พระไตรปิฎกเล่มที่ ๓๑ ภาษาบาลี อักษรไทย
พระสุตตันตปิฎกเล่มที่ ๒๓ สุตฺต. ขุ. ปฏิสมฺภิทามคฺโค

     [๙๘]   ปุริมกมฺมภวสฺมึ โมโห อวิชฺชา อายุหนา สงฺขารา นิกนฺติ ตณฺหา
อุปคมนํ   อุปาทานํ   เจตนา  ภโว  อิเม  ปญฺจ  ธมฺมา  ปุริมกมฺมภวสฺมึ
อิธ   ปฏิสนฺธิยา   ปจฺจยา   อิธ   ปฏิสนฺธิ  วิญฺญาณํ  โอกฺกนฺติ  นามรูปํ
ปสาโท   อายตนํ  ผุฏฺโฐ  ผสฺโส  เวทยิตํ  เวทนา  อิเม  ปญฺจ  ธมฺมา
อิธุปปตฺติภวสฺมึ   ปุเร   กตสฺส   กมฺมสฺส   ปจฺจยา   อิธ   ปริปกฺกตฺตา
อายตนานํ    โมโห   อวิชฺชา   อายุหนา   สงฺขารา   นิกนฺติ   ตณฺหา
อุปคมนํ    อุปาทานํ    เจตนา    ภโว   อิเม   ปญฺจ   ธมฺมา   อิธ
กมฺมภวสฺมึ    อายติปฏิสนฺธิยา   ๑-   ปจฺจยา   อายติปฏิสนฺธิ   วิญฺญาณํ
โอกฺกนฺติ    นามรูปํ    ปสาโท    อายตนํ   ผุฏฺโฐ   ผสฺโส   เวทยิตํ
เวทนา   อิเม   ปญฺจ   ธมฺมา   อายตึ   อุปปตฺติภวสฺมึ   อิธ   กตสฺส
กมฺมสฺส   ปจฺจยา   อิติ   อิเม   จตุสงฺเขเป   ตโย   อทฺเธ  วีสติยา
อากาเรหิ    ติสนฺธึ    ปฏิจฺจ   สมุปฺปาทํ   ชานาติ   ปสฺสติ   อญฺญาติ
ปฏิวิชฺฌติ    ตํ    ญาตฏฺเฐน    ญาณํ    ปชานนฏฺเฐน   ปญฺญา   เตน
วุจฺจติ ปจฺจยปริคฺคเห ปญฺญา ธมฺมฏฺฐิติญาณํ ฯ
                                                 -------
     [๙๙]   กถํ    อตีตานาคตปจฺจุปฺปนฺนานํ    ธมฺมานํ   สงฺขิปิตฺวา
ววตฺถาเน   ปญฺญา  สมฺมสเน  ญาณํ  ยงฺกิญฺจิ  รูปํ  อตีตานาคตปจฺจุปฺปนฺนํ
อชฺฌตฺตํ  วา  พหิทฺธา  วา  โอฬาริกํ  วา  สุขุมํ  วา  หีนํ วา ปณีตํ วา
ยํ   ทูเร  สนฺติเก  วา  สพฺพํ  รูปํ  อนิจฺจโต  ววตฺเถติ  เอกํ  สมฺมสนํ
ทุกฺขโต   ววตฺเถติ   เอกํ  สมฺมสนํ  อนตฺตโต  ววตฺเถติ  เอกํ  สมฺมสนํ
ยา  กาจิ  เวทนา  ฯเปฯ  ยา  กาจิ  สญฺญา เย เกจิ สงฺขารา ยงฺกิญฺจิ
วิญฺญาณํ     อตีตานาคตปจฺจุปฺปนฺนํ    อชฺฌตฺตํ    วา    พหิทฺธา    วา
โอฬาริกํ  วา  สุขุมํ  วา  หีนํ  วา  ปณีตํ  วา ยํ ทูเร สนฺติเก วา สพฺพํ
วิญฺญาณํ    อนิจฺจโต   ววตฺเถติ   เอกํ   สมฺมสนํ   ทุกฺขโต   ววตฺเถติ
@เชิงอรรถ: ๑ ม. ยุ. อายตึ ปฏิสนฺธิยา ฯ เอวมุปริปิ ฯ
เอกํ   สมฺมสนํ   อนตฺตโต   ววตฺเถติ   เอกํ   สมฺมสนํ   จกฺขุํ  ฯเปฯ
ชรามรณํ     อตีตานาคตปจฺจุปฺปนฺนํ     อนิจฺจโต     ววตฺเถติ    เอกํ
สมฺมสนํ    ทุกฺขโต   ววตฺเถติ   เอกํ   สมฺมสนํ   อนตฺตโต   ววตฺเถติ
เอกํ สมฺมสนํ ฯ
     [๑๐๐]   รูปํ   อตีตานาคตปจฺจุปฺปนฺนํ   อนิจฺจํ   ขยฏฺเฐน   ทุกฺขํ
ภยฏฺเฐน   อนตฺตา   อสารกฏฺเฐนาติ   สงฺขิปิตฺวา   ววตฺถาเน   ปญฺญา
สมฺมสเน   ญาณํ   เวทนา   สญฺญา   สงฺขารา   วิญฺญาณํ  จกฺขุํ  ฯเปฯ
ชรามรณํ   อตีตานาคตปจฺจุปฺปนฺนํ   อนิจฺจํ   ขยฏฺเฐน   ทุกฺขํ   ภยฏฺเฐน
อนตฺตา อสารกฏฺเฐนาติ สงฺขิปิตฺวา ววตฺถาเน ปญฺญา สมฺมสเน ญาณํ ฯ
     [๑๐๑]   รูปํ  อตีตานาคตปจฺจุปฺปนฺนํ  อนิจฺจํ  สงฺขตํ  ปฏิจฺจสมุปฺปนฺนํ
ขยธมฺมํ   วยธมฺมํ   วิราคธมฺมํ   นิโรธธมฺมนฺติ   สงฺขิปิตฺวา   ววตฺถาเน
ปญฺญา   สมฺมสเน   ญาณํ   เวทนา   สญฺญา   สงฺขารา  วิญฺญาณํ  จกฺขุํ
ฯเปฯ   ชรามรณํ   อตีตานาคตปจฺจุปฺปนฺนํ  อนิจฺจํ  สงฺขตํ  ปฏิจฺจสมุปฺปนฺนํ
ขยธมฺมํ   วยธมฺมํ   วิราคธมฺมํ   นิโรธธมฺมนฺติ   สงฺขิปิตฺวา   ววตฺถาเน
ปญฺญา สมฺมสเน ญาณํ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๑ หน้าที่ ๗๕-๗๗.
https://84000.org/tipitaka/read/pali_item.php?book=31&item=98&items=4
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=31&item=98&items=4&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=31&item=98&items=4
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=31&item=98&items=4
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=31&i=98
             สารบัญพระไตรปิฎกเล่มที่ ๓๑
https://84000.org/tipitaka/read/?index_31
https://84000.org/tipitaka/english/?index_31