อรรถกถาเล่มที่ ๕๐ ภาษาบาลีอักษรไทย
 อป.อ.๒ (วิสุทฺธ.๒)

                         ๑๒. มหาปริวารวคฺค
                 ๑๑๓. ๑. มหาปริวารกตฺเถราปทานวณฺณนา
     วิปสฺสี นาม ภควาติอาทิกํ อายสฺมโต มหาปริวารกตฺเถรสฺส อปทานํ. อยมฺปิ
ปุริมชินวเรสุ กตาธิกาโร ตตฺถ ตตฺถ ภเว วิวฏฺฏูปนิสฺสยานิ อุปจินนฺโต วิปสฺสิสฺส
ภควโต อุปฺปนฺนสมเย ยกฺขโยนิยํ นิพฺพตฺโต อเนกยกฺขสตสหสฺสปริวาโร เอกสฺมึ
ขุทฺทกทีเป ทิพฺพสุขํ อนุภวนฺโต วิหรติ. ตสฺมิญฺจ ทีเป เจติยาภิโสภิโต วิหาโร
อตถิ, ตตฺถ ภควา อคมาสิ. อถ โข ๑- ยกฺขเสนาธิปติ ตตฺถ กตภาวํ ทิสฺวา
ทิพฺพวตฺถานิ คเหตฺวา คนฺตฺวา ภควนฺตํ วนฺทิตฺวา ทิพฺพวตฺเถหิ ปูเชสิ, สปริวาโร
สรณํ อคมาสิ. โส เตน ปุญฺญกมฺเมน ตโต จุโต เทวโลเก นิพฺพตฺติตฺวา ตตฺถ
ฉกามาวจรสุขํ อนุภวิตฺวา ตโต จุโต มนุสฺเสสุ อคฺคจกฺกวตฺติอาทิสุขมนุภวิตฺวา
อปรภาเค อิมสฺมึ พุทฺธุปฺปาเท กุลเคเห นิพฺพตฺโต วิญฺญุตํ ปตฺโต สตฺถริ
ปสีทิตฺวา ปพฺพชิตฺวา ๒- นจิรสฺเสว อรหา อโหสิ.
     [๑-๒] โส อปรภาเค อตฺตโน ปุพฺพกมฺมํ สริตฺวา โสมนสฺสชาโต
ปุพฺพจริตาปทานํ ปกาเสนฺโต วิปสฺสี นาม ภควาติอาทิมาห. ตตฺถ วิเสสํ ปรมตฺถํ
นิพฺพานํ ปสฺสตีติ วิปสฺสี, วิวิเธ สติปฏฺฐานาทโย สตฺตตึสโพธิปกฺขิยธมฺเม
ปสฺสตีติ วา วิปสฺสี, วิวิเธ อเนกปฺปกาเร โพธเนยฺยสตฺเต วิสุํ วิสุํ ปสฺสตีติ วา
วิปสฺสี, โส วิปสฺสี ภควา ทีปเจติยํ ทีเป ปูชนียฏฺฐานํ วิหารมคมาสีติ อตฺโถ.
เสสํ สพฺพตฺถ อุตฺตานเมวาติ.
                 มหาปริวารกตฺเถราปทานวณฺณนา นิฏฺฐิตา.
                          ------------
@เชิงอรรถ: ๑ ฉ.ม. โส.                          ๒ ฉ.ม. ปพฺพชิโต.

             อรรถกถาภาษาบาลีอักษรไทย เล่มที่ ๕๐ หน้า ๑๕๕.
http://84000.org/tipitaka/atthapali/read_th.php?B=50&A=3349&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=50&A=3349&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=32&i=113
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=32&A=3469
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=32&A=4267
             The Pali Tipitaka in Roman Character :-
http://84000.org/tipitaka/read/roman_read.php?B=32&A=4267
             สารบัญพระไตรปิฎกเล่มที่ ๓๒
http://84000.org/tipitaka/read/?index_32