บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
ชวสกุณชาตกํ อกรมฺหาว เต กิจฺจนฺติ อิทํ สตฺถา เวฬุวเน วิหรนฺโต เทวทตฺตสฺส อกตญฺญุตํ อารพฺภ กเถสิ ฯ น ภิกฺขเว อิทาเนว ปุพฺเพปิ เทวทตฺโต อกตญฺญูเยวาติ วตฺวา อตีตํ อาหริ ฯ อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต หิมวนฺตปฺปเทเส รุกฺขโกฏฺฏกสกุโณ หุตฺวา นิพฺพตฺติ ฯ อเถกสฺส สีหสฺส มํสํ ขาทนฺตสฺส อฏฺฐิ คเล ลคฺคิ ฯ คโล อุทฺธุมายิ ฯ โคจรํ คณฺหิตุํ น สกฺโกติ ฯ ขรา เวทนา วตฺตนฺติ ฯ อถ นํ โส สกุโณ โคจรปสุโต ทิสฺวา สาขาย นิสินฺโน กึ ตฺวํ สมฺม ทุกฺขสีติ ปุจฺฉิ ฯ โส ตมตฺถํ อาจิกฺขิ ฯ อหํ เต สมฺม เอตํ อฏฺฐึ อปเนยฺยํ ภเยน ปน เต สมฺม มุขํ ปวิสิตุํ น วิสหามิ ขาเทยฺยาสิ มนฺติ ฯ มา ภายิ สมฺม นาหนฺตํ ขาทามิ ชีวิตํ เม เทหีติ ฯ โส--------------------------------------------------------------------------------------------- หน้าที่ ๒๕๘.
สาธูติ ตํ ปสฺเสน นิปชฺชาเปตฺวา โก ชานาติ กึ เม ๑- ภวิสฺสตีติ จินฺเตตฺวา ยถา มุขํ ปิทหิตุํ น สกฺโกติ ตถา ตสฺส อธโรฏฺเฐ จ อุตฺตโรฏฺเฐ จ ทณฺฑกํ ฐเปตฺวา มุขํ ปวิสิตฺวา อฏฺฐิโกฏึ ตุณฺเฑน ปหริ ฯ อฏฺฐิ ปติตฺวา คตํ ฯ โส อฏฺฐึ ปาเตตฺวา สีหสฺส มุขโต นิกฺขมนฺโต ทณฺฑกํ ตุณฺเฑน ปหริตฺวา ปาเตนฺโตว นิกฺขมิตฺวา สาขคฺเค นิลียิ ฯ สีโห นิโรโค หุตฺวา เอกทิวสํ เอกํ วนมหิสํ วธิตฺวา ขาทติ ฯ สกุโณ วีมํสิสฺสามิ นนฺติ ตสฺส อุปริภาเค สาขาย นิลียิตฺวา เตน สทฺธึ สลฺลปนฺโต ปฐมํ คาถมาห อกรมฺหาว เต กิจฺจํ ยํ พลํ อหุวมฺหเส มิคราช นโม ตฺยตฺถุ อปิ กิญฺจิ ลภามเสติ ฯ ตตฺถ อกรมฺหาว เต กิจฺจนฺติ โภ สีห มยมฺปิ ตว เอกํ กิจฺจํ อกรมฺหา ฯ ยํ พลํ อหุวมฺหเสติ ยํ อมฺหากํ พลํ อโหสิ เตน พเลน ตโต กิญฺจิ อหาเปตฺวา อกรมฺหาเยวาติ ฯ ตํ สุตฺวา สีโห ทุติยํ คาถมาห มม โลหิตภกฺขสฺส นิจฺจํ ลุทฺธานิ กุพฺพโต ทนฺตนฺตรคโต สนฺโต ตํ พหุํ ยมฺปิ ชีวสีติ ฯ ตํ สุตฺวา สกุโณ อิตรา เทฺว คาถา อภาสิ อกตญฺญุมกตฺตารํ กตสฺส อปฺปฏิการกํ ยสฺมึ กตญฺญุตา นตฺถิ นิรตฺถา ตสฺส เสวนา ยสฺส สมฺมุขจิณฺเณน มิตฺตธมฺโม น ลพฺภติ อนุสฺสุยมนกฺโกสํ สณิกํ ตมฺหา อปกฺกเมติ ฯ @เชิงอรรถ: ๑ กึ เปส กริสฺสติ ฯ--------------------------------------------------------------------------------------------- หน้าที่ ๒๕๙.
ตตฺถ อกตญฺญุนฺติ กตคุณํ อชานนฺตํ ฯ อกตฺตารนฺติ ยํ กิญฺจิ ๑- อกโรนฺตํ ฯ สมฺมุขจิณฺเณนาติ สมฺมุเข กเตน คุเณน ฯ อนุสฺสุยมนกฺโกสนฺติ ตํ ปุคฺคลํ น อุสฺสุยนฺโต น อกฺโกสนฺโต สณิกํ ตมฺหา ปุคฺคลา อปคจฺเฉยฺยาติ ฯ เอวํ วตฺวา โส สกุโณ ปกฺกามิ ฯ สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา สีโห เทวทตฺโต อโหสิ สกุโณ ปน อหเมวาติ ฯ ชวสกุณชาตกํ อฏฺฐมํ --------อรรถกถาภาษาบาลีอักษรไทย เล่มที่ ๓๘ หน้า ๒๕๗-๒๕๙. http://84000.org/tipitaka/atthapali/read_th.php?B=38&A=5347&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=38&A=5347&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=27&i=530 เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=2714 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=2680 The Pali Tipitaka in Roman Character :- http://84000.org/tipitaka/read/roman_read.php?B=27&A=2680 สารบัญพระไตรปิฎกเล่มที่ ๒๗ http://84000.org/tipitaka/read/?index_27
|
บันทึก ๒๖ มกราคม พ.ศ. ๒๕๖๑.
การแสดงผลนี้อ้างอิงข้อมูลจากอรรถกถาภาษาบาลีอักษรไทย.
หากพบข้อผิดพลาด กรุณาแจ้งได้ที่ [email protected]