ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓๗ ภาษาบาลีอักษรไทย ชา.อ.๓ ทุกนิปาตวณฺณนา

หน้าที่ ๑๖๑.

๔ มณิโจรชาตกํ น สนฺติ เทวา ปวสนฺติ นูนาติ อิทํ สตฺถา เวฬุวเน วิหรนฺโต วธาย ปริสกฺกนฺตํ เทวทตฺตํ อารพฺภ กเถสิ ฯ เทวทตฺโต วธาย ปริสกฺกตีติ สุตฺวา น ภิกฺขเว อิทาเนว ปุพฺเพปิ เทวทตฺโต มยฺหํ วธาย ปริสกฺกติ เยว, ปริสกฺกนฺโตปิ มํ วธิตุํ นาสกฺขีติ วตฺวา อตีตํ อาหริ ฯ อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต พาราณสิโต อวิทูเร คามเก คหปติกุเล นิพฺพตฺติ ฯ อถสฺส วยปฺปตฺตสฺส พาราณสิโต กุลธีตรํ อาเนสุํ ฯ สา ปิยา อโหสิ อภิรูปา ทสฺสนียา เทวจฺฉรา วิย ปุปฺผลตา วิย วิลาสมานา มตฺตกินฺนรี วิย จ สุชาตาติ นาเมน ปติพฺพตา สีลาจารสมฺปนฺนา วตฺตสมฺปนฺนา ฯ นิจฺจกาลมฺปิสฺสา ปติวตฺตํ สสฺสุวตฺตํ สสุรวตฺตญฺจ กตเมว โหติ ฯ สา โพธิสตฺตสฺส ปิยา อโหสิ มนาปา ฯ อิติ เต อุโภปิ สมฺโมทมานา เอกคฺคจิตฺตา สมคฺคสํวาสํ วสึสุ ฯ อเถกทิวสํ สุชาตา มาตาปิตโร ทฏฺฐุกามมฺหีติ โพธิสตฺตสฺส อาโรเจสิ ฯ โส สาธุ ภทฺเท มคฺเค ปาเถยฺยํ ปโหนกํ ปฏิยาเทหีติ ขชฺชกวิกตึ ปจาเปตฺวา ขชฺชกาทีนิ ยานเก ฐเปตฺวา ยานกํ ปาเชนฺโต ยานกสฺส ปุรโต อโหสิ, อิตรา ปจฺฉโต ฯ เต นครสมีปํ คนฺตฺวา ยานกํ โมเจตฺวา นฺหาตฺวา ภุญฺชึสุ ฯ ปุน โพธิสตฺโต ยานกํ โยเชตฺวา

--------------------------------------------------------------------------------------------- หน้าที่ ๑๖๒.

ปุรโต นิสีทิ ฯ สุชาตา วตฺถานิ ปริวตฺเตตฺวา อลงฺกริตฺวา ปจฺฉโต นิสีทิ ฯ ยานกสฺส อนฺโตนครํ ปวิฏฺฐกาเล พาราณสีราชา หตฺถิกฺขนฺธวรคโต นครํ ปทกฺขิณํ กโรนฺโต ตํ ปเทสํ อคมาสิ ฯ สุชาตา โอตริตฺวา ยานกสฺส ปจฺฉโต ปทสา ว ปายาสิ ฯ ราชา ตํ ทิสฺวา ตสฺสา รูปสมฺปตฺติยา อากฑฺฒิยมานโส ปฏิพทฺธจิตฺโต หุตฺวา เอกํ อมจฺจํ คจฺฉ เอติสฺสา สสฺสามิกภาวํ วา อสฺสามิกภาวํ วา ชานาหีติ เปเสสิ ฯ โส คนฺตฺวา ตสฺสา สสฺสามิกภาวํ ญตฺวา สสฺสามิกา กิร เทว ยานเก นิสินฺโน ปุริโส เอติสฺสา สามิโกติ อาห ฯ ราชา ปฏิพทฺธจิตฺตตํ วิโนเทตุํ อสกฺโกนฺโต กิเลสาตุโร หุตฺวา เอเกน อุปาเยน มาเรตฺวา อิตฺถึ คเหสฺสามีติ จินฺเตตฺวา เอกํ ปุริสํ อามนฺเตตฺวา คจฺฉ โภ อิมํ จุฬามณึ อาทาย วีถึ คจฺฉนฺโต วิย เอตสฺส ปุริสสฺส ยานเก ปกฺขิปิตฺวา เอหีติ จุฬามณึ ทตฺวา อุยฺโยเชสิ ฯ โส สาธูติ ตํ คเหตฺวา คนฺตฺวา ยานเก ฐเปตฺวา ฐปิโต เม เทวาติ อาคนฺตฺวา อาโรเจสิ ฯ ราชา จุฬามณิ เม นฏฺโฐติ อาห ฯ มนุสฺสา เอกโกลาหลํ อกํสุ ฯ ราชา สพฺพทฺวารานิ ปิทหิตฺวา สญฺจารํ ฉินฺทิตฺวา โจรํ ปริเยสถาติ อาห ฯ ราชปุริสา ตถา อกํสุ ฯ นครํ เอกสงฺโขภิตํ อโหสิ ฯ อิตโร ปุริโส มนุสฺเส คเหตฺวา โพธิสตฺตสฺส สนฺติกํ คนฺตฺวา โภ ยานกํ ฐเปหิ, รญฺโญ จุฬามณิ นฏฺโฐ, ยานกํ โสเธสฺสามีติ ยานกํ โสเธนฺโต อตฺตนา ฐปิตมณึ คเหตฺวา โพธิสตฺตํ คเหตฺวา มณิโจโรสีติ หตฺเถหิ จ ปาเทหิ จ โปเถตฺวา คเหตฺวา ตํ

--------------------------------------------------------------------------------------------- หน้าที่ ๑๖๓.

ปจฺฉาพาหุํ พนฺธิตฺวา เนตฺวา อยํ มณิโจโรติ รญฺโญ ทสฺเสติ ฯ ราชา สีสมสฺส ฉินฺทถาติ อาณาเปสิ ฯ อถ นํ ราชปุริสา จตุกฺเก จตุกฺเก กสาหิ ตาเฬนฺตา ทกฺขิณทฺวาเรน นครา นิกฺขมึสุ ฯ สุชาตาปิ ยานกํ ปหาย พาหา ปคฺคยฺห ปริเทวมานา สามิ มํ นิสฺสาย อิมํ ทุกฺขํ ปตฺโตสีติ ปริเทวมานา ปจฺฉโต อคมาสิ ฯ ราชปุริสา สีสมสฺส ฉินฺทิสฺสามาติ โพธิสตฺตํ อุตฺตานํ นิปชฺชาเปสุํ ฯ ตํ ทิสฺวา สุชาตา อตฺตโน สีลคุณํ อาวชฺชิตฺวา นตฺถิ วต มญฺเญ อิมสฺมึ โลเก สีลวนฺตานํ วิเหฐนเก ปาปสาหสิกมนุสฺเส นิเสเธตุํ สมตฺถา เทวา นามาติ อาทีนิ ปริเทวมานา ปฐมํ คาถมาห น สนฺติ เทวา ปวสนฺติ นูน, น หิ นูน สนฺติ อิธ โลกปาลา, สหสา กโรนฺตานํ ๑- อสญฺญตานํ น หิ นูน สนฺติ ปฏิเสธิตาโรติ ฯ ตตฺถ น สนฺติ เทวาติ อิมสฺมึ โลเก สีลวนฺตานํ โอโลกนกา ปาปานญฺจ นิเสธนกา น สนฺติ นูน เทวา ฯ ปวสนฺติ นูนาติ เอวรูเปสุ วา กิจฺเจสุ อุปฺปนฺเนสุ นูน ปวสนฺติ ปวาสํ คจฺฉนฺติ ฯ อิธ โลกปาลาติ อิมสฺมึ โลเก โลกปาลสมฺมตา สมณพฺราหฺมณาปิ สีลวนฺตา อนุคฺคหนกา น หิ นูน สนฺติ ฯ สหสา กโรนฺตานํ อสญฺญตานนฺติ สหสา อวิมํสิตฺวา สาหสิกํ ทารุณกมฺมํ กโรนฺตานํ ทุสฺสีลานํ ฯ ปฏิเสธิตาโรติ เอวรูปํ กมฺมํ มา กริตฺถ, น ลพฺภา @เชิงอรรถ: กโรนฺตานมสญฺญตานนฺติ ยุตฺตตรํ ฯ

--------------------------------------------------------------------------------------------- หน้าที่ ๑๖๔.

เอตํ กาตุนฺติ ปฏิเสเธนฺตา นตฺถีติ อตฺโถ ฯ เอวํ ตาย สีลสมฺปนฺนาย ปริเทวมานาย สกฺกสฺส เทวรญฺโญ นิสินฺนาสนํ อุณฺหาการํ ทสฺเสสิ ฯ สกฺโก โก นุ โข มํ สกฺกฏฺฐานโต จาเวตุกาโมติ อาวชฺเชนฺโต อิมํ การณํ ญตฺวา พาราณสีราชา อติผรุสํ กมฺมํ กโรติ, สีลสมฺปนฺนํ สุชาตํ กิลเมติ, คนฺตุํ อิทานิ เม วฏฺฏตีติ เทวโลกา โอรุยฺห อตฺตโน อานุภาเวน หตฺถิปิฏฺเฐ นิสีทิตฺวา คจฺฉนฺตํ ปาปราชานํ หตฺถิโต โอตาเรตฺวา ธมฺมคณฺฑิกาย อุตฺตานํ นิปชฺชาเปตฺวา โพธิสตฺตํ อุกฺขิปิตฺวา สพฺพาลงฺกาเรหิ อลงฺกริตฺวา ราชเวสํ คาหาเปตฺวา หตฺถิกฺขนฺเธ นิสีทาเปสิ ฯ ผรสุํ อุกฺขิปิตฺวา ฐิตา สีสํ ฉินฺทนฺตา รญฺโญ สีสํ ฉินฺทึสุ ฯ ฉินฺทนกาเล เยว จสฺส รญฺโญ สีสภาวํ ชานึสุ ฯ สกฺโก เทวราชา ทิสฺสมานกสรีเรเนว โพธิสตฺตสฺส สนฺติกํ คนฺตฺวา โพธิสตฺตสฺส ราชาภิเสกํ กตฺวา สุชาตาเยว อคฺคมเหสิฏฺฐานํ ทาเปสิ ฯ อมจฺจา เจว พฺราหฺมณคหปติกาทโย จ สกฺกํ เทวราชานํ ทิสฺวา อธมฺมิกราชา มาริโต, อิทานิ อมฺเหหิ สกฺกทตฺติโก ธมฺมิกราชา ลทฺโธติ โสมนสฺสปฺปตฺตา อเหสุํ ฯ สกฺโกปิ อากาเส ฐตฺวา อยํ โว สกฺกทตฺติโก ราชา ลทฺโธติ ปริสานํ อาโรเจสิ ฯ มหาราช ตุมฺเหปิ อิโต ปฏฺฐาย ธมฺเมน รชฺชํ กาเรสฺสถ, ๑- สเจ หิ ราชา อธมฺมิโก โหติ, เทโว อกาเล วสฺสติ, กาเล น วสฺสติ, ฉาตกภยํ โรคภยํ สตฺตุภยนฺติ อิมานิ ตีณิ ภยานิ อุปคตาเนว โหนฺตีติ @เชิงอรรถ: กาเรถาติปิ ฯ

--------------------------------------------------------------------------------------------- หน้าที่ ๑๖๕.

โอวทนฺโต ทุติยํ คาถมาห อกาเล วสฺสตี ตสฺส, กาเล ตสฺส น วสฺสติ, สคฺคา จ จวติ ฐานา นนุ โส ตาวตา หโตติ ฯ ตตฺถ อกาเลติ อธมฺมิกสฺส รญฺโญ รชฺเช อยุตฺเต กาเล จ สสฺสานํ ปกฺกกาเล วา ลายนกาเล วา มทฺทนาทิกาเล วา เทโว วสฺสติ ฯ กาเลติ ยุตฺตปฺปยุตฺตกาเล วปนกาเล ตรุณสสฺสกาเล คพฺภคฺคหณกาเล ปน น วสฺสติ ฯ สคฺคา จ จวติ ฐานาติ สคฺคสงฺขาตา ฐานา เทวโลกาติ อตฺโถ ฯ อธมฺมิกราชา หิ อปฺปฏิลาภวเสน เทวโลกา จวติ นาม, สคฺเคปิ วา รชฺชํ กาเรนฺโต อธมฺมิกราชา ตโต จวตีติปิ อตฺโถ ฯ นนุ โส ตาวตา หโตติ นนุ โส อธมฺมิกราชา เอตฺตเกน หโต โหติ ฯ อถ วา เอกํสวาจี เอตฺถ นุกาโร เนโส เอกํเสน เอตฺตาวตา หโต, อฏฺฐสุ ปน มหานิรเยสุ โสฬสสุ จ อุสฺสทนิรเยสุ ทีฆรตฺตํ โส หญฺญิสฺสตีติ อยเมตฺถ อตฺโถ ฯ เอวํ สกฺโก มหาชนสฺส โอวาทํ ทตฺวา อตฺตโน เทวฏฺฐานเมว อคมาสิ ฯ โพธิสตฺโตปิ ธมฺเมน รชฺชํ กาเรตฺวา สคฺคปูรํ ๑- ปูรยิ ฯ สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ฯ ตทา อธมฺมิกราชา เทวทตฺโต อโหสิ, สกฺโก อนุรุทฺโธ, สุชาตา ราหุลมาตา, สกฺกทตฺติยราชา ปน อหเมวาติ ฯ มณิโจรชาตกํ จตุตฺถํ ฯ @เชิงอรรถ: สคฺคปทนฺติปิ ฯ

             อรรถกถาภาษาบาลีอักษรไทย เล่มที่ ๓๗ หน้า ๑๖๑-๑๖๕. http://84000.org/tipitaka/atthapali/read_th.php?B=37&A=3184&modeTY=2&pagebreak=1              The Pali Atthakatha in Roman :- http://84000.org/tipitaka/atthapali/read_rm.php?B=37&A=3184&modeTY=2&pagebreak=1              อ่านอรรถกถาแปลไทย :- http://84000.org/tipitaka/attha/attha.php?b=27&i=237              เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=1426              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=1412              The Pali Tipitaka in Roman Character :- http://84000.org/tipitaka/read/roman_read.php?B=27&A=1412              สารบัญพระไตรปิฎกเล่มที่ ๒๗ http://84000.org/tipitaka/read/?index_27

อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]