ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓๘ ภาษาบาลีอักษรไทย ชา.อ.๔ ติก-ปญฺจกนิปาต

                       สีลวีมํสชาตกํ
     นตฺถิ โลเก รโห นามาติ อิทํ สตฺถา เชตวเน วิหรนฺโต
กิเลสนิคฺคหํ อารพฺภ กเถสิ ฯ
     วตฺถุ เอกาทสนิปาเต ปญฺจาลชาตเก ๑- อาวิภวิสฺสติ ฯ อยํ
ปเนตฺถ สงฺเขปตฺโถ ฯ ปญฺจสตา ภิกฺขู อนฺโตเชตวเน วสนฺตา
มชฺฌิมยามสมนนฺตเร กามวิตกฺกํ วิตกฺกยึสุ ฯ สตฺถา สพฺพรตฺตินฺทิวํ
สพฺพกาเล ยถา เอกจกฺขุโก จกฺขุํ เอกปุตฺโต ปุตฺตํ จามรี พาลํ
อปฺปมาเทน รกฺขติ เอวํ นิจฺจกาลํ ภิกฺขู โอโลเกติ ฯ โส
@เชิงอรรถ:  ปานียชาตเก ฯ
รตฺติภาเค ทิพฺพจกฺขุนา เชตวเน โอโลเกนฺโต จกฺกวตฺติรญฺโญ
อนฺโตนิเวสเน อุปฺปนฺนโจเร วิย เต ภิกฺขู ทิสฺวา คนฺธกุฏึ วิวริตฺวา
อานนฺทตฺเถรํ ปกฺโกสิตฺวา อานนฺท อนฺโตโกฏิสนฺถาเร ภิกฺขู
สนฺนิปาเตตฺวา คนฺธกุฏิทฺวาเร อาสนํ ปญฺญเปหีติ อาห ฯ โส ตถา
กตฺวา สตฺถุ ปฏิเวเทสิ ฯ สตฺถา ปญฺญตฺตาสเน นิสีทิตฺวา
สพฺพสงฺคาหิกวเสน อามนฺเตตฺวา ภิกฺขเว โปราณกปณฺฑิตา ปาปกรเณ
รโห นาม นตฺถีติ ปาปํ น กรึสูติ วตฺวา เตหิ ยาจิโต อตีตํ
อาหริ ฯ
     อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต
พฺราหฺมณกุเล นิพฺพตฺติตฺวา วยปฺปตฺโต ตตฺเถว พาราณสิยํ
ทิสาปาโมกฺขสฺส อาจริยสฺส สนฺติเก ปญฺจมาณวสตานํ เชฏฺฐโก หุตฺวา
สิปฺปํ อุคฺคณฺหติ ฯ อาจริยสฺส วยปฺปตฺตา ธีตา อตฺถิ ฯ โส
จินฺเตสิ อิเมสํ มาณวกานํ สีลํ วีมํสิตฺวา สีลสมฺปนฺนสฺเสว ตํ
ทสฺสามีติ ฯ โส เอกทิวสํ มาณเว อามนฺเตตฺวา ตาตา มยฺหํ
ธีตา วยปฺปตฺตา วิวาหมสฺสา กริสฺสามิ วตฺถาลงฺการํ ลทฺธุํ
วฏฺฏติ ตุมฺเห อตฺตโน ญาตกานํ อปสฺสนฺตานํ เถเนตฺวา
วตฺถาลงฺการํ อาหรถ เกนจิ อทิฏฺฐเมว คณฺหามิ ทสฺเสตฺวา อาภตํ
น คณฺหามีติ อาห ฯ เต สาธูติ สมฺปฏิจฺฉิตฺวา ตโต ปฏฺฐาย
ญาตกานํ อปสฺสนฺตานํ เถเนตฺวา วตฺถปิลนฺธนาทีนี อาหรนฺติ ฯ
อาจริโย อาภตาภตํ วิสุํ วิสุํ ฐเปสิ ฯ โพธิสตฺโต น กิญฺจิ อาหริ ฯ
อถ นํ อาจริโย อาห ตฺวํ ปน ตาต คนฺตฺวา น กิญฺจิ
อาหรสีติ ฯ อาม อาจริยาติ ฯ กสฺมา ตาตาติ ฯ ตุมฺเห กสฺสจิ
ปสฺสนฺตสฺส อาภตํ น คณฺหถ อหมฺปิ ปาปกมฺมกรเณ รโห น ปสฺสามีติ
ทีเปนฺโต อิมา เทฺว คาถา อาห
       นตฺถิ โลเก รโห นาม     ปาปกมฺมํ ปกุพฺพโต
       ปสฺสนฺติ วนภูตานิ         ตํ พาโล มญฺญเต รโห
       อหํ รโห น ปสฺสามิ       สุญฺญํ วาปิ น วิชฺชติ
       ยตฺถ สุญฺญํ ๑- น ปสฺสามิ   อสุญฺญํ โหติ ตํ มยาติ ฯ
     ตตฺถ รโหติ ปฏิจฺฉนฺนฏฺฐานํ ฯ วนภูตานีติ วเน นิพฺพตฺตภูตานิ ฯ
ตํ พาโลติ ตํ ปาปกมฺมํ รโห มยา กตนฺติ พาโล มญฺญติ ฯ
สุญฺญํ วาปีติ ยํ วา ฐานํ สตฺเตหิ สุญฺญํ ตุจฺฉํ ภเวยฺย ตมฺปิ
นตฺถีติ อาห ฯ
     อาจริโย ตสฺส ปสีทิตฺวา ตาต น มยฺหํ เคเห ธนํ นตฺถิ
อหํ ปน สีลสมฺปนฺนสฺส ธีตรํ ทาตุกาโม อิเม มาณวเก วีมํสนฺโต
เอวมกาสึ มม ธีตา ตุยฺหํเยว อนุจฺฉวิกาติ ธีตรํ อลงฺกริตฺวา
โพธิสตฺตสฺส อทาสิ ฯ เสสมาณวเก ตุมฺเหหิ อาภตาภตํ ตุมฺหากํ
เคหเมว เนถาติ อาห ฯ
     สตฺถา อิติ โข ภิกฺขเว เต ทุสฺสีลมาณวา อตฺตโน
ทุสฺสีลตาย ตํ อิตฺถึ น ลภึสุ อิตโร ปณฺฑิตมาณโว
สีลสมฺปนฺนตาย ลภีติ วตฺวา อภิสมฺพุทฺโธ หุตฺวา อิตรา เทฺว คาถา
อภาสิ
@เชิงอรรถ:  อญฺญํ ฯ
       ทุชฺชจฺโจ จ สุชจฺโจ ๑- จ   จณฺโฑ ๒- จ สุขวจฺฉิโต ๓-
       เวชฺฌสนฺโธ จ สีลี จ ๔-    เต ธมฺมํ ชหุมตฺถิกา
       พฺราหฺมโณ จ กถํ ชเห      สพฺพธมฺมาน ปารคู
       โย ธมฺมํ อนุปาเลติ        ธิติมา สจฺจนิกฺกโมติ ฯ
     ตตฺถ ทุชฺชจฺโจติ อาทโย ฉ เชฏฺฐกมาณวา เตสํ นามํ คณฺหิ ฯ
อวเสสานํ นามํ อคฺคเหตฺวา สพฺพสงฺคาหิกวเสเนว เต ธมฺมํ
ชหุมตฺถิกาติ อาห ฯ ตตฺถ เตติ สพฺเพปิ เต มาณวา ฯ ธมฺมนฺติ
อิตฺถีปฏิลาภสภาวํ ฯ ชหุมตฺถิกาติ ชหุํ อตฺถิกาติ ฯ อยเมว วา
ปาโฐ ฯ มกาโร ปน พฺยญฺชนสนฺธิวเสน วุตฺโต ฯ อิทํ วุตฺตํ
โหติ สพฺเพปิ เต มาณวา ตาย อตฺถิกาว หุตฺวา อตฺตโน
ทุสฺสีลตาย ตํ อิตฺถีปฏิลาภสภาวํ ชหึสุ ฯ พฺราหฺมโณ จาติ อิตโร
ปน สีลสมฺปนฺโน พฺราหฺมโณ ฯ กถํ ชเหติ เกน การเณน ตํ
อิตฺถีปฏิลาภํ ชหิสฺสติ ฯ สพฺพธมฺมานนฺติ อิมสฺมึ ฐาเน โลกิยานิ
ปญฺจ สีลานิ อฏฺฐ สีลานิ ตีณิ สุจริตานิ สพฺพธมฺมา นาม
เตสํ โส ปารคโตติ ปารคู ฯ ธมฺมนฺติ วุตฺตปฺปการเมว ธมฺมํ
โย ปาเลติ รกฺขติ ฯ ธิติมาติ สีลรกฺขนธิติยา สมนฺนาคโต ฯ
สจฺจนิกฺกโมติ สจฺจสภาวภูโต ๕- ยถาวุตฺเต สีลธมฺเม นิกฺกเมน
สมนฺนาคโต ฯ
     สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ
@เชิงอรรถ:  อชจฺโจ ฯ   นนฺโท ฯ   สุขวจฺฉโน ฯ   วชฺโฌ อทฺธุวสีโล จ ฯ   สจฺเจ
@สภาวภูเต ฯ
สโมธาเนสิ ฯ สจฺจปริโยสาเน ตานิ ปญฺจ ภิกฺขุสตานิ อรหตฺเต
ปติฏฺฐหึสุ ฯ ตทา อาจริโย สารีปุตฺโต อโหสิ ฯ ปณฺฑิตมาณโว
ปน อหเมวาติ ฯ
                    สีลวีมํสชาตกํ ปญฺจมํ
                        -------


             อรรถกถาภาษาบาลีอักษรไทย เล่มที่ ๓๘ หน้า ๒๔๖-๒๕๐. http://84000.org/tipitaka/atthapali/read_th.php?B=38&A=5120&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=38&A=5120&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=27&i=518              เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=2671              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=2636              The Pali Tipitaka in Roman Character :- http://84000.org/tipitaka/read/roman_read.php?B=27&A=2636              สารบัญพระไตรปิฎกเล่มที่ ๒๗ http://84000.org/tipitaka/read/?index_27

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]