ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓๘ ภาษาบาลีอักษรไทย ชา.อ.๔ ติก-ปญฺจกนิปาต

                       ปูฏทูสกชาตกํ
     อทฺธา หิ นูน มิคราชาติ อิทํ สตฺถา เชตวเน วิหรนฺโต
เอกํ กุมารํ ปูฏทูสกํ อารพฺภ กเถสิ ฯ
     สาวตฺถิยํ กิเรโก อมจฺโจ พุทฺธปฺปมุขํ ภิกฺขุสงฺฆํ นิมนฺเตตฺวา
อุยฺยาเน นิสีทาเปตฺวา ทานํ ททมาโน อนฺตราภตฺเต อุยฺยาเน
วิจริตุกามา จรนฺตูติ อาห ฯ ภิกฺขู อุยฺยานจาริกํ จรึสุ ฯ ตสฺมึ
ขเณ อุยฺยานปาโล ปตฺตสมฺปนฺนํ รุกฺขํ อภิรูหิตฺวา มหนฺตมหนฺตานิ
ปตฺตานิ คเหตฺวา อยํ ปุปฺผานํ ภวิสสติ อยํ ผลานนฺติ ปูเฏ
กตฺวา รุกฺขมูเล ปาเตสิ ฯ ตสฺส ปุตฺตทารโก ปาติตํ ปาติตํ
ปูฏํ วิทฺธํเสติ ฯ ภิกฺขู ตมตฺถํ สตฺถุ อาโรเจสุํ ฯ สตฺถา
น ภิกฺขเว อิทาเนว ปุพฺเพเปส ปูฏทูสโกเยวาติ วตฺวา อตีตํ
อาหริ ฯ
     อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต
พาราณสิยํ เอกสฺมึ พฺราหฺมณกุเล นิพฺพตฺติตฺวา วยปฺปตฺโต อคารํ
อชฺฌาวสมาโน เอกทิวสํ เกนจิเทว กรณีเยน อุยฺยานํ อคมาสิ ฯ
ตตฺถ พหู วานรา วสนฺติ ฯ อุยฺยานปาโล ปน อิมินาว นิยาเมน
ปตฺตปูเฏ ปาเตติ ฯ เชฏฺฐกวานโร ปาติตปาติเต วิทฺธํเสติ ฯ
โพธิสตฺโต ตํ อามนฺเตตฺวา อุยฺยานปาเลน ปาติตปาติเต ปูเฏ
วิทฺธํเสตฺวา ปาติตปาติตํ มนาปตรํ กาตุกาโม มญฺญสีติ วตฺวา
ปฐมํ คาถมาห
       อทฺธา หิ นูน มิคราชา      ปูฏกมฺมสฺส โกวิโท
       ตถา หิ ปูฏํ ทูเสติ         อญฺญํ นูน กริสฺสตีติ ฯ
     ตตฺถ มิคราชาติ มกฺกฏํ วณฺเณนฺโต วทติ ฯ ปูฏกมฺมสฺสาติ
มาลาปูฏกรณสฺส ฯ โกวิโทติ เฉโก ฯ อยํ ปเนตฺถ
สงฺเขปตฺโถ อยํ หิ มิคราชา เอกํเสน ปูฏกมฺมสฺส โกวิโท มญฺเญ
ตถา หิ อญฺญํ ปาติตํ ปูฏํ ทูเสติ อญฺญํ นูน ตโต มนาปตรํ
กริสฺสตีติ ฯ
     ตํ สุตฺวา มกฺกโฏ ทุติยํ คาถมาห
       น เม ปิตา วา มาตา วา    ปูฏกมฺมสฺส โกวิทา
       กตํ กตํ โข ทูเสม          เอวํธมฺมมิทํ กุลนฺติ ฯ
     ตํ สุตฺวา โพธิสตฺโต ตติยํ คาถมาห
       เยสํ โว อีทิโส ธมฺโม       อธมฺโม ปน กีทิโส
       มา โว ธมฺมํ อธมฺมํ วา      อทฺทสาม กุทาจนนฺติ ฯ
วตฺวา จปน วานรคณํ ครหิตฺวา ปกฺกามิ ฯ
     สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ
สโมธาเนสิ ตทา วานโร ปูฏทูสกทารโก อโหสิ ปณฺฑิตปุริโส
ปน อหเมวาติ ฯ
                     ปูฏทูสกชาตกํ ทสมํ
                    อุทปานวคฺโค ตติโย
                     -------------


             อรรถกถาภาษาบาลีอักษรไทย เล่มที่ ๓๘ หน้า ๑๔๔-๑๔๕. http://84000.org/tipitaka/atthapali/read_th.php?B=38&A=2996&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=38&A=2996&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=27&i=439              เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=2341              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=2311              The Pali Tipitaka in Roman Character :- http://84000.org/tipitaka/read/roman_read.php?B=27&A=2311              สารบัญพระไตรปิฎกเล่มที่ ๒๗ http://84000.org/tipitaka/read/?index_27

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]