Atthakatha Book 55 : PALI ROMAN
Pañca.A. (paramatthadī.)

                       4. Indriyabaddhakathāvaṇṇanā
     [786-787] Idāni indriyabaddhakathā nāma hoti. Tattha duvidhaṃ
dukkhaṃ indriyabaddhaṃ anindriyabaddhañca. Indriyabaddhaṃ dukkhavatthutāya dukkhaṃ,
anindriyabaddhaṃ udayabbayapaṭipīḷanaṭṭhena "yadaniccaṃ taṃ dukkhan"ti saṅgahitattā
dukkhaṃ. Imaṃ vibhāgaṃ aggahetvā "yassa pariññāya bhagavati brahmacariyaṃ vussati,
taṃ indriyabaddhameva dukkhaṃ, na itaran"ti yesaṃ laddhi seyyathāpi hetuvādānaṃ,
te sandhāya itarassāpi 1- dukkhabhāvaṃ dassetuṃ indriyabaddhaññevāti pucchā
sakavādissa, paṭiññā itarassa. Atha naṃ "yasmā bhagavatā `yadaniccaṃ taṃ dukkhan'ti
vuttaṃ, tasmā indriyabaddheneva tena aniccena bhavitabban"ti codetuṃ
indriyabaddhaññeva aniccantiādimāha. Nanu anindriyabaddhaṃ aniccanti nanu
paṭhavīpabbatapāsāṇādi anindriyabaddhampi aniccanti attho.
     [788] Na vattabbaṃ indriyabaddhaññeva dukkhanti pañhe āmantāti
paṭiññā sakavādissa. Anindriyabaddhañhi dukkhadomanassānaṃ ārammaṇaṃ hoti.
Uṇhakālasmiñhi aggi sītakāle ca vāto dukkhassārammaṇaṃ, niccampi bhogavināsādayo
domanassassa. Tasmā vināpi aniccaṭṭhena anindriyabaddhaṃ dukkhanti vattabbaṃ.
Kammakilesehi pana anibbattattā dukkhaṃ ariyasaccanti na vattabbaṃ, tathā
maggena apariññeyyattā. Yasmā pana tiṇakaṭṭhādinirodho vā utubījādinirodho
vā dukkhanirodho 2- ariyasaccaṃ nāma na hoti, tasmā indriyabaddhaṃ dukkhañceva
@Footnote: 1 cha.Ma. tesaṃ itarassāpi   2 cha.Ma. dukkhanirodhaṃ
---------------------------------------------------------------------------------------------
page293.
Ariyasaccañca, itaraṃ pana dukkhamevāti idaṃ nānattaṃ dassetuṃ paṭijānāti. Yathā
indriyabaddhassātiādivacanaṃ indriyabaddhassa pariññāya brahmacariyavāsaṃ
pariññātassa puna anuppattiṃ dīpeti. Tenevettha sakavādinā paṭikkhepo kato,
"yadaniccaṃ taṃ dukkhan"ti vacanena pana saṅgahitassa anindriyabaddhassa dukkhabhāvaṃ
paṭisedhetuṃ na sakkoti, tasmā asādhakanti.
                     Indriyabaddhakathāvaṇṇanā niṭṭhitā.
                          ------------


             The Pali Atthakatha in Roman Book 55 page 292-293.
http://84000.org/tipitaka/atthapali/rm_line.php?B=55&A=6580&pagebreak=1
             อรรถกถาบาลีอักษรไทย :-
http://84000.org/tipitaka/atthapali/read_th.php?B=55&A=6580&pagebreak=1
             อ่านอรรถกถาแปลไทย :-
http://84000.org/tipitaka/attha/attha.php?b=37&i=1701
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=37&A=17751
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=37&A=11491
             The Pali Tipitaka in Roman Character :-
http://84000.org/tipitaka/read/roman_read.php?B=37&A=11491
             Contents of The Tipitaka Volume 36
http://84000.org/tipitaka/read/?index_37