อรรถกถาเล่มที่ ๕๐ ภาษาบาลีอักษรไทย
 อป.อ.๒ (วิสุทฺธ.๒)

                  ๑๑๕. ๓. สรณคมนิยตฺเถราปทานวณฺณนา
     อุภินฺนํ เทวราชูนนฺติอาทิกํ อายสฺมโต สรณคมนิยตฺเถรสฺส อปทานํ. อยมฺปิ
ปุริมพุทฺเธสุ กตาธิกาโร ตตฺถ ตตฺถ ภเว ๑- วิวฏฺฏูปนิสฺสยานิ ปุญฺญานิ อุปจินนฺโต
ปทุมุตฺตเร ภควติ อุปฺปนฺเน อยํ หิมวนฺเต เทวราชา หุตฺวา นิพฺพตฺติ, ตสฺมึ
อปเรน ๒- ยกฺขเทวรญฺญา สทฺธึ สงฺคามตฺถาย อุปฏฺฐิเต เทฺว อเนกยกฺขสหสฺส-
ปริวารา ผลกาวุธาทิหตฺถา สงฺคามตฺถาย สมุปพฺยูฬฺหา อเหสุํ. ตทา ปทุมุตฺตโร
ภควา เตสุ สตฺเตสุ การุญฺญํ อุปฺปาเทตฺวา อากาเสน ตตฺถ คนฺตฺวา สปริวารานํ
ทฺวินฺนํ เทวราชูนํ ธมฺมํ เทเสสิ. ตทา เต สพฺเพ ผลกาวุธานิ ฉฑฺเฑตฺวา
ภควนฺตํ คารวพหุมาเนน วนฺทิตฺวา สรณํ อคมํสุ. เตสํ อยํ ปฐมํ สรณํ อคมาสิ.
โส เตน ปุญฺเญน เทวมนุสฺเสสุ สํสรนฺโต อุภยสมฺปตฺติโย อนุภวิตฺวา อิมสฺมึ
พุทฺธุปฺปาเท กุลเคเห นิพฺพตฺโต วุทฺธิมนฺวาย สตฺถริ ปสนฺโน ปพฺพชิตฺวา
นจิรสฺเสว อรหา อโหสิ.
     [๒๐] โส อปรภาเค ปุพฺพกุสลํ สริตฺวา โสมนสฺสชาโต ปุพฺพจริตาปทานํ
ปกาเสนฺโต อุภินฺนํ เทวราชูนนฺติอาทิมาห. ตตฺถ สุจิโลมขรโลมอาฬวกกุมฺภีร-
กุเวราทโย วิย นามโคตฺเตน อปากฏา เทฺว ยกฺขราชาโน อญฺญาปเทเสน ทสฺเสนฺโต
"อุภินฺนํ เทวราชูนนฺติอาทิมาห. ๓- สงฺคาโม สมุปฏฺฐิโตติ ๔- สํ สุฏฺฐุ คาโม
กลหตฺถาย อุปคมนนฺติ สงฺคาโม, โส สงฺคาโม สํ สุฏฺฐุ อุปฏฺฐิโต, เอกฏฺฐาเน
อุปคนฺตฺวา ฐิโตติ อตฺโถ. อโหสิ สมุปพฺยูโฬฺหติ สํ สุฏฺฐุ อุปสมีเป ราสิภูโตติ
อตฺโถ.
     [๒๑] สํเวเชสิ มหาชนนฺติ เตสํ ราสิภูตานํ ยกฺขานํ อากาเส นิสินฺโน
ภควา จตุสจฺจธมฺมเทสนาย สํ สุฏฺฐุ เวเชสิ, อาทีนวทสฺสเนน คณฺหาเปสิ
วิญฺญาเปสิ โพเธสีติ อตฺโถ. เสสํ สพฺพตฺถ อุตฺตานตฺถเมวาติ.
                  สรณคมนิยตฺเถราปทานวณฺณนา นิฏฺฐิตา.
                           -----------
@เชิงอรรถ: ๑ ฉ.ม. อุปฺปนฺนุปฺปนฺนภเว.                      ๒ สี. อาสนฺเน.
@๓ อุภินฺนํ เทวราชูนนฺติ อาห (?).                 ๔ ปาฬิ. ปจฺจุปฏฺฐิโต.

             อรรถกถาภาษาบาลีอักษรไทย เล่มที่ ๕๐ หน้า ๑๕๗.
http://84000.org/tipitaka/atthapali/read_th.php?B=50&A=3391&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=50&A=3391&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=32&i=115
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=32&A=3512
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=32&A=4314
             The Pali Tipitaka in Roman Character :-
http://84000.org/tipitaka/read/roman_read.php?B=32&A=4314
             สารบัญพระไตรปิฎกเล่มที่ ๓๒
http://84000.org/tipitaka/read/?index_32