พระไตรปิฎกเล่มที่ ๒๕ ภาษาบาลี อักษรไทย
พระสุตตันตปิฎกเล่มที่ ๑๗ สุตฺต. ขุ. ขุทฺทกปาฐ-ธมฺมปทคาถา-อุทานํ-อิติวุตฺตก-สุตฺตนิปาตา

     [๑๐๐]   ๖  เอวมฺเม  สุตํ  ฯ  เอกํ  สมยํ ภควา สาวตฺถิยํ วิหรติ
เชตวเน   อนาถปิณฺฑิกสฺส   อาราเม   ฯ   เตน   โข   ปน  สมเยน
อายสฺมา    ปิณฺโฑลภารทฺวาโช    ภควโต    อวิทูเร   นิสินฺโน   โหติ
ปลฺลงฺกํ   อาภุชิตฺวา   อุชุํ  กายํ  ปณิธาย  อารญฺญโก  ๓-  ปิณฺฑปาติโก
ปํสุกูลิโก    เตจีวริโก    อปฺปิจฺโฉ    สนฺตุฏฺโฐ   ปวิวิตฺโต   อสํสฏฺโฐ
อารทฺธวิริโย ธุตวาโท อธิจิตฺตมนุยุตฺโต ฯ
     {๑๐๐.๑}   อทฺทสา   โข  ภควา  อายสฺมนฺตํ  ปิณฺโฑลภารทฺวาชํ
อวิทูเร    นิสินฺนํ    ปลฺลงฺกํ    อาภุชิตฺวา    อุชุํ    กายํ    ปณิธาย
อารญฺญกํ     ๔-      ปิณฺฑปาติกํ     ปํสุกูลิกํ    เตจีวริกํ    อปฺปิจฺฉํ
สนฺตุฏฺฐํ       ปวิวิตฺตํ       อสํสฏฺฐํ       อารทฺธวิริยํ      ธุตวาทํ
@เชิงอรรถ: ๑ โป. ม. ยุ. น กายํ ฯ  ๒ ม. ยเทโก รมตี มโนติ ฯ  ๓ โป. ม. อรญฺญิโก ฯ
@๔ โป. ม. อารญฺญิกํ ฯ
อธิจิตฺตมนุยุตฺตํ ฯ
     {๑๐๐.๒}   อถ  โข  ภควา  เอตมตฺถํ  วิทิตฺวา ตายํ เวลายํ อิมํ
อุทานํ อุทาเนสิ
      อนุปวาโท อนุปฆาโต          ปาติโมกฺเข จ สํวโร
      มตฺตญฺญุตา จ ภตฺตสฺมึ        ปตฺถญฺจ ๑- สยนาสนํ
      อธิจิตฺเต จ อาโยโค              เอตํ พุทฺธานสาสนนฺติ ฯ ฉฏฺฐํ ฯ
     [๑๐๑]   ๗   เอวมฺเม   สุตํ  ฯ  เอกํ  สมยํ  ภควา  สาวตฺถิยํ
วิหรติ  เชตวเน  อนาถปิณฺฑิกสฺส  อาราเม  ฯ  เตน  โข  ปน  สมเยน
อายสฺมา    สารีปุตฺโต   ภควโต   อวิทูเร   นิสินฺโน   โหติ   ปลฺลงฺกํ
อาภุชิตฺวา    อุชุํ    กายํ   ปณิธาย   อปฺปิจฺโฉ   สนฺตุฏฺโฐ   ปวิวิตฺโต
อสํสฏฺโฐ   อารทฺธวิริโย   อธิจิตฺตมนุยุตฺโต   ฯ   อทฺทสา   โข  ภควา
อายสฺมนฺตํ    สารีปุตฺตํ   อวิทูเร   นิสินฺนํ   ปลฺลงฺกํ   อาภุชิตฺวา   อุชุํ
กายํ    ปณิธาย   อปฺปิจฺฉํ   สนฺตุฏฺฐํ   ปวิวิตฺตํ   อสํสฏฺฐํ   อารทฺธวิริยํ
อธิจิตฺตมนุยุตฺตํ   ฯ  อถ  โข  ภควา  เอตมตฺถํ  วิทิตฺวา  ตายํ  เวลายํ
อิมํ อุทานํ อุทาเนสิ
      อธิเจตโส อปฺปมชฺชโต    มุนิโน โมนปเถสุ สิกฺขโต
      โสกา น ภวนฺติ ตาทิโน   อุปสนฺตสฺส สทา สตีมโตติ ฯ สตฺตมํ ฯ
     [๑๐๒]   ๘  เอวมฺเม  สุตํ  ฯ  เอกํ  สมยํ ภควา สาวตฺถิยํ วิหรติ
เชตวเน   อนาถปิณฺฑิกสฺส   อาราเม   ฯ   เตน   โข   ปน  สมเยน
ภควา   สกฺกโต   โหติ   ครุกโต   มานิโต   ปูชิโต   อปจิโต   ลาภี
@เชิงอรรถ: ๑ โป. ม. ปนฺตญฺจ ฯ
จีวรปิณฺฑปาตเสนาสนคิลานปจฺจยเภสชฺชปริกฺขารานํ ฯ
ภิกฺขุสงฺโฆปิ   สกฺกโต   โหติ   ครุกโต  มานิโต  ปูชิโต  อปจิโต  ลาภี
จีวรปิณฺฑปาตเสนาสนคิลานปจฺจยเภสชฺชปริกฺขารานํ ฯ
อญฺญติตฺถิยา     ปน    ปริพฺพาชกา    อสกฺกตา    โหนฺติ    อครุกตา
อมานิตา     อปูชิตา     อนปจิตา    น    ลาภิโน    จีวรปิณฺฑปาต-
เสนาสนคิลานปจฺจยเภสชฺชปริกฺขารานํ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๒๕ หน้าที่ ๑๓๖-๑๓๘.
https://84000.org/tipitaka/read/pali_item.php?book=25&item=100&items=3
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=25&item=100&items=3&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=25&item=100&items=3
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=25&item=100&items=3
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=25&i=100
             สารบัญพระไตรปิฎกเล่มที่ ๒๕
https://84000.org/tipitaka/read/?index_25
https://84000.org/tipitaka/english/?index_25