บาลีอรรถกถาเล่มที่ ๓๗

๑๐ สาธุสีลชาตกํ สรีรทพฺยํ วุฑฺฒพฺยนฺติ อิทํ สตฺถา เชตวเน วิหรนฺโต อญฺญตรํ พฺราหฺมณํ อารพฺภ กเถสิ ฯ ตสฺส กิร จตสฺโส ธีตโร อเหสุํ ฯ ตา จตฺตาโร ชนา ปตฺเถนฺติ, เตสุ เอโก อภิรูโป สรีรสมฺปนฺโน, เอโก วยปฺปตฺโต มหลฺลโก, เอโก ชาติสมฺปนฺโน, เอโก สีลวา ฯ พฺราหฺมโณ จินฺเตสิ ธีตโร นิเวสนฺเตน กสฺส นุ โข ทาตพฺพา, กึ รูปสมฺปนฺนสฺส อุทาหุ วยปฺปตฺตชาติสมฺปนฺนสีลวนฺตานํ อญฺญตรสฺสาติ ฯ โส จินฺเตนฺโตปิ อชานิตฺวา อิมํ การณํ สมฺมาสมฺพุทฺโธ ชานิสฺสติ, ตํ ปุจฺฉิตฺวา เอเตสํ อนฺตเร อนุจฺฉวิกสฺส ทสฺสามีติ คนฺธมาลาทีนิ คาหาเปตฺวา วิหารํ คนฺตฺวา สตฺถารํ วนฺทิตฺวา เอกมนฺตํ นิสินฺโน ภควโต อาทิโต ปฏฺฐาย ตมตฺถํ อาโรเจตฺวา ภนฺเต อิเมสุ จตูสุ ชเนสุ กสฺส ทาตุํ วฏฺฏตีติ ปุจฺฉิ ฯ สตฺถา ปุพฺเพปิ เต ปณฺฑิตา

--------------------------------------------------------------------------------------------- หน้าที่ ๑๘๒.

เอตํ ปญฺหํ กถยึสุ, ภวสงฺเขปคตตฺตา ปน สลฺลกฺเขตุํ น สกฺโกสีติ วตฺวา เตน ยาจิโต อตีตํ อาหริ ฯ อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต พฺราหฺมณกุเล นิพฺพตฺติตฺวา วยปฺปตฺโต ตกฺกสิลายํ สิปฺปํ อุคฺคณฺหิตฺวา อาคนฺตฺวา พาราณสิยํ ทิสาปาโมกฺโข อาจริโย อโหสิ ฯ อเถกสฺส พฺราหฺมณสฺส จตสฺโส ธีตโร อเหสุํ ฯ ตา เอวเมว จตฺตาโร ชนา ปตฺถยึสุ ฯ พฺราหฺมโณ กสฺส นุ โข ทาตพฺพาติ อชานนฺโต อาจริยํ ปุจฺฉิตฺวา ทาตพฺพยุตฺตกสฺส ทสฺสามีติ ตสฺส สนฺติกํ คนฺตฺวา ตมตฺถํ ปุจฺฉนฺโต ปฐมํ คาถมาห สรีรทพฺยํ วุฑฺฒพฺยํ โสชจฺจํ สาธุสีลิยํ พฺราหฺมณนฺเต ว ปุจฺฉามิ กินฺนุ ^๑- เตสํ วณิมฺหเสติ ฯ ตตฺถ สรีรทพฺยนฺติ อาทีหิ เตสํ จตุนฺนํ วิชฺชมาเน คุเณ ปกาเสติ ฯ อยเมตฺถ อธิปฺปาโย ธีตโร เม จตฺตาโรเม ชนา ปตฺเถนฺติ, เตสุ เอกสฺส สรีรทพฺยํ อตฺถิ สรีรสมฺปทา ^๒- อภิรูปภาโว สํวิชฺชติ, เอกสฺส วุฑฺฒพฺยํ วุฑฺฒภาโว มหลฺลกตา อตฺถิ, เอกสฺส โสชจฺจํ สุชาตตา ชาติสมฺปทา อตฺถิ ฯ สุชจฺจนฺติปิ ปาโฐ ฯ เอกสฺส สาธุสีลิยํ สุนฺทรสีลภาโว สีลสมฺปทา อตฺถิ ฯ พฺราหฺมณนฺเต ว ปุจฺฉามาติ เตสุ เอกสฺส นาเมตา ทาตพฺพาติ อชานนฺตา มยํ ภวนฺตํ พฺราหฺมณญฺเญว ปุจฺฉาม ฯ กินฺนุ เตสํ วณิมฺหเสติ เตสํ จตุนฺนํ ชนานํ กถํ ^๓- วณิมฺหเส อิจฺฉาม, กสฺส ตา กุมาริกา ททามาติ ปุจฺฉตีติ ฯ @เชิงอรรถ: ^๑ กนฺนูติปิ ฯ ^๒ สรีรสมฺปทายาติปิ ฯ ^๓ กนฺติปิ ฯ

--------------------------------------------------------------------------------------------- หน้าที่ ๑๘๓.

ตํ สุตฺวา อาจริโย รูปสมฺปทาทีสุ วิชฺชมานาสุปิ วิปนฺนสีโล คารยฺโห, ตสฺมา ตํ อปฺปมาณํ, อมฺหากํ สีลวนฺตภาโว รุจฺจตีติ อิมมตฺถํ ปกาเสนฺโต ทุติยํ คาถมาห อตฺโถ อตฺถิ สรีรสฺมึ วุฑฺฒพฺยสฺส นโม กเร อตฺโถ อตฺถิ สุชาตสฺมึ สีลํ อสฺมาก รุจฺจตีติ ฯ ตตฺถ อตฺโถ อตฺถิ สรีรสฺมินฺติ รูปสมฺปนฺเน สรีเร อตฺโถ วิเสโส วุฑฺฒิ อตฺถิ เยว นตฺถีติ น วทามิ ฯ วุฑฺฒพฺยสฺส นโม กเรติ วุฑฺฒภาวสฺส ปน นมการเมว กโรมิ, วุฑฺฒภาโว หิ วนฺทนมานนํ ลภติ ฯ อตฺโถ อตฺถิ สุชาตสฺมินฺติ สุชาเตปิ ปุริเส วุฑฺฒิ อตฺถิ, ชาติสมฺปตฺติ หิ อิจฺฉิตพฺพา เยว ฯ สีลํ อสฺมาก รุจฺจตีติ อมฺหากํ ปน สีลเมว รุจฺจติ ฯ สีลวา หิ อาจารสมฺปนฺโน สรีรทพฺยวิรหิโตปิ ปุชฺโช ปาสํโสติ ฯ พฺราหฺมโณ ตสฺส วจนํ สุตฺวา สีลวนฺตสฺเสว ธีตโร อทาสิ ฯ สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน พฺราหฺมโณ โสตาปตฺติผเล ปติฏฺฐหิ ฯ ตทา พฺราหฺมโณ อยเมว อโหสิ, ทิสาปาโมกฺโข อาจริโย ปน อหเมวาติ ฯ สาธุสีลชาตกํ ทสมํ ฯ รุหกวคฺโค ปญฺจโม ฯ ---------------

--------------------------------------------------------------------------------------------- หน้าที่ ๑๘๔.

@เชิงอรรถ: @*** หน้านี้ไม่มีข้อมูล ***

อรรถกถาภาษาบาลีอักษรไทย เล่มที่ ๓๗ หน้า ๑๘๑-๑๘๔. http://84000.org/tipitaka/atthapali/th_line.php?B=37&A=3595&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=37&A=3595&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=27&i=249 เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=1479 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=1460 The Pali Tipitaka in Roman Character :- http://84000.org/tipitaka/read/roman_read.php?B=27&A=1460 สารบัญพระไตรปิฎกเล่มที่ ๒๗ http://84000.org/tipitaka/read/?index_27