พระไตรปิฎกเล่มที่ ๑๙ ภาษาบาลี อักษรไทย
พระสุตตันตปิฎกเล่มที่ ๑๑ สุตฺต. สํ. มหาวารวคฺโค

     [๓๓๒]   อิมาสํ   โข   ภิกฺขเว   ติสฺสนฺนํ   ตณฺหานํ   อภิญฺญาย
ปริญฺญาย     ปริกฺขยาย     ปหานาย     ฯเปฯ    ราควินยปริโยสานํ
โทสวินยปริโยสานํ   โมหวินยปริโยสานํ   ฯเปฯ   อมโตคธํ  อมตปรายนํ
อมตปริโยสานํ   ฯเปฯ   นิพฺพานนินฺนํ   นิพฺพานโปณํ   นิพฺพานปพฺภารํ  ฯ
อิมาสํ   โข   ภิกฺขเว   ติสฺสนฺนํ   ตณฺหานํ   ๒-   อภิญฺญาย  ปริญฺญาย
ปริกฺขยาย    ปหานาย    ฯเปฯ    อยํ   อริโย   อฏฺฐงฺคิโก   มคฺโค
ภาเวตพฺโพติ ฯ
                   เอสนาวคฺโค นิฏฺฐิโต ฯ
                        ตสฺสุทฺทานํ
         เอสนา วิธา อาสโว        ทุกฺขตา จ ติสฺโส ขิลา
         มลํ นิโฆ จ เวทนา         ทุเวน ตณฺหาเยน จาติ ๓- ฯ
                       ---------
@เชิงอรรถ: ๑ ม. ยุ. ตสินา ฯ ๒ ม. ยุ. ตสินานํ ฯ ๓ ม. ยุ. เทฺว ตณฺหา ตสินาย จาติ ฯ
                    โอฆวคฺโค เตรสโม
     [๓๓๓]   สาวตฺถีนิทานํ  ฯ  จตฺตาโรเม  ภิกฺขเว  โอฆา  ฯ กตเม
จตฺตาโร  ฯ  กาโมโฆ  ภโวโฆ  ทิฏฺโฐโฆ อวิชฺโชโฆ ฯ อิเม โข ภิกฺขเว
จตฺตาโร โอฆา ฯ
     [๓๓๔]   อิเมสํ   โข   ภิกฺขเว   จตุนฺนํ   โอฆานํ   อภิญฺญาย
ปริญฺญาย    ปริกฺขยาย   ปหานาย   ฯเปฯ   อยํ   อริโย   อฏฺฐงฺคิโก
มคฺโค ภาเวตพฺโพติ ฯ (ยถา เอสนา เอวํ วิตฺถาเรตพฺพํ) ฯ
     [๓๓๕]   สาวตฺถีนิทานํ  ฯ  จตฺตาโรเม  ภิกฺขเว  โยคา  ฯ กตเม
จตฺตาโร   ฯ  กามโยโค  ภวโยโค  ทิฏฺฐิโยโค  อวิชฺชาโยโค  ฯ  อิเม
โข ภิกฺขเว จตฺตาโร โยคา ฯ
     [๓๓๖]   อิเมสํ   โข   ภิกฺขเว   จตุนฺนํ   โยคานํ   อภิญฺญาย
ปริญฺญาย    ปริกฺขยาย   ปหานาย   ฯเปฯ   อยํ   อริโย   อฏฺฐงฺคิโก
มคฺโค ภาเวตพฺโพติ ฯ
     [๓๓๗]   สาวตฺถีนิทานํ  ฯ  จตฺตารีมานิ  ภิกฺขเว  อุปาทานานิ  ฯ
กตมานิ    จตฺตาริ    ฯ    กามูปาทานํ   ทิฏฺฐูปาทานํ   สีลพฺพตูปาทานํ
อตฺตวาทูปาทานํ ฯ อิมานิ โข ภิกฺขเว จตฺตาริ อุปาทานานิ ฯ
     [๓๓๘]   อิเมสํ   โข   ภิกฺขเว   จตุนฺนํ  อุปาทานานํ  อภิญฺญาย
ปริญฺญาย    ปริกฺขยาย   ปหานาย   ฯเปฯ   อยํ   อริโย   อฏฺฐงฺคิโก
มคฺโค ภาเวตพฺโพติ ฯ
     [๓๓๙]   สาวตฺถีนิทานํ  ฯ  จตฺตาโรเม  ภิกฺขเว  คนฺถา  ฯ กตเม
จตฺตาโร     ฯ     อภิชฺฌา    กายคนฺโถ    พฺยาปาโท    กายคนฺโถ
สีลพฺพตปรามาโส    กายคนฺโถ    อิทํสจฺจาภินิเวโส    กายคนฺโถ    ฯ
อิเม โข ภิกฺขเว จตฺตาโร คนฺถา ฯ
     [๓๔๐]   อิเมสํ   โข   ภิกฺขเว   จตุนฺนํ   คนฺถานํ   อภิญฺญาย
ปริญฺญาย    ปริกฺขยาย   ปหานาย   ฯเปฯ   อยํ   อริโย   อฏฺฐงฺคิโก
มคฺโค ภาเวตพฺโพติ ฯ
     [๓๔๑]   สาวตฺถีนิทานํ  ฯ  สตฺติเม  ภิกฺขเว  อนุสยา  ฯ  กตเม
สตฺต   ฯ   กามราคานุสโย   ปฏิฆานุสโย   ทิฏฺฐานุสโย  วิจิกิจฺฉานุสโย
มานานุสโย   ภวราคานุสโย   อวิชฺชานุสโย   ฯ   อิเม   โข  ภิกฺขเว
สตฺต อนุสยา ฯ
     [๓๔๒]   อิเมสํ   โข   ภิกฺขเว   สตฺตนฺนํ   อนุสยานํ  อภิญฺญาย
ปริญฺญาย    ปริกฺขยาย   ปหานาย   ฯเปฯ   อยํ   อริโย   อฏฺฐงฺคิโก
มคฺโค ภาเวตพฺโพติ ฯ
     [๓๔๓]   สาวตฺถีนิทานํ  ฯ  ปญฺจิเม  ภิกฺขเว  กามคุณา  ฯ  กตเม
ปญฺจ   ฯ   จกฺขุวิญฺเญยฺยา   รูปา   อิฏฺฐา   กนฺตา   มนาปา  ปิยรูปา
กามูปสญฺหิตา      รชนิยา      โสตวิญฺเญยฺยา      สทฺทา     ฯเปฯ
ฆานวิญฺเญยฺยา   คนฺธา   ฯ   ชิวฺหาวิญฺเญยฺยา  รสา  ฯ  กายวิญฺเญยฺยา
โผฏฺฐพฺพา   อิฏฺฐา  กนฺตา  มนาปา  ปิยรูปา  กามูปสญฺหิตา  รชนิยา  ฯ
อิเม โข ภิกฺขเว ปญฺจ กามคุณา ฯ
     [๓๔๔]   อิเมสํ   โข   ภิกฺขเว   ปญฺจนฺนํ  กามคุณานํ  อภิญฺญาย
ปริญฺญาย    ปริกฺขยาย   ปหานาย   ฯเปฯ   อยํ   อริโย   อฏฺฐงฺคิโก
มคฺโค ภาเวตพฺโพติ ฯ
     [๓๔๕]   สาวตฺถีนิทานํ   ฯ   ปญฺจิมานิ   ภิกฺขเว   นีวรณานิ  ฯ
กตมานิ    ปญฺจ   ฯ   กามจฺฉนฺทนีวรณํ   พฺยาปาทนีวรณํ   ถีนมิทฺธนีวรณํ
อุทฺธจฺจกุกฺกุจฺจนีวรณํ    วิจิกิจฺฉานีวรณํ    ฯ    อิมานิ    โข   ภิกฺขเว
ปญฺจ นีวรณานิ ฯ
     [๓๔๖]   อิเมสํ   โข   ภิกฺขเว   ปญฺจนฺนํ   นีวรณานํ  อภิญฺญาย
ปริญฺญาย    ปริกฺขยาย   ปหานาย   ฯเปฯ   อยํ   อริโย   อฏฺฐงฺคิโก
มคฺโค ภาเวตพฺโพติ ฯ
     [๓๔๗]   สาวตฺถีนิทานํ  ฯ  ปญฺจิเม  ภิกฺขเว  อุปาทานกฺขนฺธา  ฯ
กตเม   ปญฺจ   ฯ  เสยฺยถีทํ  ฯ  รูปูปาทานกฺขนฺโธ  เวทนูปาทานกฺขนฺโธ
สญฺญูปาทานกฺขนฺโธ    สงฺขารูปาทานกฺขนฺโธ    วิญฺญาณูปาทานกฺขนฺโธ   ฯ
อิเม โข ภิกฺขเว ปญฺจุปาทานกฺขนฺธา ฯ
     [๓๔๘]   อิเมสํ  โข  ภิกฺขเว  ปญฺจนฺนํ  อุปาทานกฺขนฺธานํ อภิญฺญาย
ปริญฺญาย   ปริกฺขยาย  ปหานาย  ฯเปฯ  อยํ  อริโย  อฏฺฐงฺคิโก  มคฺโค
ภาเวตพฺโพติ ฯ
     [๓๔๙]   สาวตฺถีนิทานํ   ฯ   ปญฺจิมานิ   ภิกฺขเว  โอรมฺภาคิยานิ
สญฺโญชนานิ    ฯ    กตมานิ    ปญฺจ    ฯ    สกฺกายทิฏฺฐิ   วิจิกิจฺฉา
สีลพฺพตปรามาโส   กามจฺฉนฺโท   พฺยาปาโท   ฯ   อิมานิ  โข  ภิกฺขเว
ปญฺโจรมฺภาคิยานิ สญฺโญชนานิ ฯ
     [๓๕๐]   อิเมสํ  โข  ภิกฺขเว  ปญฺจนฺนํ  โอรมฺภาคิยานํ สญฺโญชนานํ
อภิญฺญาย    ปริญฺญาย    ปริกฺขยาย   ปหานาย   ฯเปฯ   อยํ   อริโย
อฏฺฐงฺคิโก มคฺโค ภาเวตพฺโพติ ฯ
     [๓๕๑]   สาวตฺถีนิทานํ   ฯ   ปญฺจิมานิ   ภิกฺขเว  อุทฺธมฺภาคิยานิ
สญฺโญชนานิ  ฯ  กตมานิ  ปญฺจ  ฯ  รูปราโค  อรูปราโค  มาโน อุทฺธจฺจํ
อวิชฺชา ฯ อิมานิ โข ภิกฺขเว ปญฺจุทฺธมฺภาคิยานิ สญฺโญชนานิ ฯ
     [๓๕๒]   อิเมสํ  โข  ภิกฺขเว  ปญฺจนฺนํ  อุทฺธมฺภาคิยานํ สญฺโญชนานํ
อภิญฺญาย    ปริญฺญาย    ปริกฺขยาย   ปหานาย   ฯเปฯ   อยํ   อริโย
อฏฺฐงฺคิโก    มคฺโค    ภาเวตพฺโพ   ฯ   กตโม   อริโย   อฏฺฐงฺคิโก
มคฺโค   ฯ   อิธ   ภิกฺขเว   ภิกฺขุ   สมฺมาทิฏฺฐึ   ภาเวติ  วิเวกนิสฺสิตํ
ฯเปฯ   สมฺมาสมาธึ   ภาเวติ   วิเวกนิสฺสิตํ   วิราคนิสฺสิตํ  นิโรธนิสฺสิตํ
โวสฺสคฺคปริณามึ   ฯ   อิเมสํ   โข   ภิกฺขเว   ปญฺจนฺนํ  อุทฺธมฺภาคิยานํ
สญฺโญชนานํ    อภิญฺญาย    ปริญฺญาย    ปริกฺขยาย   ปหานาย   ฯเปฯ
อยํ   อริโย   อฏฺฐงฺคิโก  มคฺโค  ภาเวตพฺโพติ  ฯ  เสยฺยถาปิ  ภิกฺขเว
คงฺคา นที ฯเปฯ
     [๓๕๓]   สาวตฺถีนิทานํ   ฯ   ปญฺจิมานิ   ภิกฺขเว  อุทฺธมฺภาคิยานิ
สญฺโญชนานิ   ฯ   กตมานิ   ปญฺจ   ฯ   รูปราโค   อรูปราโค  มาโน
อุทฺธจฺจํ    อวิชฺชา    ฯ    อิมานิ   โข   ภิกฺขเว   ปญฺจุทฺธมฺภาคิยานิ
สญฺโญชนานิ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑๙ หน้าที่ ๘๗-๙๑.
https://84000.org/tipitaka/read/pali_item.php?book=19&item=332&items=22
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=19&item=332&items=22&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=19&item=332&items=22
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=19&item=332&items=22
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=19&i=332
             สารบัญพระไตรปิฎกเล่มที่ ๑๙
https://84000.org/tipitaka/read/?index_19
https://84000.org/tipitaka/english/?index_19