ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
อรรถกถาเล่มที่ ๓๙ ภาษาบาลีอักษรไทย ชา.อ.๕ ฉกฺก-ทสกนิปาต

หน้าที่ ๑๘๑.

คนฺธารวคฺควณฺณนา ---------- คนฺธารชาตกํ หิตฺวา คามสหสฺสานีติ อิทํ สตฺถา เชตวเน วิหรนฺโต เภสชฺช- สนฺนิธิการสิกฺขาปทํ อารพฺภ กเถสิ ฯ วตฺถุํ ปน ราชคเห สมุฏฺฐิตํ ฯ อายสฺมตา หิ ปิลินฺทวจฺเฉน อารามิกกุลํ โมเจตุํ ราชนิเวสนํ คนฺตฺวา รญฺโญ ปาสาเท อิทฺธิพเลน โสวณฺณมเย กเต มนุสฺสา ปสีทิตฺวา เถรสฺส ปญฺจ เภสชฺชานิ ปหิณึสุ ฯ โส ตานิ ปริสาย วิสฺสชฺเชสิ ฯ ปริสา ปนสฺส พาหุลิกา โหนฺติ ลทฺธลทฺธํ โกลุมฺเพปิ ฆเฏปิ ปตฺตถวิกาโยปิ ปูเรตฺวา ปฏิสาเมนฺติ ฯ มนุสฺสา ปสฺสิตฺวา มหิจฺฉา อิเม สมณา อนฺโต- โกฏฺฐาคาริกาติ อุชฺฌายึสุ ฯ สตฺถา ตํ ปวตฺตึ สุตฺวา ยานิ โข ปน ตานิ คิลานานํ ภิกฺขูนํ ปฏิสายนียานิ เภสชฺชานีติ สิกฺขาปทํ สญฺญาเปตฺวา ภิกฺขเว โปราณกปณฺฑิตา อนุปฺปนฺเน พุทฺเธ พาหิรก- ปพฺพชฺชํ ปพฺพชิตฺวา ปญฺจสีลมตฺตกํ รกฺขนฺตาปิ โลณสกฺขรมตฺตกํ ปุนทิวสตฺถาย น นิทฺทหึสุ ตุมฺเห ปน เอวรูเป นิยฺยานิกสาสเน ปพฺพชิตฺวา ทุติยตติยทิวสตฺถาย สนฺนิธึ กโรนฺตา อยุตฺตํ กโรถาติ วตฺวา อตีตํ อาหริ อตีเต คนฺธารรฏฺเฐ โพธิสตฺโต คนฺธารรญฺโญ ปุตฺโต หุตฺวา

--------------------------------------------------------------------------------------------- หน้าที่ ๑๘๒.

ปิตุ อจฺจเยน รชฺเช ปติฏฺฐาย ธมฺเมน รชฺชํ กาเรสิ ฯ มชฺฌิมเทเสปิ วิเทหรฏฺเฐ วิเทโห นาม ราชา รชฺชํ กาเรสิ ฯ เตปิ เทฺว ราชาโน อทิฏฺฐสหายา หุตฺวา อญฺญมญฺญํ ถิรวิสฺสาสา อเหสุํ ฯ ตทา มนุสฺสา ทีฆายุกา โหนฺติ ตึสวสฺสสหสฺสานิ ชีวนฺติ ฯ อเถกทา คนฺธารราชา ปุณฺณมุโปสถทิวเส สมาทินฺนสีโล หุตฺวา มหาตเล ปญฺญตฺตปวรปลฺลงฺกมชฺฌคโต วิวเฏน สีหปญฺชเรน ปาจีนโลกธาตุํ โอโลเกนฺโต อมจฺจานํ ธมฺมตฺถยุตฺตกถํ กเถนฺโต นิสีทิ ฯ ตสฺมึ ขเณ คคนตเล อภิลงฺฆนฺตมิว ปริปุณฺณจนฺทมณฺฑลํ ราหุ อวตฺถริ ฯ จนฺทปฺปภา อนฺตรธายิ ฯ อมจฺจา จนฺทาโลกํ อปสฺสนฺตา จนฺทสฺส ราหุนา คหิตภาวํ รญฺโญ อาโรเจสุํ ฯ ราชา จนฺทํ โอโลเกตฺวา อยํ จนฺโท อาคนฺตุกอุปกฺกิเลเสน อุปกฺกิลิฏฺโฐ นิปฺปโภ ชาโต มยฺหํเปส ราชปริวาโร อุปกฺกิเลโสว น โข ปน เม ตํ ปฏิรูปํ ยฺวาหํ ราหุนา คหิตจนฺโท วิย นิปฺปโภ ภเวยฺยํ วิสุทฺเธ คคนตเล วิจรนฺตํ จนฺทมณฺฑลมิว รชฺชํ ปหาย ปพฺพชิสฺสามิ กึ เม ปเรน โอวทิเตน กุเล จ คเณ จ อลคฺโค หุตฺวา อตฺตานเมว โอวทนฺโต วิจริสฺสามิ อิทํ เม ปฏิรูปนฺติ จินฺเตตฺวา ยํ อิจฺฉถ ตํ ราชานํ กโรถาติ รชฺชํ อมจฺจานํ นิยฺยาเทสิ ฯ ตสฺมึ คนฺธารรฏฺเฐ ราชา รชฺชํ ฉฑฺเฑตฺวา อิสิปพฺพชฺชํ ปพฺพชิตฺวา ฌานาภิญฺญา นิพฺพตฺเตตฺวา ฌานรติสมปฺปิโต หิมวนฺตปฺปเทเส วาสํ กปฺเปสิ ฯ วิเทหราชาปิ สุขํ เม สหายสฺส รญฺโญติ วาณิเช ปุจฺฉิตฺวา ตสฺส ปพฺพชิตภาวํ สุตฺวา มม สหาเย ปพฺพชิเต อหํ รชฺเชน กึ กริสฺสามีติ

--------------------------------------------------------------------------------------------- หน้าที่ ๑๘๓.

สตฺตโยชนิเก มิถิลนคเร รชฺชํ ติโยชนสติเก วิเทหรฏฺเฐ โสฬสสุ คาม- สหสฺเสสุ ปูริตปูริตานิ โกฏฺฐาคารานิ โสฬสสหสฺสา นาฏกิตฺถิโย ฉฑฺเฑตฺวา ปุตฺตธีตโร อมนสิกริตฺวา หิมวนฺตปฺปเทสํ ปวิสิตฺวา ปพฺพชิตฺวา ปวตฺตผลโภชโน หุตฺวา สมคฺควาสํ วสนฺโต วิจริ ฯ เต อุโภปิ สมวตฺตาจารํ จรนฺตา อปรภาเค สมาคจฺฉึสุ น ปน อญฺญมญฺญํ สญฺชานึสุ สมฺโมทมานา เอกโตว สมวตฺตาจารํ จรึสุ ฯ ตทา วิเทหตาปโส คนฺธารตาปสสฺส อุปฏฺฐานํ กโรติ ฯ เตสํ เอกสฺมึ ปุณฺณมีทิวเส อญฺญตรสฺมึ รุกฺขมูเล นิสีทิตฺวา ธมฺม- ยุตฺตกถํ กเถนฺตานํ คคนตเล วิโรจมานํ จนฺทมณฺฑลํ ราหุ อวตฺถริ ฯ วิเทหตาปโส กินฺนุ โข จนฺทสฺส ปภา นฏฺฐาติ โอโลเกตฺวา ราหุนา คหิตํ จนฺทํ ทิสฺวา โก นุ โข เอส อาจริย จนฺทํ อวตฺถริตฺวา นิปฺปภมกาสีติ ปุจฺฉิ ฯ อนฺเตวาสิก อยํ ราหุ นาม จนฺทสฺเสโก อุปกฺกิเลโส วิโรจิตุํ น เทติ อหํปิ ราหุคฺคหิตํ จนฺทมณฺฑลํ ทิสฺวา อิทํ ปริสุทฺธํ จนฺทมณฺฑลํ อาคนฺตุกุปกฺกิเลเสน นิปฺปภํ ชาตํ มยฺหํปิ อิทํ รชฺชํ อุปกฺกิเลโส ยาว มํ จนฺทมณฺฑลํ ราหุ วิย นิปฺปภํ น กโรติ ตาว ปพฺพชิสฺสามีติ จินฺเตตฺวา ตเทว ราหุคฺคหิตํ จนฺทมณฺฑลํ อารมฺมณํ กตฺวา มหารชฺชํ ฉฑฺเฑตฺวา ปพฺพชิโตติ ฯ อาจริย ตฺวํ คนฺธารราชาติ ฯ อาม อหนฺติ ฯ อาจริย อหํปิ วิเทหรฏฺเฐ มิถิลนคเร วิเทหราชา นาม นนุ มยํ อญฺญมญฺญํ อทิฏฺฐสหายกาติ ฯ กึ ปน เต อารมฺมณํ อโหสีติ ฯ อหํ ตุมฺเห ปพฺพชิตาติ สุตฺวา อทฺธา ปพฺพชฺชาย มหนฺตํ คุณํ อทฺทสาติ ตุมฺเหเยว อารมฺมณํ

--------------------------------------------------------------------------------------------- หน้าที่ ๑๘๔.

กตฺวา รชฺชํ ปหาย ปพฺพชิโตติ ฯ เต ตโต ปฏฺฐาย อติวิย สมคฺคา สมฺโมทมานา ปวตฺตผลโภชนา หุตฺวา วิจรึสุ ฯ ตตฺถ ทีฆรตฺตํ วสิตฺวา จ ปน โลณมฺพิลเสวนตฺถาย หิมวนฺตโต โอตริตฺวา เอกํ ปจฺจนฺตคามํ ปาปุณึสุ ฯ มนุสฺสา เตสํ อิริยาปเถ ปสีทิตฺวา ภิกฺขํ ทตฺวา ปฏิญฺญํ คเหตฺวา อรญฺเญ รตฺติฏฺฐานาทีนิ มาเปตฺวา วสาเปสุํ อนฺตรามคฺเคปิ เนสํ ภตฺตกิจฺจกรณตฺถาย อุทกผาสุกฏฺฐาเน ปณฺณสาลํ กาเรสุํ ฯ เต ปจฺจนฺตคาเม ภิกฺขํ จริตฺวา ตาย ปณฺณสาลาย นิสีทิตฺวา ปริภุญฺชิตฺวา อตฺตโน วสนฏฺฐานํ คจฺฉนฺติ ฯ เตปิ เตสํ มนุสฺสา อาหารํ ททมานา เอกทา โลณํ ปตฺเต ปกฺขิปิตฺวา เทนฺติ เอกทา ปณฺณปุเฏ พนฺธิตฺวา เทนฺติ เอกทา อโลณกาหารเมว เทนฺติ ฯ เต เตสํปิ เอกทิวสํ ปณฺณปุเฏ พหุตรํ โลณํ อทํสุ ฯ วิเทหตาปโส โลณํ อาทาย คนฺตฺวา โพธิสตฺตสฺส ภตฺตกิจฺจกาเล ปโหนกํ ทตฺวา อตฺตโนปิ ปมาณยุตฺตํ คเหตฺวา อติเรกํ ปณฺณปุเฏ พนฺธิตฺวา อโลณทิวเส ภวิสฺสตีติ ติณวฏฺฏิกอนฺตเร ฐเปสิ ฯ อเถกทิวสํ อโลณเก อาหาเร ลทฺเธ เวเทโห คนฺธารสฺส ภิกฺขาภาชนํ ทตฺวา ติณวฏฺฏิกอนฺตรโต โลณํ อาหริตฺวา อาจริย โลณํ คณฺหถาติ อาห ฯ อชฺช มนุสฺเสหิ โลณํ น ทินฺนํ ตฺวํ กุโต ลภีติ ฯ อาจริย ปุริมทิวสํ มนุสฺสา พหุํ โลณมทํสุ อถาหํ อโลณกทิวเส ภวิสฺสตีติ อติเรกํ โลณํ ฐเปสินฺติ ฯ อถ นํ โพธิสตฺโต โมฆปุริส ติโยชนสติกํ วิเทหรฏฺฐํ ปหาย ปพฺพชิตฺวา อกิญฺจนภาวํ ปตฺวา อิทานิ โลณสกฺขราย ตณฺหํ ชเนสีติ ตชฺชิตฺวา

--------------------------------------------------------------------------------------------- หน้าที่ ๑๘๕.

โอวทนฺโต ปฐมํ คาถมาห หิตฺวา คามสหสฺสานิ ปริปุณฺณานิ โสฬส โกฏฺฐาคารานิ ผีตานิ สนฺนิธินฺทานิ กุพฺพสีติ ฯ ตตฺถ โกฏฺฐาคารานีติ สุวณฺณรชตมณิมุตฺตาทิรตนโกฏฺฐาคารานิ จ ทุสฺสโกฏฺฐาคารานิ จ ธญฺญโกฏฺฐาคารานิ จ ฯ ผีตานีติ ปูรานิ ฯ สนฺนิธินฺทานิ กุพฺพสีติ อิทานิ เสฺว ภวิสฺสติ ตติยทิวเส ภวิสฺสตีติ โลณมตฺตํ สนฺนิธึ กโรสิ ฯ วิเทหตาปโส เอวํ ครหิยมาโน ครหํ อสหนฺโต ปฏิปกฺโข หุตฺวา อาจริย ตุมฺเห อตฺตโน โทสํ อทิสฺวา มยฺหเมว โทสํ ปสฺสถ นนุ ตุมฺเห กึ เม ปเรน โอวทิเตน อตฺตานเมว โอวทิสฺสามีติ รชฺชํ ฉฑฺเฑตฺวา ปพฺพชิตา ตุมฺเห อิทานิ มํ กสฺมา โอวทถาติ โจเทนฺโต ทุติยํ คาถมาห หิตฺวา คนฺธารวิสยํ ปหูตธนปานิยํ ปสาสนิโต นิกฺขนฺโต อิธ ทานิ ปสาสสีติ ฯ ตตฺถ ปสาสนิโตติ โอวาทานุสาสนีทานโต ฯ อิธ ทานีติ อิทานิ อิธ อรญฺเญ กสฺมา โอวทถาติ ฯ ตํ สุตฺวา โพธิสตฺโต ตติยํ คาถมาห ธมฺมํ ภณามิ เวเทห อธมฺโม เม น รุจฺจติ ธมฺมํ เม ภณมานสฺส น ปาปมุปลิมฺปตีติ ฯ ตตฺถ ธมฺมนฺติ สภาวํ พุทฺธาทีหิ วณฺณิตปสฏฺฐการณเมว ฯ อธมฺโม เม น รุจฺจตีติ อธมฺโม นาม อสภาโว มยฺหํ กทาจิปิ

--------------------------------------------------------------------------------------------- หน้าที่ ๑๘๖.

น รุจฺจติ ฯ น ปาปมุปลิมฺปตีติ มม สภาวเมว การณเมว ภณนฺตสฺส ปาปํ นาม หทเย น อลฺลียติ โอวาททานนฺนาเมตํ พุทฺธปจฺเจกพุทฺธ- พุทฺธสาวกโพธิสตฺตานํ ปเวณิ ฯ เตหิ ทินฺโนวาทํ พาลา น คณฺหนฺติ โอวาททายกสฺส ปน ปาปนฺนาม นตฺถิ ฯ ปุน เทเสนฺโต อาห นิธีนํว ปวตฺตารํ ยํ ปสฺเส วชฺชทสฺสินํ นิคฺคยฺหวาทึ เมธาวึ ตาทิสํ ปณฺฑิตํ ภเช ตาทิสํ ภชมานสฺส เสยฺโย โหติ น ปาปิโย ฯ โอวเทยฺย อนุสาเสยฺย อสพฺภา จ นิวารเย สตํ หิ โส ปิโย โหติ อสตํ โหติ อปฺปิโย ฯ เวเทหตาปโส โพธิสตฺตสฺส กถํ สุตฺวา อาจริย อตฺถนิสฺสิตํ กเถนฺเตนาปิ ปรํ ฆเฏตฺวา โรเสตฺวา กเถตุํ น วฏฺฏติ ตฺวํ มํ ทุสตฺถเกน มุณฺฑนฺโต วิย อติผรุสํ กเถสีติ วตฺวา จตุตฺถํ คาถมาห เยนเกนจิ วณฺเณน ปโร ลภติ รุปฺปนํ มหตฺถิยํปิ เจ วาจํ น ตํ ภาเสยฺย ปณฺฑิโตติ ฯ ตตฺถ เยนเกนจีติ ธมฺมยุตฺเตนาปิ การเณน ฯ ลภติ รุปฺปนนฺติ ฆฏนํ รุปฺปนํ กุปฺปนํ ลภติ ฯ น ตํ ภาเสยฺยาติ ตสฺมา ตํ ปรปุคฺคลํ ยาย จ โส วาจาย รุปฺปติ ตํ มหตฺถิยํ มหนฺตอตฺถนิสฺสิตํปิ วาจํ น ภาเสยฺยาติ อตฺโถติ ฯ อถสฺส โพธิสตฺโต ปญฺจมํ คาถมาห กามํ รุปฺปตุ วา มา วา ภุสํ วา วิกิริยฺยตุ ธมฺมํ เม ภณมานสฺส น ปาปมุปลิมฺปตีติ ฯ

--------------------------------------------------------------------------------------------- หน้าที่ ๑๘๗.

ตตฺถ กามนฺติ เอกํเสน ฯ อิทํ วุตฺตํ โหติ อยุตฺตการโก ปุคฺคโล อยุตฺตํ เต กตนฺติ โอวทิยมาโน เอกํเสเนว กุชฺฌตุ วา มา วา กุชฺฌตุ ฯ อถวา ภุสมุฏฺฐิ วิย วิกิริยฺยตุ มยฺหํ ปน ธมฺมํ ภณนฺตสฺส ปาปนฺนาม นตฺถีติ ฯ เอวญฺจ ปน วตฺวา น โข อหํ อานนฺท ตถา ปรกฺกมิสฺสามิ ยถา กุมฺภกาโร อามเก อามเก มตฺติเก นิคฺคยฺห นิคฺคยฺหาหํ อานนฺท วกฺขามิ โย สาโร โส ฐสฺสตีติ อิมสฺส สุคโตวาทสฺส อนุรูปาย ปฏิปตฺติยา ฐตฺวา ยถา กุมฺภกาโร ภาชเนสุ ปุนปฺปุนํ อาโกเฏตฺวา อาโกเฏตฺวา อามกํ อคเหตฺวา สุปกฺกเมว ภาชนํ คณฺหิ เอวํ ปุนปฺปุนํ โอวทิตฺวา นิคฺคณฺหิตฺวา ปกฺกภาชนสทิสา ปุคฺคลา คหิตาติ ทสฺเสตุํ ปุน ตํ โอวทนฺโต โน เจ อสฺส สกา พุทฺธิ วินโย วา สุสิกฺขิโต วเน อนฺธมหิโสว จเรยฺย พหุโก ชโน ฯ ยสฺมา จ ปนิเธกจฺเจ อาจารมฺหิ สุสิกฺขิตา วินีตวินยา ธีรา จรนฺติ สุสมาหิตาติ อิทํ คาถทฺวยมาห ฯ ตสฺสตฺโถ สมฺม เวเทห อิเมสํ หิ สตฺตานํ สเจ อตฺตโน พุทฺธิวา ปณฺฑิเต โอวาททายเก นิสฺสาย อาจารปญฺญตฺติ วินโย วา สุสิกฺขิโต น ภเวยฺย เอวํ สนฺเต ยถา ติณลตาทิคหเน วเน อนฺธมหิโส โคจราโคจรํ สาสงฺกนิราสงฺกญฺจ ฐานํ อชานนฺโต จรติ ตถา ตุมฺหาทิโส พหุโก ชโน จเรยฺย ยสฺมา ปน อิธ

--------------------------------------------------------------------------------------------- หน้าที่ ๑๘๘.

เอกจฺเจ สกาย พุทฺธิยา รหิตา สตฺตา อาจริยสนฺติเก อาจาร- ปญฺญตฺติยา สุสิกฺขิตา ตสฺมา อาจริเยหิ อตฺตโน อนุรูเปน วินเยน วินีตตฺตา วินีตวินยา สุสมาหิตา เอกคฺคจิตฺตา หุตฺวา วิจรนฺตีติ อิมินา อิทํ ทสฺเสติ อิมินา หิ สตฺเตน คิหินา หุตฺวา อตฺตโน กุลานุรูปา ปพฺพชิเตน ปพฺพชฺชานุรูปา สิกฺขา สิกฺขิตพฺพา คิหิโนปิ หิ อตฺตโน กุลานุรูเปสุ กสิโครกฺขาทีสุ สุสิกฺขิตาว สมฺปนฺนชีวา หุตฺวา สุสมาหิตา จรนฺติ ฯ ปพฺพชิตาปิ ปพฺพชฺชานุรูเปสุ ปาสาทิเกสุ อภิกฺกนฺตปฏิกฺกนฺตาทีสุ อธิสีลอธิจิตฺตอธิปญฺญาสิกฺขาสุ สุสิกฺขิตาว วิคตวิกฺเขปา สุสมาหิตา จรนฺติ ฯ โลกสฺมิมฺหิ พาหุสจฺจญฺจ สิปฺปญฺจ วินโย จ สุสิกฺขิโต สุภาสิตา จ ยา วาจา เอตมฺมงฺคลมุตฺตมนฺติ ฯ ตํ สุตฺวา เวเทหตาปโส อาจริย อิโต ปฏฺฐาย มํ โอวทถ อนุสาสถ อหํ อนธิวาสกชาติตาย ตุมฺเหหิ สทฺธึ กเถสึ ตํ เม ขมถาติ วนฺทิตฺวา มหาสตฺตํ ขมาเปสิ ฯ เต สมคฺควาสํ วสิตฺวา ปุน หิมวนฺตเมว อคมํสุ ฯ ตตฺถ โพธิสตฺโต เวเทหตาปสสฺส กสิณปริกมฺมํ กเถสิ ฯ โส ตํ สุตฺวา อภิญฺญา จ สมาปตฺติโย จ นิพฺพตฺเตสิ ฯ อิติ เต อุโภปิ อปริหีนชฺฌานา พฺรหฺมโลกปรายนา อเหสุํ ฯ สตฺถา อิมํ ธมฺมเทสนํ อาหริตฺวา ชาตกํ สโมธาเนสิ ตทา วิเทโห อานนฺโท อโหสิ คนฺธารราชา ปน อหเมวาติ ฯ คนฺธารชาตกํ ปฐมํ ฯ


             อรรถกถาภาษาบาลีอักษรไทย เล่มที่ ๓๙ หน้า ๑๘๑-๑๘๘. http://84000.org/tipitaka/atthapali/th_line.php?B=39&A=3608&modeTY=2&pagebreak=1              The Pali Atthakatha in Roman :- http://84000.org/tipitaka/atthapali/read_rm.php?B=39&A=3608&modeTY=2&pagebreak=1              อ่านอรรถกถาแปลไทย :- http://84000.org/tipitaka/attha/attha.php?b=27&i=1043              เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=4525              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=4555              The Pali Tipitaka in Roman Character :- http://84000.org/tipitaka/read/roman_read.php?B=27&A=4555              สารบัญพระไตรปิฎกเล่มที่ ๒๗ http://84000.org/tipitaka/read/?index_27

อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]