พระไตรปิฎกเล่มที่ ๑๗ ภาษาบาลี อักษรไทย
พระสุตตันตปิฎกเล่มที่ ๙ สุตฺต. สํ. ขนฺธวารวคฺโค

           ขนฺธสํยุตฺตสฺส จุลฺลปณฺณาสเก อนฺตวคฺโค ปฐโม
     [๒๗๔]   สาวตฺถี   ฯเปฯ   ตตฺร   ฯเปฯ   อโวจ   จตฺตาโรเม
ภิกฺขเว  อนฺตา  ฯ  กตเม  จตฺตาโร  ฯ  สกฺกายนฺโต  สกฺกายสมุทยนฺโต
สกฺกายนิโรธนฺโต สกฺกายนิโรธคามินีปฏิปทนฺโต ฯ
     [๒๗๕]   กตโม  จ  ภิกฺขเว  สกฺกายนฺโต  ฯ ปญฺจุปาทานกฺขนฺธาติสฺส
วจนียํ    ฯ    กตเม   ปญฺจ   ฯ   เสยฺยถีทํ   ฯ   รูปูปาทานกฺขนฺโธ
เวทนูปาทานกฺขนฺโธ       สญฺญูปาทานกฺขนฺโธ      สงฺขารูปาทานกฺขนฺโธ
วิญฺญาณูปาทานกฺขนฺโธ ฯ อยํ วุจฺจติ ภิกฺขเว สกฺกายนฺโต ฯ
     [๒๗๖]   กตโม   จ  ภิกฺขเว  สกฺกายสมุทยนฺโต  ฯ  ยายํ  ตณฺหา
โปโนพฺภวิกา   นนฺทิราคสหคตา   ตตฺรตตฺราภินนฺทินี   ฯ   เสยฺยถีทํ   ฯ
กามตณฺหา    ภวตณฺหา    วิภวตณฺหา    ฯ    อยํ    วุจฺจติ   ภิกฺขเว
สกฺกายสมุทยนฺโต ฯ
     [๒๗๗]   กตโม  จ  ภิกฺขเว  สกฺกายนิโรธนฺโต  ฯ  โย ตสฺสา เยว
ตณฺหาย   อเสสวิราคนิโรโธ   จาโค   ปฏินิสฺสคฺโค  มุตฺติ  อนาลโย  ฯ
อยํ วุจฺจติ ภิกฺขเว สกฺกายนิโรธนฺโต ฯ
     [๒๗๘]   กตโม จ ภิกฺขเว สกฺกายนิโรธคามินีปฏิปทนฺโต ฯ อยเมว ๑-
อริโย   อฏฺฐงฺคิโก  มคฺโค  ฯ  เสยฺยถีทํ  ฯ  สมฺมาทิฏฺฐิ  สมฺมาสงฺกปฺโป
สมฺมาวาจา   สมฺมากมฺมนฺโต   สมฺมาอาชีโว   สมฺมาวายาโม   สมฺมาสติ
สมฺมาสมาธิ   ฯ   อยํ  วุจฺจติ  ภิกฺขเว  สกฺกายนิโรธคามินีปฏิปทนฺโต  ฯ
@เชิงอรรถ: ๑ โป. อยเมวาติ นตฺถิ ฯ
อิเม โข ภิกฺขเว จตฺตาโร อนฺตาติ ฯ
     [๒๗๙]   สาวตฺถี  ฯ ทุกฺขญฺจ โว ภิกฺขเว เทสิสฺสามิ ๑- ทุกฺขสมุทยญฺจ
ทุกฺขนิโรธญฺจ ทุกฺขนิโรธคามินีปฏิปทญฺจ ตํ สุณาถ ฯ
     [๒๘๐]   กตมญฺจ   ภิกฺขเว   ทุกฺขํ   ฯ   ปญฺจุปาทานกฺขนฺธาติสฺส
วจนียํ   ฯ   กตเม   ปญฺจ  ฯ  เสยฺยถีทํ  ฯ  รูปูปาทานกฺขนฺโธ  ฯเปฯ
วิญฺญาณูปาทานกฺขนฺโธ ฯ อิทํ วุจฺจติ ภิกฺขเว ทุกฺขํ ฯ
     [๒๘๑]   กตโม   จ   ภิกฺขเว   ทุกฺขสมุทโย   ฯ   ยายํ  ตณฺหา
โปโนพฺภวิกา   นนฺทิราคสหคตา   ตตฺรตตฺราภินนฺทินี   ฯ   เสยฺยถีทํ   ฯ
กามตณฺหา ภวตณฺหา วิภวตณฺหา ฯ อยํ วุจฺจติ ภิกฺขเว ทุกฺขสมุทโย ฯ
     [๒๘๒]   กตโม  จ  ภิกฺขเว  ทุกฺขนิโรโธ  ฯ โย ตสฺสาเยว ตณฺหาย
อเสสวิราคนิโรโธ  จาโค  ปฏินิสฺสคฺโค  มุตฺติ  อนาลโย  ฯ  อยํ  วุจฺจติ
ภิกฺขเว ทุกฺขนิโรโธ ฯ
     [๒๘๓]   กตมา   จ  ภิกฺขเว  ทุกฺขนิโรธคามินีปฏิปทา  ฯ  อยเมว
อริโย   อฏฺฐงฺคิโก   มคฺโค   ฯ   เสยฺยถีทํ   ฯ   สมฺมาทิฏฺฐิ   ฯเปฯ
สมฺมาสมาธิ ฯ อยํ วุจฺจติ ภิกฺขเว ทุกฺขนิโรธคามินีปฏิปทาติ ฯ
     [๒๘๔]   สาวตฺถี ฯ สกฺกายญฺจ โว ภิกฺขเว เทสิสฺสามิ สกฺกายสมุทยญฺจ
สกฺกายนิโรธญฺจ สกฺกายนิโรธคามินีปฏิปทญฺจ ๒- ตํ สุณาถ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑๗ หน้าที่ ๑๙๒-๑๙๓.
https://84000.org/tipitaka/read/pali_item.php?book=17&item=274&items=11
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=17&item=274&items=11&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=17&item=274&items=11
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=17&item=274&items=11
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=17&i=274
             สารบัญพระไตรปิฎกเล่มที่ ๑๗
https://84000.org/tipitaka/read/?index_17
https://84000.org/tipitaka/english/?index_17