อรรถกถาเล่มที่ ๓๙ ภาษาบาลีอักษรไทย
 ชา.อ.๕ ฉกฺก-ทสกนิปาต

                      เจติยราชชาตกํ
     ธมฺโม หเว หโต หนฺตีติ อิทํ สตฺถา  เชตวเน วิหรนฺโต
เทวทตฺตสฺส ปฐวิปฺปเวสนํ อารพฺภ กเถสิ ฯ
     ตสฺมึ หิ ทิวเส ภิกฺขู ธมฺมสภายํ กถํ สมุฏฺฐาเปสุํ อาวุโส
เทวทตฺโต มุสาวาทํ กตฺวา ปฐวึ ปวิฏฺโฐ อวีจิปรายโน ชาโตติ ฯ
สตฺถา อาคนฺตฺวา กาย นุตฺถ ภิกฺขเว เอตรหิ กถาย สนฺนิสินฺนาติ
ปุจฺฉิตฺวา อิมาย นามาติ วุตฺเต น ภิกฺขเว อิทาเนว ปุพฺเพปิ
เทวทตฺโต มุสาวาทํ กตฺวา ปฐวึ ปวิฏฺโฐเยวาติ วตฺวา อตีตํ
อาหริ
     อตีเต ปฐมกปฺเป มหาสมฺมโต นาม ราชา อสงฺเขยฺยายุโก
อโหสิ ฯ ตสฺส ปุตฺโต โรโช นาม โรชสฺส ปุตฺโต วรโรโช
นาม ตสฺส ปุตฺโต กลฺยาโณ นาม กลฺยาณสฺส ปุตฺโต
วรกลฺยาโณ นาม วรกลฺยาณสฺส ปุตฺโต อุโปสโถ นาม อุโปสถสฺส
ปุตฺโต วรอุโปสโถ นาม วรอุโปสถสฺส ปุตฺโต มนฺธาตา
นาม มนฺธาตุสฺส ปุตฺโต วรมนฺธาตา นาม วรมนฺธาตุสฺส ปุตฺโต
วโร นาม วรสฺส ปุตฺโต อุปวโร นาม อุปริจโรติปิ ตสฺเสว
---------------------------------------------------------------------------------------------
หน้าที่ ๓๐๓.
  นามํ ฯ โส เจติยรฏฺเฐ โสตฺถิยนคเร รชฺชํ กาเรสิ จตูหิ
อิทฺธีหิ สมนฺนาคโต อโหสิ อุปริจโร โหติ อากาสคามี จตฺตาโร
เทวปุตฺตา จตูสุปิ ทิสาสุ ขคฺคหตฺถา รกฺขนฺติ กายโต จนฺทนคนฺโธ
วายติ มุขโต อุปฺปลคนฺโธ ฯ ตสฺส กปิโล นาม พฺราหฺมโณ
ปุโรหิโต อโหสิ ฯ กปิลพฺราหฺมณสฺส ปน กนิฏฺโฐ โกรกลมฺพโก
นาม รญฺญา สทฺธึ เอกาจริยกุเล อุคฺคหิตสิปฺโป พาลสหาโย ฯ
ตสฺส กุมารกาเลเยว อหํ รชฺชํ ปตฺวา ตุยฺหํ ปุโรหิตฏฺฐานํ
ทสฺสามีติ ปฏิชานิ ฯ โส รชฺชํ ปตฺวา ปิตุ ปุโรหิตํ กปิลพฺราหฺมณํ
ปุโรหิตฏฺฐานโต จาเวตุํ นาสกฺขิ ฯ ปุโรหิเต ปน อตฺตโน อุปฏฺฐานํ
อาคจฺฉนฺเต ตสฺมึ คารเวน อปจิตาการํ ทสฺเสติ ฯ พฺราหฺมโณ ตํ
สลฺลกฺเขตฺวา รชฺชํ นาม สมวเยหิ สทฺธึ สุปริหารํ โหติ อหํ
ราชานํ อาปุจฺฉิตฺวา ปพฺพชิสฺสามีติ จินฺเตตฺวา เทว อหํ มหลฺลโก
เคเห กุมาโร อตฺถิ ตํ ปุโรหิตํ กโรหิ อหํ ปพฺพชิสฺสามีติ
ราชานํ อนุชานาเปตฺวา ปุตฺตํ ปุโรหิตฏฺฐาเน ฐเปตฺวา ราชุยฺยานํ
ปวิสิตฺวา อิสิปพฺพชฺชํ ปพฺพชิตฺวา ฌานาภิญฺญา นิพฺพตฺเตตฺวา ปุตฺตํ
อุปนิสฺสาย ตตฺเถว วาสํ กปฺเปสิ ฯ โกรกลมฺพโก อยํ ปพฺพชนฺโตปิ
มยฺหํ ฐานนฺตรํ น ทาเปสีติ ภาตริ อาฆาตํ พนฺธิตฺวา เอกทิวสํ
สุขกถาย สมเย รญฺญา โกรกลมฺพก ตฺวํ ปุโรหิตฏฺฐานํ น กโรสีติ
วุตฺเต อาม เทว น กโรมิ ภาตา เม กโรตีติ อาห ฯ นนุ เต
ภาตา ปพฺพชิโตติ ฯ อาม ปพฺพชิโต ฐานนฺตรํ ปน ปุตฺตสฺส ทาเปสีติ ฯ
เตนหิ ตฺวํ กาเรหิ ฯ เทว ปเวณิยา อาคตฐานนฺตรา ภาตรํ
---------------------------------------------------------------------------------------------
หน้าที่ ๓๐๔.
อปเนตฺวา น สกฺกา มยา กาเรตุนฺติ ฯ เอวํ สนฺเต อหํ ตํ
มหลฺลกํ กตฺวา ภาตรนฺเต กนิฏฺฐํ กริสฺสามีติ ฯ กถํ เทวาติ ฯ
มุสาวาทํ กตฺวาติ ฯ กึ เทว น ชานาถ ยทา มม ภาตา มหนฺเตน
อพฺภูตธมฺเมน สมนฺนาคโต วิชฺชาธโร โส อภูเตน ตุมฺเห วญฺเจสฺสติ
จตฺตาโร เทวปุตฺเต อนฺตรหิเต วิย กริสฺสติ กายโต จ มุขโต
จ สุคนฺธํ ทุคฺคนฺธํ วิย กริสฺสติ ตุมฺเห อากาสา โอตาเรตฺวา
ภูมิยํ ฐิเต วิย กริสฺสติ ตุมฺเห ปฐวิยํ ปวิสนฺตา วิย ภวิสฺสถ
ตทา ตุมฺเห กถาย ปติฏฺฐาตุํ นาสกฺขิสฺสถาติ ฯ ตฺวํ เอวํ สญฺญํ
มา กริ อหํ กาตุํ สกฺขิสฺสามีติ ฯ กทา กริสฺสถ เทวาติ ฯ
อิโต สตฺตเม ทิวเสติ ฯ สา กถา สกลนคเร ปากฏา อโหสิ ฯ
ราชา กิร มุสาวาทํ กตฺวา ขุทฺทกํ มหลฺลกํ กริสฺสติ ฐานนฺตรํ
ขุทฺทกสฺส ทาเปสฺสติ กีทิโส นุ โข มุสาวาโท นาม กึ นีลโก
อุทาหุ ปีตกาทีสุ อญฺญตรวณฺโณติ เอวํ มหาชนสฺส ปริวิตกฺโก
อุทปาทิ ฯ ตทา กิร โลกสฺส สจฺจวาทิกาเล มุสาวาโท นาม
เอวรูโปติ น ชานนฺติ ฯ ปุโรหิตปุตฺโตปิ ตํ กถํ สุตฺวา คนฺตฺวา
ปิตุ กเถสิ ตาต ราชา กิร มุสาวาทํ กตฺวา ตุมฺเห ขุทฺทเก
กตฺวา อมฺหากํ ฐานนฺตรํ มม จุลฺลปิตุสฺส ทสฺสตีติ ฯ ตาต ราชา
มุสาวาทํ กตฺวาปิ อมฺหากํ ฐานนฺตรํ ตสฺส ทาตุํ น สกฺขิสฺสติ
กตรทิวเส ปน กริสฺสตีติ ฯ อิโต กิร สตฺตเม ทิวเสติ ฯ เตนหิ
ตทา มยฺหํ อาโรเจยฺยาสีติ ฯ สตฺตเม ทิวเส มหาชนา มุสาวาทํ
ปสฺสิสฺสามาติ ราชงฺคเณ สนฺนิปติตฺวา มญฺจาติมญฺเจ พนฺธิตฺวา
---------------------------------------------------------------------------------------------
หน้าที่ ๓๐๕.
อฏฺฐํสุ ฯ กุมาโร คนฺตฺวา ปิตุ อาโรเจสิ ฯ ราชา อลงฺกตปฏิยตฺโต
นิกฺขมิตฺวา มหาชนสฺส มชฺเฌ ราชงฺคเณ อากาเส อฏฺฐาสิ ฯ
ตาปโส อากาเสนาคนฺตฺวา รญฺโญ ปุรโต นิสีทนจมฺมํ อตฺถริตฺวา
อากาเส ปลฺลงฺเกน นิสีทิตฺวา สจฺจํ กิร ตฺวํ มหาราช มุสาวาทํ
กตฺวา ขุทฺทกํ มหลฺลกํ กตฺวา ตสฺส ฐานนฺตรํ ทาตุกาโมสีติ ฯ
อาม อาจริย เอวํ เม กถิตนฺติ ฯ อถ นํ โส โอวทนฺโต
มหาราช มุสาวาโท นาม ภาริโย คุณปริธํสโก จตูสุ อปาเยสุ
นิพฺพตฺตาเปติ ราชา นาม มุสาวาทํ กโรนฺโต ธมฺมํ หนติ โส
ธมฺมํ หนิตฺวา สยเมว หญฺญตีติ วตฺวา ปฐมํ คาถมาห
        ธมฺโม หเว หโต หนฺติ  นาหโต หนฺติ กิญฺจินํ
        ตสฺมา หิ ธมฺมํ น หเน  มา ตํ ธมฺโม หโต หนีติ ฯ
     ตตฺถ ธมฺโมติ เชฏฺฐาปจายนธมฺโม อธิปฺเปโต ฯ
     อถ นํ อุตฺตรึปิ โอวทนฺโต สเจ มหาราช มุสาวาทํ กริสฺสสิ
จตสฺโส เต อิทฺธิโย อนฺตรธายิสฺสนฺตีติ วตฺวา ทุติยํ คาถมาห
        อลิกํ ภาสมานสฺส      อปกฺกมนฺติ เทวตา
        ปูติกญฺจ มุขํ วาติ      สกฏฺฐานาว ธํสติ
        โย ชานํ ปุจฺฉิโต ปญฺหํ  อญฺญถา นํ วิยากเรติ ฯ
     ตตฺถ อปกฺกมนฺติ เทวตาติ มหาราช สเจ อลิกํ ภณิสฺสสิ
จตฺตาโร เทวปุตฺตา อารกฺขํ ฉฑฺเฑตฺวา อนฺตรธายิสฺสนฺตีติ
อธิปฺปาเยเนตํ วทติ ฯ ปูติกญฺจ มุขํ วาตีติ มุขญฺจ เต กาโย จ อุโภ
---------------------------------------------------------------------------------------------
หน้าที่ ๓๐๖.
ปูติคนฺธํ วายิสฺสตีติ ตํ สนฺธายาห ฯ สกฏฺฐานาว ธํสตีติ อากาสโต
ภสฺสิตฺวา ปฐวึ ปวิสตีติ ทีเปนฺโต เอวมาห ฯ
     ตํ สุตฺวา ราชา ภีโต โกรกลมฺพกํ โอโลเกสิ ฯ อถ นํ
โส มา ภายิ มหาราช นนุ มยา ปฐมเมว ตุมฺหากํ เอตํ
กถิตนฺติ อาห ฯ ราชา กปิลสฺส วจนํ สุตฺวา อตฺตโน กถิตเมว
ปุรโต กโรนฺโต ตฺวํสิ ภนฺเต กนิฏฺโฐ เชฏฺโฐ โกรกลมฺพโกติ
อาห ฯ อถสฺส สห มุสาวาเทน จตฺตาโร เทวปุตฺตา ตาทิสสฺส
มุสาวาทิโน อารกฺขํ น คณฺหิสฺสามาติ ขคฺเค ปาทมูเล ฉฑฺเฑตฺวา
อนฺตรธายึสุ ฯ มุขํ ภินฺนกุกฺกุฏณฺฑํ วิย กาโย วิวฏวจฺจกุฏิ
วิย ทุคฺคนฺธํ วายิ ฯ อากาสโต ภสฺสิตฺวา ปฐวิยํ ปติฏฺฐหติ
จตสฺโสปิ อิทฺธิโย ปริหายึสุ ฯ อถ นํ จ มหาปุโรหิโต มา ภายิ
มหาราช สเจ สจฺจํ ภณิสฺสสิ สพฺพนฺเต ปฏิปากติกํ กริสฺสามีติ
วตฺวา ตติยํ คาถมาห
        สเจ หิ สจฺจํ ภณสิ      โหหิ ราช ยถา ปุเร
        มุสา เจ ภาสเส ราช   ภูมิยํ ติฏฺฐ เจติยาติ ฯ
     ตตฺถ ภูมิยํ ติฏฺฐาติ ภูมิยํ เทว ปติฏฺฐ ปุน อากาสํ ลงฺฆิตุํ
น สกฺขิสฺสสีติ อตฺโถ ฯ
     โส ปสฺส มหาราช ปฐมํ มุสาวาเทเนว เต จตสฺโส อิทฺธิโย
อนฺตรหิตา สลฺลกฺเขหิ อิทานิปิ สกฺกา ปฏิปากติกํ กาตุนฺติ
วุตฺเตปิ เอวํ วตฺวา ตุมฺเห วญฺเจตุกาโมติ ทุติยมฺปิ มุสาวาทํ
ภณิตฺวา ยาว โคปฺผกา ปฐวึ ปาวิสิ ฯ อถ นํ ปุนปิ พฺราหฺมโณ
---------------------------------------------------------------------------------------------
หน้าที่ ๓๐๗.
สลฺลกฺเขหิ อิทานิปิ สกฺกา ปากติกํ กาตุํ มหาราชาติ วตฺวา
จตุตฺถํ คาถมาห
        อกาเล วสฺสตี ตสฺส     กาเล ตสฺส น วสฺสติ
        โย ชานํ ปุจฺฉิโต ปญฺหํ   อญฺญถา นํ วิยากเรติ ฯ
     ตตฺถ ตสฺสาติ โย ชานนฺโต ปุจฺฉิตํ ปญฺหํ มุสาวาทํ กตฺวา
อญฺญถา พฺยากโรติ ตสฺส รญฺโญ วิชิเต เทโว ยุตฺตกาเล อวสฺสิตฺวา
อกาเล วสฺสตีติ อตฺโถ ฯ
     อถ นํ ปุนปิ มุสาวาทผเลน ยาว ชงฺฆา ปฐวึ ปวิฏฺโฐติ
สลฺลกฺเขหิ มหาราชาติ วตฺวา ปญฺจมํ คาถมาห
        สเจ หิ สจฺจํ ภณสิ      โหหิ ราช ยถา ปุเร
        มุสา เจ ภาสเส ราช   ภูมึ ปวิส เจติยาติ ฯ
โส ตติยมฺปิ ตฺวํสิ ภนฺเต กนิฏฺโฐ เชฏฺโฐ โกรกลมฺพโกติ
มุสาวาทเมว กตฺวา ยาว ชณฺณุกา ปฐวึ ปาวิสิ ฯ อถ นํ ปุนปิ
สลฺลกฺเขหิ มหาราชาติ วตฺวา เทฺว คาถา อภาสิ
        ชิวฺหา ตสฺส ทฺวิธา โหติ  อุรคสฺเสว ทิสมฺปติ
        โย ชานํ ปุจฺฉิโต ปญฺหํ   อญฺญถา นํ วิยากเร ฯ
        สเจ หิ สจฺจํ ภณสิ      โหหิ ราช ยถา ปุเร
        มุสา เจ ภาสเส ราช   ภิยฺโย ปวิส เจติยาติ ฯ
อิมา เทฺว คาถา วตฺวา อิทานิปิ สกฺกา ปฏิปากติกํ กาตุนฺติ
อาห ฯ ราชา ตสฺส วจนํ อนาทิยนฺโต ตฺวํสิ ภนฺเต กนิฏฺโฐ
เชฏฺโฐ โกรกลมฺพโกติ จตุตฺถํ มุสาวาทํ กตฺวา ยาว กฏิโต ปฐวึ
---------------------------------------------------------------------------------------------
หน้าที่ ๓๐๘.
ปาวิสิ ฯ อถ นํ พฺราหฺมโณ สลฺลกฺเขหิ มหาราชาติ วตฺวา ปุน
เทฺว คาถา อภาสิ
        ชิวฺหา ตสฺส น ภวติ     มจฺฉสฺเสว ทิสมฺปติ
        โย ชานํ ปุจฺฉิโต ปญฺหํ   อญฺญถา นํ วิยากเร ฯ
        สเจ หิ สจฺจํ ภณสิ      โหหิ ราช ยถา ปุเร
        มุสา เจ ภาสเส ราช   ภิยฺโย ปวิส เจติยาติ ฯ
     ตตฺถ มจฺฉสฺเสวาติ นิพฺพตฺตนิพฺพตฺตฏฺฐาเน มุสาวาทิโน มจฺฉสฺส
วิย กถนสมตฺถา ชิวฺหา น โหติ มูโคว โหตีติ อตฺโถ ฯ
     โส ปญฺจมมฺปิ ตฺวํสิ ภนฺเต กนิฏฺโฐ เชฏฺโฐ โกรกลมฺพโกติ
มุสาวาทํ กตฺวา ยาว นาภิโต ปฐวึ ปาวิสิ ฯ อถ นํ พฺราหฺมโณ
ปุนปิ สลฺลกฺเขหิ มหาราชาติ วตฺวา เทฺว คาถา อภาสิ
        ถิโยว ตสฺส ชายนฺติ     น ปุมา ชายเร กุเล
        โย ชานํ ปุจฺฉิโต ปญฺหํ   อญฺญถา นํ วิยากเร ฯ
        สเจ หิ สจฺจํ ภณสิ      โหหิ ราช ยถา ปุเร
        มุสา เจ ภาสเส ราช   ภิยฺโย ปวิส เจติยาติ ฯ
     ตตฺถ ถิโยวาติ นิพฺพตฺตนิพฺพตฺตฏฺฐาเน มุสาวาทิสฺส ธีตโรว
ชายนฺติ ปุตฺตา น ชายนฺตีติ อตฺโถ ฯ
     ราชา อนาทยิตฺวา ฉฏฺฐมฺปิ ตเถว มุสาวาทํ ภณิตฺวา ยาว
ถนา ปฐวึ ปาวิสิ ฯ ปุนปิ พฺราหฺมโณ สลฺลกฺเขหิ มหาราชาติ
วตฺวา เทฺว คาถา อภาสิ
---------------------------------------------------------------------------------------------
หน้าที่ ๓๐๙.
        ปุตฺตา ตสฺส น ภวนฺติ   ปกฺกมนฺติ ทิโสทิสํ
        โย ชานํ ปุจฺฉิโต ปญฺหํ  อญฺญถา นํ วิยากเร ฯ
        สเจ หิ สจฺจํ ภณสิ     โหหิ ราช ยถา ปุเร
        มุสา เจ ภาสเส ราช  ภิยฺโย ปวิส เจติยาติ ฯ
     ตตฺถ ปกฺกมนฺตีติ สเจ มุสาวาทิสฺส ปุตฺตา โหนฺติ มาตาปิตูนํ
อนูปการา หุตฺวา ปลายนฺตีติ อตฺโถ ฯ
     โส ปาปมิตฺตสํสคฺคโทเสน ตสฺส วจนํ อนาทยิตฺวา สตฺตมมฺปิ
ตเถว มุสาวาทํ อกาสิ ฯ อถสฺส ปฐวี วิวรํ อทาสิ ฯ อวีจิโต
ชาลา อุฏฺฐหิตฺวา คณฺหิ ฯ อิมา เทฺว คาถา สมฺพุทฺธคาถา โหนฺติ
        ส ราชา อิสินา สตฺโต  อนฺตลิกฺขจโร ปุเร
        ปาเวกฺขิ ปฐวึ เปจฺโจ  หีนตฺโต อตฺตปริยายํ ฯ
        ตสฺมา หิ ฉนฺทาคมนํ    นปฺปสํสนฺติ ปณฺฑิตา
        อทุฏฺฐจิตฺโต ภาเสยฺย   คิรํ สจฺจูปสญฺหิตนฺติ ฯ
     ตตฺถ ส ราชาติ ภิกฺขเว โส เจติโย ราชา ปุพฺเพ อนฺตลิกฺขจโร
หุตฺวา ปจฺฉา อิสินา อภิสตฺโต ปริหีนสภาโว หุตฺวา อตฺตปริยายํ
อตฺตโน กาลปริยายํ ปตฺวา ปฐวึ ปาวิสีติ อตฺโถ ฯ ตสฺมาติ
ยสฺมา เจติยราชา ฉนฺทาทิคมเนน อวีจิปรายโน ชาโต ตสฺมา ฯ
อทุฏฺฐจิตฺโตติ ฉนฺทาทีหิ อทูสิตจิตฺโต หุตฺวา สจฺจเมว ภาเสยฺยาติ ฯ
     มหาชโน เจติยราชา อิสึ อกฺโกสิตฺวา มุสาวาทํ กตฺวา อวีจึ
ปวิฏฺโฐติ ภยปฺปตฺโต อโหสิ ฯ รญฺโญ ปญฺจ ปุตฺตา อาคนฺตฺวา
พฺราหฺมณสฺส ปาเทสุ ปติตฺวา อมฺหากํ อวสฺสโย โหหีติ วทึสุ ฯ
---------------------------------------------------------------------------------------------
หน้าที่ ๓๑๐.
พฺราหฺมโณ ตาตา ตุมฺหากํ ปิตา ธมฺมํ นาเสตฺวา มุสาวาทํ กตฺวา
อิสึ อกฺโกสิตฺวา อวีจึ ปวิสนฺโต ธมฺโม นาเมส หโต หนติ
ตุมฺเหหิ น สกฺกา อิธ วสิตุนฺติ วตฺวา เตสุ สพฺพเชฏฺฐกํ เอหิ
ตาต ปาจีนทฺวาเรน นิกฺขมิตฺวา อุชุกเมว คจฺฉ คจฺฉนฺโต สพฺพเสตํ
สตฺตปฺปติฏฺฐิตํ หตฺถิรตนํ ปสฺสิสฺสสิ ตาย สญฺญาย ตตฺถ นครํ
มาเปตฺวา วส ตํ นครํ หตฺถิปุรํ นาม ภวิสฺสตีติ อาห ฯ
ทุติยํ อามนฺเตตฺวา ตาต ทกฺขิณทฺวาเรน นิกฺขมิตฺวา อุชุกเมว
คจฺฉ คจฺฉนฺโต สพฺพเสตํ อสฺสรตนํ ปสฺสิสฺสสิ ตาย สญฺญาย
ตตฺถ นครํ มาเปตฺวา วส ตํ นครํ อสฺสปุรํ นาม ภวิสฺสตีติ อาห ฯ
ตติยํ อามนฺเตตฺวา ตาต ปจฺฉิมทฺวาเรน นิกฺขมิตฺวา อุชุกเมว คจฺฉ
คจฺฉนฺโต เกสรสีหํ ปสฺสิสฺสสิ ตาย สญฺญาย ตตฺถ นครํ มาเปตฺวา
วส ตํ นครํ สีหปุรํ นาม ภวิสฺสตีติ อาห ฯ จตุตฺถํ อามนฺเตตฺวา
ตาต อุตฺตรทฺวาเรน นิกฺขมิตฺวา อุชุกเมว คจฺฉ คจฺฉนฺโต สพฺพรตนมยํ
จกฺกปญฺชรํ ปสฺสิสฺสสิ ตาย สญฺญาย ตตฺถ นครํ มาเปตฺวา
วส ตํ นครํ อุตฺตรปญฺชรํ นาม ภวิสฺสตีติ อาห ฯ ปญฺจมํ
อามนฺเตตฺวา ตาต ตยา อิมสฺมึ ฐาเน วสิตุํ น สกฺกา อิมสฺมึ
นคเร มหาถูปํ กตฺวา นิกฺขมิตฺวา ปจฺฉิมุตฺตราย ทิสาย อุชุกเมว
คจฺฉ คจฺฉนฺโต เทฺว ปพฺพเต อญฺญมญฺญํ ปหริตฺวา ททฺธนฺติ
สทฺทํ กโรนฺเต ปสฺสิสฺสสิ ตาย สญฺญาย ตตฺถ นครํ มาเปตฺวา
วส ตํ นครํ ททฺธปุรํ นาม ภวิสฺสตีติ อาห ฯ เต ปญฺจปิ ชนา
ตาย สญฺญาย คนฺตฺวา ตสฺมึ ตสฺมึ ฐาเน นครานิ มาเปตฺวา วสึสุ ฯ
---------------------------------------------------------------------------------------------
หน้าที่ ๓๑๑.
     สตฺถา อิมํ ธมฺมเทสนํ อาหริตฺวา น ภิกฺขเว อิทาเนว
ปุพฺเพปิ เทวทตฺโต มุสาวาทํ กตฺวา ปฐวึ ปวิฏฺโฐติ วตฺวา ชาตกํ
สโมธาเนสิ ตทา เจติยราชา เทวทตฺโต อโหสิ กปิลพฺราหฺมโณ
ปน อหเมวาติ ฯ
                  เจติยราชชาตกํ ฉฏฺฐมํ ฯ

             อรรถกถาภาษาบาลีอักษรไทย เล่มที่ ๓๙ หน้า ๓๐๒-๓๑๑.
http://84000.org/tipitaka/atthapali/read_th.php?B=39&A=6075&modeTY=2&pagebreak=1
             The Pali Atthakatha in Roman :-
http://84000.org/tipitaka/atthapali/read_rm.php?B=39&A=6075&modeTY=2&pagebreak=1
             อ่านอรรถกถาแปลไทย :-
http://84000.org/tipitaka/attha/attha.php?b=27&i=1163
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=27&A=4938
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=27&A=4997
             The Pali Tipitaka in Roman Character :-
http://84000.org/tipitaka/read/roman_read.php?B=27&A=4997
             สารบัญพระไตรปิฎกเล่มที่ ๒๗
http://84000.org/tipitaka/read/?index_27