บาลีอรรถกถาเล่มที่ ๓๖

๗ ติตฺติรชาตกํ อจฺจุคฺคตา อติพลตาติ อิทํ สตฺถา เชตวเน วิหรนฺโต โกกาลิกํ อารพฺภ กเถสิ ฯ ตสฺส วตฺถุํ เตรสนิปาเต ตกฺการิยชาตเก อาวิภวิสฺสติ ฯ สตฺถา ปน น ภิกฺขเว โกกาลิโก อิทาเนว อตฺตโน วาจํ นิสฺสาย นฏฺโฐ ปุพฺเพปิ นสฺสิเยวาติ วตฺวา อตีตํ อาหริ ฯ

--------------------------------------------------------------------------------------------- หน้าที่ ๒๙๖.

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต อุทิจฺจพฺราหฺมณกุเล นิพฺพตฺติตฺวา วยปฺปตฺโต ตกฺกสิลายํ สพฺพสิปฺปานิ อุคฺคณฺหิตฺวา กาเม ปหาย อิสิปพฺพชฺชํ ปพฺพชิตฺวา ปญฺจาภิญฺญาอฏฺฐสมาปตฺติโย นิพฺพตฺเตสิ ฯ หิมวนฺตปฺปเทเส สพฺโพ อิสิคโณ สนฺนิปติตฺวา ตํ โอวาทาจริยํ กตฺวา ปริวาเรสิ ฯ โส ปญฺจนฺนํ อิสิสตานํ โอวาทาจริโย หุตฺวา ฌานกีฬาย กีฬนฺโต หิมวนฺเต วสติ ฯ ตทา เอโก ปณฺฑุโรคี ตาปโส กุฐารึ คเหตฺวา กฏฺฐํ ผาเลติ ฯ อเถโก มุขรตาปโส ตสฺส สนฺติเก นิสีทิตฺวา อิธ ปหารํ เทหิ อิธ ปหารํ เทหีติ ตํ ตาปสํ โรเสสิ ฯ โส กุชฺฌิตฺวา นทานิ เม ตฺวํ ทารุผาลนสิปฺปํ สิกฺขาปนกาจริโยติ ติณฺหํ กุฐารึ อุกฺขิปิตฺวา เอกปฺปหาเรเนว ชีวิตกฺขยํ ปาเปสิ ฯ โพธิสตฺโต ตสฺส สรีรกิจฺจํ กาเรสิ ฯ ตทา อสฺสมปทโต อวิทูเร เอกสฺมึ วมฺมิกปาเท เอโก ติตฺติโร วสติ ฯ โส สายํ ปาตํ วมฺมิกมตฺถเก ฐตฺวา มหาวสฺสิตํ วสฺสิ ฯ ตํ สุตฺวา เอโก ลุทฺทโก ติตฺติเรน ภวิตพฺพนฺติ จินฺเตตฺวา สทฺทสญฺญาย คนฺตฺวา ตํ วธิตฺวา อาทาย คโต ฯ โพธิสตฺโต ตสฺส สทฺทํ อสฺสุณนฺโต อสุกฏฺฐาเน ติตฺติโร วสติ กึ นุ โข ตสฺส สทฺโท น สุยฺยตีติ ตาปเส ปุจฺฉิ ฯ เต โพธิสตฺตสฺส ตมตฺถํ อาโรเจสุํ ฯ โส อุโภปิ ตานิ การณานิ สํสนฺเทตฺวา อิสิคณมชฺเฌ อิมํ คาถมาห อจฺจุคฺคตา อติพลตา อติเวลํ ปภาสิตา วาจา หนติ ทุมฺเมธํ ติตฺติรํวาติวสฺสิตนฺติ ฯ

--------------------------------------------------------------------------------------------- หน้าที่ ๒๙๗.

ตตฺถ อจฺจุคฺคตาติ อติอุคฺคตา ฯ อติพลตาติ ปุนปฺปุนํ ภาสมาเนน อติพลสภาวา ฯ อติเวลํ ปภาสิตาติ อติกฺกนฺตเวลา ปมาณาติกฺกเมน ภาสิตา ฯ ติตฺติรํวาติวสฺสิตนฺติ ยถา ติตฺติรํ อติวสฺสิตํ หนติ ตถา เอวรูปา วาจา ทุมฺเมธํ พาลปุคฺคลํ หนตีติ ฯ เอวํ โพธิสตฺโต อิสิคณสฺส โอวาทํ ทตฺวา จตฺตาโร พฺรหฺมวิหาเร ภาเวตฺวา พฺรหฺมโลกปรายโน อโหสิ ฯ สตฺถา น ภิกฺขเว โกกาลิโก อิทาเนว อตฺตโน วจนํ นิสฺสาย นฏฺโฐ ปุพฺเพปิ นสฺสิเยวาติ วตฺวา อิมํ ธมฺมเทสนํ อาหริตฺวา ชาตกํ สโมธาเนสิ ตทา ทุพฺพโจ ตาปโส โกกาลิโก อโหสิ อิสิคณา พุทฺธปริสา คณสตฺถา ปน อหเมวาติ ฯ ติตฺติรชาตกํ สตฺตมํ ฯ --------

อรรถกถาภาษาบาลีอักษรไทย เล่มที่ ๓๖ หน้า ๒๙๕-๒๙๗. http://84000.org/tipitaka/atthapali/th_line.php?B=36&A=5897&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=36&A=5897&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=27&i=117 เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=771 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=769 The Pali Tipitaka in Roman Character :- http://84000.org/tipitaka/read/roman_read.php?B=27&A=769 สารบัญพระไตรปิฎกเล่มที่ ๒๗ http://84000.org/tipitaka/read/?index_27