พระไตรปิฎกเล่มที่ ๑๘ ภาษาบาลี อักษรไทย
พระสุตตันตปิฎกเล่มที่ ๑๐ สังยุตตนิกาย สฬายตนวรรค

     [๕๗๗]   เตน  โข  ปน  สมเยน  นิคณฺโฐ  นาฏปุตฺโต มจฺฉิกาสณฺฑํ
อนุปฺปตฺโต    โหติ    มหติยา    นิคณฺฐปริสาย    สทฺธึ   ฯ   อสฺโสสิ
โข    จิตฺโต    คหปติ    นิคณฺโฐ    กิร    นาฏปุตฺโต    มจฺฉิกสณฺฑํ
อนุปฺปตฺโต   มหติยา   นิคณฺฐปริสาย   สทฺธินฺติ   ฯ   อถ   โข  จิตฺโต
คหปติ    สมฺพหุเลหิ   อุปาสเกหิ   สทฺธึ   เยน   นิคณฺโฐ   นาฏปุตฺโต
เตนุปสงฺกมิ    อุปสงฺกมิตฺวา   นิคณฺเฐน   นาฏปุตฺเตน   สทฺธึ   สมฺโมทิ
สมฺโมทนียํ   กถํ  สาราณียํ  วีติสาเรตฺวา  เอกมนฺตํ  นิสีทิ  ฯ  เอกมนฺตํ
นิสินฺนํ   โข   จิตฺตํ   คหปตึ   นิคณฺโฐ  นาฏปุตฺโต  เอตทโวจ  สทฺทหสิ
ตฺวํ   คหปติ   สมณสฺส   โคตมสฺส   อตฺถิ   อวิตกฺโก  อวิจาโร  สมาธิ
อตฺถิ   วิตกฺกวิจารานํ  นิโรโธติ  ฯ  น  ขฺวาหํ  เอตฺถ  ภนฺเต  ภควโต
สทฺธาย  คจฺฉามิ  อตฺถิ  อวิตกฺโก  อวิจาโร  สมาธิ  อตฺถิ วิตกฺกวิจารานํ
นิโรโธติ ฯ
     [๕๗๘]   เอวํ  วุตฺเต  นิคณฺโฐ นาฏปุตฺตํ สกํ ปริสํ อปโลเกตฺวา ๑-
เอตทโวจ    อิทํ   ภวนฺโต   ปสฺสนฺตุ   ยาว   อุชุโก   จายํ   จิตฺโต
คหปติ   ยาว   อสโฐ   จายํ   จิตฺโต   คหปติ  ยาว  อมายาวี  จายํ
จิตฺโต   คหปติ   วาตํ  วาโส  ๒-  ชาเลน  พาเธตพฺพํ  มญฺเญยฺย  โย
@เชิงอรรถ: ๑ ม. ยุ. อุลฺโลเกตฺวา ฯ  ๒ ม. ยุ. วา โส ฯ
วิตกฺกวิจาเร   นิโรเธตพฺพํ   มญฺเญยฺย  สกมุฏฺฐินา  วาโส  ๑-  คงฺคาย
โสตํ    อาวาเรตพฺพํ    มญฺเญยฺย    โย   วิตกฺกวิจาเร   นิโรเธตพฺพํ
มญฺเญยฺยาติ   ฯ    ตํ   กึ   มญฺญสิ   ภนฺเต   กตมํ  นุ  โข  ปณีตตรํ
ญาณํ   วา   สทฺธา   วาติ   ฯ   สทฺธาย   โข   คหปติ  ญาณํ  เยว
ปณีตตรนฺติ   ฯ   อหํ   โข   ภนฺเต   ยาวเทว   อากงฺขามิ  วิวิจฺเจว
กาเมหิ   วิวิจฺจ   อกุสเลหิ  ธมฺเมหิ  สวิตกฺกํ  สวิจารํ  วิเวกชํ  ปีติสุขํ
ปฐมชฺฌานํ   อุปสมฺปชฺช   วิหรามิ   ฯ   อหํ   โข   ภนฺเต   ยาวเทว
อากงฺขามิ   วิตกฺกวิจารานํ   วูปสมา   ฯเปฯ   ทุติยชฺฌานํ   อุปสมฺปชฺช
วิหรามิ  ฯ  อหํ  โข  ภนฺเต  ยาวเทว  อากงฺขามิ  ปีติยา  จ  วิราคา
ฯเปฯ    ตติยชฺฌานํ    อุปสมฺปชฺช   วิหรามิ   ฯ   อหํ   โข   ภนฺเต
ยาวเทว    อากงฺขามิ    สุขสฺส   จ   ปหานา   ฯเปฯ   จตุตฺถชฺฌานํ
อุปสมฺปชฺช   วิหรามิ   ฯ   น   โส   ขฺวาหํ   ภนฺเต  เอวํ  ชานนฺโต
เอวํ    ปสฺสนฺโต   กายสฺส   ๒-   สมณสฺส   วา   พฺราหฺมณสฺส   วา
สทฺธาย    คมิสฺสามิ    อตฺถิ    อวิตกฺโก    อวิจาโร   สมาธิ   อตฺถิ
วิตกฺกวิจารานํ นิโรโธติ ฯ
     [๕๗๙]   เอวํ  วุตฺเต  นิคณฺโฐ  นาฏปุตฺโต  สกํ ปริสํ อปโลเกตฺวา
เอตทโวจ   อิทํ   ภวนฺโต   ปสฺสนฺตุ   ยาว   อนุชฺชุโก   จายํ  จิตฺโต
คหปติ   ยาว   สโฐ   ๓-  จายํ  จิตฺโต  คหปติ  ยาว  มายาวี  จายํ
จิตฺโต   คหปตีติ  ฯ  อิทาเนว  จ  ปน  ๔-  มยํ  ภนฺเต  ภาสิตํ  เอวํ
@เชิงอรรถ: ๑ ม. ยุ. วา โส ฯ  ๒ ม. กสฺส อญฺญสฺส ฯ ยุ. กสฺสญฺญสฺส ฯ  ๓ ยุ. สฏฺโจ ฯ
@๔ ม. อิทาเนว โข เต ฯ ยุ. อิทาเนว โข เต ปน ฯ
อาชานาม    อิทํ   ภวนฺโต   ปสฺสนฺตุ   ยาว   อุชุโก   จายํ   จิตฺโต
คหปติ   ยาว   อสโฐ   จายํ   จิตฺโต   คหปติ  ยาว  อมายาวี  จายํ
จิตฺโต คหปตีติ ฯ
     {๕๗๙.๑}   อิทาเนว   จ   ปน   มยํ   ภนฺเต   ภาสิตํ   เอวํ
อาชานาม   อิทํ   ภวนฺโต   ปสฺสนฺตุ   ยาว   อนุชฺชุโก   จายํ  จิตฺโต
คหปติ   ยาว   สโฐ   จายํ   จิตฺโต   คหปติ   ยาว   มายาวี  จายํ
จิตฺโต   คหปตีติ   ฯ   สเจ   เต   ภนฺเต   ปุริมํ  สจฺจํ  ปจฺฉิมํ  เต
มิจฺฉา  ฯ  สเจ  ปน  เต  ภนฺเต  ปจฺฉิมํ  สจฺจํ  ปุริมํ เต มิจฺฉา ๑- ฯ
อิเม   โข   ปน   ภนฺเต   ทส   สหธมฺมิกา   ปญฺหา   อาคจฺฉนฺติ  ฯ
ยทา   เนสํ   อตฺถํ   อาชาเนยฺยาสิ   ฯ  อถ  มํ  ปฏิหเรยฺยาสิ  สทฺธึ
นิคณฺฐปริสาย   ฯ   เอโก  ปโญฺห  เอโก  อุทฺเทโส  เอกํ  เวยฺยากรณํ
เทฺว   ปญฺหา   เทฺว   อุทฺเทสา   เทฺว   เวยฺยากรณานิ  ตโย  ปญฺหา
ตโย   อุทฺเทสา   ตีณิ   เวยฺยากรณานิ   จตฺตาโร   ปญฺหา   จตฺตาโร
อุทฺเทสา   จตฺตาริ   เวยฺยากรณานิ   ปญฺจ   ปญฺหา   ปญฺจ   อุทฺเทสา
ปญฺจ   เวยฺยากรณานิ   ฉ   ปญฺหา   ฉ   อุทฺเทสา  ฉ  เวยฺยากรณานิ
สตฺต   ปญฺหา   สตฺต   อุทฺเทสา   สตฺต   เวยฺยากรณานิ  อฏฺฐ  ปญฺหา
อฏฺฐ   อุทฺเทสา  อฏฺฐ  เวยฺยากรณานิ  นว  ปญฺหา  นว  อุทฺเทสา  นว
เวยฺยกรณานิ   ทส   ปญฺหา   ทส   อุทฺเทสา  ทส  เวยฺยากรณานีติ  ฯ
อถ   โข   จิตฺโต   คหปติ   นิคณฺฐํ   นาฏปุตฺตํ  อิเม  ทส  สหธมฺมิเก
ปเญฺห อาปุจฺฉิตฺวา อุฏฺฐายาสนา ปกฺกามีติ ฯ อฏฺฐมํ ฯ
@เชิงอรรถ: ๑ ม. ภนฺเต ปุริมํ มิจฺฉา ปจฺฉิมํ เต สจฺจํ ฯ
     [๕๘๐]   เตน   โข  ปน  สมเยน  อเจโล  กสฺสโป  มจฺฉิกสณฺฑํ
อนุปฺปตฺโต   โหติ   จิตฺตสฺส   คหปติโน   ปุราณคิหิสหาโย   ฯ  อสฺโสสิ
โข   จิตฺโต   คหปติ   อเจโล   กิร   กสฺสโป  มจฺฉิกสณฺฑํ  อนุปฺปตฺโต
อมฺหากํ    ปุราณคิหิสหาโยติ   ฯ   อถ   โข   จิตฺโต   คหปติ   เยน
อเจโล    กสฺสโป   เตนุปสงฺกมิ   อุปสงฺกมิตฺวา   อเจเลน   กสฺสเปน
สทฺธึ   สมฺโมทิ   สมฺโมทนียํ   กถํ   สาราณียํ   วีติสาเรตฺวา  เอกมนฺตํ
นิสีทิ  ฯ  เอกมนฺตํ  นิสินฺโน  โข  จิตฺโต  คหปติ อเจลํ กสฺสปํ เอตทโวจ
กีวจิรํ  ปพฺพชิโตสิ  ภนฺเต  กสฺสปาติ  ๑-  ฯ  ตึสมตฺตานิ  โข เม คหปติ
วสฺสานิ   ปพฺพชิตสฺสาติ   ฯ   อิเมหิ  ๒-  ปน  เต  ภนฺเต  ตึสมตฺเตหิ
วสฺเสหิ    อตฺถิ    โกจิ    อุตฺตริมนุสฺสธมฺโม   อลมริยญาณทสฺสนวิเสโส
อธิคโต  ผาสุวิหาโรติ  ฯ  อิเมหิ  โข  เม คหปติ ตึสมตฺเตหิ วสฺเสหิ ๓-
นตฺถิ    โกจิ    อุตฺตริมนุสฺสธมฺโม    อลมริยญาณทสฺสนวิเสโส   อธิคโต
ผาสุวิหาโร  อญฺญตฺร  นคฺเคยฺยา  จ  มุณฺเฑยฺยา  จ  วาฬนิปฺโปตนาย ๔-
จาติ ฯ
     [๕๘๑]   เอวํ  วุตฺเต  จิตฺโต  คหปติ  อเจลํ  กสฺสปํ  เอตทโวจ
อจฺฉริยํ   วต   โภ   อพฺภุตํ   วต   โภ  ธมฺมสฺส  สฺวากฺขาตตา  ยตฺร
หิ    นาม    ตึสมตฺเตหิ    วสฺเสหิ    น    โกจิ   อุตฺตริมนุสฺสธมฺโม
อลมริยญาณทสฺสนวิเสโส   อธิคโต   ภวิสฺสติ   ๕-  ผาสุวิหาโร  อญฺญตฺร
นคฺเคยฺยา  จ  มุณฺเฑยฺยา  จ วาฬนิปฺโปตนาย ๔- จาติ ฯ ตุยฺหมฺปน คหปติ
@เชิงอรรถ: ๑ ยุ. ม. ปพฺพชิตสฺส ภนฺเต กสฺสปาติ ฯ  ๒ ยุ. อิเมหิ โข ฯ  ๓ ม. ยุ. วสฺเสหิ
@ปพฺพชิตสฺส ฯ  ๔ ม. ยุ. ปวาฬนิปฺโผฏนาย ฯ  ๕ ม. อภวิสฺส ฯ
กีวจิรํ  อุปาสกตฺตํ  อุปคตสฺสาติ  ฯ  มยฺหมฺปิ  โข  ปน  ภนฺเต ตึสมตฺตานิ
วสฺสานิ  อุปาสกตฺตํ  อุปคตสฺสาติ  ฯ  อิเมหิ  ปน  เต  คหปติ ตึสมตฺเตหิ
วสฺเสหิ    อตฺถิ    โกจิ    อุตฺตริมนุสฺสธมฺโม   อลมริยญาณทสฺสนวิเสโส
อธิคโต  ผาสุวิหาโรติ  ฯ  คิหิโนปิ  สิยา  ภนฺเต  อหํ หิ ภนฺเต ยาวเทว
อากงฺขามิ  วิวิจฺเจว  กาเมหิ  วิวิจฺจ  อกุสเลหิ  ธมฺเมหิ สวิตกฺกํ สวิจารํ
วิเวกชํ  ปีติสุขํ  ปฐมชฺฌานํ  อุปสมฺปชฺช  วิหรามิ ฯ อหํ หิ ภนฺเต ยาวเทว
อากงฺขามิ   วิตกฺกวิจารานํ   วูปสมา   ฯเปฯ   ทุติยชฺฌานํ   อุปสมฺปชฺช
วิหรามิ  ฯ  อหํ  หิ  ภนฺเต  ยาวเทว อากงฺขามิ ปีติยา จ วิราคา ฯเปฯ
ตติยชฺฌานํ  อุปสมฺปชฺช  วิหรามิ  ฯ  อหญฺหิ  ภนฺเต  ยาวเทว  อากงฺขามิ
สุขสฺส   จ  ปหานา  ฯเปฯ  จตุตฺถชฺฌานํ  อุปสมฺปชฺช  วิหรามิ  ฯ  สเจ
โข  ปนาหํ  ภนฺเต  ภควตา  ๑- ปฐมตรํ พฺยากเรยฺยํ ๒- ฯ อนจฺฉริยํ โข
ปเนตํ   ยํ   มํ   ภควา  เอวํ  พฺยากเรยฺย  นตฺถิ  ตํ  สญฺโญชนํ  เยน
สญฺโญชเนน สํยุตฺโต จิตฺโต คหปติ ปุน อิมํ โลกํ อาคจฺเฉยฺยาติ ฯ
     [๕๘๒]   เอวํ  วุตฺเต  อเจโล  กสฺสโป  จิตฺตํ  คหปตึ  เอตทโวจ
อจฺฉริยํ    วต    โภ    อพฺภุตํ   วต   โภ   ธมฺมสฺส   สฺวากฺขาตตา
ยตฺร    หิ    นาม    คิหี   โอทาตวสโน   เอวรูปํ   อุตฺตริมนุสฺสธมฺมํ
อลมริยญาณทสฺสนวิเสสํ     อธิคมิสฺสติ   ผาสุวิหารํ   ลเภยฺยาหํ   คหปติ
อิมสฺมึ   ธมฺมวินเย  ปพฺพชฺชํ  ลเภยฺยํ  อุปสมฺปทนฺติ  ฯ  อถ  โข  จิตฺโต
@เชิงอรรถ: ๑ ม. ยุ. ภควโต ฯ  ๒ ม. กาลํ กเรยฺยํ ฯ
คหปติ   อเจลํ   กสฺสปํ   อาทาย   เยน   เถรา   ภิกฺขู  เตนุปสงฺกมิ
อุปสงฺกมิตฺวา   เถเร   ภิกฺขู  เอตทโวจ  อยํ  ภนฺเต  อเจโล  กสฺสโป
อมฺหากํ   ปุราณคิหิสหาโย   อิมํ   เถรา   ปพฺพาเชนฺตุ   อุปสมฺปาเทนฺตุ
อหมสฺส      อุสฺสุกํ     กริสฺสามิ     จีวรปิณฺฑปาตเสนาสนคิลานปจฺจย-
เภสชฺชปริกฺขารานนฺติ ฯ
     {๕๘๒.๑}   อลตฺถ   ๑-   อเจโล   กสฺสโป  อิมสฺมึ  ธมฺมวินเย
ปพฺพชฺชํ    อลตฺถ    อุปสมฺปทํ    ฯ   อจิรูปสมฺปนฺโน   จ   ปนายสฺมา
กสฺสโป   เอโก   วูปกฏฺโฐ   อปฺปมตฺโต   อาตาปี  ปหิตตฺโต  วิหรนฺโต
นจิรสฺเสว    ยสฺสตฺถาย   กุลปุตฺตา   สมฺมเทว   อคารสฺมา   อนคาริยํ
ปพฺพชนฺติ   ตทนุตฺตรํ   พฺรหฺมจริยปริโยสานํ   ทิฏฺเฐ   ว   ธมฺเม   สยํ
อภิญฺญา    สจฺฉิกตฺวา    อุปสมฺปชฺช    วิหาสิ    ขีณา    ชาติ   วุสิตํ
พฺรหฺมจริยํ    กตํ    กรณียํ    นาปรํ   อิตฺถตฺตายาติ   อพฺภญฺญาสิ   ฯ
อญฺญตโร จ ปนายสฺมา กสฺสโป อรหตํ อโหสีติ ฯ นวมํ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑๘ หน้าที่ ๓๖๗-๓๗๒.
https://84000.org/tipitaka/read/pali_item.php?book=18&item=577&items=6
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=18&item=577&items=6&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=18&item=577&items=6
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=18&item=577&items=6
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=18&i=577
             สารบัญพระไตรปิฎกเล่มที่ ๑๘
https://84000.org/tipitaka/read/?index_18
https://84000.org/tipitaka/english/?index_18