พระไตรปิฎกเล่มที่ ๒๐ ภาษาบาลี อักษรไทย
พระสุตตันตปิฎกเล่มที่ ๑๒ สุตฺต. องฺ. (๑): เอก-ทุก-ติกนิปาตา

     [๕๑๕]   ๗๖  อถโข  อายสฺมา  อานนฺโท  เยน ภควา เตนุปสงฺกมิ
อุปสงฺกมิตฺวา    ภควนฺตํ    อภิวาเทตฺวา   เอกมนฺตํ   นิสีทิ   เอกมนฺตํ
นิสินฺนํ   โข  อายสฺมนฺตํ  อานนฺทํ  ภควา  เอตทโวจ   ยํ  ๒-  อานนฺท
อนุกมฺเปยฺยาถ  เย  จ  โสตพฺพํ  มญฺเญยฺยุํ  มิตฺตา  วา อมจฺจา วา ญาตี
@เชิงอรรถ: ๑ ม. ปณฺฑิตกุมารก ฯ  ๒ ม. เย ฯ
วา   สาโลหิตา   วา  เต  โว  อานนฺท  ตีสุ  ฐาเนสุ  สมาทเปตพฺพา
นิเวเสตพฺพา   ปติฏฺฐาเปตพฺพา   กตเมสุ   ตีสุ  พุทฺเธ  อเวจฺจปฺปสาเท
สมาทเปตพฺพา   นิเวเสตพฺพา  ปติฏฺฐาเปตพฺพา  อิติปิ  โส  ภควา  อรหํ
สมฺมาสมฺพุทฺโธ     วิชฺชาจรณสมฺปนฺโน    สุคโต    โลกวิทู    อนุตฺตโร
ปุริสทมฺมสารถิ    สตฺถา    เทวมนุสฺสานํ    พุทฺโธ    ภควาติ   ธมฺเม
อเวจฺจปฺปสาเท     สมาทเปตพฺพา     นิเวเสตพฺพา    ปติฏฺฐาเปตพฺพา
สฺวากฺขาโต    ภควตา    ธมฺโม   สนฺทิฏฺฐิโก   อกาลิโก   เอหิปสฺสิโก
โอปนยิโก    ปจฺจตฺตํ   เวทิตพฺโพ   วิญฺญูหีติ   สงฺเฆ   อเวจฺจปฺปสาเท
สมาทเปตพฺพา    นิเวเสตพฺพา   ปติฏฺฐาเปตพฺพา   สุปฏิปนฺโน   ภควโต
สาวกสงฺโฆ     อุชุปฏิปนฺโน    ภควโต    สาวกสงฺโฆ    ญายปฏิปนฺโน
ภควโต    สาวกสงฺโฆ   สามีจิปฏิปนฺโน   ภควโต   สาวกสงฺโฆ   ยทิทํ
จตฺตาริ   ปุริสยุคานิ   อฏฺฐ   ปุริสปุคฺคลา   เอส  ภควโต  สาวกสงฺโฆ
อาหุเนยฺโย     ปาหุเนยฺโย    ทกฺขิเณยฺโย    อญฺชลิกรณีโย    อนุตฺตรํ
ปุญฺญกฺเขตฺตํ โลกสฺสาติ
     {๕๑๕.๑}   สิยา    อานนฺท    จตุนฺนํ   มหาภูตานํ   อญฺญถตฺตํ
ปฐวิธาตุยา   อาโปธาตุยา   เตโชธาตุยา   วาโยธาตุยา    น  เตฺวว
พุทฺเธ     อเวจฺจปฺปสาเทน     สมนฺนาคตสฺส    อริยสาวกสฺส    สิยา
อญฺญถตฺตํ      ตตฺริทํ      อญฺญถตฺตํ     โส     วตานนฺท     พุทฺเธ
อเวจฺจปฺปสาเทน      สมนฺนาคโต      อริยสาวโก     นิรยํ     วา
ติรจฺฉานโยนี     วา     เปตฺติวิสยํ     วา    อุปปชฺชิสฺสตีติ    เนตํ
ฐานํ      วิชฺชติ      สิยา      อานนฺท      จตุนฺนํ     มหาภูตานํ
อญฺญถตฺตํ        ปฐวิธาตุยา        อาโปธาตุยา       เตโชธาตุยา
วาโยธาตุยา    น    เตฺวว    ธมฺเม   ฯเปฯ   น   เตฺวว   สงฺเฆ
อเวจฺจปฺปสาเทน    สมนฺนาคตสฺส    อริยสาวกสฺส    สิยา    อญฺญถตฺตํ
ตตฺริทํ     อญฺญถตฺตํ    โส    วตานนฺท    สงฺเฆ    อเวจฺจปฺปสาเทน
สมนฺนาคโต     อริยสาวโก     นิรยํ     วา    ติรจฺฉานโยนึ    วา
เปตฺติวิสยํ   วา   อุปปชฺชิสฺสตีติ   เนตํ  ฐานํ  วิชฺชติ  ยํ  ๑-  อานนฺท
อนุกมฺเปยฺยาถ   เย   จ   โสตพฺพํ   มญฺเญยฺยุํ   มิตฺตา   วา  อมจฺจา
วา  ญาตี  วา  สาโลหิตา  วา  เต  โว  อานนฺท  อิเมสุ  ตีสุ ฐาเนสุ
สมาทเปตพฺพา นิเวเสตพฺพา ปติฏฺฐาเปตพฺพาติ ฯ
     [๕๑๖]   ๗๗  อถโข  อายสฺมา  อานนฺโท  เยน ภควา เตนุปสงฺกมิ
อุปสงฺกมิตฺวา    ภควนฺตํ    อภิวาเทตฺวา   เอกมนฺตํ   นิสีทิ   เอกมนฺตํ
นิสินฺโน  โข  อายสฺมา  อานนฺโท  ภควนฺตํ  เอตทโวจ ภโว ภโวติ ภนฺเต
วุจฺจติ  กิตฺตาวตา  นุ  โข  ภนฺเต  ภโว  โหตีติ  ฯ  กามธาตุเวปกฺกญฺจ
อานนฺท   กมฺมํ   นาภวิสฺส   อปิ   นุ  โข  กามภโว  ปญฺญาเยถาติ  ฯ
โน   เหตํ   ภนฺเต  ฯ  อิติ  โข  อานนฺท  กมฺมํ  เขตฺตํ  วิญฺญาณํ  พีชํ
ตณฺหา   สิเนโห   อวิชฺชานีวรณานํ   สตฺตานํ   ตณฺหาสญฺโญชนานํ  หีนาย
ธาตุยา   วิญฺญาณํ   ปติฏฺฐิตํ   เอวํ   อายตึ   ปุนพฺภวาภินิพฺพตฺติ   โหติ
รูปธาตุเวปกฺกญฺจ   อานนฺท   กมฺมํ   นาภวิสฺส   อปิ   นุ  โข  รูปภโว
ปญฺญาเยถาติ  ฯ  โน  เหตํ ภนฺเต ฯ อิติ โข อานนฺท กมฺมํ เขตฺตํ วิญฺญาณํ
พีชํ    ตณฺหา   สิเนโห   อวิชฺชานีวรณานํ   สตฺตานํ   ตณฺหาสญฺโญชนานํ
มชฺฌิมาย   ธาตุยา   วิญฺญาณํ   ปติฏฺฐิตํ  เอวํ  อายตึ  ปุนพฺภวาภินิพฺพตฺติ
โหติ       อรูปธาตุเวปกฺกญฺจ      อานนฺท      กมฺมํ      นาภวิสฺส
@เชิงอรรถ: ๑ ม. เย ฯ
อปิ   นุ   โข  อรูปภโว  ปญฺญาเยถาติ  ฯ  โน  เหตํ  ภนฺเต  ฯ  อิติ
โข  อานนฺท  กมฺมํ  เขตฺตํ  วิญฺญาณํ  พีชํ  ตณฺหาสิเนโห  อวิชฺชานีวรณานํ
สตฺตานํ      ตณฺหาสญฺโญชนานํ      ปณีตาย      ธาตุยา     วิญฺญาณํ
ปติฏฺฐิตํ   เอวํ   อายตึ   ปุนพฺภวาภินิพฺพตฺติ   โหติ  เอวํ  โข  อานนฺท
ภโว โหตีติ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๒๐ หน้าที่ ๒๘๕-๒๘๘.
https://84000.org/tipitaka/read/pali_item.php?book=20&item=515&items=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=20&item=515&items=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=20&item=515&items=2
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=20&item=515&items=2
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=20&i=515
             สารบัญพระไตรปิฎกเล่มที่ ๒๐
https://84000.org/tipitaka/read/?index_20
https://84000.org/tipitaka/english/?index_20