อาลปติ ฯ
สทฺธายาติ โลกิยโลกุตฺตราย สทฺธาย ฯ สีเลปิ เอเสว นโย ฯ
จาคสฺสาติ เทยฺยธมฺมปริจฺจาคสฺส เจว กิเลสปริจฺจาคสฺส จ ฯ
อยํ ผลนฺติ อิทํ ผลํ คุณํ อานิสํสนฺติ อตฺโถ ฯ อถ วา จาคสฺส
ผลํ ปสฺส อยํ นาโค นาวาย วณฺเณนาติ เอวเมตฺถ อตฺโถ
ทฏฺฐพฺโพ ฯ นาวาย วณฺเณนาติ นาวาย สณฺฐาเนน ฯ สทฺธนฺติ
ตีสุ สรเณสุ ปติฏฺฐิตสทฺธํ ฯ สพฺภิ เรวาติ ปณฺฑิเตหิ เยว ฯ
สมาเสถาติ เอกโต อวเสยฺย อุปวเสยฺยาติ อตฺโถ ฯ กุพฺเพถาติ
กเรยฺย ฯ สนฺถวนฺติ มิตฺตสนฺถวํ ฯ ตณฺหาสนฺถโว ปน เกนจิ สทฺธึ น
กาตพฺโพ ฯ นหาปิโตติ นหาปิตกุฏุมฺพิโก ฯ นฺหาปิโตติปิ ปาโฐ ฯ
     เอวํ สมุทฺทเทวตา อากาเส ฐตฺวา ธมฺมํ เทเสตฺวา โอวทิตฺวา
นาคราชานํ คณฺหิตฺวา อตฺตโน วิมานเมว อคมาสิ ฯ
     สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ
สโมธาเนสิ ฯ สจฺจปริโยสาเน อุปาสโก สกทาคามิผเล ปติฏฺฐหิ ฯ
ตทา โสตาปนฺโน อุปาสโก อุตฺตรึ มคฺคํ ภาเวตฺวา ปรินิพฺพายิ ฯ
นาคราชา สาริปุตฺโต อโหสิ, สมุทฺทเทวตา ปน อหเมวาติ ฯ
                   สีลานิสํสชาตกํ ทสมํ ฯ
                   อสทิสวคฺโค จตุตฺโถ ฯ
                     ------------
@เชิงอรรถ:
@*** หน้านี้ไม่มีข้อมูล ***

             อรรถกถาภาษาบาลีอักษรไทย เล่มที่ ๓๗ หน้า ๑๔๖-๑๕๐.
http://84000.org/tipitaka/atthapali/read_th.php?B=37&A=2909&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=37&A=2909&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=27&i=229
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=27&A=1385
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=27&A=1371
             The Pali Tipitaka in Roman Character :-
http://84000.org/tipitaka/read/roman_read.php?B=27&A=1371
             สารบัญพระไตรปิฎกเล่มที่ ๒๗
http://84000.org/tipitaka/read/?index_27