บาลีอรรถกถาเล่มที่ ๓๗

หน้าที่ ๓๕๑.

๗ ปาทญฺชลิชาตกํ อทฺธา ปาทญฺชลี สพฺเพติ อิทํ สตฺถา เชตวเน วิหรนฺโต โลฬุทายิตฺเถรํ ^๑- อารพฺภ กเถสิ ฯ เอกสฺมึ ทิวเส เทฺว มหาสาวกา ปญฺหํ วินิจฺฉินนฺติ ฯ ภิกฺขู ปญฺหํ สุณนฺตา เถเร ปสํสนฺติ ฯ โลฬุทายิตฺเถโร ปริสนฺตเร นิสินฺโน เอเต อมฺเหหิ สมํ กึ ชานนฺตีติ โอฏฺฐํ ภญฺชิ ฯ ตํ ทิสฺวา เถรา อุฏฺฐายาสนา ปกฺกมึสุ ฯ ปริสา ภิชฺชิ ฯ ธมฺมสภายํ ภิกฺขู กถํ สมุฏฺฐาเปสุํ อาวุโส โลฬุทายี เทฺว อคฺคสาวเก ครหิตฺวา โอฏฺฐํ ภญฺชตีติ ฯ สตฺถา น ภิกฺขเว อิทาเนว ปุพฺเพปิ โลฬุทายี ฐเปตฺวา โอฏฺฐภญฺชนํ ตโต อุตฺตรึ อญฺญํ น ชานาตีติ วตฺวา อตีตํ อาหริ ฯ อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต ตสฺส อตฺถธมฺมานุสาสโก อมจฺโจ อโหสิ ฯ รญฺโญ ปน ปาทญฺชลี นาม ปุตฺโต โลโล ^๒- ทนฺธปริสกฺกโน อโหสิ ฯ อปรภาเค ราชา กาลมกาสิ ฯ อมจฺจา รญฺโญ มตกิจฺจานิ กตฺวา ตํ รชฺเช อภิสิญฺจิสฺสามาติ มนฺตยมานา ราชปุตฺตํ ปาทญฺชลินฺติ ^๓- อาหํสุ ฯ โพธิสตฺโต ปน อยํ กุมาโร โลโล ทนฺธปริสกฺกโน, ปริคฺคหิตฺวา นํ อภิสิญฺจิสฺสามาติ อาห ฯ อมจฺจา วินิจฺฉยํ สชฺเชตฺวา กุมารํ สมีเป นิสีทาเปตฺวา อฏฺฏํ วินิจฺฉินนฺตา น สมฺมา วินิจฺฉินึสุ ฯ เต อสฺสามิกํ สามิกํ กตฺวา กุมารํ ปุจฺฉึสุ กีทิสํ กุมาร สุฏฺฐุ @เชิงอรรถ: ^๑ ลาฬุ...อิติปิ ฯ ป ฯ ^๒ ลาโลติปิ ฯ ป ฯ ^๓ ปาทญฺชลิกนฺติปิ ฯ

--------------------------------------------------------------------------------------------- หน้าที่ ๓๕๒.

วินิจฺฉินิมฺหาติ ฯ โส โอฏฺฐํ ภญฺชิ ฯ โพธิสตฺโต ปณฺฑิโต มญฺเญ กุมาโร, อสมฺมาวินิจฺฉิตภาโว เตน ญาโต ภวิสฺสตีติ มญฺญมาโน ปฐมํ คาถมาห อทฺธา ปาทญฺชลี สพฺเพ ปญฺญาย อติโรจติ, ตถา หิ โอฏฺฐํ ภญฺชติ อุตฺตรึ นูน ปสฺสตีติ ฯ ตสฺสตฺโถ เอกํเสน ปาทญฺชลี กุมาโร สพฺเพ อมฺเห ปญฺญาย อติโรจติ ฯ ตถา หิ โอฏฺฐํ ภญฺชติ นูน อุตฺตรึ อญฺญํ การณํ ปสฺสตีติ ฯ เต อปรสฺมึ ทิวเส วินิจฺฉยํ สชฺเชตฺวา อญฺญํ อฏฺฏํ สุฏฺฐุ วินิจฺฉินิตฺวา กีทิสํ เต เทว สุฏฺฐุ วินิจฺฉิตนฺติ ปุจฺฉึสุ ฯ โส ปุนปิ โอฏฺฐเมว ภญฺชิ ฯ อถสฺส อนฺธพาลภาวํ ญตฺวา โพธิสตฺโต ทุติยํ คาถมาห นายํ ธมฺมํ อธมฺมํ วา อตฺถานตฺถญฺจ พุชฺฌติ, อญฺญตฺร โอฏฺฐนิพฺโภคา นายํ ชานาติ กิญฺจนนฺติ ฯ อมจฺจา ปาทญฺชลิกุมารสฺส โลลภาวํ ญตฺวา โพธิสตฺตํ รชฺเช อภิสิญฺจึสุ ฯ สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ฯ ตทา ปาทญฺชลี โลฬุทายี อโหสิ, ปณฺฑิตามจฺโจ ปน อหเมวาติ ฯ ปาทญฺชลิชาตกํ สตฺตมํ ฯ ----------

อรรถกถาภาษาบาลีอักษรไทย เล่มที่ ๓๗ หน้า ๓๕๑-๓๕๒. http://84000.org/tipitaka/atthapali/read_th.php?B=37&A=6941&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=37&A=6941&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=27&i=344 เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=1934 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=1921 The Pali Tipitaka in Roman Character :- http://84000.org/tipitaka/read/roman_read.php?B=27&A=1921 สารบัญพระไตรปิฎกเล่มที่ ๒๗ http://84000.org/tipitaka/read/?index_27