พระไตรปิฎกเล่มที่ ๒๙ ภาษาบาลี อักษรไทย
พระสุตตันตปิฎกเล่มที่ ๒๑ สุตฺต. ขุ. มหานิทฺเทโส

     [๙๒๙]        ปญฺจนฺน ๑- ธีโร ภยานํ น ภาเย
                       ภิกฺขุ สโต สปฺปริยนฺตจารี
                       ฑํสาธิปาตาน สิรึสปานํ ๒-
                       มนุสฺสผสฺสาน จตุปฺปทานํ ฯ
     [๙๓๐]   ปญฺจนฺน   ธีโร   ภยานํ   น   ภาเยติ   ธีโรติ  ธีโร
ปณฺฑิโต    ปญฺญวา    พุทฺธิมา    ญาณี   วิภาวี   เมธาวี   ฯ   ธีโร
ปญฺจนฺนํ   ภยานํ   น  ภาเยยฺย  น  ตเสยฺย  [๓]-  น  อุตฺตเสยฺย  น
ปริตฺตเสยฺย   น   สนฺตาสํ   อาปชฺเชยฺย   อภิรุ   ๔-   อสฺส  อจฺฉมฺภี
อนุตฺราสี     อปลายี    ปหีนภยเภรโว    วิคตโลมหํโส    วิหเรยฺยาติ
ปญฺจนฺน ธีโร ภยานํ น ภาเย ฯ
     [๙๓๑]   ภิกฺขุ   สโต   สปฺปริยนฺตจารีติ  ภิกฺขูติ  กลฺยาณปุถุชฺชโน
วา  ภิกฺขุ  เสกฺโข  วา  ภิกฺขุ  ฯ  สโตติ  จตูหิ  การเณหิ  สโต กาเย
กายานุปสฺสนาสติปฏฺฐานํ     ภาเวนฺโต     สโต    เวทนาสุ    จิตฺเต
ธมฺเมสุ    ธมฺมานุปสฺสนาสติปฏฺฐานํ    ภาเวนฺโต   สโต   โส   วุจฺจติ
สโต    ฯ    สปฺปริยนฺตจารีติ   จตฺตาโร   ปริยนฺตา   สีลสํวรปริยนฺโต
อินฺทฺริยสํวรปริยนฺโต            โภชเน           มตฺตญฺญุตาปริยนฺโต
ชาคริยานุโยคปริยนฺโต ฯ
@เชิงอรรถ: ๑ โป. ม. ปญฺจนฺนํ ฯ ๒ ม. สิรีสปานํ ฯ ๓ ม. น สนฺตเสยฺย ฯ ๔ ม. ยุ. อภีรู ฯ
     {๙๓๑.๑}   กตโม  สีลสํวรปริยนฺโต  ฯ  อิธ  ภิกฺขุ  สีลวา  โหติ
ปาฏิโมกฺขสํวรสํวุโต     วิหรติ     อาจารโคจรสมฺปนฺโน     อณุมตฺเตสุ
วชฺเชสุ   ภยทสฺสาวี   สมาทาย   สิกฺขติ   สิกฺขาปเทสุ  อนฺโต  ปูติภาวํ
ปจฺจเวกฺขมาโน   อนฺโต   สีลสํวรปริยนฺเต   จรติ   มริยาทํ  น  ภินฺทติ
อยํ สีลสํวรปริยนฺโต ฯ
     {๙๓๑.๒}   กตโม  อินฺทฺริยสํวรปริยนฺโต  ฯ  อิธ  ภิกฺขุ  จกฺขุนา
รูปํ   ทิสฺวา   น  นิมิตฺตคฺคาหี  โหติ  นานุพฺยญฺชนคฺคาหี  ยตฺวาธิกรณเมนํ
จกฺขุนฺทฺริยํ    อสํวุตํ    วิหรนฺตํ   อภิชฺฌาโทมนสฺสา   ปาปกา   อกุสลา
ธมฺมา   อนฺวาสฺสเวยฺยุํ   ตสฺส   สํวราย   ปฏิปชฺชติ  รกฺขติ  จกฺขุนฺทฺริยํ
จกฺขุนฺทฺริเย   สํวรํ   อาปชฺชติ   โสเตน   สทฺทํ  สุตฺวา  ฆาเนน  คนฺธํ
ฆายิตฺวา    ชิวฺหาย    รสํ   สายิตฺวา   กาเยน   โผฏฺฐพฺพํ   ผุสิตฺวา
มนสา    ธมฺมํ   วิญฺญาย   น   นิมิตฺตคฺคาหี   โหติ   นานุพฺยญฺชนคฺคาหี
ยตฺวาธิกรณเมนํ     มนินฺทฺริยํ    อสํวุตํ    วิหรนฺตํ    อภิชฺฌาโทมนสฺสา
ปาปกา   อกุสลา   ธมฺมา   อนฺวาสฺสเวยฺยุํ   ตสฺส   สํวราย  ปฏิปชฺชติ
รกฺขติ    มนินฺทฺริยํ    มนินฺทฺริเย    สํวรํ    อาปชฺชติ   อาทิตฺตปริยายํ
ปจฺจเวกฺขมาโน    อนฺโต    อินฺทฺริยสํวรปริยนฺเต   จรติ   มริยาทํ   น
ภินฺทติ อยํ อินฺทฺริยสํวรปริยนฺโต ฯ
     {๙๓๑.๓}   กตโม   โภชเน  มตฺตญฺญุตาปริยนฺโต  ฯ  อิธ  ภิกฺขุ
ปฏิสงฺขา  โยนิโส  อาหารํ  อาหาเรติ  เนว ทวาย น มทาย น มณฺฑนาย
น   วิภูสนาย  ยาวเทว  อิมสฺส  กายสฺส  ฐิติยา  ยาปนาย  วิหึสุปรติยา
พฺรหฺมจริยานุคฺคหาย    อิติ    ปุราณญฺจ    เวทนํ   ปฏิหงฺขามิ   นวญฺจ
เวทนํ   น   อุปฺปาเทสฺสามิ   ยาตฺรา   จ   เม   ภวิสฺสติ  อนวชฺชตา
จ       ผาสุวิหาโร      จาติ      อกฺขพฺภญฺชนวณปฏิจฺฉาทนปุตฺตมํสูปมํ
ปจฺจเวกฺขมาโน   อนฺโต   โภชเน   มตฺตญฺญุตาปริยนฺเต   จรติ  มริยาทํ
น ภินฺทติ อยํ โภชเน มตฺตญฺญุตาปริยนฺโต ฯ
     {๙๓๑.๔}   กตโม  ชาคริยานุโยคปริยนฺโต  ฯ  อิธ ภิกฺขุ ทิวสํ ๑-
จงฺกเมน  นิสชฺชาย  อาวรณีเยหิ  ธมฺเมหิ  จิตฺตํ ปริโสเธติ รตฺติยา ปฐมํ
ยามํ   จงฺกเมน   นิสชฺชาย   อาวรณีเยหิ   ธมฺเมหิ   จิตฺตํ  ปริโสเธติ
รตฺติยา   มชฺฌิมํ   ยามํ   ทกฺขิเณน  ปสฺเสน  สีหเสยฺยํ  กปฺเปติ  ปาเท
ปาทํ    อจฺจาธาย    สโต    สมฺปชาโน    อุฏฺฐานสญฺญํ   มนสิกริตฺวา
รตฺติยา   ปจฺฉิมํ   ยามํ   ปจฺจุฏฺฐาย   จงฺกเมน  นิสชฺชาย  อาวรณีเยหิ
ธมฺเมหิ   จิตฺตํ   ปริโสเธติ   ภทฺเทกรตฺตวิหารํ  ปจฺจเวกฺขมาโน  อนฺโต
ชาคริยานุโยคปริยนฺเต   จรติ  มริยาทํ  น  ภินฺทติ  อยํ  ชาคริยานุโยค-
ปริยนฺโตติ ภิกฺขุ สโต สปฺปริยนฺตจารี ฯ
     [๙๓๒]   ฑํสาธิปาตาน  สิรึสปานนฺติ  ฑํสา  วุจฺจนฺติ ปิงฺคลมกฺขิกา ฯ
อธิปาติกา   ๒-  วุจฺจนฺติ  สพฺพาปิ  มกฺขิกาโย  ฯ  กึการณา  อธิปาติกา
วุจฺจนฺติ   สพฺพาปิ   มกฺขิกาโย  ฯ  ตา  อุปฺปติตฺวา  อุปฺปติตฺวา  ขาทนฺติ
ตํการณา  อธิปาติกา  วุจฺจนฺติ  สพฺพาปิ  มกฺขิกาโย  ฯ  สิรึสปา  วุจฺจนฺติ
อหีติ ฑํสาธิปาตาน สิรึสปานํ ฯ
@เชิงอรรถ: ๑ โป. ยุ. ทิวา ฯ ๒ ม. อธิปาตกา ฯ
     [๙๓๓]   มนุสฺสผสฺสาน    จตุปฺปทานนฺติ   มนุสฺสผสฺสา   วุจฺจนฺติ
โจรา  วา  อสฺสุ  มาณวา  กตกมฺมา  วา  อกตกมฺมา  วา  ฯ เต ภิกฺขุํ
ปญฺหํ   วา  ปุจฺเฉยฺยุํ  วาทํ  วา  อาโรเปยฺยุํ  อกฺโกเสยฺยุํ  ปริภาเสยฺยุํ
โรเสยฺยุํ  วิโรเสยฺยุํ  หึเสยฺยุํ  วิหึเสยฺยุํ  เหเฐยฺยุํ  วิเหเฐยฺยุํ  ฆาเตยฺยุํ
อุปฆาเตยฺยุํ   อุปฆาตํ   วา   กเรยฺยุํ  ฯ  โยโกจิ  มนุสฺสโต  อุปฆาโต
มนุสฺสผสฺโส    ฯ   จตุปฺปทานนฺติ   สีหา   พฺยคฺฆา   ทีปิ   อจฺฉตรจฺฉา
โกกา   โคมหิสา   หตฺถี   ฯ  เต  ภิกฺขุํ  มทฺเทยฺยุํ  ขาเทยฺยุํ  หึเสยฺยุํ
วิหึเสยฺยุํ    เหเฐยฺยุํ    วิเหเฐยฺยุํ   ฆาเตยฺยุํ   อุปฆาเตยฺยุํ   อุปฆาตํ
วา    กเรยฺยุํ    ฯ   จตุปฺปทโต   อุปฆาโต   ยงฺกิญฺจิ   จตุปฺปทภยนฺติ
มนุสฺสผสฺสาน จตุปฺปทานํ ฯ เตนาห ภควา
                       ปญฺจนฺน ธีโร ภยานํ น ภาเย
                       ภิกฺขุ สโต สปฺปริยนฺตจารี
                       ฑํสาธิปาตาน สิรึสปานํ
                       มนุสฺสผสฺสาน จตุปฺปทานนฺติ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๒๙ หน้าที่ ๕๙๓-๕๙๖.
https://84000.org/tipitaka/read/pali_item.php?book=29&item=929&items=5
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=29&item=929&items=5&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=29&item=929&items=5
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=29&item=929&items=5
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=29&i=929
             สารบัญพระไตรปิฎกเล่มที่ ๒๙
https://84000.org/tipitaka/read/?index_29
https://84000.org/tipitaka/english/?index_29