|
| บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
๗ ทสรถชาตกํ ฯ เอถ ลกฺขณสีตา จาติ อิทํ สตฺถา เชตวเน วิหรนฺโต เอกํ มตปิตรํ กุฏุมฺพิกํ อารพฺภ กเถสิ ฯ โส หิ ปิตริ กาลกเต โสกาภิภูโต สพฺพกิจฺจานิ ปหาย โสกานุวตฺตโกว อโหสิ ฯ สตฺถา ปจฺจูสสมเย โลกํ โวโลเกนฺโต ตสฺส โสตาปตฺติผลุปนิสฺสยํ ทิสฺวา ปุนทิวเส สาวตฺถิยํ ปิณฺฑาย จริตฺวา กตภตฺตกิจฺโจ ภิกฺขู อุยฺโยเชตฺวา เอกํ ปจฺฉาสมณํ คเหตฺวา ตสฺส เคหํ คนฺตฺวา วนฺทิตฺวา นิสินฺนํ มธุรวจเนน อาลปนฺโต กึ โสจสิ อุปาสกาติ วตฺวา อาม ภนฺเต ปิตุโสโก มํ พาธตีติ วุตฺเต อุปาสก โปราณกปณฺฑิตา อฏฺฐวิเธ โลกธมฺเม ตตฺตโต ชานนฺตา ปิตริ กาลกเต อปฺปมตฺตกํปิ โสกํ น วินฺทึสูติ วตฺวา เตน ยาจิโต อตีตํ อาหริ อตีเต พาราณสิยํ ทสรถมหาราชานาม อคติคมนํ ปหาย ธมฺเมน รชฺชํ กาเรสิ ฯ ตสฺส โสฬสนฺนํ อิตฺถีสหสฺสานํ เชฏฺฐกา อคฺคมเหสิ เทฺว ปุตฺเต เอกญฺจ ธีตรํ วิชายิ เชฏฺฐปุตฺโต รามปณฺฑิโตนาม อโหสิ ทุติโย ลกฺขณกุมาโรนาม ธีตา สิตาเทวีนาม ฯ อปรภาเค อคฺคมเหสิ กาลมกาสิ ฯ ราชา ตสฺสา กาลกตาย จิรตรํ โสกวสํ คนฺตฺวา อมจฺเจหิ สญฺญาปิโต ตสฺสา กตฺตพฺพปริหารํ กตฺวา อญฺญํ อคฺคมเหสิฏฺฐาเน ฐเปสิ ฯ สา รญฺโญ ปิยา มนาปา--------------------------------------------------------------------------------------------- หน้าที่ ๕๐.
อโหสิ ฯ สาปิ อปรภาเค คพฺภํ คณฺหิตฺวา ลทฺธคพฺภปริหารา ปุตฺตํ วิชายิ ฯ ภรตกุมาโรติสฺส นามํ กรึสุ ฯ ราชา ปุตฺตสิเนเหน ภทฺเท เต วรํ ทมฺมิ คณฺหาหีติ อาห ฯ สา คหิตกํ กตฺวา ฐเปตฺวา กุมารสฺส สตฺตฏฺฐวสฺสิกกาเล ราชานมุปสงฺกมิตฺวา เทว ตุมฺเหหิ มยฺหํ ปุตฺตสฺส วโร ทินฺโน อิทานิสฺส นํ เทถาติ อาห ฯ คณฺห ภทฺเทติ ฯ เทว ปุตฺตสฺส เม รชฺชํ เทถาติ อาห ฯ ราชา อจฺฉรํ ปหริตฺวา นสฺส วสลิ มยฺหํ เทฺว ปุตฺตา อคฺคิกฺขนฺธา วิย ชลนฺติ เต มาราเปตฺวา ตว ปุตฺตสฺส รชฺชํ ยาจสีติ ตชฺเชสิ ฯ สา ภีตา สิริคพฺภํ ปวิสิตฺวา อญฺเญสุปิ ทิวเสสุ ราชานํ ปุนปฺปุนํ รชฺชเมว ยาจิ ฯ ราชา ตสฺสา วรํ อทตฺวาว จินฺเตสิ มาตุคาโมนาม อกตญฺญู มิตฺตทุพฺภี อหํ เม กุฏปณฺณํ วา กุฏลญฺจํ วา กตฺวา ปุตฺเต ฆาเตยฺยาติ ฯ โส ปุตฺเต ปกฺโกสาเปตฺวา ตมตฺถํ อาโรเจตฺวา ตาต ตุมฺหากํ อิธ วสนฺตานํ อนฺตราโยปิ ภเวยฺย ตุมฺเห สามนฺตรชฺชํ วา อรญฺญํ วา คนฺตฺวา มม มตกาเล อาคนฺตฺวา กุลรชฺชกํ คณฺหถาติ วตฺวา ปุน เนมิตฺตเก ปกฺโกสาเปตฺวา อตฺตโน อายุปริจฺเฉทํ ปุจฺฉิตฺวา อญฺญานิ ทฺวาทส วสฺสานิ ปวตฺติสฺสตีติ สุตฺวา ตาต อิโต ทฺวาทสวสฺสจฺจเยน อาคนฺตฺวา ฉตฺตํ อุสฺสาเปยฺยาถาติ อาห ฯ เต สาธูติ วตฺวา ปิตรํ วนฺทิตฺวา โรทนฺตา ปาสาทา โอตรึสุ ฯ สิตาเทวี อหํปิ ภาติเกหิ สทฺธึ คมิสฺสามีติ ปิตรํ วนฺทิตฺวา โรทนฺตา นิกฺขมิ ฯ เต ตโยปิ มหาชเนน ปริวุตา นครา นิกฺขมิตฺวา มหาชนํ--------------------------------------------------------------------------------------------- หน้าที่ ๕๑.
นิวตฺเตตฺวา อนุปุพฺเพน หิมวนฺตํ ปวิสิตฺวา สมฺปนฺโนทกมูลผลาผเล ปเทเส อสฺสมํ มาเปตฺวา ผลาผเลน ยาเปนฺตา วสึสุ ฯ ลกฺขณปณฺฑิโต ปน สิตา จ รามปณฺฑิตํ ยาจิตฺวา ตุมฺเห อมฺหากํ ปิตุฏฺฐาเน ฐิตา ตสฺมา อสฺสมปเทเยว โหถ มยํ ผลาผลํ อาหริตฺวา ตุมฺเห โปเสสฺสามาติ ปฏิญฺญํ คณฺหึสุ ฯ ตโต ปฏฺฐาย รามปณฺฑิโต ตตฺเถว อโหสิ ฯ อิตเร ผลาผลํ อาหริตฺวา ตํ ปฏิชคฺคึสุ ฯ เอวํ เตสํ ผลาผเลน ยาเปตฺวา วสนฺตานํ ทสรถมหาราชา ปุตฺตโสเกน นวเม สํวจฺฉเร กาลมกาสิ ฯ ตสฺส สรีรกิจฺจํ กาเรตฺวา เทวี อตฺตโน ปุตฺตสฺส ภรตกุมารสฺส ฉตฺตํ อุสฺสาเปถาติ อาห ฯ อมจฺจา ปน ฉตฺตสามิกา อรญฺเญ วสนฺตีติ น อทํสุ ฯ ภรตกุมาโร มม ภาตรํ รามปณฺฑิตํ อรญฺญโต อาเนตฺวา ฉตฺตํ อุสฺสาเปสฺสามีติ ปญฺจราชกกุธภณฺฑานิ คเหตฺวา จตุรงฺคินิยา เสนาย ตสฺส วสนฏฺฐานํ ปตฺวา อวิทูเร ขนฺธาวารํ นิวาสาเปตฺวา กติปเยหิ อมจฺเจหิ สทฺธึ ลกฺขณปณฺฑิตสฺส สิตาย จ อรญฺญํ คตกาเล อสฺสมปทํ ปวิสิตฺวา อสฺสมปททฺวาเร ฐปิตกาญฺจนรูปกํ วิย รามปณฺฑิตํ นิราสงฺกํ สุขนิสินฺนํ อุปสงฺกมิตฺวา วนฺทิตฺวา เอกมนฺตํ ฐิโต รญฺโญ ปวุตฺตึ อาโรเจตฺวา สทฺธึ อมจฺเจหิ ปาเทสุ นิปติตฺวา โรทิ ฯ รามปณฺฑิโต เนว โสจิ น โรทิ ฯ อินฺทฺริยวิการมตฺตํปิสฺส นาโหสิ ฯ ภรตสฺส ปน โรทิตฺวา นิสินฺนกาเล สายณฺหสมเย อิตเร เทฺว ผลาผลํ อาทาย อาคมึสุ ฯ รามปณฺฑิโต จินฺเตสิ อิเม ทหรา มยฺหํ วิย--------------------------------------------------------------------------------------------- หน้าที่ ๕๒.
น ปริคฺคหณปญฺญา เอเตสํ อตฺถิ สหสา ปิตา เต มโตติ วุตฺโต โสกํ สณฺฐาเรตุํ อสกฺโกนฺตานํ หทยํปิ เนสํ ผเลยฺย อุปาเยน เต อุทกํ โอตาเรตฺวา เอตํ ปวุตฺตึ สาเวสฺสามีติ ฯ อถ เนสํ ปุรโต เอกํ อุทกฏฺฐานํ ทสฺเสตฺวา ตุมฺเห อติจิเรน อาคตา อิทํ โว ทณฺฑกมฺมํ โหตุ อุทกํ โอตริตฺวา ติฏฺฐถาติ อุปฑฺฒคาถมาห เอถ ลกฺขณสีตา จ อุโภ โอตรโถทกนฺติ ฯ ตสฺสตฺโถ เอถ ลกฺขณสิตา จ อาคจฺฉนฺตุ อุโภ โอตรถ อุทกนฺติ ฯ เต เอกวจเนเนว โอตริตฺวา อฏฺฐํสุ ฯ อถ เนสํ ปิตุ ปวุตฺตึ อาโรเจนฺโต เสสํ อุปฑฺฒคาถมาห เอวายํ ภรโต อาห ราชา ทสรโถ มโตติ ฯ เต ปิตุ มตสาสนํ สุตฺวาว วิสญฺญี อเหสุํ ฯ ปุนปิ เนสํ กเถสิ ฯ ปุน วิสญฺญี อเหสุํ ฯ เอวํ ยาวตติยํ วิสญฺญิตํ ปตฺเต เต อมจฺจา อุกฺขิปิตฺวา อุทกา นีหริตฺวา ถเล นิสีทาเปสุํ ฯ (ลทฺธสฺสาเสสุ เตสุ) สพฺเพ อญฺญมญฺญํ โรทิตฺวา ปริเทวิตฺวา นิสีทึสุ ฯ ตทา ภรตกุมาโร จินฺเตสิ มยฺหํ ภาตา ลกฺขณกุมาโร ภคินี จ สิตาเทวี ทสรถสฺส มตสาสนํ สุตฺวา โสกํ สณฺฐาเรตุํ น สกฺโกนฺติ รามปณฺฑิโต ปน น โสจติ น ปริเทวติ กินฺนุโข ตสฺส อโสจนการณํ ปุจฺฉิสฺสามิ นนฺติ ฯ โส ตํ ปุจฺฉนฺโต ทุติยํ คาถมาห--------------------------------------------------------------------------------------------- หน้าที่ ๕๓.
เกน ราม ปภาเวน โสจิตพฺพํ น โสจสิ ปิตรํ กาลกตํ สุตฺวา น ตํ ปสหเต ทุกฺขนฺติ ฯ ตตฺถ ปภาเวนาติ อานุภาเวน ฯ น ตํ ปสหเต ทุกฺขนฺติ เอวรูปํ ทุกฺขํ เกน การเณน ตํ น ปีเฬติ กึ เต อโสจนการณํ กเถหิ ตาว โนติ ฯ อถสฺส รามปณฺฑิโต อตฺตโน อโสจนการณํ กเถนฺโต อาห ยํ น สกฺกา นํ ปาเลตุํ โปเสน ลปตํ พหุํ ส กิสฺส วิญฺญู เมธาวี อตฺตานมุปตาปเย ฯ ทหรา จ หิ เย วุฑฺฒา เย พาลา เย จ ปณฺฑิตา อทฺธา เจว ทลิทฺทา จ สพฺเพ มจฺจุปรายนา ฯ ผลานมิว ปกฺกานํ นิจฺจํ ปตนโต ภยํ เอวํ ชาตาน มจฺจานํ นิจฺจํ มรณโต ภยํ ฯ สายเมเก น ทิสฺสนฺติ ปาโต ทิฏฺฐา พหู ชนา ปาโต เอเก น ทิสฺสนฺติ สายํ ทิฏฺฐา พหู ชนา ฯ ปริเทวยมาโน เจ กิญฺจิทตฺถํ อุทพฺพเห สมฺมุฬฺโห หึสมตฺตานํ กยิรา เจ นํ วิจกฺขโณ ฯ กีโส วิวณฺโณ ภวติ หึสมตฺตานมตฺตโน น เตน เปตา ปาเลนฺติ นิรตฺถา ปริเทวนา ฯ ยถา สรณมาทิตฺตํ วารินา ปรินิพฺพเย เอวมฺปิ ธีโร สุตวา เมธาวี ปณฺฑิโต นโร ขิปฺปมุปฺปติตํ โสกํ วาโต ตูลํว ธํสเย ฯ--------------------------------------------------------------------------------------------- หน้าที่ ๕๔.
เอโกว มจฺโจ อจฺเจติ เอโกว ชายเต กุเล สํโยคปรมาเตฺวว สมฺโภคา สพฺพปาณินํ ฯ ตสฺมาหิ ธีรสฺส พหุสฺสุตสฺส สมฺปสฺสโต โลกมิมํ ปรญฺจ อญฺญาย ธมฺมํ หทยํ มนญฺจ โสกา มหนฺตาปิ น ตาปยนฺติ ฯ โสหํ ยสญฺจ โภคญฺจ ภริยาปิ จ ญาตเก เสสํ สมฺปาลยิสฺสามิ กิจฺจเมตํ วิชานโตติ ฯ อิมาหิ ฉหิ คาถาหิ อนิจฺจตํ ปกาเสสิ ฯ ตตฺถ ปาเลตุนฺติ รกฺขิตุํ ฯ ลปตนฺติ ลปนฺตานํ อิทํ วุตฺตํ โหติ ตาต ภรต ยํ สตฺตานํ ชีวิตํ ตํ พหุํปิ วิลปนฺตานํ ปุริสานํ เอเกนาปิ มา อุปจฺฉิชฺชีติ น สกฺกา รกฺขิตุํ ฯ โสทานิ มาทิโส อฏฺฐ โลกธมฺเม ตตฺตโต ชานนฺโต วิญฺญู เมธาวี ปณฺฑิโต มรณปริโยสานชีวิเตสุ สตฺเตสุ มเตสุ กิสฺส อตฺตานมุปตาปเย กึการณา อนุปกาเรน สกทุกฺเขน อตฺตานํ สนฺตาเปยฺยาติ ฯ ทหรา จาติ คาถา มจฺจุนาเมสา ตาต ภรต เนว สุวณฺณรูปกสทิสานํ ทหรานํ ขตฺติยกุมาราทีนํ น คุณวุฑฺฒิปฺปตฺตานํ มหาโยธานํ น พาลานํ ปุถุสตฺตานํ น พุทฺธาทีนํ ปณฺฑิตานํ น จกฺกวตฺติอาทีนํ อิสฺสรานํ น นิรวเสสานํ ทลิทฺทานํ ลชฺชติ สพฺเพปิเม สตฺตา มจฺจุปรายนา มรณมุเข สมฺภคฺควิภคฺคาว ภวนฺติเยวาติ ทสฺสนตฺถํ วุตฺตา ฯ ปตนโตติ ปปตนฺโต อิทํ วุตฺตํ โหติ ยถา หิ--------------------------------------------------------------------------------------------- หน้าที่ ๕๕.
ตาต ภรต ปกฺกานํ ผลานํ ปกฺกกาลโต ปฏฺฐาย อิทานิ วณฺฑา ภิชฺชิตฺวา ปติสฺสนฺติ อิทานิ ปติสฺสนฺตีติ ปตนโต เตสํ นิจฺจํ ธุวํ เอกํสิกเมว ภยนฺติ เอวํ อาสงฺกิยโต เอวํ ชาตานํ มจฺจานํปิ เอกํสิกเมว มรณโต ภยนฺติ นตฺถิ โส ขโณ วา ลโย วา ยตฺถ เอเตสํ มรณํ น อาสงฺกิตพฺพํ ภเวยฺยาติ ฯ สายนฺติ วิกาเล อิมินา รตฺติภาเค จ ทิฏฺฐานํ ทิวสภาเค จ ทิฏฺฐานํ รตฺติภาเค อทสฺสนํ ทีเปติ ฯ กิญฺจิทตฺถนฺติ ปิตา เม ปุตฺโต เมติ อาทีหิ ปริเทวมาโน เจ โปโส สมฺมุฬฺโห อตฺตานํ หึสนฺโต กิลมนฺโต อปฺปมตกมฺปิ อตฺถํ อาหเรยฺย ฯ กยิราเจนํ วิจกฺขโณติ อถ ปณฺฑิโต ปุริโส เอวํ ปริเทวํ กเรยฺย ฯ ยสฺมา ปน ปริเทวนฺโต มตํ วา อาเนตุํ อญฺญํ วา ตสฺส วุฑฺฒิกาตุํ น สกฺโกติ ตสฺมา นิรตฺถกตา ปริเทวิตสฺส ปณฺฑิตา น ปริเทวนฺตีติ ฯ อตฺตานมตฺตโนติ อตฺตโน อตฺตภาวํ โสกปริเทวทุกฺเขน หึสนฺโต ฯ น เตนาติ เตน ปริเทเวน ปรโลกคตา สตฺตา น ปาเลนฺติ น ยาเปนฺติ ฯ นิรตฺถาติ ตสฺมา เตสํ มตสตฺตานํ อยํ ปริเทวนา นิรตฺถกา ฯ สรณนฺติ นิวาสนเคหํ อิทํ วุตฺตํ โหติ ยถา ปณฺฑิโต ปุริโส อตฺตโน วสนาคาเร อาทิตฺเต มุหุตฺตํปิ โวสานํ อนาปชฺชิตฺวา ฆฏสหสฺเสน วารินา นิพฺพาปยเตว เอวํ ธีโร อุปฺปติตํ โสกํ ขิปฺปเมว นิพฺพาปเย ตูลํ วิย วาโต ยถา สณฺฐาเรตุํ น สกฺโกติ เอวํ ธํสเย วิทฺธํเสยฺยาติ อตฺโถ ฯ เอโกว มจฺโจติ เอตฺถ ตาต ภรต อิเม สตฺตา กมฺมสฺสกานาม เตหิ อิโต ปรโลกํ คจฺฉนฺโต สตฺโต เอโกว--------------------------------------------------------------------------------------------- หน้าที่ ๕๖.
อจฺเจติ อติกฺกมติ ขตฺติยาทิเก กุเล ชายมาโนปิ เอโกว คนฺตฺวา ชายติ ฯ ตตฺถ ตตฺถ ปน ญาติมิตฺตสํโยควเสน อยํ เม ปิตา อยํ เม มาตา อยํ เม มิตฺโตติ สํโยคปรมาเตฺวว สมฺโภคา สพฺพปาณินํ ปรมตฺเถน ปน ตีสุ ภเวสุ กมฺมสฺสกาเวเต สตฺตาติ อตฺโถ ฯ ตสฺมาติ ยสฺมา เอเตสํ สตฺตานํ ญาติมิตฺตสํโยคํ ญาติมิตฺตปริโภคมตฺตํ ฐเปตฺวา อิโต ปรํ อญฺญํ นตฺถิ ตสฺมา สมฺปสฺสโตติ อิมญฺจ ปรญฺจ โลกํ นานาวินาภาวเมว สมฺมา ปสฺสโต ฯ อญฺญาย ธมฺมนฺติ อฏฺฐวิธํ โลกธมฺมํ ชานิตฺวา ฯ หทยํ มนญฺจาติ อิทํ อุภยํปิ จิตฺตสฺเสว นามํ ฯ อิทํ วุตฺตํ โหติ ลาโภ อลาโภ ยโส อยโส จ นินฺทา ปสํสา จ สุขํ จ ทุกฺขํ เอเต อนิจฺจา มนุเชสุ ธมฺมา มา โสจิ กึ โสจสิ โปฏฺฐปาทาติ ฯ อิเมสํ อฏฺฐนฺนํ โลกธมฺมานํ เยนเกนจิ จิตฺเตน ปญฺญายนฺติ ตสฺส จ อนิจฺจตํ ญตฺวา ฐิตสฺส ธีรสฺส ปิยปุตฺตมรณาทิวตฺถุกา มหนฺตาปิ โสกา หทยํ น ตาปยนฺตีติ ฯ เอกํ วา อฏฺฐวิธํ โลกธมฺมํ ญตฺวา ธีรสฺส หทยวตฺถุญฺจ มนญฺจ มหนฺตาปิ โสกา น ตาปยนฺตีติ เอวเมตฺถ อตฺโถ ทฏฺฐพฺโพ ฯ โสหํ ยสญฺจ โภคญฺจาติ คาถาย ตาต ภรต อนฺธพาลสตฺตานํ วิย มม โรทนปริเทวนํนาม อนนุจฺฉวิกํ อหํ ปน ปิตุ อจฺจเยน ตสฺส ฐาเนว ฐตฺวา กปณาทีนํ ทานารหานํ ทานํ ฐานนฺตรารหานํ ฐานนฺตรํ ยสารหานํ ยสํ ทสฺสามิ--------------------------------------------------------------------------------------------- หน้าที่ ๕๗.
ปิตรา เม ปริภุตฺตนเยน อิสฺสริยํ ภุญฺชิสฺสามิ ญาตเก โปเสสฺสามิ อวเสสญฺจ อนฺโต ปริชนาธิกํ ชนํ ปาเลสฺสามิ ธมฺมิกสมณพฺราหฺมณานํ ธมฺมิการกฺขาวรณคุตฺตึ กริสฺสามีติ เอตญฺหิ วิชานโต ปณฺฑิตปุริสสฺส อนุรูปํ กิจฺจนฺติ อตฺโถ ฯ ปริสา อิมํ รามปณฺฑิตสฺส อนิจฺจตาปกาสนํ ธมฺมเทสนํ สุตฺวา นิสฺโสกา อเหสุํ ฯ ตโต ภรตกุมาโร รามปณฺฑิตํ วนฺทิตฺวา พาราณสิรชฺชํ ปฏิจฺฉถาติ อาห ฯ ตาต ลกฺขณญฺจ สิตเทวิญฺจ คเหตฺวา รชฺชํ อนุสาสถาติ ฯ ตุมฺเห ปน เทวาติ ฯ ตาต มม ปิตา ทฺวาทสวสฺสจฺจเยน อาคนฺตฺวา รชฺชํ กเรยฺยาสีติ มํ อโวจ อหํ อิทาเนว คจฺฉนฺโต ตสฺส วจนกโรนาม นาโหมิ อญฺญานิ ปน ตีณิ วสฺสานิ อติกฺกมิตฺวา อาคมิสฺสามีติ ฯ เอตฺตกํ กาลํ โก รชฺชํ กาเรสฺสตีติ ฯ ตุมฺเห กาเรถาติ ฯ น มยํ กาเรสฺสามาติ ฯ เตนหิ ยาว มมาคมนา อิมานิ ปาทุกา กาเรสฺสนฺตีติ อตฺตโน ติณปาทุกา โอมุญฺจิตฺวา อทาสิ ฯ ตโยปิ ชนา ปาทุกา คเหตฺวา รามปณฺฑิตํ วนฺทิตฺวา มหาชนปริวุตา พาราณสึ อคมํสุ ฯ ตีณิ สํวจฺฉรานิ ปาทุกา รชฺชํ กาเรสุํ ฯ อมจฺจา ติณปาทุกา ราชปลฺลงฺเก ฐเปตฺวา อฏฺฏํ วินิจฺฉนนฺติ ฯ สเจ ทุวินิจฺฉิโต โหติ ปาทุกา อญฺญมญฺญํ ปฏิหญฺญนฺติ ตาย สญฺญาย ปุน วินิจฺฉนนฺติ สมฺมาวินิจฺฉิตกาเล ปาทุกา นิสฺสทฺทาว สนฺนิสีทนฺติ ฯ รามปณฺฑิโต ติณฺณํ สํวจฺฉรานํ อจฺจเยน อรญฺญา นิกฺขมิตฺวา--------------------------------------------------------------------------------------------- หน้าที่ ๕๘.
พาราณสินครํ ปตฺวา อุยฺยานํ ปาวิสิ ฯ ตสฺสาคตภาวํ ญตฺวา กุมารา อมจฺจปริวุตา อุยฺยานํ คนฺตฺวา สิตํ อคฺคมเหสึ กตฺวา อุภินฺนํปิ อภิเสกํ อกํสุ ฯ เอวํ อภิเสกํ ปตฺโต มหาสตฺโต อลงฺกตรเถ ฐตฺวา มหนฺเตน ปริวาเรน นครํ ปวิสิตฺวา ปทกฺขิณํ กตฺวา สุนนฺทนปาสาทวรสฺส มหาตลํ อภิรุยฺหิ ฯ ตโต ปฏฺฐาย โสฬสวสฺสสหสฺสานิ ธมฺเมน รชฺชํ กาเรตฺวา อายุหปริโยสาเน สคฺคปุรํ ปูเรสิ ฯ ทสวสฺสสหสฺสานิ สฏฺฐิวสฺสสตานิ จ กมฺพุคิโว มหาพาหุ ราโม รชฺชมการยีติ ฯ อยํ อภิสมฺพุทฺธคาถา ตมตฺถํ ปกาเสติ ฯ ตตฺถ กมฺพุคิโวติ สุวณฺณลิงฺคสทิสคิโว ฯ สุวณฺณํ หิ กมฺพุนฺติ วุจฺจติ ฯ สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน กุฏุมฺพิโก โสตาปตฺติผเล ปติฏฺฐหิ ฯ ตทา ทสรถมหาราชา สุทฺโธทนมหาราชา อโหสิ ฯ มาตา มหามายา ฯ สิตา ราหุลมาตา ฯ ภรโต อานนฺโท ฯ ลกฺขโณ สารีปุตฺโต ฯ ปริสา พุทฺธปริสา ฯ รามปณฺฑิโต ปน อหเมวาติ ฯ ทสรถชาตกํ สตฺตมํ ฯ --------------อรรถกถาภาษาบาลีอักษรไทย เล่มที่ ๔๐ หน้า ๔๙-๕๘. http://84000.org/tipitaka/atthapali/read_th.php?B=40&A=981&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=40&A=981&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=27&i=1564 เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=6278 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=6473 The Pali Tipitaka in Roman Character :- http://84000.org/tipitaka/read/roman_read.php?B=27&A=6473 สารบัญพระไตรปิฎกเล่มที่ ๒๗ http://84000.org/tipitaka/read/?index_27
![อ่านหน้า[ต่าง] แรก](go1.gif) ![อ่านหน้า[ต่าง] ที่แล้ว](go2.gif)   ![อ่านหน้า[ต่าง] ถัดไป](go3.gif) ![อ่านหน้า[ต่าง] สุดท้าย](go4.gif)   |
|
บันทึก ๒๖ มกราคม พ.ศ. ๒๕๖๑.
การแสดงผลนี้อ้างอิงข้อมูลจากอรรถกถาภาษาบาลีอักษรไทย.
หากพบข้อผิดพลาด กรุณาแจ้งได้ที่ [email protected]