ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓๙ ภาษาบาลีอักษรไทย ชา.อ.๕ ฉกฺก-ทสกนิปาต

                       ปรนฺตปชาตกํ
     อาคมิสฺสติ เม ปาปนฺติ อิทํ สตฺถา เวฬุวเน วิหรนฺโต
เทวทตฺตสฺส วธาย ปริสกฺกนํ อารพฺภ กเถสิ ฯ
     ตทา หิ ธมฺมสภายํ กถํ สมุฏฺฐาเปสุํ อาวุโส เทวทตฺโต
ตถาคตสฺส มารณตฺถเมว ปริสกฺกติ ธนุคฺคเห ปโยเชสิ สิลํ
ปฏิวิชฺฌิ นาฬาคิรึ วิสฺสชฺชาเปสิ ตถาคตสฺส วินาสนตฺถเมว
อุปายํ กโรตีติ ฯ สตฺถา อาคนฺตฺวา กาย นุตฺถ ภิกฺขเว
เอตรหิ กถาย สนฺนิสินฺนาติ ปุจฺฉิตฺวา อิมาย นามาติ วุตฺเต
น ภิกฺขเว อิทาเนว วธาย ปริสกฺกติ ปุพฺเพเปส มม วธาย
ปริสกฺกิตฺวา ตาสมตฺตํปิ ปน กาตุํ อสกฺโกนฺโต อตฺตโนว ทุกฺขํ
อนุโภตีติ วตฺวา อตีตํ อาหริ
     อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต
ตสฺส อคฺคมเหสิยา กุจฺฉิมฺหิ นิพฺพตฺติตฺวา วยปฺปตฺโต ตกฺกสิลายํ
สพฺพสิปฺปานิ สิกฺขติ สพฺพรุทมนฺตํ อุคฺคณฺหิ ฯ โส อาจริยสฺส
อนุโยคํ ทตฺวา พาราณสิยํ ปจฺจาคจฺฉิ ฯ ปิตา ตํ อุปรชฺเช
ฐเปสิ ฯ กิญฺจาปิ อุปรชฺเช ฐเปสิ มาราเปตุกาโม ปน หุตฺวา
นํ ทฏฺฐุํปิ น อิจฺฉิ ฯ อเถกทิวสํ เอกา สิคาลี เทฺว ปุตฺตเก
คเหตฺวา รตฺตึ มนุสฺเสสุ ปฏิสลฺลีเนสุ นิทฺธมเนน นครํ ปาวิสิ ฯ
โพธิสตฺตสฺส ปาสาเท สยนคพฺภปสฺเส เอกา สาลา อตฺถิ ฯ
ตตฺเถโก อทฺธิกมนุสฺโส อุปาหนา โอมุญฺจิตฺวา ปาทมูเล ภูมิยํ
ฐเปตฺวา เอกสฺมึ ผลเก นิปชฺชิ น ตาว นิทฺทายติ ฯ ตทา
สิคาลิยา เทฺว โปตกา ฉาตา วิรวึสุ ฯ อถ เน สา มาตา มา
ตาว สทฺทํ กริตฺถ เอติสฺสา สาลาย เอโก มนุสฺโส อุปาหนา
โอมุญฺจิตฺวา ภูมิยํ ฐเปตฺวา ผลเก นิปนฺโน น ตาว นิทฺทายติ
เอตสฺส นิทฺทายนกาเล เอตา อุปาหนา อาหริตฺวา ตุมฺเห ขาทาเปสฺสามีติ
อตฺตโน ภาสาย อาห ฯ โพธิสตฺโต มนฺตานุภาเวน ตสฺสา ภาสํ
ชานิตฺวา สยนคพฺภา นิกฺขมฺม วาตปานํ วิวริตฺวา โก เอตฺถาติ
อาห ฯ อิตโร อหํ เทว อทฺธิกมนุสฺโสติ ฯ อุปาหนา เต
กหนฺติ ฯ ภูมิยํ เทวาติ ฯ อุกฺขิปิตฺวา โอลมฺพิตฺวา ฐเปหีติ ฯ
ตํ สุตฺวา สิคาลี โพธิสตฺตสฺส กุชฺฌิ ฯ ปุเนกทิวสํ สา ตเถว
นครํ ปาวิสิ ฯ ตทา เอโก มนุสฺโส ปานียํ ปิวิสฺสามีติ โปกฺขรณึ
โอตรนฺโต ปติโต นิมุคฺโค นิรุสฺสาโส มริ ฯ นิวตฺถา ปนสฺส
เทฺว สาฏกา นิวาสนนฺตเร กหาปณสหสฺสํ องฺคุลิยา จ มุทฺทิกา
อตฺถิ ฯ ตทาปิ สา ปุตฺตเก ฉาตมฺหา อมฺมาติ วิรวนฺเต ตาตา
มา สทฺทํ กริตฺถ เอติสฺสา โปกฺขรณิยา มนุสฺโส มโต ตสฺส
อิทญฺจิทญฺจ อตฺถิ โส ปน มริตฺวา โสปาเนเยว นิปนฺโน
ตุมฺเห เอตํ มนุสฺสํ ขาทาเปสฺสามีติ อาห ฯ โพธิสตฺโต ตํ สุตฺวา
วาตปานํ วิวริตฺวา สาลาย โก อตฺถีติ วตฺวา เอเกนุฏฺฐาย อหํ
เทวาติ วุตฺเต คจฺฉ เอติสฺสา โปกฺขรณิยา มตปุริสสฺส สาฏเก
จ กหาปณสหสฺสญฺจ องฺคุลิมุทฺทิกญฺจ คเหตฺวา สรีรมสฺส ยถา
น อุฏฺฐาติ เอวํ อุทเก โอสีทาเปหีติ อาห ฯ โส ตถา อกาสิ ฯ
สา ปุน กุชฺฌิตฺวา ปุริมทิวเส เม ปุตฺตกานํ อุปาหนานิ ขาทิตุํ
นาทาสิ อชฺช มตมนุสฺสํ ขาทิตุํ น เทติ โหตุ อิโต ทานิ
ตติยทิวเส เอโก สามนฺตราชา อาคนฺตฺวา นครํ ปริกฺขิปิสฺสติ
อถ นํ ปิตา ยุทฺธตฺถาย เปเสสฺสติ ตตฺร เต สีสํ ฉินฺทิสฺสติ
อถ เต คลโลหิตํ ปิวิตฺวา เวรํ มุญฺจิสฺสามิ ตฺวํ มยา สทฺธึ
เวรํ พนฺธสิ ชานิสฺสามีติ วิรวิตฺวา โพธิสตฺตํ ตชฺเชตฺวา ปุตฺตเก
คเหตฺวา นิกฺขมิ ฯ ตติยทิวเส สามนฺตราชา อาคนฺตฺวา นครํ
ปริวาเรสิ ฯ ราชา โพธิสตฺตํ คจฺฉ ตาต เอเตน สทฺธึ ยุชฺฌาหีติ
อาห ฯ มยา เทว เอกํ ทิฏฺฐํ อตฺถิ คนฺตุํ น วิสหามิ
ชีวิตนฺตรายา ภายามีติ  ฯ มยฺหํ ตยิ มเต วา อมเต วา กึ
คจฺเฉว ตฺวนฺติ ฯ โส สาธุ เทวาติ มหาสตฺโต ปริสํ คเหตฺวา
สามนฺตรญฺโญ ฐิตทฺวาเรน อนิกฺขมิตฺวา อญฺญํ ทฺวารํ วิวราเปตฺวา
นิกฺขมิ ฯ ตสฺมึ คจฺฉนฺเต สกลนครํ ตุจฺฉํ วิย อโหสิ ฯ สพฺเพ
เตเนว สทฺธึ นิกฺขมึสุ ฯ โส เอกสฺมึ สภาคฏฺฐาเน ขนฺธวารํ
นิวาสาเปตฺวา อจฺฉิ ฯ ราชา จินฺเตสิ อุปราชา นครํ ตุจฺฉํ กตฺวา
พลํ คเหตฺวา ปลายิ สามนฺตราชาปิ นครํ ปริวาเรตฺวา ฐิโต
อิทานิ มยฺหํ ชีวิตํ นตฺถิ ฯ โส ชีวิตํ รกฺขิสฺสามีติ เทวิญฺจ
ปุโรหิตญฺจ ปรนฺตปนฺนาม เอกํ ปาทมูลิกํ คเหตฺวา รตฺติภาเค
อญฺญาตกเวเสน ปลายิตฺวา อรญฺญํ ปาวิสิ ฯ โพธิสตฺโต ตสฺส
ปลายนภาวํ สุตฺวา นครํ ปวิสิตฺวา ยุทฺธํ กตฺวา สามนฺตราชานํ
ปลาเปตฺวา รชฺชํ คณฺหิ ฯ ปิตาปิสฺส เอกสฺมึ นทีตีเร ปณฺณสาลํ
กาเรตฺวา ผลาผเลน ยาเปนฺโต วสิ ฯ ราชา จ ปุโรหิโต จ
ผลาผลตฺถาย คจฺฉนฺติ ฯ ปรนฺตปทาโส รญฺโญ เทวิยา สทฺธึ
ปณฺณสาลายเมว โหติ ฯ ตตฺราปิ ราชานํ ปฏิจฺจ เทวิยา กุจฺฉิสฺมึ
คพฺโภ ปติฏฺฐหิ ฯ สา อภิณฺหสํสคฺควเสน ปรนฺตเปน สทฺธึ
อติจริ ฯ สา เอกทิวสํ ปรนฺตปํ อาห รญฺญา ญาเต เนว ตว
น มยฺหํ ชีวิตํ อตฺถิ ตสฺมา มาเรหิ นนฺติ ฯ กถํ มาเรมีติ ฯ
เอส ตํ ขคฺคญฺจ นหานสาฏกญฺจ คาหาเปตฺวา นหายิตุํ คจฺฉติ
ตตฺรสฺส นหานฏฺฐาเน ปมาทํ โอโลเกตฺวา ขคฺเคน สีสํ ฉินฺทิตฺวา
สรีรํ ขณฺฑาขณฺฑิกํ กตฺวา ภูมิยํ นิกฺขนาหีติ ฯ โส สาธูติ
สมฺปฏิจฺฉิ ฯ อเถกทิวสํ ปุโรหิโตเยว ผลาผลตฺถาย คนฺตฺวา อวิทูเร
รญฺโญ นหานติตฺถสามนฺเต เอกํ รุกฺขํ อารุยฺห ผลาผลํ คณฺหาติ ฯ
ราชา นหายิสฺสามีติ ปรนฺตปํ ขคฺคญฺจ นหานสาฏกญฺจ คาหาเปตฺวา
นทีตีรํ อคมาสิ ฯ ตตฺราปิ นหานกาเล ปมาทมาปนฺนํ มาเรสฺสามีติ
ปรนฺตโป ตํ คีวายํ คเหตฺวา ขคฺคํ อุกฺขิปิ ฯ โส มรณภเยน
วิรวิ ฯ ปุโรหิโต ตํ สทฺทํ สุตฺวา โอโลเกนฺโต ปรนฺตปํ ราชานํ
มาเรนฺตํ ทิสฺวา ภีตตสิโต สาขํ วิสฺสชฺเชตฺวา รุกฺขโต โอรุยฺห
เอกํ คุมฺพํ ปวิสิตฺวา นิสีทิ ฯ ปรนฺตโป ตสฺส สาขาวิสฺสชฺชนสทฺทํ
สุตฺวา ราชานํ มาเรตฺวา ภูมิยํ นิกฺขนิตฺวา อิมสฺมึ ฐาเน สาขา-
วิสฺสชฺชนสทฺโท อโหสิ โก นุ โข เอตฺถาติ วิจินนฺโต กิญฺจิ
อทิสฺวา นหาตฺวา คโต ฯ ตสฺส คตกาเล ปุโรหิโต นิสินฺนฏฺฐาเน
นิกฺขมิตฺวา รญฺโญ สรีรํ ขณฺฑาขณฺฑิกํ ฉินฺทิตฺวา อาวาเฏ
นิกฺขาตภาวํ ญตฺวา นหาตฺวา อตฺตโน วธภเยน อนฺธเวสํ คเหตฺวา
ปณฺณสาลํ อคมาสิ ฯ ตํ ทิสฺวา ปรนฺตโป กึ เต พฺราหฺมณ
กตนฺติ อาห ฯ โส อชานนฺโต วิย เทว เทฺว อกฺขีนิ นาเสตฺวา
อาคโตมฺหิ อุสฺสนฺนาสีวิเส อรญฺเญ เอกสฺมึ วมฺมิกปสฺเส อฏฺฐาสึ
ตตฺเรเกน อาสีวิเสน นาสาวาโต วิสฺสฏฺโฐ ภวิสฺสตีติ ฯ ปรนฺตโป
น มํ สญฺชานาติ เทวาติ วทติ สมสฺสาเสสฺสามิ นนฺติ พฺราหฺมณ
มา จินฺตยิ อหํ ตํ ปฏิชคฺคิสฺสามีติ อสฺสาเสตฺวา ผลาผลํ ทตฺวา
สนฺตปฺเปสิ ฯ ตโต ปฏฺฐาย ปรนฺตปทาโส ผลาผลํ อาหรติ ฯ
เทวี ปุตฺตํ วิชายิ ฯ สา ปุตฺเต วฑฺฒนฺเต เอกทิวสํ ปจฺจูสสมเย
สุขํ นิปนฺนา สณิกํ ปรนฺตปทาสํ อโวจ ตฺวํ ราชานํ มาเรนฺโต
น เกนจิ ทิฏฺโฐติ ฯ น มํ โกจิ อทฺทส อปิจ สาขาวิสฺสฏฺฐสทฺทํ
ปน อสฺโสสึ ตสฺสา สาขาย มนุสฺเสน วา ติรจฺฉาเนน วา
วิสฺสฏฺฐภาวํ น ชานามิ ยทา กทาจิ ปน มยฺหํ ภยํ อาคจฺฉติ
เยน สาขา วิสฺสฏฺฐา ตโต อาคมิสฺสตีติ ตาย สทฺธึ สลฺลปนฺโต
ปฐมํ คาถมาห
        อาคมิสฺสติ เม ปาปํ      อาคมิสฺสติ เม ภยํ
        ตทา หิ จลิตา สาขา     มนุสฺเสน มิเคน วาติ ฯ
     ตตฺถ ปาปนฺติ ลามกํ อนิฏฺฐํ อกนฺตํ ฯ ภยนฺติ จิตฺตุตฺราสภยํปิ
เม อาคมิสฺสติ น สกฺกา อนาคนฺตุํ ฯ กึการณา ฯ ตทา หิ
จลิตา สาขา ปน มนุสฺเสน มิเคน วาติ น ปญฺญายติ ตสฺมา
ตโต มํ ภยํ อาคมิสฺสเตว ฯ
     เต ปุโรหิโต นิทฺทายตีติ มญฺญึสุ ฯ โส ปน อนิทฺทายนฺโตว
เตสํ กถํ อสฺโสสิ ฯ อเถกทิวสํ ปุโรหิโต ปรนฺตปทาเส ผลาผลตฺถาย
คเต อตฺตโน พฺราหฺมณึ สริตฺวา วิลปนฺโต วิย ทุติยคาถมาห
         ภีรุยา นูน เม กาโม      อวิทูเร วสนฺติยา
         กริสฺสติ กิสํ ปณฺฑุํ         สาว สาขา ปรนฺตปนฺติ ฯ
     ตตฺถ ภีรุยาติ อิตฺถี นาม อปฺปมตฺตเกนปิ ภายนฺติ ตสฺมา
ภีรูติ วุจฺจติ ฯ อวิทูเรติ นาติทูเร อิโต กติปยโยชนมตฺถเก
วสนฺติยา ภีรุยา มยฺหํ พฺราหฺมณิยา มม กาโม อุปฺปนฺโน ฯ
สา นูน มํ กิสญฺจ ปณฺฑุญฺจ กริสฺสตีติ ทสฺเสติ ฯ สาว
สาขาติ อิมินา ปน อุปมํ ทสฺเสนฺโต ยถา สาขา ปรนฺตปํ กิสํ
ปณฺฑุํ กโรติ เอวนฺติ อตฺโถ ฯ อิติ พฺราหฺมโณ คาถเมว วทติ ฯ
อตฺถํ ปน น กเถสิ ฯ ตสฺมา อิมาย คาถาย กิจฺจํ เทวิยา
อปากฏํ ฯ
     อถ นํ กึ กเถสิ พฺราหฺมณาติ อาห ฯ โสปิ สลฺลกฺขิต-
เมวาติ วตฺวา ปุเนกทิวสํ ตติยํ คาถมาห
         โสจยิสฺสติ มํ กนฺตา       คาเม วสํ อนินฺทิตา
         กริสฺสติ กิสํ ปณฺฑุํ         สาว สาขา ปรนฺตปนฺติ ฯ
     ตตฺถ โสจยิสฺสตีติ โสกุปฺปาทเนน สุกฺขาเปสฺสติ ฯ กนฺตาติ
อิฏฺฐภริยา ฯ คาเม วสนฺติ พาราณสิยํ วสนฺตีติ อธิปฺปาโย ฯ
อนินฺทิตาติ อครหิตา อุตฺตมรูปธรา ฯ
     ปุเนกทิวสํ จตุตฺถํ คาถมาห
          ตยา มํ หสิตาปงฺคี       มิหิตานิ ภณิตานิ จ
          กิสํ ปณฺฑุํ กริสฺสติ        สาว สาขา ปรนฺตปนฺติ ฯ
     ตตฺถ ตยา มํ หสิตาปงฺคีติ ตยา มํ หิ อสิตอปงฺคี ฯ อิทํ
วุตฺตํ โหติ ภทฺเท อกฺขิโกฏิโต อญฺชนสลากาย นีหริตฺวา อภิสงฺขต-
อสิตาปงฺคี ตยา ปวตฺติตานิ มนฺทหสิตานิ จ มธุรภาณิตานิ จ
มยา วิสฺสฏฺฐสาขา วิจรมานา ปรนฺตปํ วิย กิสํ ปณฺฑุํ กริสฺสตีติ ฯ
จการํ ปการํ กตฺวา ปงฺคีติปิ ปาโฐเยว ฯ
     อปรภาเค กุมาโร วยปฺปตฺโต อโหสิ โสฬสวสฺสุทฺเทสิโก ฯ
อถ นํ พฺราหฺมโณ ยฏฺฐิโกฏึ คาหาเปตฺวา นหานติตฺถํ คนฺตฺวา
อกฺขีนิ อุมฺมีเลตฺวา โอโลเกสิ ฯ กุมาโร นนุ ตฺวํ พฺราหฺมณ
อนฺโธติ อาห ฯ โส นาหํ อนฺโธ อิมินา ปนุปาเยน ชีวิตํ
รกฺขามีติ วตฺวา ตว ปิตรํ ชานาสีติ อาห ฯ อาม ชานามิ อยํ
โส มยฺหํ ปิตาติ วุตฺเต นายํ ตว ปิตา ปิตา ปน เต พาราณสีราชา
อยํ ตุมฺหากํ ทาโส โส มาตริ เต วิปฺปฏิปชฺชิตฺวา อิมสฺมึ
ฐาเน ตว ปิตรํ มาเรตฺวา นิกฺขนีติ อฏฺฐีนิ นีหริตฺวา ทสฺเสสิ ฯ
กุมารสฺส พลวโกโธ อุปฺปชฺชิ ฯ อถ นํ อิทานิ กึ กโรมีติ
วุตฺเต ยนฺเต อิมสฺมึเยว ติตฺเถ ปิตุ เตน กตํ ตํ กโรหีติ
สพฺพํ ปวตฺตึ อาจิกฺขิตฺวา กุมารํ กติปาหํ ถรุคหณํ สิกฺขาเปสิ ฯ
อเถกทิวสํ กุมาโร ขคฺคญฺจ นหานสาฏกญฺจ คเหตฺวา นหายิตุํ
คจฺฉาม ตาตาติ อาห ฯ ปรนฺตโป สาธูติ เตน สทฺธึ คโต ฯ
อถสฺส นหายิตุํ โอติณฺณกาเล ทกฺขิณหตฺเถน อสึ วามหตฺเถน
จูฬํ คเหตฺวา ตฺวํ กิร อิมสฺมิญฺเญว ติตฺเถ มม ปิตรํ จูฬาย
คเหตฺวา วิรวนฺตํ มาเรสิ อหํปิ ตํ ตเถว กริสฺสามีติ อาห ฯ
โส มรณภยภีโต ปริเทวมาโน เทฺว คาถา อภาสิ
      อคมา นูน โส สทฺโท      อสํสิ นูน โส ตว
      อกฺขาตํ นูน ตํ เตน       โย ตํ สาขมกมฺปยิ ฯ
      อิทํ โข ตํ สมาคมฺม       มม พาลสฺส จินฺติตํ
      ตทา หิ จลิตา สาขา      มนุสฺเสน มิเคน วาติ ฯ
     ตตฺถ อคมาติ โส สาขาย สทฺโท นูน ตํ อาคโต สมฺปตฺโต ฯ
อสํสิ นูน โส ตวาติ โส สทฺโท ตว อาโรเจสิ มญฺเญ ฯ
อกฺขาตํ นูน ตํ เตนาติ โย สตฺโต ตทา ตํ สาขํ อกมฺปยิ
เตน เอวํ เต ปิตา มาริโตติ นูน ตํ การณํ อกฺขาตํ ฯ
สมาคมฺมาติ สงฺคมฺม สมาคตนฺติ อตฺโถ ฯ ยํ มม พาลสฺส ตทา
จลิตา สาขา มนุสฺเสน มิเคน วาติ ตโต เม ภยํ อุปฺปชฺชิสฺสตีติ
จิตฺติกํ ปริวิตกฺกิตํ อโหสิ อิทํ มยา สทฺธึ สมาคตนฺติ วุตฺตํ โหติ ฯ
     ตโต กุมาโร โอสานคาถมาห
       ตเถว ตฺวํ อเวทสิ        อวญฺจิ ปิตรํ มม
       คนฺตฺวา สาขาหิ ฉาเทนฺโต  อาคมิสฺสติ เต ภยนฺติ ฯ
     ตตฺถ ตเถว ตฺวํ อเวทสีติ ตเถว ตฺวํ อญฺญาสิ ฯ อวญฺจิ
ปิตรํ มมาติ ตฺวํ หิ มม ปิตรํ นหายิตุํ คจฺฉามาติ วิสฺสาเสตฺวา
นหายนฺตํ มาเรตฺวา ขณฺฑาขณฺฑิกํ ฉินฺทิตฺวา นิกฺขนิตฺวา สเจ
โกจิ ชานิสฺสติ มยฺหํปิ เอวรูปํ ภยํ อาคมิสฺสตีติ วญฺเจสิ อิทํ
โข ปน มรณภยํ อิทานิ ตวาคตนฺติ ฯ
     อิติ วตฺวา นํ ตตฺเถว ชีวิตกฺขยํ ปาเปตฺวา นิกฺขนิตฺวา
สาขาย ปฏิจฺฉาเทตฺวา ขคฺคํ โธวิตฺวา นหาตฺวา ปณฺณสาลํ คนฺตฺวา
มาริตภาวํ ปุโรหิตสฺส กเถตฺวา มาตรํ ปริภาสิ ฯ อิธ กึ กริสฺสามาติ
ตโยปิ ชนา พาราณสิเมว อคมํสุ ฯ โพธิสตฺโต กนิฏฺฐสฺส อุปรชฺชํ
ทตฺวา ทานาทีนิ ปุญฺญานิ กตฺวา สคฺคปทํ ปูเรสิ ฯ
     สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา
ชาตกํ สโมธาเนสิ ตทา ปิตาราชา เทวทตฺโต อโหสิ ปุโรหิโต
อานนฺโท ปุตฺตราชา ปน อหเมวาติ ฯ
                  ปรนฺตปชาตกํ เอกาทสมํ ฯ
                   คนฺธารวคฺโค ทุติโย ฯ
                 สตฺตกนิปาตวณฺณนา นิฏฺฐิตา ฯ
                    ---------------
@เชิงอรรถ:
@*** หน้านี้ไม่มีข้อมูล ***


             อรรถกถาภาษาบาลีอักษรไทย เล่มที่ ๓๙ หน้า ๒๕๑-๒๖๐. http://84000.org/tipitaka/atthapali/read_th.php?B=39&A=5044&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=39&A=5044&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=27&i=1114              เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=4763              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=4803              The Pali Tipitaka in Roman Character :- http://84000.org/tipitaka/read/roman_read.php?B=27&A=4803              สารบัญพระไตรปิฎกเล่มที่ ๒๗ http://84000.org/tipitaka/read/?index_27

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]