ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๔๕ ภาษาบาลีอักษรไทย นิทฺ.อ.๑ (สทฺธมฺมปชฺ.)

                   ๑๓. มหาวิยูหสุตฺตนิทฺเทสวณฺณนา ๑-
    [๑๓๐] เตรสเม มหาวิยูหสุตฺตนิทฺเทเส เย เกจิเม ทิฏฺฐิปริพฺพสานาติ อิทมฺปิ
"กึ นุ โข อิเม ทิฏฺฐิปริพฺพสานา วิญฺญูนํ สนฺติกา นินฺทเมว ลภนฺติ, อุทาหุ
ปสํสมฺปี"ติ อุปฺปนฺนจิตฺตานํ เอกจฺจานํ เทวตานํ ตมตฺถํ อาวิกาตุํ ปุริมนเยเนว
นิมฺมิตพุทฺเธน อตฺตานํ ปุจฺฉาเปตฺวา วุตฺตํ. ตตฺถ อนฺวานยนฺตีติ อนุ อานยนฺติ
ปุนปฺปุนํ อาหรนฺติ.
    นินฺทเมว อเนฺวนฺตีติ ครหเมว อุปคจฺฉนฺติ.
    [๑๓๑] อิทานิ ยสฺมา เต "อิทเมว สจฺจนฺ"ติ วทนฺตาปิ ทิฏฺฐิคติกวาทิโน
กทาจิ กตฺถจิ ปสํสมฺปิ ลภนฺติ, ยํ เอตํ ปสํสาสงฺขาตํ วาทผลํ, ตํ อปฺปํ, ราคาทีนํ
สมาย สมตฺถํ น โหติ, โก ปน วาโท ทุติเย นินฺทาผเล, ตสฺมา เอตมตฺถํ
ทสฺเสนฺโต อิมํ ตาว วิสฺสชฺชนคาถํ อาห "อปฺปํ หิ เอตํ น อลํ สมาย,
ทุเว วิวาทสฺส ผลานิ พฺรูมี"ติ. ตตฺถ ทุเว วิวาทสฺส ผลานีติ นินฺทา จ ปสํสา
จ ชยปราชยาทีนิ วา ตํสภาคานิ. เอตมฺปิ ทิสฺวาติ "นินฺทา อนิฏฺฐา เอว,
ปสํสา นาลํ สมายา"ติ เอตมฺปิ วิวาทผเล อาทีนวํ ทิสฺวา. เขมาภิปสฺสํ
อวิวาทภูมินฺติ อวิวาทภูมึ นิพฺพานํ เขมนฺติ ปสฺสมาโน.
    อปฺปกนฺติ มนฺทํ. ปริตฺตกนฺติ โถกํ. โอมกนฺติ เหฏฺฐิมกํ. ลามกนฺติ ปาปกํ.
สมายาติ ราคาทีนํ สมนตฺถาย. อุปสมายาติ อุปรูปริ สมนตฺถาย. วูปสมายาติ
สนฺนิสีทาปนตฺถาย. นิพฺพานายาติ อมตมหานิพฺพานตฺถาย. ปฏินิสฺสคฺคายาติ มคฺเคน
กิเลสานํ นิสฺสชฺชนตฺถาย. ปฏิปสฺสทฺธิยาติ ผเลน ปฏิปสฺสทฺธานํ อนุปฺปชฺชนตฺถาย
นาลํ.
@เชิงอรรถ:  ฉ.ม. มหาพฺยูห... เอวมุปริปิ
    [๑๓๒] เอวํ หิ อวิวาทมาโน:- ยา กาจิมาติ คาถา. ตตฺถ สมฺมติโยติ ๑-
ทิฏฺฐิโย. ปุถุชฺชาติ ปุถุชฺชนสมฺภวา. โส อุปยํ กิเมยฺยาติ โส อุปคนฺตพฺพฏฺเฐน
อุปยํ รูปาทีสุ เอกมฺปิ ธมฺมํ กึ อุเปยฺย, เกน วา การเณน อุเปยฺย. ทิฏฺเฐ
สุเต ขนฺติมกุพฺพมาโนติ ทิฏฺฐสุตสุทฺธีสุ ขนฺตึ ๒- อกโรนฺโต.
    ปุถุชฺชเนหิ ชนิตา วาติ ปุถุชฺชเนหิ อุปฺปาทิตา วา. ตา สมฺมุติโยติ เอตา
ทิฏฺฐิโย. ปุถุ นานาชเนหิ ชนิตา วาติ อเนกวิเธหิ ทิฏฺฐิคติเกหิ อุปฺปาทิตา วา.
เนตีติ น เอติ. น อุเปตีติ สมีปํ น เอติ. น อุปคจฺฉตีติ นิวตฺตติ. นาภินิวิสตีติ
ปวิสิตฺวา น ปติฏฺฐาติ. ๓-
    [๑๓๓] อิโต พาหิรา ปน:- สีลุตฺตมาติ คาถา. ตสฺสตฺโถ:- สีลเมว
"อุตฺตมนฺ"ติ มญฺญมานา สีลุตฺตมาติ เอเก โภนฺโต สญฺญมมตฺเตน สุทฺธึ วทนฺติ,
หตฺถิวตาทิวตํ สมาทาย อุปฏฺฐิตาเส. อิเธว ทิฏฺฐิยํ อสฺส สตฺถุโน สุทฺธึ ภวูปนีตา
ภวชฺโฌสิตา สมานา วทนฺติ, อปิ จ เต กุสลาวทานา "กุสลา มยนฺ"ติ เอวํวาทา.
    [๑๓๔] เอวํ สีลุตฺตเมสุ จ เตสุ ตถา ปฏิปนฺโน โย โกจิ:- สเจ จุโตติ
คาถา. ตสฺสตฺโถ:- สเจ ตโต สีลวตโต ปรวิจฺฉินฺทเนน วา อสมฺภุณนฺโต ๔-
วา จุโต โหติ, โส ตํ สีลพฺพตกมฺมํ ปุญฺญาภิสงฺขาราทิกมฺมํ วา วิราธยิตฺวา
เวธตี. น เกวลญฺจ เวธติ, อปิ จ โข ตํ สีลพฺพตสุทฺธึ ปชปฺปตี จ วิปฺปลปติ
จ ปตฺถยตี จ. กิมิว? สตฺถาว หีโน ปวสํ ฆรมฺหาติ, ฆรมฺหา ปวสนฺโต
สตฺถโต หีโน ยถา ตํ ฆรํ วา สตฺถํ วา ปตฺถยตีติ.
    ปรวิจฺฉินฺทนาย วาติ ปเรน วาริยมาโน วา. อนภิสมฺภุณนฺโต วาติ ตํ
ปฏิปตฺตึ อสมฺปาเทนฺโต วา.
@เชิงอรรถ:  ฉ.ม. สมฺมุติโย. เอวมุปริปิ   ฉ.ม. เปมํ   ฉ.ม. นปฺปติฏฺฐติ   ฉ.ม.
@อนภิสมฺภุณนฺโต
    อญฺญาย อปรทฺโธติ นิพฺพาเนน ปริหีโน มคฺคโต วา. ตํ วา สตฺถํ
อนุพนฺธตีติ ตํ วา สตฺถํ สพฺพตฺถ ปจฺฉโต คจฺฉติ.
    [๑๓๕] เอวํ ปน สีลุตฺตมานํ ปเวธนการณํ อริยสาวโก สีลพฺพตํ วาปิ ปหาย
สพฺพนฺติ คาถา. ตตฺถ สาวชฺชานวชฺชนฺติ สพฺพากุสลํ โลกิยกุสลญฺจ. เอตํ สุทฺธึ
อสุทฺธินฺติ อปตฺถยาโนติ ปญฺจกามคุณาทิเภทํ สุทฺธึ อกุสลาทิเภทํ อสุทฺธิญฺจ
อปตฺถยมาโน. วิรโต จเรติ สุทฺธิยา อสุทฺธิยา จ วิรโต จเรยฺย. สนฺติมนุคฺคหายาติ
ทิฏฺฐึ อคฺคเหตฺวา.
    กณฺหํ กณฺหวิปากนฺติ อกุสลกมฺมํ อกุสลวิปากทายกํ. สุกฺกํ สุกฺกวิปากนฺติ
โลกิยกุสลํ อตฺตนา สทิสํ สุกฺกวิปากทายกํ.
    นิยามาวกฺกนฺตินฺติ มคฺคปวิสนํ. เสกฺขาติ สตฺต เสกฺขา. อคฺคธมฺมนฺติ
อุตฺตมธมฺมํ, อรหตฺตผลํ.
    [๑๓๖] เอวํ อิโต พาหิรเก สีลุตฺตเม สํยเมน วิสุทฺธิวาเท เตสญฺจ วิฆาตํ ๑-
สีลพฺพตปฺปหายิโน อรหโต จ ปฏิปตฺตึ ทสฺเสตฺวา อิทานิ อญฺญถาปิ สุทฺธิวาเท
พาหิรเก ทสฺเสนฺโต "ตมูปนิสฺสายา"ติ คาถมาห. ตสฺสตฺโถ:- สนฺตญฺเญปิ
สมณพฺราหฺมณา, เต  ชิคุจฺฉิตํ อมรนฺตปํ วา ทิฏฺฐสุทฺธิอาทีสุ วา อญฺญตรํ ๒-
อุปนิสฺสาย อกิริยทิฏฺฐิยา วา อุทฺธํสรา หุตฺวา ภวาภเวสุ อวีตตณฺหา สุทฺธึ
อนุตฺถุนนฺติ วทนฺติ กเถนฺตีติ.
    ตโปชิคุจฺฉวาทาติ กายปีฬนาทิตเปน ปาปหิรียนวาทา. ตโปชิคุจฺฉสาราติ
เตเนว ตเปน หิรียนสารวนฺโต. อุทฺธํสราวาทาติ สํสาเรน สุทฺธึ กถยนฺตา.
    [๑๓๗] เอวํ เตสํ อวีตตณฺหานํ สุทฺธึ อนุตฺถุนนฺตานํ โยปิ สุทฺธิปฺปตฺตเมว
@เชิงอรรถ:  ฉ.ม. วิปากํ   ฉ.ม. อญฺญตรญฺญตรํ
อตฺตานํ มญฺเญยฺย, ตสฺสาปิ อวีตตณฺหตฺตา ภวาภเวสุ ตํ ตํ วตฺถุํ ปตฺถยมานสฺส
หิ ชปฺปิตานิ ปุนปฺปุนํ โหนฺติเยวาติ อธิปฺปาโย. ตณฺหา หิ อาเสวิตา ตณฺหํ
วฑฺฒยเตว, น เกวลญฺจ ชปฺปิตานิ, ปเวธิตํ วาปิ ปกปฺปิเตสุ, ตณฺหาทิฏฺฐีหิ
จสฺส ปกปฺปิเตสุ วตฺถูสุ ปเวทิตมฺปิ โหตีติ วุตฺตํ โหติ. ภวาภเวสุ ปน วีตตณฺหตฺตา
อายตึ จุตูปปาโต อิธ ยสฺส นตฺถิ, ส เกน เวเธยฺย กุหึว ชปฺเปติ อยเมติสฺสา
คาถาย สมฺพนฺโธ.
    อาคมนนฺติ ปุน อาคมนํ. คมนนฺติ อิโต อญฺญตฺถ คมนํ. คมนาคมนนฺติ
อิโต คนฺตฺวา ปุน นิวตฺตนํ. กาลนฺติ มรณํ. คตีติ คมนวเสน คติยา คนฺตพฺพํ.
    [๑๓๘] ยมาหุ ธมฺมนฺติ ปุจฺฉาคาถา.
    [๑๓๙] อิทานิ ยสฺมา เอโกปิ เอตฺถ วาโท สจฺโจ นตฺถิ, เกวลํ ทิฏฺฐิมตฺตเกน
หิ เต วทนฺติ, ตสฺมา ตมตฺถํ ทสฺเสนฺโต "สกํ หี"ติ อิมํ  ตาว วิสฺสชฺชนคาถมาห.
ตตฺถ สมฺมุตินฺติ ทิฏฺฐึ. อโนมนฺติ อนูนํ.
    [๑๔๐] เอวเมเตสุ สกํ ธมฺมํ ปริปุณฺณํ พฺรูวนฺเตสุ อญฺญสฺส ธมฺมํ ปน
หีนนฺติ วทนฺเตสุ ยสฺส กสฺสจิ:- ปรสฺส เจ วมฺภยิเตน หีโนติ คาถา.
ตสฺสตฺโถ:- ยทิ ปรสฺส นินฺทิตการณา หีโน ภเวยฺย, น โกจิ ธมฺเมสุ วิเสสิ
อคฺโค ภเวยฺย. กึการณา? ปุถู  หิ อญฺญสฺส วทนฺติ ธมฺมํ นิหีนโต สพฺเพว
เต สมฺหิ ทฬฺหํ วทานา สกธมฺเม ทฬฺหวาทา เอว.
    วมฺภยิตการณาติ ธํสิตการณา. ครหิตการณาติ ลามกกตการณา.
อุปวทิตการณาติ อกฺโกสิตการณา. สกายนนฺติ สกมคฺคํ.
    [๑๔๑] กิญฺจิ ภิยฺโย:- สทฺธมฺมปูชาติ คาถา. ตสฺสตฺโถ:- เต จ ติตฺถิยา
ยถา ปสํสนฺติ สกายนานิ, สทฺธมฺมปูชาปิ เตสํ ตเถว วตฺตติ. เต หิ อติวิย
สตฺถาราทีนิ สกฺกโรนฺติ. ตตฺถ ยทิ เต ปมาณา สิยุํ, เอวํ สนฺเต สพฺเพว
วาทา ตถิยา ๑- ภเวยฺยุํ. กึการณา? สุทฺธิ หิ เตสํ ปจฺจตฺตเมว. น สา อญฺญตฺถ
สิชฺฌติ, นาปิ ปรมตฺถโต อตฺถิ. ๒- อตฺตนิ ทิฏฺฐิคาหมตฺตเมว หิ ตํ เตสํ
ปรเนยฺยพุทฺธีนํ. ๓- ปจฺจตฺตเมวาติ ปาเฏกฺกเมว.
    [๑๔๒] โย ปน วิปรีตโต พาหิตปาปตฺตา พฺราหฺมโณ, ตสฺส น พฺราหฺมณสฺส
ปรเนยฺยมตฺถีติ คาถา. ตสฺสตฺโถ:- พฺราหฺมณสฺส หิ "สพฺเพ สงฺขารา
อนิจฺจา"ติอาทินา ๔- นเยน สุทิฏฺฐตฺตา ปเรน เนตพฺพํ ญาณํ นตฺถิ. ทิฏฺฐิธมฺเมสุ
"อิทเมว สจฺจนฺ"ติ นิจฺฉินิตฺวา สมุคฺคหิตมฺปิ นตฺถิ. ตํการณา โส ทิฏฺฐิกลหานิ
อติกฺ กนฺโต, น หิ โส เสฏฺฐโต ปสฺสติ ธมฺมมญฺญํ อญฺญตฺร สติปฏฺฐานาทีหิ.
    น ปรเนยฺโยติ ปเรน เนตพฺโพ ชานาเปตพฺโพ น โหติ. น ปรปตฺติโย
น ปรปจฺจโยติ ปเรสํ ปจฺเจตพฺโพ น โหติ. น ปรปฏิพทฺธคูติ ปเรสํ ปฏิพทฺธคมโน
น โหติ.
    [๑๔๓] ชานามีติ คาถาย สมฺพนฺโธ อตฺโถ จ:- เอวํ ตาว ปรมตฺถพฺราหฺมโณ
น หิ เสฏฺฐโต ปสฺสติ ธมฺมมญฺญํ, อญฺเญ ปน ติตฺถิยา ปรจิตฺตญาณาทีหิ
ชานนฺตาปิ ปสฺสนฺตาปิ "ชานามิ ปสฺสามิ ตเถว เอตนฺ"ติ เอวํ วทนฺตาปิ
จ ทิฏฺฐิยา สุทฺธึ ปจฺเจนฺติ. กสฺมา? ยสฺมา เตสุ เอโกปิ อทฺทกฺขิ เจ อทฺทส
เจปิ เตน ปรจิตฺตญาณาทินา ยถาภูตมตฺถํ, กิญฺหิ ตุมสฺส เตน ตสฺส เตน
ทสฺสเนน กึ กตํ, กึ ทุกฺขปริญฺญา สาธิตา, อุทาหุ สมุทยปฺปหานาทีนํ อญฺญตรํ,
ยโต สพฺพถาปิ อติกฺกมิตฺวา อริยมคฺคํ เต ติตฺถิยา อญฺเญเนว วทนฺติ สุทฺธึ,
อติกฺกมิตฺวา วา เต ติตฺถิเย พุทฺธาทโย อญฺเญเนว วทนฺติ สุทฺธินฺติ.
@เชิงอรรถ:  ม. ตถิวา   ฉ.ม. อยํ ปาโฐ น ทิสฺสติ
@ ฉ.ม. ปรปจฺจยเนยฺยพุทฺธีนํ   ที.มหา. ๑๐/๒๗๒/๑๗๑, สํ.ส. ๑๕/๑๘๖/๑๙๐, ขุ.เถร.
@๒๖/๑๑๖๘/๔๑๗
    [๑๔๔] ปสฺสํ นโรติ คาถาย สมฺพนฺโธ อตฺโถ จ:- กิญฺจิ ภิยฺโย?
ยฺวายํ ปรจิตฺตญาณาทีหิ อทฺทกฺขิ. โส ปสฺสํ นโร ทกฺขติ นามรูปํ, น ตโต
ปรํ,  ทิสฺวาน วา ญสฺสติ ตานิเมว นามรูปานิ นิจฺจโต สุขโต วา, น อญฺญถา,
โส เอวํ ปสฺสนฺโต กามํ พหุํ ปสฺสตุ อปฺปกํ วา นามรูปํ นิจฺจโต สุขโต
จ อถสฺส เอวรูเปน ทสฺสเนน  น หิ เตน สุทฺธึ กุสลา วทนฺติ.
    [๑๔๕] นิวิสฺสวาทีติ คาถาย สมฺพนฺโธ อตฺโถ จ:- เตน จ ทสฺสเนน
สุทฺธิยา อสติยาปิ โย "ชานามิ ปสฺสามิ ตเถว เอตนฺ"ติ เอวํ นิวิสฺสวาที, เอตํ
วา ทสฺสนํ ปฏิจฺจ ทิฏฺฐิยา สุทฺธึ ปจฺเจนฺโต "อิทเมว สจฺจนฺ"ติ เอวํ นิวิสฺสวาที,
โส สุพฺพินโย น โหติ ตํ ตถา ปกปฺปิตํ อภิสงฺขตํ ทิฏฺฐึ ปุรกฺขราโน. ๑- โส
หิ ยํ สตฺถาราทึ นิสฺสิโต, ตตฺเถว สุภํ วทาโน สุทฺธึ วโท, ๒- "ปริสุทฺธิวาโท
ปริสุทฺธิทสฺสโน วา อหนฺ"ติ อตฺตานํ มญฺญมาโน ตตฺถ ตถทฺทสา โส, ตตฺถ
สกาย ทิฏฺฐิยา อวิปรีตเมว โส อทฺทส. ยถา สา ทิฏฺฐิ ปวตฺตติ, ตเถว ตํ
อทฺทส, น อญฺญถา ปสฺสิตุํ อิจฺฉตีติ อธิปฺปาโย.
    นิวิสฺสวาทีติ ปติฏฺฐหิตฺวา กเถนฺโต. ทุพฺพินโยติ วิเนตุํ ทุกฺโข.
ทุปฺปญฺญาปโยติ ญาเปตุํ จิตฺเตน ลพฺภาเปตุํ ทุกฺโข. ทุนฺนิชฺฌาปโยติ จิตฺเตน
วีมํสิตฺวา คหณตฺถํ ปุนปฺปุนํ นิชฺฌาปยิตุํ ทุกฺโข. ทุปฺเปกฺขาปโยติ อิกฺขาปยิตุํ
ทุกฺโข. ทุปฺปสาทโยติ จิตฺเต ปสาทํ อุปฺปาเทตุํ ทุกฺโข.
    อปสฺสีติ ญาเณน ปฏิเวธํ ปาปุณิ. ปฏิวิชฺฌีติ จิตฺเตน อวโพธํ ปาปุณิ.
    [๑๔๖] เอวํ ปกปฺปิตํ ทิฏฺฐึ ปุรกฺขราเนสุ ติตฺถิเยสุ:- น พฺราหฺมโณ
กปฺปมุเปติ สงฺขาติ คาถา. ตตฺถ สงฺขาติ สงฺขาย, ชานิตฺวาติ อตฺโถ. นปิ
ญาณพนฺธูติ สมาปตฺติญาณาทินา อกตตณฺหาทิฏฺฐิพนฺธุ. ตตฺถ วิคฺคโห:- นาปิ
@เชิงอรรถ:  ก. ทิฏฺฐิปุเรกฺขราโน   ก. สุทฺธํ วทาโน สุทฺธิวาโท
อสฺส ญาเณน กโต พนฺธุ อตฺถีติ นปิ ญาณพนฺธุ. สมฺมุติโยติ ทิฏฺฐิสมฺมุติโย.
ปุถุชฺชาติ ปุถุชฺชนสมฺภวา. อุคฺคหณนฺติ มญฺเญติ อุคฺคหณนฺติ อญฺเญ, อญฺเญ ตา
สมฺมุติโย อุคฺคณฺหนฺตีติ วุตฺตํ  โหติ.
    อุเปกฺขตีติ อุปปตฺติโต อปกฺขปติโต หุตฺวา ปสฺสติ.
    [๑๔๗] กิญฺจิ ภิยฺโย:- วิสฺสชฺช คนฺถานีติ คาถา. ตตฺถ อนุคฺคโหติ
อุคฺคหณวิรหิโต, โสปิ นาสฺส อุคฺคโหติ อนุคฺคโห. น วา อุคฺคณฺหาตีติ อนุคฺคโห.
    คนฺเถ โวสฺสชฺชิตฺวา วาติ อภิชฺฌาทิเก คนฺเถ จชิตฺวา. วิสฺสชฺชาติ ปุน
อนาทิยนวเสน ชหิตฺวา. คธิเตติ ฆฏิเต. คนฺถิเตติ สุตฺเตน สงฺคหิเต วิย คนฺถิเต.
พนฺเธติ สุฏฺฐุ พนฺเธ. วิพนฺเธติ วิวิธา พนฺเธ. ปลิพุนฺเธติ สมนฺตโต พนฺธเนน
พนฺเธ. พนฺธเนติ กิเลสพนฺธเน. โผฏยิตฺวาติ ปปฺโผเฏตฺวา. สจฺจํ วิสฺสชฺชํ ๑-
กโรนฺตีติ วิสงฺขริตฺวา อปริโภคํ กโรนฺติ. วิโกเปนฺตีติ จุณฺณวิจุณฺณํ กโรนฺติ.
    [๑๔๘] กิญฺจิ ภิยฺโย:- โส เอวรูโป:- ปุพฺพาสเวติ คาถา. ตตฺถ ปุพฺพาสเวติ
อตีตรูปาทีนิ อารพฺภ อุปฺปชฺชนธมฺมกิเลเส. นเวติ ปจฺจุปฺปนฺนรูปาทีนิ อารพฺภ
อุปฺปชฺชนธมฺเม. น ฉนฺทคูติ ฉนฺทาทิวเสน น คจฺฉติ. อนตฺตครหีติ กตากตวเสน
อตฺตานํ อครหนฺโต.
    [๑๔๙] เอวํ อนตฺตครหี จ:- ส สพฺพธมฺเมสูติ คาถา. ตตฺถ สพฺพธมฺเมสูติ
ทฺวาสฏฺฐิทิฏฺฐิธมฺเมสุ "ยํ กิญฺจิ ทิฏฺฐํ วา"ติ เอวํ ปเภเทสุ. ปนฺนภาโรติ
ปติตภาโร. น กปฺเปตีติ น กปฺปิโย, ทุวิธมฺปิ กปฺปํ น กโรตีติ อตฺโถ. นูปรโตติ
ปุถุชฺชนกลฺยาณกเสกฺขา วิย อุปรติสมงฺคีปิ โน  โหติ. น ปตฺถิโยติ นิตฺตโณฺห.
ตณฺหา หิ ปตฺถยตีติ ปตฺถิยา, นาสฺส ปตฺถิยาติ น ปตฺถิโย. อิโต ปรญฺจ
@เชิงอรรถ:  ก. สชฺชํ วิสชฺชํ
เหฏฺฐา จ ตตฺถ ตตฺถ วุตฺตนยตฺตา อุตฺตานตฺถเมว. เอวํ อรหตฺตนิกูเฏเนว เทสนํ
นิฏฺฐาเปสิ, เทสนาปริโยสาเน ปุราเภทสุตฺเต ๑- วุตฺตสทิโส เอวาภิสมโย อโหสีติ.
                  สทฺธมฺมปชฺโชติกาย มหานิทฺเทสฏฺฐกถาย
                   มหาวิยูหสุตฺตนิทฺเทสวณฺณนา นิฏฺฐิตา.
                       -------------------
@เชิงอรรถ:  ขุ.มหา. ๒๙/๒๗๔/๒๕๑ (สฺยา)


             อรรถกถาภาษาบาลีอักษรไทย เล่มที่ ๔๕ หน้า ๓๖๗-๓๗๔. http://84000.org/tipitaka/atthapali/read_th.php?B=45&A=8477&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=45&A=8477&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=29&i=600              เนื้อความพระไตรปิฎกฉบับหลวง :- http://84000.org/tipitaka/read/r.php?B=29&A=6833              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=29&A=7358              The Pali Tipitaka in Roman Character :- http://84000.org/tipitaka/read/roman_read.php?B=29&A=7358              สารบัญพระไตรปิฎกเล่มที่ ๒๙ http://84000.org/tipitaka/read/?index_29

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]