[๑๑๗๐] เย หิ เกจิ ภิกฺขเว อตีตมทฺธานํ สมณา วา พฺราหฺมณา
วา มหิทฺธิกา อเหสุํ มหานุภาวา สพฺเพ เต จตุนฺนํ อิทฺธิปาทานํ
ภาวิตตฺตา พหุลีกตตฺตา ฯ เย หิ เกจิ ภิกฺขเว อนาคตมทฺธานํ
สมณา วา พฺราหฺมณา วา มหิทฺธิกา ภวิสฺสนฺติ มหานุภาวา
สพฺเพ เต จตุนฺนํ อิทฺธิปาทานํ ภาวิตตฺตา พหุลีกตตฺตา ฯ เย
หิ เกจิ ภิกฺขเว เอตรหิ สมณา วา พฺราหฺมณา วา มหิทฺธิกา
มหานุภาวา สพฺเพ เต จตุนฺนํ อิทฺธิปาทานํ ภาวิตตฺตา
พหุลีกตตฺตา ฯ กตเมสํ จตุนฺนํ ฯ อิธ ภิกฺขเว ภิกฺขุ ฉนฺทสมาธิ-
ปธานสงฺขารสมนฺนาคตํ อิทฺธิปาทํ ภาเวติ ฯ วิริยสมาธิ
จิตฺตสมาธิ วีมํสาสมาธิปธานสงฺขารสมนฺนาคตํ อิทฺธิปาทํ
ภาเวติ ฯ
[๑๑๗๑] เย หิ เกจิ ภิกฺขเว อตีตมทฺธานํ สมณา วา พฺราหฺมณา
@เชิงอรรถ: ๑ ม. เอวเมวํ โภตา อานนฺเทน ฯ
วา มหิทฺธิกา อเหสุํ มหานุภาวา สพฺเพ เต อิเมสํเยว จตุนฺนํ
อิทฺธิปาทานํ ภาวิตตฺตา พหุลีกตตฺตา ฯ เย หิ เกจิ ภิกฺขเว
อนาคตมทฺธานํ สมณา วา พฺราหฺมณา วา มหิทฺธิกา ภวิสฺสนฺติ
มหานุภาวา สพฺเพ เต อิเมสํเยว จตุนฺนํ อิทฺธิปาทานํ
ภาวิตตฺตา พหุลีกตตฺตา ฯ เย หิ เกจิ ภิกฺขเว เอตรหิ สมณา
วา พฺราหฺมณา วา มหิทฺธิกา มหานุภาวา สพฺเพ เต
อิเมสํเยว จตุนฺนํ อิทฺธิปาทานํ ภาวิตตฺตา พหุลีกตตฺตาติ ฯ
[๑๑๗๒] เย หิ เกจิ ภิกฺขเว อตีตมทฺธานํ สมณา วา พฺราหฺมณา
วา อเนกวิหิตํ อิทฺธิวิธํ ปจฺจนุโภสุํ เอโกปิ หุตฺวา พหุธา อเหสุํ
พหุธาปิ หุตฺวา เอโก อเหสุํ อาวิภาวํ ติโรภาวํ ติโรกุฑฺฑํ
ติโรปาการํ ติโรปพฺพตํ อสชฺชมานา อคมํสุ เสยฺยถาปิ อากาเส
ปฐวิยํปิ อุมฺมุชฺชนิมฺมุชฺชํ อกํสุ เสยฺยถาปิ อุทเก อุทเกปิ
อภิชฺชมาเน อคมํสุ เสยฺยถาปิ ปฐวิยํ อากาเสปิ ปลฺลงฺเกน
กมึสุ เสยฺยถาปิ ปกฺขี สกุโณ อิเมปิ จนฺทิมสุริเย เอวํมหิทฺธิเก
เอวํมหานุภาเว ปาณินา ปรามสึสุ ๑- ปริมชฺชึสุ ยาว พฺรหฺมโลกาปิ
กาเยน วสํ วตฺเตสุํ ฯ สพฺเพ เต จตุนฺนํ อิทฺธิปาทานํ ภาวิตตฺตา
พหุลีกตตฺตา ฯ
{๑๑๗๒.๑} เย หิ เกจิ ภิกฺขเว อนาคตมทฺธานํ สมณา
วา พฺราหฺมณา วา อเนกวิหิตํ อิทฺธิวิธํ ปจฺจนุโภสนฺติ ๒- เอโกปิ
หุตฺวา พหุธา ภวิสฺสนฺติ พหุธาปิ หุตฺวา เอโก ภวิสฺสนฺติ อาวิภาวํ
ติโรภาวํ ติโรกุฑฺฑํ ติโรปาการํ ติโรปพฺพตํ อสชฺชมานา
@เชิงอรรถ: ๑ ม. ยุ. ปริมสึสุ ฯ ๒ ม. ยุ. ปจฺจนุโภสฺสนฺติ ฯ
คมิสฺสนฺติ เสยฺยถาปิ อากาเส ปฐวิยํปิ อุมฺมุชฺชนิมฺมุชฺชํ กริสฺสนฺติ
เสยฺยถาปิ อุทเก อุทเกปิ อภิชฺชมาเน คมิสฺสนฺติ เสยฺยถาปิ ปฐวิยํ
อากาเสปิ ปลฺลงฺเกน คมิสฺสนฺติ เสยฺยถาปิ ปกฺขี สกุโณ อิเมปิ
จนฺทิมสุริเย เอวํมหิทฺธิเก เอวํมหานุภาเว ปาณินา ปรามสิสฺสนฺติ ๑-
ปริมชฺชิสฺสนฺติ ยาว พฺรหฺมโลกาปิ กาเยน วสํ วตฺเตสฺสนฺติ ฯ
สพฺเพ เต จตุนฺนํ อิทฺธิปาทานํ ภาวิตตฺตา พหุลีกตตฺตา ฯ
{๑๑๗๒.๒} เย หิ เกจิ ภิกฺขเว เอตรหิ สมณา วา พฺราหฺมณา
วา อเนกวิหิตํ อิทฺธิวิธํ ปจฺจนุโภนฺติ เอโกปิ หุตฺวา พหุธา โหนฺติ
พหุธาปิ หุตฺวา เอโก โหนฺติ อาวิภาวํ ติโรภาวํ ติโรกุฑฺฑํ ติโรปาการํ
ติโรปพฺพตํ อสชฺชมานา คจฺฉนฺติ เสยฺยถาปิ อากาเส ปฐวิยํปิ
อุมฺมุชฺชนิมฺมุชฺชํ กโรนฺติ เสยฺยถาปิ อุทเก อุทเกปิ อภิชฺชมาเน
คจฺฉนฺติ เสยฺยถาปิ ปฐวิยํ อากาเสปิ ปลฺลงฺเกน กมนฺติ เสยฺยถาปิ
ปกฺขี สกุโณ อิเมปิ จนฺทิมสุริเย เอวํมหิทฺธิเก เอวํมหานุภาเว
ปาณินา ปรามสนฺติ ๒- ปริมชฺชนฺติ ยาว พฺรหฺมโลกาปิ กาเยน วสํ
วตฺเตนฺติ ฯ สพฺเพ เต จตุนฺนํ อิทฺธิปาทานํ ภาวิตตฺตา พหุลีกตตฺตา ฯ
กตเมสํ จตุนฺนํ ฯ อิธ ภิกฺขเว ภิกฺขุ ฉนฺทสมาธิปธานสงฺขารสมนฺนาคตํ
อิทฺธิปาทํ ภาเวติ ฯ วิริยสมาธิ จิตฺตสมาธิ วีมํสาสมาธิปธานสงฺขาร-
สมนฺนาคตํ อิทฺธิปาทํ ภาเวติ ฯ
[๑๑๗๓] เย หิ เกจิ ภิกฺขเว อตีตมทฺธานํ สมณา วา พฺราหฺมณา
วา อเนกวิหิตํ อิทฺธิวิธํ ปจฺจนุโภสุํ เอโกปิ หุตฺวา พหุธา อเหสุํ
@เชิงอรรถ: ๑ ม. ยุ. ปริมสิสฺสนฺติ ฯ ๒ ม. ยุ. ปริมสนฺติ ฯ
ฯเปฯ ยาว พฺรหฺมโลกาปิ กาเยน วสํ วตฺเตสุํ ฯ สพฺเพ
เต อิเมสํเยว จตุนฺนํ อิทฺธิปาทานํ ภาวิตตฺตา พหุลีกตตฺตา ฯ
เย หิ เกจิ ภิกฺขเว อนาคตมทฺธานํ สมณา วา พฺราหฺมณา
วา อเนกวิหิตํ อิทฺธิวิธํ ปจฺจนุโภสฺสนฺติ เอโกปิ หุตฺวา พหุธา
ภวิสฺสนฺติ ฯเปฯ ยาว พฺรหฺมโลกาปิ กาเยน วสํ วตฺเตสฺสนฺติ ๑- ฯ
สพฺเพ เต อิเมสํเยว จตุนฺนํ อิทฺธิปาทานํ ภาวิตตฺตา พหุลีกตตฺตา ฯ
เย หิ เกจิ ภิกฺขเว เอตรหิ สมณา วา พฺราหฺมณา วา อเนกวิหิตํ
อิทฺธิวิธํ ปจฺจนุโภนฺติ เอโกปิ หุตฺวา พหุธา โหนฺติ ฯเปฯ ยาว
พฺรหฺมโลกาปิ กาเยน วสํ วตฺเตนฺติ ฯ สพฺเพ เต อิเมสํเยว จตุนฺนํ
อิทฺธิปาทานํ ภาวิตตฺตา พหุลีกตตฺตาติ ฯ
[๑๑๗๔] จตุนฺนํ ภิกฺขเว อิทฺธิปาทานํ ภาวิตตฺตา พหุลีกตตฺตา
ภิกฺขุ อาสวานํ ขยา อนาสวํ เจโตวิมุตฺตึ ปญฺญาวิมุตฺตึ ทิฏฺเฐว
ธมฺเม สยํ อภิญฺญา สจฺฉิกตฺวา อุปสมฺปชฺช วิหรติ ฯ กตเมสํ
จตุนฺนํ ฯ อิธ ภิกฺขเว ภิกฺขุ ฉนฺทสมาธิปธานสงฺขารสมนฺนาคตํ
อิทฺธิปาทํ ภาเวติ วิริยสมาธิ จิตฺตสมาธิ วีมํสาสมาธิปธานสงฺขาร-
สมนฺนาคตํ อิทฺธิปาทํ ภาเวติ ฯ อิเมสํ โข ภิกฺขเว จตุนฺนํ
อิทฺธิปาทานํ ภาวิตตฺตา พหุลีกตตฺตา ภิกฺขุ อาสวานํ ขยา อนาสวํ
เจโตวิมุตฺตึ ปญฺญาวิมุตฺตึ ทิฏฺเฐว ธมฺเม สยํ อภิญฺญา สจฺฉิกตฺวา
อุปสมฺปชฺช วิหรตีติ ฯ
[๑๑๗๕] อิทฺธิญฺจ โว ภิกฺขเว เทเสสฺสามิ อิทฺธิปาทญฺจ
@เชิงอรรถ: ๑ ม. วตฺติสฺสนฺติ ฯ
อิทฺธิปาทภาวนญฺจ อิทฺธิปาทภาวนาคามินิญฺจ ปฏิปทํ ตํ สุณาถ ฯ
กตมา จ ภิกฺขเว อิทฺธิ ฯ อิธ ภิกฺขเว ภิกฺขุ อเนกวิหิตํ อิทฺธิวิธํ
ปจฺจนุโภติ เอโกปิ หุตฺวา พหุธา โหติ พหุธาปิ หุตฺวา เอโก
โหติ ฯเปฯ ยาว พฺรหฺมโลกาปิ กาเยน วสํ วตฺเตติ ฯ อยํ วุจฺจติ
ภิกฺขเว อิทฺธิ ฯ
[๑๑๗๖] กตโม จ ภิกฺขเว อิทฺธิปาโท ฯ โย [๑]- ภิกฺขเว มคฺโค
ยา ปฏิปทา อิทฺธิลาภาย อิทฺธิปฏิลาภาย สํวตฺตติ ฯ อยํ วุจฺจติ
ภิกฺขเว อิทฺธิปาโท ฯ
[๑๑๗๗] กตมา จ ภิกฺขเว อิทฺธิปาทภาวนา ฯ อิธ ภิกฺขเว
ภิกฺขุ ฉนฺทสมาธิปธานสงฺขารสมนฺนาคตํ อิทฺธิปาทํ ภาเวติ วิริยสมาธิ
จิตฺตสมาธิ วีมํสาสมาธิปธานสงฺขารสมนฺนาคตํ อิทฺธิปาทํ
ภาเวติ ฯ อยํ วุจฺจติ ภิกฺขเว อิทฺธิปาทภาวนา ฯ
เนื้อความพระไตรปิฎกฉบับภาษาบาลีอักษรไทย เล่มที่ ๑๙ หน้าที่ ๓๕๑-๓๕๕.
https://84000.org/tipitaka/read/pali_item.php?book=19&item=1170&items=8
อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=19&item=1170&items=8&mode=bracket
อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=19&item=1170&items=8
อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=19&item=1170&items=8
ศึกษาอรรถกถานี้ได้ที่ :-
https://84000.org/tipitaka/attha/attha.php?b=19&i=1170
สารบัญพระไตรปิฎกเล่มที่ ๑๙
https://84000.org/tipitaka/read/?index_19
https://84000.org/tipitaka/english/?index_19
บันทึก ๒ ธันวาคม พ.ศ. ๒๕๕๙.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย.
หากพบข้อผิดพลาด กรุณาแจ้งได้ที่ [email protected]
