พระไตรปิฎกเล่มที่ ๒๕ ภาษาบาลี อักษรไทย
พระสุตตันตปิฎกเล่มที่ ๑๗ สุตฺต. ขุ. ขุทฺทกปาฐ-ธมฺมปทคาถา-อุทานํ-อิติวุตฺตก-สุตฺตนิปาตา

     [๓๑๘]   |๓๑๘.๖๘๔| พหูเทวา มนุสฺสา จ        มงฺคลานิ อจินฺตยุํ
                          อากงฺขมานา โสตฺถานํ   พฺรูหิ มงฺคลมุตฺตมํ ฯ
     |๓๑๘.๖๘๕|   อเสวนา จ พาลานํ         ปณฺฑิตานญฺจ เสวนา
                          ปูชา จ ปูชนียานํ ๑-      เอตมฺมงฺคลมุตฺตมํ ๒- ฯ
     |๓๑๘.๖๘๖|   ปฏิรูปเทสวาโส จ           ปุพฺเพ จ กตปุญฺญตา
                          อตฺตสมฺมาปณิธิ จ         เอตมฺมงฺคลมุตฺตมํ ฯ
     |๓๑๘.๖๘๗|   พาหุสจฺจญฺจ สิปฺปญฺจ    วินโย จ สุสิกฺขิโต
                          สุภาสิตา จ ยา วาจา     เอตมฺมงฺคลมุตฺตมํ ฯ
     |๓๑๘.๖๘๘|   มาตาปิตุอุปฏฺฐานํ         ปุตฺตทารสฺส สงฺคโห
@เชิงอรรถ: ๑ ม. ปูชเนยฺยานํ ฯ ๒ ม. เอตํ ... ฯ
                          อนากุลา จ กมฺมนฺตา    เอตมฺมงฺคลมุตฺตมํ
     |๓๑๘.๖๘๙|   ทานญฺจ ธมฺมจริยา จ     ญาตกานญฺจ สงฺคโห
                          อนวชฺชานิ กมฺมานิ        เอตมฺมงฺคลมุตฺตมํ ฯ
     |๓๑๘.๖๙๐|   อารตี วิรติ ปาปา            มชฺชปานา จ สญฺญโม
                          อปฺปมาโท จ ธมฺเมสุ      เอตมฺมงฺคลมุตฺตมํ ฯ
     |๓๑๘.๖๙๑|   คารโว จ นิวาโต จ          สนฺตุฏฺฐี ๑- จ กตญฺญุตา
                          กาเลน ธมฺมสฺสวนํ         เอตมฺมงฺคลมุตฺตมํ ฯ
     |๓๑๘.๖๙๒|   ขนฺตี จ โสวจสฺสตา         สมณานญฺจ ทสฺสนํ
                          กาเลน ธมฺมสากจฺฉา     เอตมฺมงฺคลมุตฺตมํ ฯ
     |๓๑๘.๖๙๓|   ตโป จ พฺรหฺมจริยญฺจ ๒-    อริยสจฺจานทสฺสนํ
                          นิพฺพานสจฺฉิกิริยา จ     เอตมฺมงฺคลมุตฺตมํ ฯ
     |๓๑๘.๖๙๔|   ผุฏฺฐสฺส โลกธมฺเมหิ       จิตฺตํ ยสฺส น กมฺปติ
                          อโสกํ วิรชํ เขมํ              เอตมฺมงฺคลมุตฺตมํ ฯ
     |๓๑๘.๖๙๕|   เอตาทิสานิ กตฺวาน        สพฺพตฺถมปราชิตา
                          สพฺพตฺถ โสตฺถึ คจฺฉนฺติ  ตนฺเตสํ มงฺคลมุตฺตมนฺติ ฯ
                                      มงฺคลสุตฺตํ จตุตฺถํ ฯ
                                        -----------
@เชิงอรรถ: ๑ ม. สนฺตุฏฺฐิ ฯ ๒ ยุ. พฺรหฺมจริยา จ ฯ
         สุตฺตนิปาเต ทุติยสฺส จูฬวคฺคสฺส ปญฺจมํ สูจิโลมสุตฺตํ
     [๓๑๙]   ๕  เอวมฺเม  สุตํ  ฯ  เอกํ  สมยํ  ภควา  คยายํ วิหรติ
ฏงฺกิตมญฺเจ   สูจิโลมยกฺขสฺส   ๑-  ภวเน  ฯ  เตน  โข  ปน  สมเยน
ขโร  จ  ยกฺโข  สูจิโลโม  จ  ยกฺโข  ภควโต  อวิทูเร  อติกฺกมนฺติ  ฯ
อถ   โข  ขโร  ยกฺโข  สูจิโลมํ  ยกฺขํ  เอตทโวจ  เอโส  สมโณติ  ฯ
เนโส  สมโณ  สมณโก  เอโส  ยาว  ๒-  อหํ  ปชานามิ ยทิ วา [๓]-
สมโณ ยทิ วา [๔]- สมณโกติ ฯ
     {๓๑๙.๑}   อถ  โข  สูจิโลโม  ยกฺโข  เยน  ภควา เตนุปสงฺกมิ
อุปสงฺกมิตฺวา   ภควโต   กายํ   อุปนาเมสิ  ฯ  อถ  โข  ภควา  กายํ
อปนาเมสิ   ฯ  อถ  โข  สูจิโลโม  ยกฺโข  ภควนฺตํ  เอตทโวจ  ภายสิ
มํ  สมณาติ  ฯ  น  ขฺวาหนฺตํ  อาวุโส ภายามิ อปิ จ [๕]- เต สมฺผสฺโส
ปาปโกติ ฯ
     {๓๑๙.๒}   ปญฺหนฺตํ  สมณ  ปุจฺฉิสฺสามิ  สเจ  เม  น  พฺยากาสิ
จิตฺตํ  วา  เต  ขิปิสฺสามิ  หทยํ วา เต ผาเลสฺสามิ ปาเทสุ วา คเหตฺวา
ปารคงฺคาย ขิปิสฺสามีติ ฯ
     {๓๑๙.๓}   น  ขฺวาหนฺตํ อาวุโส ปสฺสามิ สเทวเก โลเก สมารเก
สพฺรหฺมเก    สสฺสมณพฺราหฺมณิยา    ปชาย   สเทวมนุสฺสาย   โย   เม
จิตฺตํ   วา   ขิเปยฺย   หทยํ   วา   ผาเลยฺย  ปาเทสุ  วา  คเหตฺวา
ปารคงฺคาย   ขิเปยฺย   อปิ   จ   ตฺวํ  อาวุโส  ปุจฺฉ  ยทากงฺขสีติ  ฯ
อถ โข สูจิโลโม ยกฺโข ภควนฺตํ คาถาย อชฺฌภาสิ

             เนื้อความพระไตรปิฎกฉบับภาษาบาลีอักษรไทย เล่มที่ ๒๕ หน้าที่ ๓๗๖-๓๗๘.
https://84000.org/tipitaka/read/pali_item.php?book=25&item=318&items=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=25&item=318&items=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=25&item=318&items=2
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=25&item=318&items=2
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=25&i=318
             สารบัญพระไตรปิฎกเล่มที่ ๒๕
https://84000.org/tipitaka/read/?index_25
https://84000.org/tipitaka/english/?index_25