ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๓๓ ภาษาบาลีอักษรไทย เถร.อ.๒ (ปรมตฺถที.๒)

หน้าที่ ๑.

ปรมตฺถทีปนี นาม ขุทฺทกนิกายฏฺฐกถา เถรคาถาวณฺณนา (ทุติโย ภาโค) ----------------- นโม ตสฺส ภควโต อรหโต สมฺมาสมฺพุทฺธสฺส. ๔. จตุกฺกนิปาต ๓๒๓. ๑. นาคสมาลตฺเถรคาถาวณฺณนา อลงฺกตาติอาทิกา อายสฺมโต นาคสมาลตฺเถรสฺส คาถา. กา อุปฺปตฺติ? อยมฺปิ ปทุมุตฺตรสฺส ภควโต กาเล กุลเคเห นิพฺพตฺติตฺวา วิญฺญุตํ ปตฺโต คิมฺหสมเย ๑- สุริยาตปสนฺตตฺตาย ภูมิยา คจฺฉนฺตํ สตฺถารํ ทิสฺวา ปสนฺนมานโส ฉตฺตํ อทาสิ. โส เตน ปุญฺญกมฺเมน เทวมนุสฺเสสุ สํสรนฺโต อิมสฺมึ พุทฺธุปฺปาเท สกฺยราชกุเล นิพฺพตฺติตฺวา นาคสมาโลติ ลทฺธนาโม วยปฺปตฺโต ญาติสมาคเม ปฏิลทฺธสทฺโธ ปพฺพชิตฺวา กิญฺจิ กาลํ ภควโต อุปฏฺฐาโก อโหสิ. โส เอกทิวสํ นครํ ปิณฺฑาย ปวิฏฺโฐ อลงฺกตปฏิยตฺตํ อญฺญตรํ นจฺจกึ มหาปเถ ตูริเยสุ วชฺชนฺเตสุ นจฺจนฺตึ ทิสฺวา "อยํ จิตฺตกิริยวาโยธาตุ วิปฺผารวเสน กรชกายสฺส ตถา ตถา ปริวตฺติ, อโห อนิจฺจา สงฺขารา"ติ ขยวยํ ปฏฺฐเปตฺวา วิปสฺสนํ อุสฺสุกฺกาเปตฺวา อรหตฺตํ ปาปุณิ. เตน วุตฺตํ อปทาเน ๒-:- "องฺคารชาตา ปฐวี กุกฺกุฬานุคตา มหี ปทุมุตฺตโร ภควา อพฺโภกาสมฺหิ จงฺกมิ. @เชิงอรรถ: สี.,อิ. ฆมฺมสมเย ขุ.อป. ๓๓/๔๗/๗๒ เอกฉตฺติยตฺเถราปทาน (สฺยา)

--------------------------------------------------------------------------------------------- หน้าที่ ๒.

ปณฺฑรํ ฉตฺตมาทาย อทฺธานํ ปฏิปชฺชหํ ตตฺถ ทิสฺวาน สมฺพุทฺธํ จิตฺตํ ๑- เม อุปปชฺชถ. มรีจิโยตฺถฏา ภูมิ องฺคาราว มหี อยํ อุปฏฺฐนฺติ ๒- มหาวาตา สรีรกายุเขปนา. ๓- สีตํ อุณฺหํ วิหนนติ ๔- วาตาตปนิวารณํ ปฏิคฺคณฺห อิมํ ฉตฺตํ ผสฺสยิสฺสามิ นิพฺพุตึ. อนุกมฺปโก การุณิโก ปทุมุตฺตโร มหายโส มม สงฺกปฺปมญฺญาย ปฏิคฺคณฺหิ ตทา ชิโน. ตึสกปฺปานิ เทวินฺโท เทวรชฺชมการยึ สตานํ ปญฺจกฺขตฺตุํ จ จกฺกวตฺตี อโหสหํ. ปเทสรชฺชํ วิปุลํ คณนาโต อสงฺขิยํ อนุโภมิ สกํ กมฺมํ ปุพฺเพ สุกตมตฺตโน. อยํ เม ปจฺฉิมา ชาติ จริโม วตฺตเต ภโว อชฺชาปิ เสตจฺฉตฺตํ เม สพฺพกาลํ ธรียติ. สตสหสฺเส อิโต ๕- กปฺเป ยํ ฉตฺตมททึ ตทา ทุคฺคตึ นาภิชานามิ ฉตฺตทานสฺสิทํ ผลํ. กิเลสา ฌาปิตา มยฺหํ ฯเปฯ กตํ พุทฺธสฺส สาสนนฺ"ติ. อรหตฺตํ ปน ปตฺวา:- [๒๖๗] "อลงฺกตา สุวสนา มาลินี จนฺทนุสฺสทา มชฺเฌ มหาปเถ นารี ตุริเย นจฺจติ นฏฺฏกี. [๒๖๘] ปิณฺฑิกาย ปวิฏฺโฐหํ คจฺฉนฺโต นํ อุทิกฺขิสํ อลงฺกตํ สุวสนํ มจฺจุปาสํว โอฑฺฑิตํ. @เชิงอรรถ: ฉ.ม. วิตฺติ ฉ.ม.อุปหนฺติ ฉ.ม. สรีรสฺสาสุเขปนา @ ฉ.ม. วิหนนฺตํ ฉ.ม. สตสหสฺสิโต

--------------------------------------------------------------------------------------------- หน้าที่ ๓.

[๒๖๙] ตโต เม มนสีกาโร โยนิโส อุทปชฺชถ อาทีนโว ปาตุรหุ นิพฺพิทา สมติฏฺฐถ. ๑- [๒๗๐] ตโต จิตฺตํ วิมุจฺจิ เม ปสฺส ธมฺมสุธมฺมตํ ติสฺโส วิชฺชา อนุปฺปตฺตา กตํ พุทฺธสฺส สาสนนฺ"ติ จตูหิ คาถาหิ อตฺตโน ปฏิปตฺติกิตฺตนมุเขน อญฺญํ พฺยากาสิ. ตตฺถ อลงฺกตาติ หตฺถูปคาทิอาภรเณหิ อลงฺกตคตฺตา. สุวสนาติ สุนฺทรวสนา โสภณวตฺถนิวตฺถา. มาลินีติ มาลาธารินี ๒- ปิฬนฺธิตปุปฺผมาลา. จนฺทนุสฺสทาติ จนฺทนานุเลปลิตฺตสรีรา. มชฺเฌ มหาปเถ นารี, ตุริเย นจฺจติ นฏฺฏกีติ ยถาวุตฺตฏฺฐาเน เอกา นารี นฏฺฏกี นาฏกิตฺถี นครวีถิยา มชฺเฌ ปญฺจงฺคิเก ตุริเย วชฺชนฺเต นจฺจติ, ยถาปฏฺฐปิตํ นจฺจํ กโรติ. ปิณฺฑิกายาติ ภิกฺขาย. ปวิฏฺโฐหนฺติ นครํ ปวิฏฺโฐ อหํ. คจฺฉนฺโต นํ อุทิกฺขิสนฺติ นครวีถิยํ คจฺฉนฺโต ปริสฺสยปริหรณตฺถํ วีถึ โอโลเกนฺโต ตํ นฏฺฏกึ โอโลเกสึ. กึ วิย? มจฺจุปาสํว โอฑฺฑิตนฺติ ยถา มจฺจุสฺส มจฺจุราชสฺส ปาสภูโต รูปาทิโก ๓- โอฑฺฑิโต โลเก อนุวิจริตฺวา ฐิโต เอกํเสน สตฺตานํ อนตฺถาวโห, เอวํ สาปิ อปฺปฏิสงฺขาเน ฐิตานํ อนฺธปุถุชฺชนานํ เอกํสโต อนตฺถาวหาติ มจฺจุปาสสทิสี วุตฺตา. ตโตติ ตสฺมา มจฺจุปาสสทิสตฺตา. เมติ มยฺหํ. มนสีกาโร โยนิโส อุทปชฺชถาติ "อยํ อฏฺฐิสงฺฆาโต นฺหารุสมฺพนฺโธ มํเสน อนุปลิตฺโต ฉวิยา ปฏิจฺฉนฺโน อสุจิ- ทุคฺคนฺธเชคุจฺฉปฏิกฺกูโล อนิจฺจุจฺฉาทนปริมทฺทนเภทนวิทฺธํสนธมฺโม อีทิเส วิกาเร ทสฺเสตี"ติ เอวํ โยนิโส มนสิกาโร อุปฺปชฺชิ. อาทีนโว ปาตุรหูติ เอวํ กายสฺส สภาวูปธารณมุเขน ตสฺส จ ตํนิสฺสิตานญฺจ จิตฺตเจตสิกานํ อุทยพฺพยํ ๔- @เชิงอรรถ: อิ. สนฺติฏฺฐถ สี.มาลาหารินี,อิ.มาลาภารินี ม. ชราทิโก @ สี.,อิ.อุทยพฺพยตํ

--------------------------------------------------------------------------------------------- หน้าที่ ๔.

สรสปภงฺคุตญฺจ ๑- มนสิ กโรโต เตสุ จ ยกฺขรกฺขสาทีสุ วิย ภยโต อุปฏฺฐหนฺเตสุ ตตฺถ เม ๒- อเนกาการอาทีนโว โทโส ปาตุรโหสิ, ตปฺปฏิปกฺขโต จ นิพฺพาเน อานิสํโส. นิพฺพิทา สมติฏฺฐถาติ นิพฺพินฺทนํ อาทีนวานุปสฺสนานุภาวสิทฺธํ นิพฺพิทาญาณํ มม หทเย สณฺฐาสิ, มุหุตฺตมฺปิ เตสํ รูปารูปธมฺมานํ คหเณ จิตฺตํ นาโหสิ, อญฺญทตฺถุ มุญฺจิตุกามตาทิวเสน ๓- ตตฺถ อุทาสีนเมว ชาตนฺติ อตฺโถ. ตโตติ วิปสฺสนาญาณโต ปรํ. จิตฺตํ วิมุจฺจิ เมติ โลกุตฺตรภาวนาย วตฺตมานาย มคฺคปฏิปาฏิยา สพฺพกิเลเสหิ มม จิตฺตํ วิมุตฺตํ อโหสิ. เอเตน ผลุปฺปตฺตึ ๔- ทสฺเสติ. มคฺคกฺขเณ หิ กิเลสา วิมุจฺจนฺติ นาม, ผลกฺขเณ วิมุตฺตาติ. เสสํ วุตฺตนยเมว. นาคสมาลตฺเถรคาถาวณฺณนา นิฏฺฐิตา. ----------------


             อรรถกถาภาษาบาลีอักษรไทย เล่มที่ ๓๓ หน้า ๑-. http://84000.org/tipitaka/atthapali/th_line.php?B=33&A=1&modeTY=2&pagebreak=1              The Pali Atthakatha in Roman :- http://84000.org/tipitaka/atthapali/read_rm.php?B=33&A=1&modeTY=2&pagebreak=1              อ่านอรรถกถาแปลไทย :- http://84000.org/tipitaka/attha/attha.php?b=26&i=323              เนื้อความพระไตรปิฎกฉบับหลวง :- http://84000.org/tipitaka/read/r.php?B=26&A=6191              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=26&A=6314              The Pali Tipitaka in Roman Character :- http://84000.org/tipitaka/read/roman_read.php?B=26&A=6314              สารบัญพระไตรปิฎกเล่มที่ ๒๖ http://84000.org/tipitaka/read/?index_26

อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]