ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๔ ภาษาบาลีอักษรไทย ที.อ. (สุมงฺคล.๑)

                          ๑๑. เกวฏฺฏสุตฺต
                      เกวฏฺฏคหปติปุตฺตวตฺถุวณฺณนา
      [๔๘๑] เอวมฺเม สุตํ ฯเปฯ นาฬนฺทายนฺติ เกวฏฺฏสุตฺตํ. ตตฺราย-
มนุปุพฺพปทวณฺณนา:- ปาวาริกมฺพวเนติ ปาวาริกสฺส อมฺพวเน. เกวฏฺโฏติ อิทํ
ตสฺส คหปติปุตฺตสฺส นามํ, โส กิร จตฺตาลีสโกฏิมตฺตธโน ๑- คหปติมหาสาโล
อติวิย สทฺโธ ปสนฺโน อโหสิ. โส สทฺธาธิกตฺตาเยว "สเจ เอโก ภิกฺขุ
อฑฺฒมาสนฺตเรน วา มาสนฺตเรน วา สํวจฺฉเรน วา อากาเส อุปฺปติตฺวา วิวิธานิ
ปาฏิหาริยานิ ทสฺเสยฺย, สพฺโพ ชโน อติวิย ปสีเทยฺย. ยนฺนูนาหํ ภควนฺตํ
ยาจิตฺวา ปาฏิหาริยกรณตฺถาย เอกํ ภิกฺขุํ อนุชานาเปยฺยนฺ"ติ จินฺเตตฺวา ภควนฺตํ
อุปสงฺกมิตฺวา เอวมาห.
      ตตฺถ อิทฺธาติ สมิทฺธา. ผีตาติ นานาภณฺฑอุสฺสนฺนตาย วุฑฺฒิปฺปตฺตา.
อากิณฺณมนุสฺสาติ อํสกูเฏน อํสกูฏํ ปหริตฺวา วิย วิจรนฺเตหิ มนุสฺเสหิ อากิณฺณา.
สมาทิสตูติ อาณาเปตุ ฐานนฺตเร ฐเปตุ. อุตฺตริมนุสฺสธมฺมาติ อุตฺตริมนุสฺสานํ
ธมฺมโต, ทสกุสลสงฺขาตโต วา มนุสฺสธมฺมโต อุตฺตริ. ภิยฺโยโส มตฺตายาติ
ปกติยาปิ ปชฺชลิตปทีโป เตลเสฺนหํ ลภิตฺวา วิย อติเรกปฺปมาเณน อภิปฺปสีทิสฺสติ.
น โข อหนฺติ ภควา ราชคหเสฏฺฐิวตฺถุสฺมึ สิกฺขาปทํ ปญฺญเปสิ, ตสฺมา "น โข
อหนฺ"ติ อาทิมาห.
      [๔๘๒] น ธํเสมีติ น คุณวินาสเนน ธํเสมิ, สีลเภทํ ปาเปตฺวา
อนุปุพฺเพน อุจฺจฏฺฐานโต โอตาเรนฺโต นีจฏฺฐาเน น ฐเปมิ, อถโข อหํ
พุทฺธสาสนสฺส วุฑฺฒึ ปจฺจาสึสนฺโต กเถมีติ ทสฺเสติ. ตติยํปิ โขติ ยาวตติยํ
พุทฺธานํ กถํ ปฏิพาหิตฺวา กเถตุํ วิสหนฺโต นาม นตฺถิ. อยํ ปน ภควตา สทฺธึ
วิสฺสาสิโก วิสฺสาสํ วฑฺเฒตฺวา วลฺลโภ หุตฺวา อตฺถกาโมสฺมีติ ติกฺขตฺตุํ กเถสิ.
@เชิงอรรถ:  ฉ.ม. จตฺตาลีสโกฏิธโน
                         อิทฺธิปาฏิหาริยวณฺณนา
      [๔๘๓-๔๘๔] อถ ภควา อยํ อุปาสโก มยิ ปฏิพาหนฺเตปิ ปุนฺปฺปุนํ
ยาจติเยว. "หนฺทสฺส ปาฏิหาริยกรเณ อาทีนวํ ทสฺเสมี"ติ จินฺเตตฺวา "ตีณิ
โข"ติอาทิมาห. ตตฺถ อมาหํ ภิกฺขุนฺติ อมุํ อหํ ภิกฺขุํ. คนฺธารีติ คนฺธาเรน
นาม อิสินา กตา, คนฺธารรฏฺเฐ วา อุปฺปนฺนวิชฺชา. ตตฺถ กิร พหู อิสโย
วสึสุ, เตสุ เอเกน กตา วิชฺชาติ อธิปฺปาโย. อฏฺฏิยามีติ อฏฺโฏ ปีฬิโต วิย
โหมิ. หรายามีติ ลชฺชามิ. ชิคุจฺฉามีติ คูถํ ทิสฺวา วิย ชิคุจฺฉํ อุปฺปาเทมิ.
                       อาเทสนาปาฏิหาริยวณฺณนา
      [๔๘๕] ปรสตฺตานนฺติ อญฺเญสํ สตฺตานํ. ทุติยํ ตสฺเสว เววจนํ.
อาทิสตีติ กเถติ. เจตสิกนฺติ โสมนสฺสโทมนสฺสํ อธิปฺเปตํ. เอวมฺปิ เต มโนติ
เอวํ ตว มโน โสมนสฺสิโต วา โทมนสฺสิโต วา กามวิตกฺกาทิสมฺปยุตฺโต วา.
ทุติยํ ตสฺเสว เววจนํ. อิติปิ เต จิตฺตนฺติ อิติ ตว จิตฺตํ, อิมญฺจิมญฺจ อตฺถํ
จินฺตยมานํ ปวตฺตตีติ อตฺโถ. มณิกา นาม วิชฺชาติ "จินฺตามณี"ติ เอวํ
ลทฺธนามา โลเก เอกา วิชฺชา อตฺถิ, ตาย ปเรสํ จิตฺตํ ชานาตีติ ทีเปติ.
                       อนุสาสนีปาฏิหาริยวณฺณนา
      [๔๘๖] เอวํ วิตกฺเกถาติ เอวํ เนกฺขมฺมวิตกฺกาทโย ปวตฺเตนฺตา
วิตกฺเกถ. มา เอวํ วิตกฺกยิตฺถาติ เอวํ กามวิตกฺกาทโย ปวตฺเตนฺตา มา
วิตกฺกยิตฺถ. เอวํ มนสิกโรถาติ เอวํ อนิจฺจสญฺญเมว, ทุกฺขสญฺญาทีสุ วา
อญฺญตรํ มนสิกโรถ. มา เอวนฺติ "นิจฺจนฺ"ติ อาทินา นเยน มา มนสิกริตฺถ.
อิทนฺติ อิทํ ปญฺจกามคุณิกราคํ ปชหถ. อิทํ อุปสมฺปชฺชาติ อิทํ จตุมคฺคผลปฺปเภทํ
โลกุตฺตรธมฺมเมว อุปสมฺปชฺช ปาปุณิตฺวา นิปฺผาเทตฺวา วิหรถ. อิติ ภควา อิทฺธิวิธํ
อิทฺธิปาฏิหาริยนฺติ ทสฺเสติ, ปรสฺส จิตฺตํ ญตฺวา กถนํ อาเทสนาปาฏิหาริยนฺติ,
สาวกานญฺจ พุทฺธานญฺจ สตตํ ธมฺมเทสนา อนุสาสนีปาฏิหาริยนฺติ.
      ตตฺถ อิทฺธิปาฏิหาริเยน อนุสาสนีปาฏิหาริยํ มหาโมคฺคลฺลานสฺสาจิณฺณํ,
อาเทสนาปาฏิหาริเยน  อนุสฺสานีปาฏิหาริยํ ธมฺมเสนาปติสฺส. เทวทตฺเต สํฆํ
ภินฺทิตฺวา ปญฺจภิกฺขุสตานิ คเหตฺวา คยาสีเส พุทฺธลีฬาย เตสํ ธมฺมํ เทเสนฺเต หิ
ภควตา เปสิเตสุ ทฺวีสุ อคฺคสาวเกสุ ธมฺมเสนาปติ เตสํ จิตฺตวารํ ๑- ญตฺวา ธมฺมํ
เทเสสิ, เถรสฺส ธมฺมเทสนํ สุตฺวา ปญฺจสตา ภิกฺขู โสตาปตฺติผเล ปติฏฺฐหึสุ. อถ
เนสํ มหาโมคฺคลฺลาโน วิกุพฺพนํ ทสฺเสตฺวา ทสฺเสตฺวา ธมฺมํ เทเสสิ, ตํ สุตฺวา
สพฺเพ อรหตฺตผเล ปติฏฺฐหึสุ. อถ เทฺวปิ มหานาคา ปญฺจภิกฺขุสตานิ คเหตฺวา
เวหาสํ อพฺภุคฺคนฺตฺวา เวฬุวนเมวาคมึสุ. อนุสาสนีปาฏิหาริยํ ปน พุทฺธานํ สตตํ
ธมฺมเทสนา, เตสุ อิทฺธิปาฏิหาริยอาเทสนาปาฏิหาริยานิ สอุปารมฺภานิ สโทสานิ,
อทฺธานํ น ติฏฺฐนฺติ, อทฺธานํ อติฏฺฐนโต น นิยฺยนฺติ. อนุสาสนีปาฏิหาริยํเยว
อนุปารมฺภํ นิทฺโทสํ, อทฺธานํ ติฏฺฐติ, อทฺธานํ ติฏฺฐนโต นิยฺยติ. ตสฺมา ภควา
อิทฺธิปาฏิหาริยญฺจ อาเทสนาปาฏิหาริยญฺจ ครหติ, อนุสาสนีปาฏิหาริยเมว ปสํสติ.
                     ภูตนิโรธปริเยสกภิกฺขุวตฺถุวณฺณนา
      [๔๘๗] ภูตปุพฺพนฺติ อิทํ กสฺมา ภควตา อารทฺธํ? อิทฺธิปาฏิหาริย-
อาเทสนาปาฏิหาริยานํ อนิยฺยานิกภาวทสฺสนตฺถํ, อนุสาสนีปาฏิหาริยสฺเสว จ
นิยฺยานิกภาวทสฺสนตฺถํ. อปิจ สพฺพพุทฺธานํ มหาภูตปริเยสโก นาเมโก ภิกฺขุ
โหติเยว. โย มหาภูเต ปริเยสนฺโต ยาว พฺรหฺมโลกา วิจริตฺวา วิสฺสชฺโชตารํ ๒-
อลภิตฺวา อาคมฺม พุทฺธเมว ปุจฺฉิตฺวา นิกฺกงฺโข โหติ. กสฺมา พุทฺธานํ
มหนฺตภาวปฺปกาสนตฺถํ, อิทญฺจ การณํ ปฏิจฺฉนฺนํ, อถ นํ วิวฏํ กตฺวา ทสฺเสนฺโตปิ
ภควา "ภูตปุพฺพนฺ"ติ อาทิมาห.
      ตตฺถ กตฺถ มุโขติ กิสฺมึ ฐาเน กึ อาคมฺม กึ ปตฺตสฺส เต
อนวเสสา อปฺปวตฺติวเสน นิรุชฺฌนฺติ. มหาภูตกถา ปเนสา สพฺพากาเรน
วิสุทฺธิมคฺเค วุตฺตา, ตสฺมา สา ตโตว คเหตพฺพา.
@เชิงอรรถ:  ฉ.ม. จิตฺตาจารํ             ฉ.ม. วิสฺสชฺเชตารํ
      [๔๘๘] เทวยานิโย มคฺโคติ ปาฏิเยกฺโก เทวโลกคมนมคฺโค นาม
นตฺถิ, อิทฺธิวิธญาณสฺเสว ปเนตํ อธิวจนํ. เตน เหส ยาว พฺรหฺมโลกาปิ กาเยน
วสํ วตฺเตนฺโต เทวโลกํ ยาติ. ตสฺมา ตํ "เทวยานิโย มคฺโค"ติ วุตฺตํ. เยน
จาตุมฺมหาราชิกาติ สมีเป ฐิตํปิ ภควนฺตํ อปุจฺฉิตฺวา ธมฺมตาย โจทิโต เทวตา
มหานุภาวาติ มญฺญมาโน อุปสงฺกมิ. มยํปิ โข ภิกฺขุ น ชานามาติ พุทฺธวิสเย
ปญฺหํ ปุจฺฉิตา เทวตา น ชานนฺติ, เตเนวมาหํสุ. อถ โข โส ภิกฺขุ "มม อิมํ
ปญฺหํ น กเถตุํ น ลพฺภา, สีฆํ กเถถา"ติ ตา เทวตา อชฺโฌตฺถรติ, ปุนปฺปุนํ
ปุจฺฉติ, ตา "อชฺโฌตฺถรติ โน อยํ ภิกฺขุ, หนฺท นํ หตฺถโต โมเจสฺสามา"ติ ๑-
จินฺเตตฺวา "อตฺถิ โข ภิกฺขุ จตฺตาโร มหาราชาโน"ติ อาทิมาหํสุ. ตตฺถ
อภิกฺกนฺตตราติ  อติกฺกมฺม กนฺตตรา. ๒- ปณีตราติ วณฺณยสอิสฺสริยาทีหิ อุตฺตมตรา.
เอเตน นเยน สพฺพวาเรสุ อตฺโถ เวทิตพฺโพ.
      [๔๙๑-๔๙๓] อยํ ปน วิเสโส:- สกฺโก กิร เทวราชา จินฺเตสิ
"อยํ ปโญฺห พุทฺธวิสโย, น สกฺกา อญฺเญน วิสฺสชฺชิตุํ, อยญฺจ ภิกฺขุ อคฺคึ
ปหาย ขชฺโชปนกํ ธเมนฺโต วิย, เภรึ ปหาย อุทรํ วาเทนฺโต วิย จ โลเก
อคฺคปุคฺคลํ สมฺมาสมฺพุทฺธํ ปหาย เทวตา ปุจฺฉนฺโต วิจรติ, เปเสมิ นํ สตฺถุ
สนฺติกนฺ"ติ. ตโต ปุนเทว โส จินฺเตสิ "สุทูรํปิ คนฺตฺวา สตฺถุ สนฺติเกว
นิกฺกงฺโข ภวิสฺสติ, อตฺถิเจว ๓- ปุคฺคโล ๓- นาเมส โถกํ ตาว อาหิณฺฑนฺโต กิลมตุ
ปจฺฉา ชานิสฺสตี"ติ. ตโต นํ "อหํปิ โข"ติ อาทิมาห. พฺรหฺมยานิโยปิ
เทวยานิยสทิโสว. เทวยานิยมคฺโคติ วา พฺรหฺมยานิยมคฺโคติ วา ธมฺมเสตูติ
วา เอกจิตฺตกฺขณิกอปฺปนาติ วา สนฺนิฏฺฐานิกเจตนาติ วา มหคฺคตจิตฺตนฺติ วา
อภิญาณนฺติ วา สพฺพเมตํ อิทธิวิธญาณสฺเสว นามํ.
      [๔๙๔] ปุพฺพนิมิตฺตนฺติ อาคมนปุพฺพภาเค นิมิตฺตํ สุริยสฺส อุทยโต
อรุณุคฺคํ วิย. ตสฺมา อิทาเนว พฺรหฺมา อาคมิสฺสติ, เอวํ มยํ ชานามาติ ทีปยึสุ.
ปาตุรโหสีติ ปากโฏ อโหสิ. อถ โข โส พฺรหฺมา เตน ภิกฺขุนา ปุฏฺโฐ
อตฺตโน อวิสยภาวํ ญตฺวา สจาหํ "น ชานามี"ติ วกฺขามิ, อิเม มมํ ปริภวิสฺสนฺติ,
@เชิงอรรถ:  สี. โมเจมาติ, ม. มุญฺจิสฺสามาติ       ม. อติกฺกนฺตตรา
@ สี. อฏฺฐิเวธปุคฺคโล
อถ ชานนฺโต วิย ยํกิญฺจิ กเถสฺสามิ, อยํ เม ภิกฺขุ เวยฺยากรเณน อนารทฺธจิตฺโต
วาทํ อาโรเปสฺสติ. "อหมสฺมิ ภิกฺขุ พฺรหฺมา"ติ อาทีนิ ปน เม ภณนฺตสฺส น
โกจิ วจนํ สทฺหหิสฺสติ, ยนฺนูนาหํ วิกฺเขปํ กตฺวา อิมํ ภิกฺขุํ สตฺถุ สนฺติกํเยว
เปเสยฺยนฺติ จินฺเตตฺวา "อหมสฺมิ ภิกฺขุ พฺรหฺมา"ติ อาทิมาห.
      [๔๙๕-๔๙๖] เอกมนฺตํ อปเนตฺวาติ กสฺมา เอวมกาสิ? กุหกตฺตา.
พหิทฺธา ปริเยฏฺฐินฺติ เตลตฺถิโก วาลิกํ นิปฺปีฬิยมาโน วิย ยาว พฺรหฺมโลกา
พหิทฺธา ปริเยสนํ อาปชฺชสิ.
      [๔๙๗] สกุณนฺติ กากํ วา กุลลํ วา. น โข เอโส ภิกฺขุ
ปโญฺห เอวํ ปุจฺฉิตพฺโพติ อิทํ ภควา ยสฺมา ปเทเสเนว ๑- ปโญฺห ปุจฺฉิตพฺโพ,
อยญฺจ โข ภิกฺขุ อนุปาทินฺนเกปิ คเหตฺวา นิปฺปเทสโต ปุจฺฉติ, ตสฺมา ปฏิเสเธติ.
อาจิณฺณํ กิเรตํ พุทฺธานํ, ปุจฺฉามูฬฺหสฺส ชนสฺส ปุจฺฉาย โทสํ ทสฺเสตฺวา
ปุจฺฉํ สิกฺขาเปตฺวา ปจฺฉาวิสฺสชฺชนํ. กสฺมา? ปุจฺฉิตุํ อชานิตฺวา ปริปุจฺฉนฺโต
ทุพฺพิญฺญาปโย โหติ.
      [๔๙๘] ปญฺหํ สิกฺขาเปนฺโต ปน กตฺถ "อาโป จา"ติ อาทิมาห.
ตตฺถ น คาธตีติ น ปติฏฺฐาติ, อิเม จตฺตาโร มหาภูตา กึ อาคมฺม อปฺปติฏฺฐา
ภวนฺตีติ อตฺโถ. อุปาทินฺนํเยว สนฺธาย ปุจฺฉติ. ๒- ทีฆญฺจ รสฺสญฺจาติ
สญฺฐานวเสน อุปาทารูปํ วุตฺตํ. อณุํ ถูลนฺติ ขุทฺทกํ วา มหนฺตํ วา, อิมินาปิ
อุปาทารูเป วณฺณมตฺตเมว กถิตํ. สุภาสุภนฺติ สุภญฺจ อสุภญฺจ อุปาทารูปเมว
กถิตํ. กึ ปน อุปาทารูปํ สุภํ อสุภนฺติ อตฺถิ? นตฺถิ. อิฏฺฐานิฏฺฐารมฺมณํ ปเนวํ
กถิตํ. นามญฺจ รูปญฺจาติ นามญฺจ ทีฆาทิเภทํ รูปญฺจ. อุปรุชฺฌตีติ นิรุชฺฌติ,
กึ อาคมฺม อเสสเมตํ นปฺปวตฺตตีติ.
      [๔๙๙] เอวํ ปุจฺฉิตพฺพํ สิยาติ ปุจฺฉํ ทสฺเสตฺวา อิทานิ วิสฺสชฺชนํ
ทสฺเสนฺโต ตตฺร เวยฺยากรณํ ภวตีติ วตฺวา "วิญฺญาณนฺ"ติ อาทิมาห. ตตฺถ
วิญฺญาตพฺพนฺติ วิญฺญาณํ, นิพฺพานสฺเสตํ นามํ, ตเทตํ นิทสฺสนาภาวโต
อนิทสฺสนํ. อุปฺปาทนฺโต วา วยนฺโต วา ฐิตสฺส อญฺญถตฺตอนฺโต วา เอตสฺส
@เชิงอรรถ:  ฉ.ม. ปเทเสเนส          สี. ปุจฺฉา
นตฺถีติ อนนฺตํ. ปภนฺติ ปปํ. เอตํ กิร ติตฺถสฺส นามํ, ตญฺหิ ปปนฺติ เอตฺถาติ
ปปํ, ปการสฺส ปน ภกาโร กโต. สพฺพโต ปภมสฺสาติ สพฺพโตปภํ. นิพฺพานสฺส
กิร ยถา มหาสมุทฺทสฺส ยโต ยโต โอตริตุกามา โหนฺติ, ตํตเทว ติตฺถํ, อติตฺถํ
นาม นตฺถิ. เอวเมว อฏฺฐตฺตึสาย กมฺมฏฺฐาเนสุ เยน เยน มุเขน นิพฺพานํ
โอตริตุกามา โหนฺติ, ตํ ตเทว ติตฺถํ, นิพฺพานสฺส อติตฺถํ นาม กมฺมฏฺฐานํ
นตฺถิ. เตน วุตฺตํ "สพฺพโตปภนฺ"ติ. เอตฺถ อาโป จาติ เอตฺถ นิพฺพาเน อิทํ
นิพฺพานํ อาคมฺม สพฺพเมตํ "อาโป"ติ อาทินา นเยน วุตฺตํ อุปาทินฺนกธมฺมชาตํ
นิรุชฺฌติ, อปฺปวตฺตํ โหตีติ.
      อิทานิสฺส นิรุชฺฌนุปายํ ทสฺเสนฺโต "วิญฺญาณสฺส นิโรเธน เอตฺเถตํ
อุปรุชฺฌตี"ติ ๑- อาห. ตตฺถ "วิญฺญาณนฺติ จริมกวิญฺญาณํปิ อภิสงฺขารวิญฺญาณํปิ.
จริมกวิญฺญาณสฺสาปิ หิ นิโรเธน เอตฺเถตํ อุปรุชฺฌติ. วิชฺฌาตทีปสิขา วิย
อปณฺณตฺติกภาวํ ยาติ. อภิสงฺขารวิญฺญาณสฺสาปิ อนุปฺปาทนิโรเธน อนุปฺปาทวเสน
อุปรุชฺฌติ. ยถาห "โสตาปตฺติมคฺคญาเณน อภิสงฺขารวิญฺญาณสฺส นิโรเธน ฐเปตฺวา
สตฺต ภเว อนมตคฺเค สํสาเร เย อุปฺปชฺเชยฺยุํ นามญฺจ รูปญฺจ เอตฺเถเต
นิรุชฺฌนฺตี"ติ สพฺพํ จูฬนิทฺเทเส ๑- วุตฺตนเยเนว เวทิตพฺพํ. เสสํ สพฺพตฺถ
อุตฺตานเมวาติ.
                  อิติ สุมงฺคลวิลาสินิยา ทีฆนิกายฏฺฐกถาย
                      เกวฏฺฏสุตฺตวณฺณนา นิฏฺฐิตา.
                            เอกาทสมํ.
                       -------------------
@เชิงอรรถ: ๑-๑ ขุ. จูฬ. ๓๐/๘๕/๒๑ อชิตมาณวปุจฺฉานิทฺเทส (สยา)


             อรรถกถาภาษาบาลีอักษรไทย เล่มที่ ๔ หน้า ๓๒๒-๓๒๗. http://84000.org/tipitaka/atthapali/read_th.php?B=4&A=8429&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=4&A=8429&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=9&i=338              เนื้อความพระไตรปิฎกฉบับหลวง :- http://84000.org/tipitaka/read/r.php?B=9&A=7317              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=9&A=5428              The Pali Tipitaka in Roman Character :- http://84000.org/tipitaka/read/roman_read.php?B=9&A=5428              สารบัญพระไตรปิฎกเล่มที่ ๙ http://84000.org/tipitaka/read/?index_9

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]